Ia Uwen Pahn Laud en Amw Peren
Met ih lukei kumwail en esehla duwen pwukoah doadoahk wet, iangahki amwail kadehde unsek, oh kohla wia amwail misin.
Rie ohl oh lihoko, ahi madamadau en rahnwet e doke kapokonpenehn mehn Israel ko, iei me Preseden Russel M. Nelson indahki “mehkot me keioun kesempwal me wiewiawi pohn sampah rahnwet. Sohte mehkot me kak karasahieng uwen laud, sohte mehkot kak karasahieng uwen kesempwal, sohte mehkot kak karasahieng uwen lapalap.”1
Kapokono me keioun kasalehda me “komourlahn emen aramas wia mehkot laud mwohn sihlangin Koht.”2 E mengei duwehte mwo. Kitail kapokonepene Sapwellimen Koht seri kan ni imwin rahn akan pwe “kapai kan en kak kohdieng pohrail”3oh inou kan en “mour soutik.”4 E mahsani me nin duwen kihpene mehn Isrehl kan kitail anahne misneri—tohtohsang me wie mihmi nan misin.5 Rahnwet I koaskoasoieng me mah tohto nan Mwomwodiso me kak iang wia arail misin. Kauno ketin anahnei komwi. Se anahnei komwi nan New York oh Chicago, Australia oh Africa, Thailand oh Mexico, oh nan pwungen wasah kan koaros.
Mweidong ie ien kapwurei kumwaila nan pahr 2015. I apwtehn wiahla emen tohn Pwihn en Wahnparon Ehk-Riemenko. Ehu pwukoah kaselel me se kin wia ni aht wia Wahnparon kei iei en kihong misineri kan nan arail wasahn doadoahk. I iangeh patehng doadoahk en Isiakan,6 ahpw met ni ai wia Wahnpoaron emen, I kehn uwen laud en pwukoah doadoahk wet. I kin kapakapki ien kadarpeseng misneri pwulopwul tohto kan, wademen, ong nan misin kan wasa koaros nan sampah. Mwuri I ahpw uhd sohpeieng irail pwopwoud mah kan. Meh ehk me mih nan doaropwehu. E sohte nohn tohto. Ih pwuriamweikihla, ngehi eri idek rehn iengei tohn doadoahk sang ni Misineri Department, “Meh depe me kitail anahne nan wihket pwehn apwaliala pekipek kan?”
E sapengk, “300.”
I tamtamante ansouo lel met: pwopwoud ehk me audehda pekipek 300 ko.
President Russell M. Nelson kangoangehki irail me pwopwoud kan en “kelehpwikihdi pohn pwukiarail kan oh peki rehn Sahm Nanleng ma iei ansou mwahu met me irail en wia arail doadoahk en misineri.”7 Nan pwungen ireh kan koaros me pid duwen mwomwen arail pahn alahlda, e koasoia,“ahniki ineng en men papah iei me keieu kesempwal.”8
Duwen pwuhk sarawi ah masanih, “ma kumwail ahnikihda ineng en papah Koht eri kumwail pilipildahr en doadoahk.”9 Doadoahk iei e pid duwen kosonned en dolung. Kitail wadek nan Sohn, “Me kin poadokedi oh me kin dolung irail koaros pahn pereperenpene.”10
I kilangehr duwen kosonned en dolung wahn ahi doadoahk nan ai peneinei.
Sounpar kei samwalahro I wie mwemweit rehn peneinei, ansou me pisop peki rehi ma I kak kaimwsekala sarawio.11 Ni ansou me ih kokohdidosang nan mwoahlo, lih emen keido rehi iangahki nah seri isimen oh kapehsehiong ie me ih Sister Rebecca Guzman.
E idek, “Elder Rasband, ke ese ihs Rulon oh Verda Rasband?”
Ih perenda oh sapengki, “Ahi pahpa oh nohno ira.”
Sang met ke kak esehier dahme pahn wiawi. I alehdi mweimwei sang Rebecca, me mih met iangahki ah peneinei nan wasahn Tiepene wet, Ih pahn ehukiong kumwail soai pen ah peneinei.12
Ai pahpa oh nohno, Elder Rulon oh Sister Verda Rasband, wia ara pwukoah doadoahk en papah en misineri nan Fort Lauderdale Florida Mission.13 Ira kohkohseli padapadahk oh sang ni kaweid laud ira ahpw letelet ni wenihmw en imwen Rebecca. E wia serepein pwulopwul men ansouo oh kin pereniki rongorong koul en Osmonds, ahpw mehlel kempoakepahi Donny—me pil iang mihmi wasaht rahnwet.14 E kin rongorong arail koasoi kan nan wehwe oh esedahr me irail wia towe en Mwomwodiso en Sises Krais en Souleng en Imwin-rahn akan. E kehn me mie mehkot me inenen wekisang meteikan duwen ira, oh e medemedewe me mwein e kakete arail mwomwodisohu, Rebecca raparapahki duwen Mwomwodiso erein sounpar riau nan laiprehri en sukuhl. Eri, ni ansou me pwopwoud kadek ehu ahpw letelet ni wenihmw en ihmwarailo oh kapese iong irail me re wia misineri kei en Souleng en Imwin-Rahn akan, e pwuriamweila.
“Ahi nohnohu indahiengie ien indahng ira en kokohla,” Rebecca ahpw intingihdi, “ahpw ai mohngiong inda ‘Soh.’ Ih kilang nan meserahko oh kehn insenamwahu oh limpoak. Mehn kataman wet kin kakerehdi pilen mesei oh pepehm laud ong ai mongiong.”15
Rebecca luke ira ong nan ihmwo, oh ai pahpa oh nohno me wia misineri ahpw ehukiong ih rongamwahu wet, iangahki rie serepein riemen, ahpw, mendahte arail nohno, ah sapwungki.
Rebecca ahpw kawewehiong ie me: “Ahmw pahpa oh nohno inenen mwahu ong kiht ni ara kin sapsapeng aht peidek kan. I kak kilang mesera kan nin duwen marain ehu ah kin kapil irapene. Se kin kalapw pwolehdi amw nohno ansou koaros me e kin kokohla, oh e kin kalapw sewese ai nohno en kak insenamwahu oh wauneki. Amw pahpa kin kalapw mie marain nan meseh kan ni ansou me e kin padahkiong kiht duwen Sises Krais. E kin song en luke ai pahpao nan aht kin tuhpene kan oh ai pahpa tepda pereniki iang rong. Ai pahpao wia soun kuk men nan wasahn koul en kemweiht ehu oh e tepida kukihda kenen amw pahpa oh nohno mwengehn soutik, iangahki wiahda kenen amw pahpa pahi me doliki pilen karer, me e kin keieu iouki.”16
Ansou me Elder oh Sister Rasband idek rehn Rebecca oh ah peneinei en wadek pwuhk en Mormon, Rebecca wadekala pwuhko ki rahn limau. E men pepdaisla ansou karuwaru, ahpwekei tohn ah peneinei saikinte onopada. Mwurin sounpwong pahieu, Rebecca ngingihteteki en pepdaisla oh iangala Mwomwodiso. E ahpw pil ehu katamanda me, “Wasa koaros en pali ngehniet ese me e mehlel.”17 Nan Epreil [limau] 5, [kid duwepwiki isihsek duwahu]1979, misineri kan pepdaisihla Rebecca ni ah sounpar[eisek duwahu]19, ah nohno, oh iangahki rie serepein riemen. Ahi pahpa me wia soun kadehde ni wasahn pepdaiso.
Ansou me ih tuhwong Rebecca oh ah peneinei nan mwomwodiso, se kilelehng irail koaros. Ih wahla rehn ai nohnou, oh e ahpw koladahng nan mwarmwarehu. Ih eri indadohngie, “Ronnie, rahn wet wia ehu rahn kaperen ong ai mour.”
Pasapeng en ai nohno wia pekpek ngidingid ehu ong me mah kan: “Dahme kumwail wiewia nan irair en amwail mour wet?” Mie soahng tohto me irail me mah misineri kan kak wia me sohte ekei kak wia. Kumwail ahniki poahsoan kehlail en doadoahk, wewehkier duwen Mwomwodiso oh audepeh kan, oh me kak ngoangki oh kapitala sapwellimen Koht serih kan.
Ekei kumwail kak medemedewe me: “Ahpw ia mwomwen ai pahn kokolahsang neihn nei serih kan serih kan? Se pahn sohte kak iang kilangidi kekeirdahn peneinei, ansou en ipwidi kan, kempoakepaht kan, oh nait mahn akan.” Ma ih pahn idek rehn ai nohno dahme karehda ih oh pahpa kohla ki wia ara doadoahk en misineri, ih ese me e pahn inda met: “Mie nein nei serihka seri. Ih men irail en ese me amw pahpao oh ngehi wia doadoahk en misineri, se men wiahda karasaras mwahu ong nait dih en mwuhr akan, oh se inenen kapaida mehlel, udahn kapaida.”
Ni ansou me ih kin pwarek wasahn misin kan nan sampah, ih kilangehr duwen doadoahk mwahu en neitail misineri mah kan. E sansal me irail pereniki wiewia “doadoahk en Kauno” oh wia nin duwen “kupwuren Kauno.”18
Ong ekei, oh se koapwoaroapwoariki me meh kid kei kumwail, me wia amwail pwukoahn papah en misineri nan ehu keimw en sampah pahn wia ehu wasa pwung.19 Ong ekei, papah nan misin en Mwomwodiso ni wasahn kouson pil kak wiawi. Pwehki sang ni soumwahu de sohngen kahrepe teikan, miehte ekei me sohte kak papah. Se wewehki songen irair pwuko, oh I pahn ahniki koapwoaroapwoar me kumwail pahn diarada ahl en utung irail akan me wiewia arail doadoahk en papah. Idahwen kaweid en soukohp kan oh kapakap kumwail en esehla dahme Kauno kupwurki kumwail en wia.
Wasahn doadoahk en misin kan nan sampah wie pekipeki amwail sawas. Preseden Nelson kosoiahki neitail misineri me mah kan me, “Irail pwulopwul nan palingehn, lolokong, oh inengieng doadoahk.”20
Nan wasahn doadoahk en misin, kumwail ahneki songesongen mehn sawas kei: kumwail kak wia amwail papah nan ohpis en misin de tehnpas sarawi kan, kakelailih misineri pwulopwul kan, kasalehda utuht ong branch tiktik kan, doadoahk nan wasahn poadoapoad en peneinei de wasahn poadoapoad kan, wia sounpadah en insdiduhd, kihda sawas akan ong kahpwal laud kan, doadoahk ong me pwulopwul kan, sawas nan wasahn rapahki doadoahk kan de nan en Mwomwodiso mwoatuwel kan. Soangsoangen wiepen papah kei, dahme pahn keieu mwahu ong kumwail, wasa me pahn mie anahnepamwail ie, oh ia mwomwen amwail pahn kak onopada en kohla e sansal nan website“Senior Missionary.”21 Kumwail pil kak kosoiong amwail pisop de branch preseden.
I lukehier pwopwoud tohto en papah oh irail en kilang arail mour ah pahn direkihla Marain en Krais.22 Ansou me irail pahn pwurodo, irail pahn kasalehda arail karaniala Kauno oh karaniala emen emen, kehn ngenen Kauno pohrail, oh ese me mie mehkot irail wiahda.23 Ihs me sohte pahn mwahuki soahngo?
Pwukoah doadoahk en misin pahn wia ehu iren mour keieu laud nan mour en pwoupwoud ehu. Oaralap ehu me pahn mwahu iei “Ahi Kaun Pahn Anahne Doadoahngkinie.”24 Kumwail pahn sohte mwein wehwehki mwahu duwen pwukoah doadoahko; ahpw, manaman en Ngehno pahn sewesei kumwail en kehn me kumwail mihmi nan wasahn kousoan mwahu.
Ahi pahpa nohno, oh pwopwoud misineri meh kid kei me pwurodohr alehdi arail kadehde sang nan arail wia arail doadoahk en misineri. Kauno mahsanih nan rongamwahu en imwin rahn akan me, “Oh ma kumwail doadoahk erein amwail mour padapadahkiong aramas pwukat irail en koluhla, oh wado, aramas emen, ia uwen amwail pahn peren nan wein Semeio!”25
Aiseia kiheng kitail lepin mahsen ehu me kaweweh duwen mwomwen wehwehpen pwukoahn papah en misin nan “mwahto.” Pwuhk Sarawi padahkieng kitail “mwahto iei sampah.”26 Soukohp en kawahu intingiedi, “Eri kumwail pahn mweselwei pereperen, oh pakahrieisang nan kahnimwo ni popohl: nahna kan oh dohl akan pahn direkihla ar koulen kaping, oh tuhkehn nansapw akan pahn ngisingiski ar peren.”27 Dohl akan, nahnah kan, oh nan sahpw patapat akan, oh tuhke kan kak duwehte misin preseden, bisop, sounkaweid kan nan distrik, tohn mwomwohdiso, oh irail kan me raparapahki me mehlelo ahpw “re sehse re pahn diar iat.”28 Irail kak kadehde me irail misineri mah kan wekidirailla sang ni arail kin kadehde Sounkomour oh Soundoar, Sises Krais.
Ni ai wia Wahnparon en Kaun Sises Krais, ih peki ken wia soun papah en misineri men nan kapwurepenehn mehn Isrehl kan oh pil pwurehng alehda pwukoahn papah. Se anahne iuk—se anahne iuk. Se inenen kapingki irail me mah kan, pwehki duwen mour me kumwail ahneki oh karasaras akan me kumwail kin wia nan amwail wasahn kousoan kan, nan ward kan, oh pil nan stake kan. Met ih lukei kumwail en wia dahme-kumwail ese, iangahki amwail kadehde-unsek, oh kohla wia amwail misin. Ih kapakapki me mwurin met ni ai pahn mwohndi oh koasoanehdi pwopwoud mah kan, e pahn meh epwiki samwa kumwail me pahn kasikalahr amwail ansou.
I pil inoukihwei me ni amwail pahn papah kumwail pahn kehn Sapwellimen Kauno limpoak nan amwail mour, kumwail pahn ese Ih, E pahn esei kumwail, oh “ia uwen laud en amwail peren.”29 Amwail ngong en pahpah Sises Krais pahn kalinganihda oh kapaida amwail peneinei, neihn noumwail serih kan, oh neihn noumwail serih kan neirail seri kan. “Popohl, oh limpoak en kadirehla mehlel”30 nan arail mour erein pahr akan me pahn kohdo. I inouki. Ni mwaren Sises Krais, amen.