Kaisog nga Naggikan sa Atong Pagbaton og Hugot nga Pagtuo diha ni Jesukristo
Kon atong ipakita ang atong kaisog sa pagpili sa matarong, ang atong hugot nga pagtuo diha ni Kristo molig-on.
Among gihangop si Presidente Rosemary Chibota ngadto sa kinatibuk-ang liderato sa Simbahan. Ang iyang istorya usa ka ehemplo sa kaisog nga naggikan sa hugot nga pagtuo diha ni Jesukristo.
Ang desisiyete anyos nga si Rosemary nakakita og usa ka pampleta ni Joseph Smith nga gibilin sa mga misyonaryo sa iyang balay didto sa Zimbabwe. Gibasa niya kini ug diha dayon nakadawat og espirituhanong pagsaksi nga kadto tinuod; nakita ni Joseph ang Dios Amahan ug ang Iyang Anak, si Jesukristo. Siya gitudloan ug nabunyagan ug nahimong ehemplo sa iyang mga ginikanan, kinsa miapil sa Simbahan paglabay sa 19 ka tuig.
Ang hugot nga pagtuo ug kaisog mao ang mga timailhan sa mga disipulo ni Jesukristo.
Si Jesukristo mao ang balaan nga Anak sa Dios. Siya natawo sa labing mapaubsanon nga mga sirkumstansiya. Siya nagpuyo og perpekto nga kinabuhi. Siya nagtudlo kanato kon unsaon pagpuyo sa atong mortal nga kinabuhi ug unsaon pagpangandam alang sa atong kinabuhing dayon. Tungod sa Iyang dili hitupngan nga gugma alang sa matag usa kanato, mihatag Siya og gasa nga Siya lamang ang makahatag, nag-antos alang sa atong mga sala, nagtugot kanato sa paghinulsol ug mapasaylo. Siya gilansang sa krus ug, sa kahalangdon sa plano sa atong Langitnong Amahan, mibangon sa ikatulong adlaw. Tungod kay Siya mibangon gikan sa lubnganan, kita usab mabanhaw. Pagkahalangdon sa mga katuyoan sa atong Dios ug pagkadako sa atong pagtahod alang sa atong Manluluwas.
Espirituhanong Kaisog
Ang pagkahimong Iyang tinuod nga disipulo, pagbuntog sa kalibotan, pagtuman sa Iyang mga sugo, ug pagsalig diha Kaniya ug sa Iyang mga saad dili usa ka kaswal nga mga buluhaton. Ang espirituhanong kaisog mao ang kadaugan batok sa mga babag, pagduhaduha, ug kahadlok sa pagpili sa matarong.
Kini sa kanunay nagkinahanglan gyod og espirituhanong kaisog, nga naggikan sa hugot nga pagtuo diha ni Jesukristo, aron mahimong Iyang disipulo. “Nag-inusara ko,” si Moroni misulat. “Ang akong amahan [ug ang tibuok nakong pamilya] namatay sa gubat, … ug ako wala nay mga higala ni dapit nga kapaingnan.”
Bisan pa gani og gipamatay sa iyang mga kaaway ang tanan nga dili molimod ni Kristo, sa iyang kaisog siya mideklarar, “Ug ako, si Moroni, dili molimod kang Kristo.”
Lahi ang atong kalibotan kaysa panahon ni Moroni, apan ang pagkadisipulo kanunay nga magkinahanglan og kaisog. Ang mga pagduhaduha, mga makabalda, ug mga limbong sa atong panahon mahulagway sa mga pulong ni Apostol Pablo: “Ang atong pakigdumog dili batok sa unod ug dugo, kondili batok sa mga punoan, batok sa mga kagamhanan, batok sa mga labawng agalon niining mangitngit nga kalibutan karon.”
Ang atong kalibotan anaa sa kanunayng kaguliyang. Ang atong telepono daw hapit na lang gitaod sa atong kamot, naglunop sa impormasyon, sayop nga impormasyon, ug karon artipisyal nga impormasyon.
Nagdako ko sa usa ka gamay nga ransohan sa baka. Sulod sa usa ka panahon, ang among tulo ka dosena nga mga baka gipapuyo duol sa usa ka gamay nga pangpang. Hapit kada buntag sa ting-init human gatasan ang baka, akong itaod ang montura [saddle] sa akong kabayo ug giyahan ang mga baka ngadto sa taas nga kasagbotan aron manibsib, nga walay cellphone, walay earbuds, walay musika, walay text. Tibuok adlaw, ako ra ug ang mga baka, nag-inusara uban sa akong mga hunahuna. Nagbag-o na ang panahon, apan ang atong mga espiritu wala mausab. Kita nagkinahanglan sa kalinaw aron mapalig-on ang atong hugot nga pagtuo diha ni Kristo.
Hugot nga Pagtuo ug Kaisog
Kon mopili kita sa hugot nga pagtuo diha ni Kristo, Siya mopanalangin kanato og kaisog, usahay sa lisod kaayo nga mga sitwasyon, sa pagpili sa matarong, ug samtang atong ipakita ang atong kaisog sa pagpili sa matarong, ang atong hugot nga pagtuo diha ni Kristo molig-on.
Kami nagmaya diha sa hugot nga pagtuo diha ni Jesukristo ug sa espirituhanong kaisog nga among nakita diha kaninyo, atong mga miyembro sa Simbahan sa tibuok kalibotan.
Ang atong hugot nga pagtuo diha ni Jesukristo mao ang maghatag kanato og kaisog sa pagluhod nga mag-inusara ug pag-ampo sa atong Langitnong Amahan. Niadtong mga hilom nga gutlo kon makigsulti kita sa atong Langitnong Amahan sa pribado, kinaugalingon, hatagan kita og dugang nga kaisog sa pagpili sa matarong. Sa batan-on pa, akong nadungog si Presidente David O. McKay nga nag-ingon, “Ang labing dakong gubat sa kinabuhi anaa sa kaugalingon.” Samtang maisogon kitang modaog sa mga gubat sa kaugalingon, ang atong pagtuo sa atong Manluluwas modaghan.
Kada semana mainampoon kitang modawat sa pan ug tubig sa sakramento ug mosaksi sa atubangan sa Dios, ug sa presensya sa uban, nga kita “andam nga modala diha sa [atong kaugalingon] sa ngalan ni [Jesukristo], ug sa kanunay mohinumdom kaniya ug mosunod sa iyang mga sugo.” Dayon, uban ang kaisog, kita magmatinud-anon sa atong mga pakigsaad, ug agig balos, ang Ginoo mopanalangin kanato og dugang nga pagtuo.
Ang atong hugot nga pagtuo diha ni Jesukristo mao ang naghatag kanato og kaisog sa pagdawat og calling gikan sa atong lider sa pagkapari bisan kon mobati kita nga dili igo o walay igong panahon sa pagdawat sa responsibilidad.
Isip usa ka batan-ong abogado, si Presidente Dallin H. Oaks madasigon nga nagtrabaho sa usa ka prestihiyosong law firm, lakip na ang pagtrabaho sa gabii ug sa Sabado. Ang iyang presidente sa stake mitawag kaniya nga mahimong magtatambag sa kapangulohan sa misyon sa stake, nga nagkinahanglan og labing menos tulo ngadto sa upat ka gabii matag semana. Nahinumdom si Presidente Oaks, “Gitigom nako ang tanan nakong pagtuo, ug gidawat nako ang tawag.” Si Presidente Oaks mihulagway niini isip usa ka importante kaayo nga desisyon sa iyang kinabuhi. Ang iyang pagtuo nagpalig-on sa iyang kaisog, ug ang iyang desisyon nagdala og dugang nga pagtuo.
Ang atong hugot nga pagtuo diha ni Jesukristo mao ang naghatag kanato og kaisog sa pagpangalagad sa uban, pagsunod sa Pulong sa Kaalam, pagtuman sa balaod sa kaputli, pagtahod sa adlawng Igpapahulay, magmatinuoron sa atong ikapulo, ug pagsalig sa atong Amahan ug sa Iyang Anak kon ang wala damha nga sakit, problema sa pinansiyal, o natural nga katalagman makaguba sa atong kinabuhi.
Usa ka bulan ang milabay miuban ko ni Presidente Dieter F. Uchtdorf ngadto sa Spokane, Washington, diin ang sunog miguba og kapin sa 800 ka mga balay. Mibisita kami sa mga miyembro kansang mga kasilinganan hingpit nga naguba. “Luwas ang among pamilya,” miingon sila si Cody ug Haylee Woodbury kanako, “ug ang among pagtuo lig-on. Makatukod kami og laing balay.” Ang ilang hugot nga pagtuo diha ni Jesukristo nagbayaw sa ilang kaisog, ug ang ilang kaisog mopataas sa ilang pagtuo.
Ang hugot nga pagtuo sa napulo ka liboan ka talagsaong mga batan-ong lalaki ug babaye sa tibuok kalibotan ang naghatag kanila og kaisog sa pagbangon sa dili pa mosubang ang adlaw aron motambong sa seminary, moserbisyo og misyon ug, sa pagbalik, magminyo ug magsugod og pamilya. Ug alang niadtong wala pa maminyo, ang ilang kaisog makatabang kanila nga magpabiling matinud-anon sa ilang mga pakigsaad.
Uban sa hugot nga pagtuo diha ni Kristo ug dalaygong kaisog, usa ka batan-ong inahan nag-andam sa iyang gagmayng mga anak para manimba, nakahibalo nga ang ubang Dominggo mahimong dugang panlimbasog sa paglahutay kay sa espirituhanong pagbag-o.
Ang atong hugot nga pagtuo diha ni Kristo mao ang naghatag kanato og kaisog nga dayag nga mosulti sa uban kabahin sa Manluluwas, paghimo og mga pakigsaad diha sa balay sa Ginoo, paghinulsol ug pagdawat og kapasayloan, pagsunod sa mga buhing propeta, ug pagsunod sa hilom nga mga impresyon sa Espiritu Santo.
Bag-ohay lang usa ka halangdon nga babaye nga adunay lawom nga pagtuo og mipakigbahin sa iyang pagpamatuod sa simbahan. Sa hilom, nasayod ko nga naguol gyod siya sa pagluib sa iyang bana. Apan tungod sa kaisog nga naggikan sa iyang pagtuo, kusganon niyang gipahayag nga sa kalipay o sa dili matukib nga kasubo, mosalig siya sa bato sa iyang kaluwasan, ang iyang Manluluwas, si Jesukristo.
Uban sa atong paglaom nga buhi diha ni Kristo, bisan sa daghang mga hagit sa kinabuhi, kita usab mahimong, sama sa giingon ni Apostol Pablo, “ginasamok sa tanang paagi, apan wala maglisod; … nalibog, apan wala mawad-i sa paglaom.”
Mga Saad ug Pagpamatuod
Ako mosaad kaninyo nga samtang inyong palig-onon ang inyong pagtuo diha ni Jesukristo pinaagi sa pagtuo ug pagsunod Kaniya ug pagtuman sa Iyang mga sugo, ang inyong mga tubag moabot, ang inyong espirituhanong gahom molambo, ug ang inyong kaisog sa pagsunod ni Kristo mao ang magtino sa inyong mahangtoron nga kalag.
Ang Manluluwas namahayag, “Ang nahigugma kanako, magtuman sa akong gisugo. Higugmaon siya sa akong Amahan ug ang akong Amahan ug ako moanha ug magpuyo diha kaniya.”
Si Pedro ug Juan didto sa kuwarto sa dihang ang nabanhaw nga Kristo nagpakita sa Apostoles. “Tan-awa ninyo ang akong mga kamot ug mga tiil,” miingon si Jesus, “Ako gayod kini! Hikapa ako ug makita ninyo.”
Wala madugay human niining sagrado nga kasinatian, ang mga dili-motuo nga mga magmamando mikompronta kang Pedro ug Juan mahitungod sa pag-ayo sa usa ka tawo nga dili makalakaw. Si Pedro ug Juan “napuno sa Espiritu Santo,” mipahayag, inubanan sa ilang kaisog nga naggikan sa ilang hugot nga pagtuo, “Kon kami gisukitsukit man karon … sa unsang paagiha [kining tawhana] naayo; Angay gayod nga kamong tanan masayod … tanan … nga pinaagi sa ngalan ni Jesukristo nga Nazaretnon, kadtong inyong gilansang sa krus ug unya gibanhaw sa Dios gikan sa mga patay, pinaagi kaniya kining tawhana nagatindog dinhi sa inyong atubangan.”
Sama nila ni Pedro ug Juan sa karaang panahon, ako usab mosaksi sa katinuod ni “Jesukristo nga Nazaretnon.” Siya buhi. Siya mogiya niining balaan nga buhat, ang gipahiuli nga ebanghelyo ni Jesukristo. Sa ngalan ni Jesukristo, amen.