Kaping Ohng Ohl Emen
Ia uwen kapai laud me kitail kak en ese soahng koaros me kitail ese pwehki Joseph Smith, me wia soukohp en imwilahn ahnsou.
Riei ohl oh lih akan, I kapingki ahi patehng kumwail menseng wet. I kapakapki me Kauno pahn ketin kapaia ie.
Mesei kat sohte duwehte mahso. I kolahr tuhweng toahktehn mahs men, oh I indahng me, “I sohte kak kilang misihn en wadawado.”
Oh e sapengki me, “Ahki, pwoaren mesemw kan mahlahr. Re sohte pahn wekila.”
Eri I pahn wia uwen ahi kak.
I men ehukiheng kumwail soahng kei me kin mihmi nan ahi madamadau. Sounpwung kei samwalahro I kin wie medemedewe Soukohp Joseph. I kin mwomwohd oh medemedewe sapwellime pwukoah kesempwal en wiahla soukohp en imwilahn ahnsou ni unsek.
I medewe ia uwen kaping laud ong kitail ni atail wia towe en Mwomwohdiso en Sises Krais en Souleng en Imwin Rahn-akan me Jospeh Smith, ni ah wia kisin pwutak men me men esehla dahme e anahne wia pwehn alehdi mahkepen dipeh kan, me ahniki komwad en kak kohla nan welin tuhke kei limwahn imwehu nan Palmyra, New York, oh wasahu e kelepwidier oh kapakap, oh sang pein ah lokaia—e ngilaudki keioun ah kapakapo (kilang Joseph Smith—History 1:14}
Nan ansouo, me Joseph kelepwikihdier nan wasa ehu me kitail kin kahdahnki Sacred Grove de nan Mwetin Tuhke Sarawi, nanleng ahpw ritida. Kahlap Riemen, me marain sang ketipin en souwas, pwaradahr mwowe. Emen mahsenieng ih oh mahsanih, “[Joseph,] iei met ai tungoal Pwutak Kesempwal. Karonge Ih!” Joseph Smith—History 1:17. Met tapiadahr Kopwurupwurdohn rongamwahu unsek en Sises Krais.
Pwehki Sises, atail Sounkomour oh Soundoar, lokaiahngehr sin pwutak Joseph oh ritingadahr imwilahn ahnsou me kitail mihmi loale met, kitail kin koulki, “Praise to the man who communed with Jehovah!” (“Praise to the Man,” Nan Pwuhk en Koul, nempe 27). Kitail kaping kiheng Kauno pwehki Joseph Smith oh ah komwad en kohla nan mwetin tuhke koa nan pahr 1820 , limwahnte imwehu nan Palmyra, New York.
I kin wie medemedewe soangen mehn kaweihd kaselel kan me kitail ese oh soahng kan koaros me kitail ahniki. Riei lih oh ohl akan, ahi kadehde ong kumwail nimenseng wet iei uwen kapai laud me kitail ahniki en ese soahng koaros pwehki Joseph Smith, me wia soukohp en imwilahn ahnsou.
Kitail wehwehki duwen kahrepen mour oh ihs kitail.
Kitail ese isime Koht; kitail ese isime Sounkomouro, pwehki kitail ese Joseph, me kolahr nan mwetin tuhke koa ni ah wia kisin pwutak, raparapahki mahkepen dipeh kan.
I leme me e wia ehu mehkot keiou kesempwal oh kaselel me emen aramas sohte lipilipil nan sampah kak ese, me Samatail Nanleng oh atail Kaun Sises Krais ketin kasalehda Pein Ira ong nan imwin rahn akan oh me Joseph kekeirdahr pwehn kapwurehdo rongamwahu en Sises Krais ni unsek.
Kitail nainki Pwuhk en Mormon. Ehu kisakis kapai oh kaselel me Pwuhk en Mormon wia ong towe kan en Mwomwohdiso wet. E wia pil ehu men kadehdeh, me padahngki me Sises iei Ih me Krais. E mie rehtail pwehki Joseph warehng en kohla alehdi pleit koa, e alehdi kamarain sang nanleng pwehn kawehwehdi sang ni kisakis oh manaman en Koht oh en kiheng pwuhko sampah.
Mendahte ahi padahk en menseng wet ah mengei, e inenen loal, oh e direki limpoak ong Soukohp Joseph Smith oh ong koaros, riei ohl oh lih akan, me utungadahr ih oh me inengieng en utungada ni ah pwulopwulo.
Ni menseng wet I pil men pohnese ah nohnohu. I kin kalapw medewe ia uwen lingan ni ansou me Joseph pwurasang dahme e lelehng nan Mwetin Tuhke Sarawi pwurodohng ni imwehu oh indahngehr ah nohnohu dahme wiawihero, Lucy Mack Smith kamehlele ih.
I kapingki ah pahpahu oh rie pwutak oh serepein kan oh ah peneinei, me utungada ih nan ah pwukoah laud me Kauno ketkihengehr powe en wiahla soukohp me kapwurehdo rongamwahu en Sises Krais pohn sampah.
Eri ahi kadehde ni menseng wet iei me I ese me Sises Krais iei ih me Sounkomour oh Soundor en sampah. I pil ese me Samatail Nanleng oh Kaun Sises Krais pwarehng oh mahsenieng Joseph oh kaunopada ih en wiahla soukohp.
I kapingki, oh I ese me tohto kumwail me pil iang kapingki, ni uwen kapai me kitail ahniki ni atail ese dahme kitail ese duwen kahrepen mour wet, dahme karehda kitail mihmihki met, dahme kitail anahne wihwia oh kapwaiada nan ehu ehu rahn akan en atail mour. Kitail miher nan ansoun atail nanantiheng kaunopada pein kitail, nahn ehu ehu ahn, kin ekisekis mwamwaulasang rahnteio, kadeksang rahnteio, kaunopada mwahu sang rahnteio, ong ni ahnsou me pahn leledohu, ni ansou me kitail pahn pwuralahng rehn Samatail Nanleng oh Kaun Sises Krais.
Me kerkerendohngiehier. Kereniengehr I pahn lel sounpar 95. Nei serihkoa kin indahng ie me ekei rahn I kin mahsan ekei rahn, ahpw e Mwahute. I wihwia uwen ahi kak.
Ahpw erein sounpar 50, riei ohl oh lih akan, I ahnekiher ansou mwahu en lela wasah kan nan sampah ni ahi wia ahi pwukoahn Kaun Lapalap en Mwomwohdiso. E wia kapai kaselel ehu. I leme I lelehr kerenieng wasa koaros nan sampah. I tuhwengehr towe kan en Mwomwohdiso nan sampah.
Oh, I udahn poakpoakei kumwail. Ehu irair kaselel me wiawiher—ien kilang nan mesamwail kan, ien mihmi rehmwail, oh pehm amwail limpoak ong Kauno oh ong Kopwurpwurdohn rongamwahu en Sises Krais wet.
Samatail Nanleng en ketin sinsilei kitail met oh kapaiada soahng koaros nan kapokon wet. Oh kitail en ahniki Ngehn en Kauno nan atail mohngiong, oh atail poakehng rongamwhau en Sises Krais—atail Sounkomouro, Kaun Sises Krais—laudla ni atail pahn nantiheng papah Ih oh momourki Sapwellime kosonned akan oh duwehla Ih pwehki atail iang towehda kapokon lap wet. Sohte lipilipil iawasa kumwail mih ie nan sampah, Kauno en ketin kapai kumwailda. Ngehn en Kauno en ketket rehtail. Kitail en kehn manaman en nanleng ni atail pahn kaudek pene nan tiepenehn kapokon wet.
I kiheng kumwail ahi kadehde me I ese me Sises iei me Krais. Iei Ih me atail Sounkomour, atail Soundor. E wia kempoakepahtail mehlel. Ni lengileng sarawi en Sises Krais, ahmen.