O Se Perofeta Soifua mo Aso e Gata Ai

Saunia e Elder Allen D. Haynie

O Le Fitugafulu

Ua filifilia e le Tama oi le Lagi le mamanu o le faaalia mai o upumoni i Ana fanau e ala mai i se perofeta.

A o ou laitiiti, sa ou fiafia tele i Aso Toonai aua o mea uma sa ou faia i lena aso sa foliga o se sailiga fiafia. Ae na tusa lava po o a au mea na fai, sa taimua lava i taimi uma i le mea aupito taua o mea uma—o le matamataina o ata komi i le televise. I le taeao o se tasi o Aso Toonai faapena, ao ou tū i talaane o le televise ma kīkī solo ia alaata, na ou iloaina ai o le ata komi sa ou faamoemoe ia maua sa suitulaga i se faasalalauga o le konafesi aoao a Le Ekalesia a Iesu Keriso o le Au Paia o Aso e Gata Ai. Ao ou tilotilo atu i le televise ma ’auē i le leai o se ata komi, sa ou vaaia se tamaloa lauulu sinasina e fai lona suti ma le fusiua, o saofai i se nofoa manaia.

Sa i ai se mea sa ese e uiga ia te ia, o lea na ou fesili ai i lo’u uso matua, “O ai le la?”

Sa fai mai o ia, “O Peresitene David O. McKay; o ia o se perofeta.”

Ou te manatua [lo’u] lagonaina o se mea ma i se isi itu na ou iloaina o ia o se perofeta. Ona, talu ai sa o a’u o se tama laitiiti ma’ivalea tele i ata komi, sa ou suia ai le alaata. Ae sa le’i galo lava ia te a’u le lagona na ou lagonaina i lena taimi puupuu, o faaaliga sa le’i mafaufauina. O ni isi taimi, o se perofeta, e laitiiti lava se taimi ae iloa [o ia].¹

O le iloa e ala i faaaliga o loo i ai se perofeta soifua i le lalolagi ua suia ai mea uma.² E mafua ai ona lē fia faalogo se tagata i se faafinauga e uiga i le po o le a le taimi e saunoa ai se perofeta o se perofeta po o le, pe mata e tauamiotonuina se tagata i le filifilia o fautuaga faaperofeta e talia pe teena.³ O se malamalama faaalia mai faapena, e valaaulia ai se tagata e faatuatua i le fautuaga a se perofeta soifua, e tusa lava pe tatou te le malamalama atoatoa i ai.⁴ E ui i lea, ua filifilia e se Tama oi le Lagi atoatoa ma agaalofa le mamanu o le faaali mai o upumoni i Ana fanau e ala i se perofeta, o se tasi na te le’i sailia lava se tofiga paia faapea ma o sē na te le manaomia la tatou fesoasoani e tau faailoa atu ia te ia ona lava lē atoatoa.⁵ O se perofeta o se tasi ua sauniaina, valaauina, faasa’oina, musuiaina, aoaiina, faapaiaina, ma lagolagoina e le Atua lava ia.⁶ O le mafuaaga lena e le mafai ai lava ona tatou lamatia faaleagaga pe a mulimuli i le fautuaga faaperofeta.

Pe tatou te fiafia i ai pe leai, o i tatou uma sa filifilia i se auala i le muai olaga ina ia fananau mai i nei aso e gata ai. E lua mea moni e fesootai ma aso e gata ai. O le mea moni muamua, o le Ekalesia a Keriso o le a toefaatuina i luga o le fogaeleele. O le mea moni lona lua e faapea, o mea o le a matuai faigata lava. Ua faaalia mai i tusitusiga paia, o aso e gata ai o le a i ai “se timu uato’a tele e auina mai e faaumatia ai laau totō o le lalolagi,”⁷ mala,⁸ “tala o taua, ma o le a vāvāō le lalolagi atoa, … ma o le a faateteleina le amioletonu.”⁹

A o ou laitiiti, o na valoaga e uiga i aso e gata ai sa ou fefe ai ma na mafua ai ona ou tatalo ina ia le oo mai le Afio Mai Faalua i o’u aso—atonu ua faamanuiaina i le le’i oo mai lava. Peitai o lenei ua ou tatalo mo le faafeagai, e ui lava o luitau valoiaina e mautinoa lava o le a tutupu,¹⁰ aua a toe foi mai Keriso e nofotupu, o Ana foafoaga uma o le a “taooto ai … ma le filemu.”¹¹

O tulaga ua i ai nei i le lalolagi ua mafua ai ona popolevale nisi. I le avea ai ma fanau o le feagaiga a le Atua, e le manaomia ona tatou taufetuli solo iinei po o iina ia iloa ai le ala e tami solo ai i nei taimi faigata. E le tatau ona tatou matatau.¹² O aoaoga faavae ma mataupu faavae e ao ona tatou mulimuli ai ina ia sao ai faaleagaga ma tumau ai faaletino o loo maua i upu a se perofeta soifua.¹³ O le pogai lena na folafola mai ai e Peresitene M. Russell Ballard “e le o se mea faatauvaa … le i ai o se perofeta a le Atua i lo tatou lotolotoi.”¹⁴

Ua tautino mai Peresitene Russell M. Nelson, “O le mamanu ua leva ona faatulagaina a le Atua o le aoaoina o Lana fanau e ala mai i perofeta ua faamautinoa mai ai ia i tatou o le a Ia faamanuiaina perofeta taitasi ma o le a Ia faamanuiaina i latou o e faalogo ma gauai atu i fautuaga faaperofeta.”¹⁵ O lea la, o le autu [ki] lava o le mulimuli i le perofeta soifua.¹⁶ Uso e ma tuafafine, e le pei o tusi komi ua leva ma taavale tuai tulaga ese, o aoaoga faaperofeta e le faapea a leva ona sili atu lea o lona taua. O le pogai lena e le tatau ai ona tatou saili e faaaoga upu a perofeta ua mavae ia faataatiaese ai aoaoga a perofeta soifua.¹⁷

Ou te fiafia i faataoto na faaaoga e Iesu Keriso e aoao mai ai mataupu faavae o le talalelei. Ou te fia faasoa atu se faataoto moni o se ituaiga faapena ma outou i lenei taeao.

I se tasi o aso sa ou savali atu ai i totonu o le faleaiga i le laumua o le Ekalesia mo se meaai o le aoauli. Ina ua uma ona aumai la’u laulau o meaai, sa ou ulu atu i le eria e aai ai ma ou matauina ai se laulau sa alala ai le toatolu o sui o le Au Peresitene Sili, sa i ai ma se nofoa avanoa e tasi. O lo’u le mautonu na mafua ai ona ou vave pi’o ese mai lena laulau, ona ou faalogo atu lea i le siufofoga o le tatou perofeta, o Peresitene Russell M. Nelson, na fai mai, “Allen, lea e i ai le nofoa avanoa ii. Sau tatou nonofo.” O lea sa ou faia ai.

Ina ua lata ina uma le malologa, sa faateia a’u i le faalogoina o se pa’o leotele, ma ina ua ou ea a’e, sa ou vaaia ai na faatu e Peresitene Nelson lana faguvai palasitika ona faamaomi lea ma toe tapuni.

Ona fesili atu lea o Peresitene Dallin H. Oaks le fesili na ou fia fesili ai foi, “Peresitene Nelson, aisea na e faamaomia ai lau faguvai palasitika?”

Sa tali o ia, “E faafaigofie ai mo i latou o e taulimaina mea e toe faaaoga ona e le telē se avanoa e alu ai i totonu o le koneteina o mea e toe faaaoga.”

A o [ou] mafaufau loloto i lena tali, sa ou toe faalogoina foi lena pa’o o le faamaomi. Sa ou autilo i lo’u itu taumatau, na faamaomi e Peresitene Oaks lana faguvai palasitika pei lava o Peresitene Nelson. Ona ou faalogoina lea o ni pa’o i lou itu agavale, ma sa faamaomi e Peresitene Eyring lana faguvai palasitika, e ui sa ia faia se faiga ese e ala i le faamaomi a o taatia faalava le fagu, lea na tele atu se taumafaiga na alu ai nai lo le faatu sao o le fagu. O le matauina o lenei mea, sa faaali atu ai ma le agalelei e Peresitene Nelson ia te ia le faiga faatu sa’o e faigofie atu ona faamaomi ai le fagu.

O le taimi lea, na ou punou atu ai ia Peresitene Oaks ma fesili filemu atu, “Pe o le faamaomiina o lau faguvai palasitika o se tulaga manaomia fou lea a le faleaiga mo le toe faaaogaina?”

Sa tali mai Peresitene Oaks ma se ataata i ona foliga, “Ia, Allen, e tatau ona e mulimuli i le perofeta.”

Ou te mautinoa sa le’i folafolaina mai e Peresitene Nelson se aoaoga faavae fou mo mea e toe faaaoga i le faleaiga i lena aso. Ae e mafai ona tatou aoao mai le tali vave atu¹⁸ a Peresitene Oaks ma Peresitene Eyring i le faataitaiga ma le mataala a Peresitene Nelson e fesoasoani ia i latou na aafia ai i se auala lelei atu.¹⁹

O ni tausaga ua mavae atu, sa faasoa mai ai e Elder Neal A. Maxwell ni isi o maitauga ma fautuaga e fetaui tonu lava le faaperofeta e faatatau i o tatou aso:

“I masina ma tausaga o lumanai, o mea o le a tutupu atonu o le a manaomia ai tagata taitasi o le ekalesia e filifili pe o le a mulimuli o ia pe leai i le Au Peresitene Sili. O le a iloa e tagata o le ekalesia o le a faateteleina le faigata o le tutū umi i le va o ni manatu se lua. …

“… Se’i o tatou tuua se faamaumauga ina ia mafai ona manino ia filifiliga, e tuu ai isi ia fai e pei ona latou loto i ai i le feagai ai ma fautuaga faaperofeta. …

“Na fetalai Iesu a matala mai lau o le mati, ‘ua latalata le tausaga vevela.’ … O le lapataia ai ua latalata mai le tausaga vevela, ia aua la nei o tatou faitio ai i le vevela!”²⁰

Ua tutupu a’e le tupulaga faiae i se vaitaimi ua le toe i ai ni lau o le mati ae ua faateteleina le vevela. O lena mea moni ua tuu mai ai se tiutetauave mamafa atu i le tupulaga ua matutua atu, ae maise lava pe a faatatau i le mulimuli i fautuaga faaperofeta. A leano matua i le fautuaga a le perofeta soifua, e le gata ina latou lē maua faamanuiaga folafolaina mo i latou lava, ae e sili atu ona leaga o le aoao o a latou fanau e faapea, o saunoaga a se perofeta e faaletaua po o le faapea, o fautuaga faaperofeta e mafai ona filifili mai i se faaaliga o mea eseese e aunoa ma le popole mo le taunuuga o le tinovale faaleagaga.

Sa ta’ua e Elder Richard L. Evans i se tasi o taimi: “Ua manatu sese nisi o matua e faapea e mafai ona latou evaeva teisi e tusa ai ma amioga ma le usitaia … e faapea e mafai ona latou faamatagataga teisi i mea faavae e aunoa ma le aafia ai o lo latou aiga po o le lumanai o lo latou aiga. Peitai, afai e sipa teisi ‘ese se matua, o le a ono sili atu le sipa a tamaiti i lo le faataitaiga a matua.”²¹

I le avea ai o se tupulaga ua i ai le tiute paia e saunia le tupulaga faia’e mo lona matafaioi valoiaina i aso e gata ai,²² o lea matafaioi e ao ona faataunuuina i se taimi ua matuai sili ona malosi ai faatosinaga a le fili,²³ e le mafai ona avea i tatou o se punavai o le fenumiai e uiga i le taua o le mulimuli i fautuaga faaperofeta. O le fautuaga tonu lena o le a mafai ai e le tupulaga faia’e ona iloa atu “le fili a o mamao atu o ia; ma semanu [e] mafai ai ona [latou] sauni” e tetee atu i osofaiga a le fili.²⁴ O a tatou faasipa laiti, faaleano filemu, po o faitioga taumusumusu i le tali atu i fautuaga faaperofeta e ono iu ai ina tatou savavali ma le tulaga lamatia i le pito o le ala o feagaiga; ae pe a faatelē e le fili i olaga o le tupulaga faia’e, o amioga faapena e mafai ona faatosina ai i latou e tuua atoa lena ala. O se taunuuga faapena o se tau taugata tele faaleaugatupulaga lena.²⁵

Atonu e lagona e ni isi o outou e faapea ua le taulau a outou taumafaiga e mulimuli i le fautuaga a Peresitene Russell M. Nelson. Afai o le tulaga lena, salamo, toe amata ona mulimuli i le fautuaga a le perofeta filifilia a le Atua. Ia faataatiaese le faalavefau o ata komi faatamaitiiti ae ia faalagolago i le [auauna] filifilia a le Alii. Ia olioli aua ua toe “i ai se perofeta i Isaraelu.”²⁶

E tusa pe e te le o mautinoa, ou te molimau atu e mafai ona tatou tatalia le vevela o aso e gata ai ae e faapea foi ona tatou lauolaola ai. O i tatou o le Au Paia o aso e gata ai, ma o aso maoae nei. Sa lemataofiofia lo tatou fia o mai i le lalolagi i lenei taimi, ma i ai le mautinoa o le a le tuua i tatou e tautevateva pe a faafetauia e puao ua faateteleina le pogisa ma le fenumiai a le fili²⁷ nai lo o lena, ia talia fautuaga ma le taitaiga mai i le toatasi ua faatagaina e saunoa mai ia i tatou ma le lalolagi atoa, “O loo faapea ona fetalai mai le Alii o Ieova.”²⁸ I le suafa paia o le perofeta o lē na faatuina a’e e le Atua, o Le Paia e Toatasi o Isaraelu,²⁹ o Iesu Keriso, amene.

Faamatalaga

1. Sa valaaulia lata mai nei e Peresitene Russell M. Nelson ia tagata aooga i le Iunivesite o Polika Iaga ia maua lea lava aafiaga patino faafaaaliga e tasi: “Fesili atu i lou Tama Faalelagi pe o i matou moni o ni aposetolo ma perofeta a le Alii. Fesili atu pe na matou mauaina ni faaaliga i lenei mataupu faapea ma isi mataupu” (“The Love and Laws of God” [Brigham Young University devotional, Sept. 17, 2019], speeches.byu.edu). Tagai foi Neil L. Andersen, “O Le Perofeta a le Atua,” Liahona, Me 2018, 26: “Ua ia i tatou le faamanuiaga o ni Au Paia o Aso e Gata Ai e maua ai se molimau patino o le valaauga o Peresitene Nelson e mai le Atua.” O le tala i le liua o Alema mai le faalogo i le perofeta o Apinati ua tuuina mai ai ni isi faamaoniga e faapea, o faaaliga e faatatau i se perofeta e avanoa mo i tatou uma (tagai i le Mosaea 13:5; 17:2).

2. “A le o le i ai o se tatou perofeta po o le leai o se mea; ma o le i ai o se perofeta, ua i ai ia i tatou mea uma” (Gordon B. Hinckley, “We Thank Thee, O God, for a Prophet,” Ensign, Jan. 1974, 122).

3. “Ua amata ona latou le talitonu i le agaga o valoaga ma le agaga o faaaliga; ma ua sisila totoa mai faafeagai ma o latou mata faamasinoga a le Atua” (Helamana 4:23; tagai foi Mataupu Faavae ma Feagaiga 11:25). “Ua tatou pepese ma ua tatou faia e le aunoa, ‘Ia viia Oe, Le Atua, mo le Perofeta lelei, ua taitaiina e ia o i matou i ona po nei.’ E toatele i latou o e [taumafai e] tuu se faamatalaga i lena faaupuga ia fai mai: ‘Pe a faapea lena na te taitaia i tatou ia fetaui ma o tatou lava manaoga ma o tatou lava manatu’” (Teachings of Presidents of the Church: Heber J. Grant [2002], 80).

4. “O nisi taimi o le a tatou maua ai fautuaga e le mafai ona tatou malamalama i ai pe foliga mai e le faatatau ia i tatou, e ui lava i le mae’a ai o le tatalo ma le mafaufau toto’a i ai. Aua le lafoaia le fautuaga, ae ia taofia mau pea i ai. Afai e tauaao atu e se tasi e te faatuatuaina se mea e foliga mai e leai se taua ae ua na’o ni oneone faatasi ai ma le folafolaga e faapea, o loo i ai ni auro, atonu e te uuina ma le poto lea mea i ou lima mo sina taimi, ma lūlū malie. Soo se taimi lava na ou faia ai lena mea i fautuaga mai se perofeta, e mavae se taimi ae amata ona aliali mai fasi auro ma sa ou faafetai ai” (Henry B. Eyring, “Finding Safety in Counsel,” Ensign, May 1997, 26; tagai foi 3 Nifae 1:13; Mataupu Faavae ma Feagaiga 1:14).

5. Tagai i le 2 Nifae 4:17–18. “Aua tou te tauleagaina au ona o ou le atoatoa, po o lou tamā, ona o ona le atoatoa, … ae nai lo lena, ia outou avatu le faafetai i le Atua ina ua ia faaalia atu ia te outou o matou le atoatoa, ina ia outou aoao ia sili atu ona outou popoto nai lo i matou” (Mamona 9:31).

6. Tagai i le Mataupu Faavae ma Feagaiga 3:6–8; tagai foi Mataupu Faavae ma Feagaiga 93:47.

7. Mataupu Faavae ma Feagaiga 29:16.

8. Tagai i le Mataupu Faavae ma Feagaiga 84:97; tagai foi Mataupu Faavae ma Feagaiga 87:6.

9. Mataupu Faavae ma Feagaiga 45:26, 27.

10. Tagai i le Mataupu Faavae ma Feagaiga 1:38.

11. Hosea 2:18. “Ona o le a Ou faaali atu aʼu lava mai le lagi i le mana ma le mamalu tele faatasi ma ona ʼau uma, ma mau faatasi ma tagata i le amiotonu i luga o le lalolagi i le afe o tausaga, ma o le a lē tutu e e amioleaga” (Mataupu Faavae ma Feagaiga 29:11).

12. Tagai i le 1 Nifae 22:16–17; tagai foi Mataupu Faavae ma Feagaiga 59:23.

13. “Aua faauta, ua latou teena upu a perofeta. O le mea lea, afai e nofo loʼu tamā i le laueleele ina ua uma ona poloaiina o ia e sola ese mai le laueleele, faauta, e fano foi o ia” (1 Nifae 3:18; tagai foi 2 Nifae 26:3; Mataupu Faavae ma Feagaiga 90:5).

14. M. Russell Ballard, “O Lana Upu o le a Outou Talia,” Liahona, Iulai 2001, 80.

15. Russell M. Nelson, “Ole Atu, Saili, Tu’itu’i Atu,” Liahona, Nov. 2009, 83. “E leai se tagata e mafai ona sili atu le fiafia nai lo o le usitai i fautuaga a le perofeta soifua” (The Teachings of Lorenzo Snow, ed. Clyde J. Williams [1996], 86).

16. “Ia tausisi atu lau vaai i luga o i latou o e pulefaamalumalu i le Ekalesia i aso nei, po o taeao, ma ia mamanu lou olaga ia i latou nai lo o le nopiai i auala atonu na silasila ai pe manatu ai pe na saunoa ai perofeta anamua” (The Teachings of Harold B. Lee [1996], 525).

17. Sa saunoa Peresitene Spencer W. Kimball i se tasi o taimi e faapea “o i latou o e faamamaluina upu a perofeta ua maliliu ua taumafai nei e faaaoga na upu e saili masei ai i perofeta soifua” (The Teachings of Spencer W. Kimball, ed. Edward L. Kimball [1982], 462). “O upu aupito taua e mafai ona tatou faalogo i ai, mafaufau loloto i ai, ma mulimuli ai o upu na ua faaalia e ala mai i lo tatou perofeta soifua” (Ronald A. Rasband, “O Mea o Lo’u Agaga,” Liahona, Nov. 2021, 40).

18. “Pe a tatou faalogo i le fautuaga a le Alii o faailoa mai e ala i saunoaga a le Peresitene o le Ekalesia, o la tatou tali e tatau ona lelei ma vave” (M. Russell Ballard, “His Word Ye Shall Receive,” Liahona, Iulai 2001).

19. “O Le Ekalesia a Iesu Keriso o le Au Paia o Aso e Gata Ai sa, ma o loo taitaia pea e perofeta ma aposetolo soifua. E ui o i latou o tagata soifua ma e i ai foi le atoatoa faaletagata, ae e musuia lava auauna a le Alii e fesoasoani mai ia i tatou ia aloese mai faafitauli ia e lamatia ai le olaga faaleagaga ma fesoasoani ia i tatou ia pasia ma le saogalemu le olaga faaletino ia oo atu ai i lo tatou taunuuga mulimuli i le lagi” (M. Russell Ballard, “O Le Atua o loo i le Foeuli,” Liahona, Nov. 2015, 24).

20. Neal A. Maxwell, “A More Determined Discipleship,” Ensign, Feb. 1979, 69–70.

21. Richard L. Evans, “Foundations of a Happy Home,” i le Conference Report, Oct. 1964, 135–36.

22. Tagai i le Mataupu Faavae ma Feagaiga 123:11; tagai foi Robert D. Hales, “O Lo Tatou Tiute i le Atua: O Le Misiona a Matua ma Taitai i le Tupulaga Faiae,” Liahona, Me 2010, 95–98.

23. Tagai i le Mataupu Faavae ma Feagaiga 52:14.

24. Mataupu Faavae ma Feagaiga 101:54.

25. Tagai i le Mosaea 26:1–4.

26. 2 Tupu 5:8.

27. “Uai atu i ana upu uma ma poloaiga o le a ia tuu atu ia te outou e pei ona maua e ia, … o le faia o nei mea … o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa” (Mataupu Faavae ma Feagaiga 21:4, 6). “E leai ma se tagata na mulimuli i aoaoga pe na talia se lapataiga po o se fautuaga mai lē o loo tu o se sui o le Alii na se ese” (Doctrines of Salvation: Sermons and Writings of Joseph Fielding Smith, ed. Bruce R. McConkie [1998], 243).

28. Esekielu 3:27. “Ona o lana upu ia outou talia, e pei lava ua mai i loʼu lava gutu, i le onosai ma le faatuatua atoa” (Mataupu Faavae ma Feagaiga 21:5).

29. Tagai i le 1 Nifae 22:20–21; tagai foi i le 3 Nifae 20:23.