Me Kin Idawehn Krais Ni Meleilei
I kadehdehki me “irail me kin idawehn Krais ni meleilei” pahn diar meleilei nan mour wet oh mour kaperen nanleng.
Kitail momour nan ahnsou ehu me “tohnpadahk meleilei kan en Krais”1 kin lelohng kahpwal kan me sohte kalapw wiawi. Irail kan me kamehlele, kin pwongih ni karakarahk, oh kadehdehki Sises Krais kin kalapw lelohng kasongosong, kahpwal, oh paisuwed kan.2 Ngehi oh, ai pwoud, Mary, pil duwehte. Nan pahr kei samwalahro, se kilangehr tohtohn iangat tohn skuhl, iangat misineri kan, ekei arail werek kesempwal akan, iangat tohn doadoahk en mahs akan mehla, de, me Preseden Russell M. Nelson kosoiahier, kesepwilahng palio wasa me melahr akan mihmi ie. Kitail kilangehr me tohto me keirda ni pwoson oh kamehlele arail pwopwisang pohn ahl en inou en rongamwahu wet.
Se ahniki kapahtou, pwehki emen neihn nait seri pwutak sounpar 23 [rieisek siluh] mehkihla aksiden en sdohsa. Ekei kempoakepaht, tohn aht peneinei kan, oh iangat tohn doadoahk kan pil lelehngehr songen kahpwal en soumwau kei.
Ansou koaros me kasongosong kin wiawi, kitail kin pahtoukihla oh nantiheng sewese emen emen nan ah katoutou kan.3 Kitail kin weikek kihla soahng kan me sohte pahn pweida oh koul kan me sohte me pahn koulki.4 Mehkot suwed kin wiawi ong aramas mwahu nan seiloaken mour wet. Kisiniei laud me kawehla nan Maui Hawaii, ni palieir en Chile, oh nan Canada wia kasalepen mwekiden kahpwal laud kopwuriamwei kei me aramas mwahu kan kin ekei pak lelehng.
Kitail wadekehr nan Pearl of Great Price me Kauno ketin kasalehieng Apram duwen ngehn akan nan mour soutik. Apram eselahr duwen mour mwohn mour wet, me pilipildahkan mwohn mour wet, Kepikipikidahu, pilipil en Soundoaro, oh mour wet, me wia sohso keriau ong aramas.5 Soundoaro mahsaniher:
“Kitail pahn wiahda ehu sampah wasa irail kak kousoan ie;
“Kitail pahn song irail, pwehn kilang ma irail pahn wia mehkoaros me Kauno arail Koht pahn mahsanihong irail.”6
Kitail koaros mihmi wasaht met nan atail sohso keriau en atail seiloak en keirda ong wein klohri me wia kisehn sapwellimen Koht pilahn en komour oh lapalapala. Kitail alehdier kapai en wiahda pein atail pilipil oh kitail udahn pahn lelehng kasongosong kan en mour wet. Ih ahnsou wet me kohieng kitail en kaunopada tuhweng Koht.7 Kitail alehdier kapai en esehla Sises Krais oh Sapwellime pwukoah nan pilahno. Kitail paiamwahu en wiahla tohn Sapwellime Mwomwohdiso kopwurpwurdoh wet—Mwomwohdiso en Sises Krais en Souleng en Imwin-rahn Akan. Ni atail wia tohnpadahk en Krais kei kitail kin nantihong momourki Sapwellime kosonned akan. E udahn sohte mengei ong Sapwellime tohnpadahk kan. E pil sohte mengei ong Sounkomouro en nantiheng kapwaiada Sapwellime misin en mour wet.
Pwuhk sarawi pil kasalehda: me tohto pahn lohdiong madamadau en “mwenge, sakau, oh pereperen, pwe lakapw kitail pahn mehla”.8 Ekei me sohte kin kamehleleh kan rukilahr nan wasahn kousoan rotorot oh tohrohrala kan rehn irail kan me pil ahneki soangen madamadauohte me kin kampeinki “mehkot kapw”9 oh padahk kan en aramas.10 Irail sehse iawasa irail pahn diar me mehlelo.11
Tohnpadahk kan en Krais sohte kin idawehn ahl pwukat. Kitail me kadek, tohn kousoan kei me kin patehng soahng kan. Kitail kin poakpoake, ehukihla, oh luke sapwellimen Koht seri koaros en idawehn sapwellimen Krais padahk kan.12 Kitail kin idawehn kaweid en atail soukohp, Preseden Nelson: kitail kin pilada pwukoahn soun kameleilei men, met oh ansou koaros.13 Mwomwen madamadaun marain wet pwungehng koaros pwuhk sarawi oh kaweid en soukohp.
Nan pahr 1829 [kid welipwiki rieisek duwau] Mwomwohdiso kopwurpwurdo wet saikinte koukouda, Pwuken Mormon pil saikinte wiawihda. Kisin pwihn en aramas nananti kei, me mwekidkihda Ngehn en Koht, idawehnla Soukohp Joseph Smith. Kauno ketin kasalehieng Joseph kaweid ong ahnsoun kahpwal kan: “Dehr masepwehk, nei seri koa; wiahda mwahu; mweidehng sampah oh ehl en ehupene uhweng uhk, pwe ma kumwail pahn poahsoanehda amwail mour pohn Krais, irail sohte kak kaunda.”14 E pil ketin kaweihd irail:
“Kilengdohng ie nan madamadau koaros; dehr peikasal, dehr masak.
”Ahneki pwoson, momourki ahi kosonned akan, oh kumwail ahpw pahn sohsohki weihn nanleng.”15
E sansal, wasa kitail pahn lel ie nanleng sohte pahn wekila ahnsou kitail lelehng kahpwal. Nan Ipru kitail alehdier kaweid me “kitail eimah oh keiong mpen mwoalen Koht, wasahn ale kalahngan, iei wasao me kitail pahn ale kalahngan ie mehn sewesei kitail ni ahnsoun atail anahn laud kan.“16 Sises Krais iei “me kaun en mour soutik.“17
I perenki en Mormon padahk kan, me nah pwutak Moronai koasoaiahier, kepikepinga “tohnpadahk en Krais … meleilei kan pwehki amwail ahneki meleilei ong nein aramas seri kan.”18
Ong kitail nan Mwomowhdiso me nanantihong en wia tohnpadahk en Krais meleilei kei, rahn marain ehu awiawih kitail ni atail pahn sohpeilahngete atail Kaun oh Sounkomour, Sises Krais. Kasongosong wia kisehn mour wet oh kin wiawi nan mour en aramas koaros nan sampah pwon. Met iangahki pingiping laud kan nan pwungen wehi kan oh emen emen aramas.
Kaun en Mwomwohdiso kan pak tohto kin alehdi peidek, “Dahme Koht mwahu men kak mweidkihda mehkot suwed en wiawi, mehlel ong aramas mwahu?” oh “Dahme irail kan me momourki kosonned en Koht akan oh wie papah Kauno sohte perehrehsangki soangen kahpwal kan?”
Kitail sohte ese pasapeng kan koaros, ahpw, kitail ese padahk kesempwal kan me kin mweidohng kitail en sohpai kasongosong kan, nan kahpwal, oh ni atail ahneki pwoson oh koapwoaroapwoar ong ehu rahn kaselel me awiawih emen emen kitail. Sohte karasaras mwahu mie nan pwuhk sarawi me pid weweidwei nan kahpwal sang mahsen en Kauno ong Joseph Smith, Soukohp o, ansou e sensel nan Kalapwuhs en Liberty.
Kauno mahsaniher:
“Ma ewen ehl pahn sarapeseng laud ong uhk, ese met, nei pwutak, me soahngkat koaros pahn kiheng uhk marain, oh pahn mwahu ong uhk.
“Sapwellimen Aramas ketin kesepwildier pahn koaruhsiehn. Ia duwe, Ke lapalap sang ih?
“… Dehr masak dahme aramas kak wiahng uhk, pwe Kauno Koht pahn ketin ieiang uhk kokolahte.19
E sansal mie Samatail Nanleng me ketin mwangih oh poakehng emen emen kitail oh ketin wehwehki atail lokolok kan ni unsek. Sapwellime Pwutak, Sises Krais, iei atail Sounkomour oh Soundoar.
Preseden Russell M. Nelson oh Preseden M. Russell Ballard kasalehda wen kesempwalpen keriau en tehksapahl pen pwuhk en Kalohki Ahi Rongamwahu.20 I ehukieng kumwail arail utuht. Pwuhk kapw wet, me kalaudehla ngilen pwuhk sarawi, ni manaman padahngki:
”Nan Sapwellime tomwpen dihp, Sises Krais alehda ong Pein Ih atail weirek kan, kahpwal kan, oh luwet akan. Pwehki met, E ketin mwahngih ‘nin duwen paliwar mwomwen eh pahn ketin sewese sapwellime aramas akan nin duwen arail luwet akan’ (Alma 7:12; pil kilang ire tikitik 11). E kin ketin luklukei kitail, ‘Kohdo rehi,’ oh ni atail pahn wia, E pahn ketkiheng kitail komoal, koapwoaroapwoar, kehlail, marain, oh kamwahula (Madiu 11:28; pil kilang ire tikitik 29–30).
“Ni atail pahn likih Sises Krais oh Sapwellime Tomwpen dihp, E kak ketin kakehlailih kitail nan ahnsoun kasongosong, soumwahu, oh weirek kan. Kitail kak direkihla peren, popohl, oh kameleilei. Mehkoaros me sapahrek nan mour kak kapwungpwungla sang ni Tomwpen Sises Krais.”23
Kitail kak ni popohl wia tohnpadahk en Krais meleilei kei
Sapwellimen Samatail pilahn en popohl ong Sapwellime seri kan sohte iangahkihte mouren mwohn mour wet oh mour en sampah ahpw pil mour soutik, iangahki kalahngan oh popohl en pilehu tuhwengdi irail me melahr akan. Sapwung koaros pahn kopwungpwungla, oh kitail pahn kilang ni sansal paiamwahu unsek oh madamadau pwung oh marain.
Kaun kan en Mwomwohdiso karasahiongehr madamadau wet ong aramas emen me alialu nan werengen spai pali-siluh ehu.22 Irail kan me sohte ese Sapwellimen Sahmo pilahno sohte wehwehki dahme wiawi nan keioun sipaio de (nan mour mwohn mour wet o) oh kahrepe kan me wiawidahr wasahu; irail pil sohte wehwehki kawehwepen oh koasoandi me wiawi nan kesiluhn sipaio, me iei pweida kaselel en Sapwellimen Sahmo pilahn.
Me tohto sohte kapingki me pwehki Sapwellime limpoak oh pilahn unsek, irail me mwomwen paisuwed kan, sang kahrepe me kaidehn pein arail, sohte pahn lelehng kahpwal.23
Pwuhk sarawi me sansal: tohnpadahk en Krais meleilei kan me pwung, kin idawehn Sounkomouro, oh momourki Sapwellime kosonned akan pahn kapaida. Ehu iren pwuhk sarawi me keioun kesempwal ong irail koa me pwung, mendahte irair en arail mour kan, wia kisehn en Nahnmwarki Pensamin padahk ong nah aramas kan. E inouki me irail kan me nanantiheng momourki kosonned akan pahn kapaida nan soahng koaros nan mour wet oh “kasamwohlong nanleng … [oh] kousoanla rehn Koht nan mour peren kohkohlahte.”24
Kitail ese me kerenieng kitail koaros lelehngehr kahpwal en paliwar oh palingehn nan atail mour kan, tohto me inenen laud. Sahm Nanleng limpoako oh Sapwellime Iehros, Sises Krais, me wia moangen Sapwellime Mwomwohdiso, ketkiheng kitailehr pwuhk sarawi oh soukohp kan pwehn kaunop kitailda, keperkin kitail kahpwal akan, oh kiheng kitail kaweid pwehn kaunop oh pereikitailla. Tohto kaweid kan anahne en wiawi ahnsouohte, oh tohto pahn wia atail mehn perehre nan pahr tohto kohkohdo kan. Sapwellimen Kauno kapehse ong Doctrine and Covenants, iralaud 1 [ehu]keperkin kitail en peikieng kaweid kan en soukohp akan. (tehk Doctrine and Covenants 125
Iralaud 1 [ehu] pil keperkin kitail, “Kumwail kaunopada, kumwail kaunopada ong dahme pahn kohdo.”26 Kauno kin ketin sewesehki Sapwellime aramas akan ansou mwahu en kak kaunopehng soahng kan me pahn wiawi.
Kauno ketin kasalehieng Preseden Brigham Young ehu kaudiahl ni Senueri 14, 1847, nan Winter Quarters.27 Kaudiahl wet wia karasepen Kauno ah kin ketin kaunopada aramas ong dahme pahn kohdo. Souleng pwoson akan tapiadahr arail seiloak ong wasahn keiru en nan nahna kan en Wahu en Salt Lake. Irail pweidahr oh kauwadahr Tehnpas Sarawi en Nauvoo oh alehdier tiahk sarawi kan en komour. Irail pwekpweksangehr nan Missouri, oh me kailongkin irail kan pwakih irail sangehr nan Nauvoo nan ansoun winter sakanakan ehu. Kaudiahl me kohweng Brigham kiheng ih kaweid duwen kaunopehng seiloako. Kauno inenen kesempwalki epwelpen me semwehmwe, lihohdi kan, me sopwoupwou kan, oh peneinei en irail kan me wie papah nan Mormon Battalion kan ni souleng kan arail doulahngehr nan arail seiloak kahpwalo.
Me pil pahn patehng ekei kaweid ong momourki pwung, Kauno ketin kasalehda padahk riau me pil kesempwal rahnwet.
Keiou, E ketin kangoangei irail en “kepinga Kauno ni ahr kokoul, ni ngilen koul, ni kahlek, oh ni kapakap en kaping oh kalahngan,”28
Keriau, Kauno ketin kaweidki ma irail “ahneki pahtou, likwerieng Kauno amwail Koht ni kapakap, pwe palingenamwail kan en ahneki popohl.”29
Mehn ketemen riau pwukat wia mehn kaweid kesempwal ong atail rahn akat. Mour kan me direki kaping, ngilen koul, oh kupwur kalahngan kin inenen kapaida. Ahneki popohl oh likih sawas en nanleng sang kapakap wia ahl manaman ehu en wia tohnpadahk en Krais meleilei kei. Nanantiheng ahnsou koaros en ahneki peren kak sawas soikala kansensued kan en palingehn.
Imwilahn iren koulen sarawi ehu kasalehda duwen pasapeng kaselel me koasoia: “Sohte kapahtou ehu pohn sampah me nanleng sohte kak kamwahuiala.”30
Ni ahi wia Wahnpoaron en Sises Krais men, I kadehdehki me “tohnpadahk meleilei kan en Krais pahn diar pein arail meleilei nan mouret oh ahneki tuhpene kaperen nanleng. I wia ahi kadehde ong sarawihn Sounkomouro oh mehlel en Sapwellime Tomwpen dihp. Ih me atail Sounkomour oh Soundoar. Ni mwaren Sises Krais, ahmen.