Sang Insiyacsr Kwewa
Fin kuht kena Mwet Lahngo in sruhk kuht nuh inkuhsrao, na oaru lasr nuh Sel ac wosasuc Lal tiac kuh in alsruhngwesr.
Kihsac nuh sel
Lwen kuhtuh met liki El sang moul Lal kacsr, Jisus Kraist El oasr ke tempuhl Jerusalem, liye mwet suc sang mani lalos ke nien eisacni mani. “Mwet kasrup puspis elos filiya mani na yohk,” na sie katinmas suc suhkahsruhp el tuhkuh “ac filiya luo ipin mani srisrik” Srihklac na pwacye mani inge, tiac fal in oacklah.
Ac finne mani srihsrihk inge oruh tuh Mwet Lahngo elacn lohacng nuh sel. Pwacye, yohk srihpac nuh Sel tuh “el pahngon ma mwet tuhmal lutlut ac fahk nuh selos, Pwacyena nga fahk nuh suwos, mwe sang ma katinmas suhkahsruhp se inge el fihliyac in nien mani uh arulacna yohk liki mwe sang luhn mwet ngiac nuh kwewa:
“Tuh elos nuh kwewa fihliyac ma elos srwelah liki ma pucspucs lalos, ac el, el nwe suhkahsruhp, el sang ma lal nuh kwewa, ahok nohfohn ma oasr yohrohl.”1
Ke mwe luti srihsrihk se inge, Mwet Lahngo El luti lah oacklah fuhkah ma kuht sang ke tohkohsrahi Lal—ac sielacna liki ohiyac ma kuht nuhnkuh in oacklah ma inge. Nuh sin Leum, kuht oacklah ma kuht sang tiac ke luhpah la ke nien mani uh tuh ke ohiyac ma kuht sang ekuhllah insiacsr.
In kaksakihn katinmas luhlahlfongi se inge, Mwet Lahngo El use nuh sesr ohiyac se in oacklah ohiyacn moul in mwet tuhma lutlut lasr. Jisus el luti kuht tuh finne ma kuht sang yohk kuh srihk, oacna sie, kuh in oruh ke insiacsr kwewa.
Ip yohk se inge oasr ke nguhsr luhn mwet pahluh Amaleki ke Puk luhn Mormon: “Tuhkuh nuh yurun Kraist, suc El pa Muhtahl luhn Israel, ac ipeis ke molwelah Lal, ac kuh luhn iwaclah Lal. Kuht suliyuck in tuhkuh nuh yurin Kraist in sang moul lasr kwewa nuh Sel.”2
Tuhsruhk ma inge kuh fuhkah? Nuh sin pucs sesr, ohiyac kihsac inge luhman tiac kuh in siyuck sesr. Puhkantwen ma kuht enenuh oruh tari. Kuht in oruh fuhkah ma nuh kwewa enenweyuck luhn moul facluh lasr ac kena lasr in sang moul lasr kwewa nuh sin Leum?
Sahp elyah lasr pa kuht nuhnkuh kuht enenuh in sang lusacn pacl oacna sie nuh ke kais sie ma enenweyuck. Fin ohinge, oaru lasr nuh sin Jisus Kraist oacna sie ma inmahsrlon ma kuht enenuh in oruh—ma se kuht sang nuh ke lwen kahfofo lasr. Tuh sahp oasr ohiyac sahyac in nuhnkuh ke ma inge.
Oruh Ma nuh Kwewa: Oacna Kahsruhsr Bicycle Soko
Muhtwacn kiyuck, Harriet,ac nga luhngse in tuhkweni kahsruhsr bicycle okwacsr. Pacl wowo se in ahsrohsr ac tuhkweni sin sie sie. Ke kuht kahsruhsr, ac nga tiac momong yohk, kuht ngwetngwet liye ma kahto raunikuht ac sramsram wo sie sin sie. Kuht suhkwac lohacng yohk in tiac puhtatlac ke kuht kahsruhsr. Kuht kahsruhsr bicycle yohklac pacl oruh kuht tiac nuhnkuh kac—fihsrwacsrlah nuh sesr.
Tuh ke nga liye mwet etwaclah in kahsruhsr bicycle ke pacl se met, nga akacsmakihnyeyuck tuh upac in tiac puhtatlac ke wil srihsrihk luo. Kom enenuh eis pacl. Kom enenuh kampare. Kom enenuh muhtweng. Finne kom puhtatlac kuhtuh pacl.
Yohkiyacna, elos suc kampare in tiac puhtatlac ke bicycle etwaclah ma inge:
Tiac ngweti nuh niyom.
Ngwet nuh met.
Ngwet nuh ke inkacnek met liki kom. Lohacng nuh ke acn kom som nuh kac. Ac kampare niyom. In tiac puhtatlac kuht enenuh in kampare nuh met.
Ip yohk inge oacna sie ke moul lasr oacna mwet tuhma lutlut luhn Jisus Kraist. Ohiyac in sang pacl ac kuh lom inmahsrlon ma enenweyuck pucs lom siena ke kais sie mwet ac pacl luhn moul uh. Tuh finsrak luhlahp lasr pa in ukwe Inkacnek luhn Mwet Kol lasr, Jisus Kraist, ac fohlohk nuh ke Pahpah kuloh tuhmwacsr Inkuhsrao. Finsrak se inge enenuh in fahsr nuh met ac tiac eklac, oacna sie kain in mwet kuh ma sikyak ke moul lasr.3
Sohk: Oacna Kahsruhsr Oak Sohk
Na, nuh selos suc luhngse kahsruhsr bicycle, in kapsre ohiyacn mwet tuhma lutlut nuh ke kahsruhsr bicycle sahp pa puhpuhlyuck wo se. Nuh selos suc tiac, met fosrngah. Oasr sie pac ma, nga etuh, mukul, muhtwacn, ac tuhlihk ac kahlwem kac.
Moul luhn mwet tuhma lutlut, oacna inkaiyacn ma luhn facluh, kuh in kapsreyuck nuh ke oak sohk soko.
Kuh kom nuhnkuh lah usrnguck na pwacye tuh oak sohk luhlahp soko kuh in sohk nuh lucng? Kuh meac se oruh oak sohk inge kuh in sohk inkuhsrao, ahluhkwelah meoa ac muhtuhn facl?
In fihsrwacsr, oak sohk soko kuh in sohk muhkwena fin eng ahluhkwelah wing la. Mukwikwi luhn eng inge oruh oak sohk kuh in sohk nuh lucng. Ac fuhkah in oruh eng yohk ahluhkwelah wing ah in oruh oak sohk in sohk nuh lucng? Top an pa in som nuh met.
Oak sohk tiac kuh in som nuh lucng fin muhta infohk. Finne ke lwen engyeng se, tiac kuh in sohk fin oak sohk tiac som nuh met, ke kuh fokoko se ma yohk liki kuh ma sruok nuh ten.
Oacna ke kuht som nuh met ac tiac puhtatlac ke bicycle, in som nuh met oruh oak sohk in ahluhkwelah kuh luhn facluh ac sohk.
Meac kalmac nuh sesr oacna mwet tuhma lutlut luhn Jisus Kraist uh? Kalmac tuh kuht fin ke oruh ma nuhkwewa ke moul lasr, ac kuht fin kena Mwet Lahngo in sruhk kuht nuh inkuhsrao, na oaru lasr nuh Sel ac wosasuc Lal tiac kuh in alsruhngwesr. Oacna katinmas acn Jerusalem, kuht in sang nguhn lasr kwewa nuh sel. Finne ma srihk ma kuht sang, tuhsruhk enenuh tuhkuh insiacsr ac nguhnasr.
Ekihn mwet tuhma lutlut luhn Jisus Kraist tiac ma se inmahsrlon ma puhkantwen kuht oruh. Mwet Lahngo pa kuh yohk ye ma nuhkwewa kuht oruh. Tiac acn in monglac se met liki kuht kampare ke fuhfahsryucsr lasr. Tiac acn kahto srihsrihk kuh acn pwengpweng se. El pa “inkanek, ac pwaye, ac moul; wangin mwet som nu yurin Papa fin tia ke [Jisus Kraist].”4 Pa inge inkacnek ac acn kuht kampare in som nuhkac uh.
Kuht ac tiac puhtatlac ac sohk nuh lucng ke kuht “ahkwot nuh met ke luhlahlfongi kuh in Kraist, in oasr kahlwem suwohs luhn finsrak, ac luhngse God ac mwet nuhkwewa.”5
Kihsac ac Ahkmuhtahlye
Ac fuhkah ma enenweyuck ac ma kunac ke moul lasr ma oruh kuht kahfofo? Eis pacl lasr yurin mwet kuht luhngse, som lutlut kuh ahkolah ke kain in orekma, sruh mani, karihngihn sucu lasr, kuhlwacnsap ke mura lasr—kuht ac oruh fuhkah? Mwet Lahngo El ahkmihsye kuht:
“Tuh Pahpah tomowos inkuhsrao El etuh lah kowos enenuh ma inge nuhkwewa.
“Tuhsruhk kowos in suk met tohkohsrahi luhn God ac suwohswohs Lal, ac ma inge nuhkwewa fah utuckot nuh suwos.”6
Tuh tiac kalmac tuh fihsrwacsr.7 Kuht enenuh in kihsac ac ahkmuhtahlye.
Kuht enenuh in fuhlwelah kuhtuh ma ac ma sahyac kapwack.
Kihsac ac ahkmuhtahlye pa masap inkuhsrao luo ma kuht olwelah in ahkos ke tempuhl muhtahl. Masap luo inge oacna sie sin sie tuh tiac ma sefanna. In kihsac kalmac in fuhlwelah ma se in eis ma se sahyac ma sacohk. Ke pacl met, mwet luhn God kihsaclah ma lahp ke un sip nahtuhlos in ahkfuhlwactye tuhkuh luhn Messiah. Nuh ke fihlin pacl uh, Mwet Luhlahlfongi tuh kihsaclah kena sifacna, mani, ac finne moul lalos nuh sin Mwet Lahngo.
Oasr sesr nuhkwewa, yohk ac srihk, ma kuht enenuh in kihsac in ukwe Jisus Kraist wo liki met.8 Kihsac lasr ahkkahlwemye ma kuht sacohkkihn. Kihsac uh muhtahl ac kaksakihnyuck sin Leum.9
Ahkmuhtahlye uh siena liki kihsac ke ohiyac yohk srihpac se. Ke kuht ahkmuhtahlye ma se, kuht tiac liki in orekmakihnyuck fin loang ah. Liki na, kuht orekmakihn ke kuhlwacnsap luhn Leum. Kuht ahkmuhtahlye nuh Sel ac srihpac muhtahl Lal.10 Kuht eis mwe insewowo ma Leum El use nuh sesr ac srihke in ahkyohkye, ahkkahlwemye, ac eklac in kahsruh yohk in muhsaheack tohkohsrahi luhn Leum.11
Suhpuhs sesr ac siyuck in kihsaclah moul lasr nuh sin Mwet Lahngo. Tuh siyuck sesr nuhkwewa in ahkmuhtahlye moul lasr nuh Sel.
Sie Orekma, Sie Engan, Sie Srihpac
Ke kuht suk in ahkmuhtahlye moul lasr ac ngwact nuh Kraist ke nuhnak kwewa,12 ma nuhkwewa sahyac fihsrwacsrlah. Moul uh tilac puhla oacna tahk loes ke ma pucs kuht enenuh oruh ma apkuhran puhtatlac.
Tukun lusacn pacl, eklac nuh ke orekma sefanna.
Engan sefanna.
Srihpac muhtahl sefanna.
Ma se inge pa orekma ke luhngse ac kuhlwacnsapuh God. Pa luhngse ac kuhlwacnsapuh tuhlihk nahtuhl God.13
Ke kuht ngwetwacng liye moul lasr ac liye ma puhkantwen kuh enenuh in oruh, kuh puhla ullac nuh pwacye. Ke kuht liye ma sefanna—luhngse ac kuhlwacnsap God ac tuhlihk Nahtuhl, ke ohiyac puhkantwen—na kuht kuh in orekma nuh ke ma inge ke engan.
Pa inge ohiyac se ma kuht sang nguhnasr kwewa—in kihsac kuhtwena ma lah sruok kuht nuh ten ac ahkmuhtahlye ma sahyac nuh sin Leum ac srihpac Lal.
Kahs in Kahsruh ac Luhlahlfongi
Tamuhlwel sacohk wiyuck, kawuck sacohk luhk, oasr pacl ke kowos nuhnkuh kowos finsrak in oruh ma yohk likina met. Pahpah luhngse tuhmom Inkuhsrao El etuh insiom. El etuh lah kom tiac kuh in oruh ma nuhkwewa ma insiom ke oruh. Tuh kom kuh in luhngse ac kuhlwacnsapwacl God. Kom kuh in oruh suwohs lowos in liyacacng masap Lal. Kom kuh in luhngse ac kuhlwacnsapuh tuhlihk nahtuhl. Ac orekma lom ahkmuhtahlye insiom ac ahkoekomlac nuh ke pacl wolacna fahsruh.
Pa inge ma katinmas se suc oasr ke nien mani luhn tempuhl el kahlwem kac. El etuh tuh mani el sang fah tiac ekuhllah ohiyacn mani luhn acn Israel nohfohn, tuh kuh in ekuhllahke srihpen, finne ma srihsrihk, pa ma lal nuhkwewa.
Na, kawuck sacohk luhk ac mwet tuhma lutlut wiyuck luhn Jisus Kraist, lwelah kuht in tiac “ullac ke oruh ma wo,” mweyen kuht “ac akiyac pwelucng se ke pahyuck wolacna an.” Ac liki ma srihsrihk lasr “ma yohk srihpac” ac tuhkuh.14
Nga fahkwack tuh ma inge pwacye, ac nga oacyacpac fahk tuh Jisus Kraist pa Mwet Kol lasr, Mwet in Molwelah lasr, ac Inkacnek sefanna in fohlohk nuh sin Pahpah kuloh lasr Inkuhsrao. Ke ine muhtahl luhn Jisus Kraist, amen.