O Aoaoga a Iesu Keriso
Ua tuuina mai ia i tatou tusitusiga paia e faatonutonu ai o tatou olaga. O la’u savali i le aso, e aofia ai se ōfaga o upu a lo tatou Faaola—o mea sa Ia fetalaia.
Tatou te talitonu ia Keriso. I le avea ai ma tagata o Le Ekalesia a Iesu Keriso o le Au Paia o Aso e Gata Ai, tatou te tapuai ia te Ia ma mulimuli i Ana aoaoga o i tusitusiga paia.
A’o le’i i ai le Pa’ū, sa tulei tuusa’o lava le Tama Faalelagi ia Atamu ma Eva. Mulimuli ane, sa folasia mai e le Tama Lona Alo Pele e Toatasi, o Iesu Keriso, o lo tatou Faaola ma le Togiola ma tuuina mai le poloaiga ia te i tatou ia “faalogo ia te Ia.”1 Mai lea faatonuga ua tatou faia ai se faaiuga e faapea, o faamaumauga faatusi paia o upu na tulei i ai le “Atua” po o le “Alii” e toetoe o upu uma lava a Ieova, lo tatou Alii, o Iesu Keriso.2
Ua tuuina mai ia i tatou tusitusiga paia e faatonutonu ai o tatou olaga. E pei ona aoao mai i tatou e le perofeta o Nifae, e tatau ona tatou “taumamafa fiafia i afioga a Keriso; aua faauta, o afioga a Keriso o le a tau mai ai ia te outou mea uma e tatau ona outou faia.”3 O le tele o mau o loo lipotia mai ai galuega i le tino a Iesu, o ni faamatalaga ia o mea sa Ia faia. O la’u savali i le aso, e aofia ai se ōfaga o upu a lo tatou Faaola---o mea sa Ia fetalaia. O upu ia na tusia i le Feagaiga Fou (e aofia ai faaopoopoga musuia a Iosefa Samita) ma i le Tusi a Mamona. O le tele o nei ōfaga o loo i le faasologa na fetalaia ai e lo tatou Faaola na upu.
“E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua.”4
“Amuia … i latou uma [o e] e fia aai ma fia feinu i le amiotonu, aua o le a faatumuina i latou i le Agaga Paia.”5
“Amuia e faatupuina le filemu: aua e ta’ua i latou o atalii o le Atua.”6
“Ua outou faalogo, na fai mai i e anamua, Aua e te mulilua:
“A ou te fai atu au ia te outou, ai se vaai atu i le fafine ina ia manao i ai, ua uma ona mulilua ma ia i lona loto.”7
“Ua outou faalogo, na fai mai, Ia e alofa atu i le lua te tuaoi, a ia inoino i le ua ita mai ia te oe.
“Ae ou te fai atu a’u ia te outou, ia outou alolofa atu i e ua ita mai ia te outou, faamanuia i e ua fetuu mai ia te outou, ia agalelei atu i e ua inoino mai ia te outou, ma tatalo foi mo e ua tuuai fua mai ma faasaua mai ia te outou;
“Ina ia faia outou ma atalii o lo outou Tama o i le lagi: O le na te faaoso i lona la i e ua amio leaga atoa ma e ua amio lelei, ua ia faatoto ifo foi le ua i e ua amiotonu, atoa ma e ua amioletonu.”8
“Afai tou te faamagaloina atu tagata i a latou agasala, e faamagaloina foi outou e lo outou Tama o i le lagi:
“Ae afai tou te le faamagalo atu i tagata i a latou agasala o le a le faamagaloina foi e lo outou Tamā a outou agasala.”9
“Afai o ni tagata o le lalolagi outou, po ua alofa mai le lalolagi i ona tagata; ae le ni ō le lalolagi outou, a ua ou filifilia outou nai le lalolagi, o le mea lea e inoino ai le lalolagi ia te outou.”10
“O le mea lea, aua neʼi saili i mea o lenei lalolagi ae ia outou muai saili e atinae le malo o le Atua, ma faatuina lana amiotonu, ma o nei mea uma e faaopoopoina atu ia te outou.”11
“O le mea lea, o mea uma foi tou te loto i ai ia faia e tagata ia te outou, ia faapea lava ona outou faia ia te i latou: aua o le tulafono lea ma le au perofeta.”12
“Ia faaeteete i perofeta pepelo, o e e o mai ia te outou i ofu faamamoe, ae i totonu o luko feai lava i latou.
“Tou te iloa i latou i o latou fua. Pe tau mai ea tagata se fuifui vine mai le laau tuitui, po o mati mai le laau talatala?
“E faapea lava ona fua mai e laau lelei taitasi fua lelei; ae o se laau ua leaga e fua mai i fua leaga.”13
“E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo’u Tama o i le lagi.”14
“Ia outou o mai ia te a’u, outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”15
“Ai se tasi e fia mulimuli mai ia te au, aua ne’i usiusitai o ia ia te ia, a ia ave e ia lona satauro i le mulimuli mai ai ia te au.
“Ma o lenei, ina ia aveina e se tasi lona satauro, e tatau ona teena e ia o amioleatua uma, ma tuinanau faalelalolagi, ma tausia a’u poloaiga.”16
“O le mea lea, lafoai le lalolagi, ae lavea’i o outou agaga; aua se a le aoga i le tagata, pe afai na te maua le lalolagi uma, a e maumau lona ola? Po o le, o le a se mea e avatu e le tagata e sui a’i lona agaga?”17
“Ai se tasi e fia faia lona finagalo, e iloa e ia le mataupu, pe mai le Atua, pe ou te tautala fua lava au.”18
“Ma ou te fai tau ia te outou, Ole atu, ma o le a to mai ia te outou; saili, ma o le a outou maua; tuitui atu, ma o le a tatala mai ia te outou.
“Aua ai se ole atu, e maua e ia; o le saili, e iloa e ia; o le tuitui e toina mai ia te ia.”19
“Ua i ai ia te au ni isi mamoe ua le o i lenei lotoa; e ao foi ona ou aumai i latou; ma o le a latou faalogo i lou leo; ma o le a tasi le lafu, ma tasi le leoleo mamoe.”20
“Na fetalai atu Iesu ia te ia, o A’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia:
“O tagata ola uma o e faatuatua mai ia te au, e le oti lava e oo i le faavavau.”2
“[O le poloaiga sili i le tulafono o lenei] e te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe.
“O na poloaiga e lua ua autu ai le tulafono uma ma le au perofeta.”22
“O le ua ia te ia a’u poloaiga ma tausi i ai, o ia lea e alofa mai ia te a’u: o lē alofa mai foi ia te a’u e alofaina o ia e lo’u Tama, ou te alofa foi ia te ia, ma ou faaali ia te ia.”23
“Ou te tuuina atu ia te outou le [filemu], o lo’u [filemu] ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”24
“O la’u poloaiga lenei, ia outou fealofani, e pei ona ou alofa atu ia te outou.”25
“Ia outou vaavaai mai i o’u lima ma o’u vae, aua o a’u lava lenei: ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o a’u nei ua outou vaavaai i ai.”26
“O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia:
“Ia outou a’oa’o atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.”27
I le mae’a ai o Lana galuega i le Nuu Paia, sa Ia faaali atu i e amiotonu i le konetineta o Amerika. O nisi nei o upu na Ia fetalai atu ai iina:
“Faauta, o Au o Iesu Keriso, le Atalii o le Atua. O au na foafoaina le lagi ma le lalolagi, ma mea uma o i ai. O au na ou i ai faatasi ma le Tamā mai le amataga. O au ua ou i ai i totonu o le Tamā, ma le Tamā i totonu o au; ma o au ua faamamaluina ai e le Tamā lona suafa.”28
“O au o le malamalama ma le ola o le lalolagi. O au o le Alefa ma le Omeka, le amataga ma le gataaga.
“Ma ia outou le toe osia mai ia ia te au se taulaga i le faamaligiina o le toto; ioe, o a outou taulaga ma a outou taulaga mu ia faauma ese, ona o le a leai ni a outou taulaga ma ni a outou taulaga mu o le a ou taliaina.
“Ma ia outou osi mai mo se taulaga ia te au le loto momomo ma le agaga salamo. Ma o soo se tasi e sau ia te au ma le loto momomo ma le agaga salamo, o ia lea o le a ou papatisoina i le afi ma le Agaga Paia. …
“Faauta, ua ou sau i le lalolagi e aumai le togiola i le lalolagi, e laveai le lalolagi mai le agasala.”29
“Ma ou te toe fai atu ia te outou, e ao ina outou salamo, ma papatiso i lou igoa, ma avea e pei o se tamaitiiti, a leai e le mafai lava i se ala ona outou mautofi i le malo o le Atua.”30
“O lea ou te manao ia outou atoatoa e pei lava o aʼu, po o lo outou Tamā o le o i le lagi e atoatoa.”31
“E moni, e moni, ou te fai atu ia te outou, e ao ina outou mataala ma tatalo e le aunoa, nei faaosoosoina outou e le tiapolo, ma taitai ese atu ai outou faatagataotaua e ia.”32
“O le mea lea e tatau ai ona outou tatalo e le aunoa i le Tama i lo’u igoa.”33
“O lenei, o mea uma tou te faia, ia outou faia i lo’u igoa; o le mea lea, ia outou faaigoa le ekalesia i lo’u igoa.”34
“Faauta, ua ou tuu atu ia te outou la’u talalelei, ma o le talalelei lenei ua ou tuu atu ia te outou—e faapea, ua ou sau i le lalolagi e fai le finagalo o lo’u Tama, aua na auina mai a’u e lo’u Tama.
“Ma na auina mai a’u e le Tama, ina ia siitia a’u i luga o le satauro; ina ua uma ona siitia a’u i luga o le satauro, ia tosina mai tagata uma ia te a’u … ina ia faamasinoina ai e tusa ma a latou galuega, pe lelei pe leaga.”35
“O lenei o le poloaiga lenei: Ia salamo, outou tuluiga uma o le lalolagi, ma o mai ia te au ma ia papatiso i lou igoa, ina ia faapaiaina outou i le taliaina o le Agaga Paia, ina ia outou tutu ma le le pona i ou luma i le aso gataaga.”36
Tatou te talitonu ia Keriso. Ou te faai’u atu i le mea na Ia fetalai ai e uiga i le ala e tatau ona tatou iloa ai ma mulimuli i Ana aoaoga:
“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.”37
Ou te faamautu atu le moni o nei aoaoga i le suafa o Iesu Keriso, amene.