Iangatail en Ansou Koaros
Kumwail oh ngehi ahneki ansou mwahu en mweidehng Ngehn Sarawi en wia iangatail en ansou koaros.
Riei ko, nan kapokon lap wet, kitail pil paiekiher kaudiahl tohto kei. Sapwellimen Kaun Sises Krais laduhkan pil kasaledahr oh pil pahn doula oh kasakasalehda mahsen mehlel kan, mahsen en kangoang, oh mahsen en kaweid.
Kadehde kan me wiawiher nan kapokon lap wet me Kauno kin ketin mahseniong kitail sang Ngehn Sarawio sairiehier. Ni atail kin kapakap oh peikiong kaweid kan en Ngehno, kitail kin alehdi kamarain laud oh kapai kan en kaweid kitail nan rahn apwal akan me kohkohdoh.
Preseden Russell M. Nelson pwurehngehr keperkin kitail me, “nan rahn akan me wie kohkohdo, palingenitail sohte kak pweida ma sohte mehn kaweid, mehn kahluwa, kaloalamwahu, oh kaweid en Ngehn Sarawi ansou koaros.”1
Kaudiahl en kapar wet sang soukohp eledahr ahi medemedewe laud dahme I kak kaskuhlihki nei seri kan, nein nei seri kan, oh nein nei seri kan seri me pid duwen arail pahn kolokol mehn kaweid kesempwal wet nan rahn apwal akan me kohkohdo ong irail.
Eri padahk wet iei silikou mwotomwot ehu ong kadaudokei kan me kak sewese irail ansou me I solahr pahn miheng irail nan rahn kaperen kan me kohkohdo. I mwahuki irail en ese dahme I eselahr me kak sewese irail.
I pil ekisehr wehwehkihla dahme pahn anahn pwe Ngehn Sarawi en kin kak ieiang irail nan ansou koaros nan rahn akan me irail pahn momour loale. Pepehm me I alehdi iei en koasoaia rahnet ahi kin wia uwen ahi kak koaros oh luke Ngehn Sarawi en kin ieiangie ansou koaros. Ahi kapakap iei me I kak kangoange irail.
I pahn tepki irail en medewe oh kapakapki duwen nein Ilemen pwukat koa, Nihpai ih Lihai, oh sapwellimen Kauno lidu teiko me iang ira doadoahk. Irail sohpaier kasongsong laud. Irail wie papahier nan wasa suwed ehu oh pil kin kapwkapwung soangen widing laud kan. I kin kehlailkihda, oh ke pil kak iang, pwehki ire tikitik wet sang nan pwuken Ilemen:
“Oh nan pahr isihsek duwauo mie akupwung laud me tepida wiawi. Ahpw kedekedeo Nihpai oh Lihai, oh riarail ohl tohto me ese duwen mehlel en iren padahk kan, pwehki ar kin alehdi kaudiahl tohto kan rahn koaros, kahrehda re kalohk ong aramas akan, lao re katokehdi arail akupwung kan nan pahrohte.”2
Soai wet kin kangoangeie, oh e pil kak kangoangei kumwail. Pak tohtohkei me nein Ilemen pwutangko kin alehdi kasukuhl oh kaweid sang rehn Ngehn Sarawi. Met kemehlelehiengie me kitail kak alehdi kasukuhl oh ekis ekis esehla mehkot sang rehn Ngehno, aliale dahme kitail anahne, oh mwuhr, ni atail pahn onopadahr, kitail pahn pil alehdi kalaudepe.
Ni pil soangen mwohmwohte loalei kin kehlailkihda koasoaiepen Nihpai a alehdi poahngoak en pwurala Seruhsalem oh ale nein Leipen pileitko. Kumwail taman pilipil me e wiadahro. E mahsani, “I pahn kohla oh wia soahng kan me Kauno pahngokih.”3
En Nihpai ah mwekid pahn kaweid en Ngehn Sarawi nan ilekwo kin kakehlakaiehda pak tohto ni ai kin doula nan pwukoah kan me sang rehn Kauno ahpw kin mwomwen lapasang uwen koahiek me I ahneki oh pil keke.
Kumwail taman en Nihpai koasoai duwen mwokid wet: “Oh e nihpwongdi ni aht lella mwo; ngehi eri ndaiong [irail] me re pahn rukila maslikin kehlo. Oh mwurin arail rukilahr, ngehi, Nihpai, wailong nan kahnihmwo oh kohla ni ihmwen Leipeno.”
E doula oh mahsani: “Oh Ngehno kahluwa ie, ni ei sohte ese soahng koaros me I pahn anahne wia.”4
Loaleiet kin kehlailkihda ai ese me Nihpai alehdier kaweid sang Ngehno nan minit koaros pwohngo ni eh wiewia ilek en Kauno.
Kitail anahne, oh kumwail pahn anahne, iengomwail en ansou koaros me iei Ngehn Sarawi. Ansou wet, kitail inangih, ahpw kitail ese sang pein kitail me e sohte mengei. Kitail koaros kin ahneki madamadau, wia koasoai, oh wiewia soahng kan nan atail mour me kin kansensuwed ong Ngehno.
Ni ansou me met kin wiawi, oh e pahn wiawi, kitail kakete pehm me Kauno sohte kupwurpereniki. Oh kitail pil pahn kak pehmada me kitail kelkelehpw. E kesempwal ansou kitail en taman inou tengeteng me kitail kin ale nan wihk koaros ni atail kin koluhla oh ale kamadipw sarawio: “Pwe sapwellime Ngehn en ketiket rehrail ansou koaros.”5
Ma ke kehnehr kepitien Ngehn Sarawio rahnwet, met kak wia kasansal ong uhk me Tomwpen dihpo wie doadoahk nan ahmw mour.
Ni duwen Jeffrey R. Holland ah koasoaiahier: “Ni ansou kan me kitail kin daulahr, kitail dehr dukieng atail kin mentehnoh kamehlele me Koht ketin likidmelieikitailahr de sohte men karonge atail kapakap kan. E kin ketin karongei kitail. E kin ketin mahsanih kitail. E kin ketin poakohng kitail.”6
Mahsen kamehlel pwukat seweseiedahr. Ni ansou me I kin kehn me I dohsang Kauno, ansou me pasapengpen ahi kapakap kan kin mwomwen pwand, met I eselahr ien idawehn en Preseden Nelson kaweido me ien kasawih ahi mour ohng soahng kan me I anahne koluhkihla. E kin katamanehng kitail me “Koluhla rahn koaros pahn kahrehieng kitail en mwakelekella, oh mwakelekel kin wahdo manaman.”7
Ma ke kehn me ke solahr kehn Ngehn Sarawio, ke kak tehktikih ahmw mour ma sou mie mehkot me ke anahne koluhkihla oh alehdi mahkepe.8 Ke kak kapakap ni pwoson pwe ken kak ese dahme ke pahn wia pwe ken mwakelekelda oh warehngala Ngehn Sarawi en kin ieiang uhk ansou koaros.
Ma ke men Ngehn Sarawi en kin ieianguhk, ke anahne poahsoankihda kahrepe pwung kan. Sapwellimen kauno kahrepe kan pahn anahne wia omwi kahrepe. Ma ahmw kahrepe kan pahn poahsoankihda pein nsenomw, e pahn apwalehnguhk ken alehdi pepehm kan en Ngehno.
Me keieu kesempwal rehn ngehi oh kowe iei en mwahuki dahme Sounkomouro kupwurki. Atail kahrepe kan pahn anahne en mwekidki limpoak mehlel en Krais. Atail kapakap kan anahne en “Ihte me I mwahuki, iei kupwuromwi. Kuwpuromwi en pweida.”
I kin song tamataman Sapwellimen Sounkomouro tohnmetei oh Sapwellime limpoak ohngie. Mwuri, ni ahi kin kapakap en kaping ong Samatail Nanleng, I kin kehn limpoak oh koapwoaroapwoar me E ketin karonge ahi kapakap kan oh me I pahn alehdi dahme pahn keieu mwahu ohng ie oh irail kan me I poakohng. E kin kakehlaka ahi kadehde.
Nan soahng koaros me Ngehn Sarawi kin ketin kadehdehki, me keieun kesempwal ong kitail iei me Sises Ih me Krais, Sapwellimen Koht Iehros me ketin ieias. Sounkomouro ketin inoukihda, “A Sounsawas pahn ketido, iei Ngenen mehlel, me ketido sang rehn Sahm, I pahn kadarodo sang rehn Sahm, oh e pahn kadehde duwen ngehi.”9
Sounpar kei samwalahro I alehdi koahl ehu sang rehn nohnoh men me inenen nsensued. E ndahiengie me nah serepeino kolahr kousoanla wasa me dohsang imwarailo. Pwehki ah sohte kin nohn kak alehdi nah serepeino, e mweleki me mie mehkot sapwung. E peki ien sewese.
I diarada ihs me wia en nah serepeino home teacher. Ke kak kilang ni ahdo me rahnteio mwo. Ngehi eri koahl. E pwulopwul. Ahpw e ndahiengie me ih oh iengehu pirkihda pwohng ehu ara pwunodki serepeino oh pil alehdi pepehm ehu me serepeino pahn wiahda pilipil kei me pahn kiheng nan pahtou oh lokolok. Pwehki pepehmo me sang Ngehno, ira kohla pwarek serepeino.
E tepte sohte men ndahieng ira irair e mihmi loale. Sang ni kamarain, ira peki reh en koluhla oh pilada ahl me Kauno ketin kaunopehng ih. Serepeino eri kasawihada, I kamehlele me sang rehn Ngehno, me ihte me ira kak esehki dahme ira ese duwen ah mour iei ma e sang rehn Koht. Nohno meno kiheng ah kapwunod kan rehn Samatail Nanleng oh Sounkomouro. Ngehn Sarawio pekederlahngehr rehn home teacher ko pwehki ira inegieng papah Kauno. Ira idawehnehr inou me dierek nan Doctrine and Covenants:
“Loalemwail en direkihla limpoak mehlel ong aramas koaros, oh irail akan me miniminkipene arail pwoson, oh amwail madamadau en kin mwakelekel ansou koaros; amwail likih Koht ahpw pahn laudla; oh manaman en prihsduhd ahpw pahn mweredieng pohmwail duwehte pwoaik sang nanleng.
“Ngehn Sarawi pahn ieianguhk ansou koaros, me pwung oh mehlel kan pahn wia kehlepemw; ahmw wehi pahn kin poatoapoat, oh e pahn kin mengeieng pwiliwehng uhk kohkohlahte.”10
I kadehdehki me Kauno ketin kolokolete Sapwellime inouo. Ngehn Sarawio kin pekederlahng rehn irail memper kan en Mwomwohdiso en Sises Krais me kin mehlelieng arail inou me sarawihkan. Eri, dahme ke pahn lelehng pahn wekisang en mehteikan, oh Ngehno pahn kaweid uhk ni mwohmw me pahn keiou soanamwahu ong ahmw pwoson oh uwen ahmw kak alehdi kaudiahl ong pein kowe oh irail akan ke poakohng oh kin papah. I kapakapki ahi mohngiong unsek me amwail koapwoaroapwoar pahn keirda.
I kadehdehiong kumwail me Koht Sahm ieias. E ketin poakohng kumwail. E kin ketin karonge amwail kapakap koaros. Sises Krais kapakapki ong Sahmo en ketin kadaredo Ngehn Sarawio en kaweid, kansenamwahuih, oh kadehde duwen mehlelo ong kitail. Sahmo oh Sapwellime Ieroso pwarehngehr Sosep Smith nan welin tuhkehko. Soukohp Sosep Smith kawehwehdier Pwuhk en Mormon sang ni kisakis oh manaman en Koht.
Meninkeder en nanleng kei kapwuredohr kih kan en prihsduhd. Preseden Russell M. Nelson iei Sapwelimen Koht soukohp ong sampah pwon.
Ni ahi wia sounkadehdepen Sises Krais men, I ese me E ketin ieias oh kawkaweid Sapwellime Mwomwohdiso wet. Ngehn Sarawio kak ieiang komwi oh ngehi ansou koaros oh alehdi kadehdepen mehlel pwukat ni atail pahn kin tamataman oh poakohng Sounkomouro, koluhla, oh peki Sapwellime limpoak en mihmi loaletail. I kapakapki me kitail kak ahneki kapaiwo oh ianganki Ngehn Sarawio rahnet oh rahn koaros nan atail mour kan. I poakohng kumwail. Ni lengileng sarawi en Sises Krais, ahmen.