Kuhpahsr Lasr Yurin God
Finne fuhkah ma ohiyacn moul lasr uh, kuht kuh in luhlahlfongi God ac konwacwacack engan in El.
Oacna Job ke Wuhlweacng Mahtuh, ke pacl in kweok oasr mwet sahp puhla muh God El fahsr luhkwelos. Ke srihpen kuht etuh tuh oasr kuh luhn God in kosrwaclah kuh eislah kuhtwena kweok, sahp kuht ke tohrkahskahs El fin lwelah, sahp siyuck, “God El fin tiac use ma nga pruhe kac uh, nga kuh in luhlahlfongi Kacl fuhkah?” Ke sie pacl ke kweok upac lal, Job suc suwohswohs el fahk muh:
“Mea, komtal tiana akilen lah God pa oru ma inge? El oakiya sie sruhf in sruokyuwi.
“Tuh wanginna mwet porongeyu. Nga kwafe in oasr nununku suwohs orek nu sik, tuh wanginna mwet long.”1
Ke top Lal nuh sel Job, God El siyuck, “Ya kom srike in akkalemye mu nga sesuwos, a kom pa pwaye uh?”2 Ke kahs sahyac, “Kuh kom ac sang ma koluk inge nuh sihk? Yac kom ac ahkkahlwemye sesuwohs luhk tuh in wo nuh sum?”3 Jehova El lihksreni ahkacsmakuhnuhl Job ke kuh yohk ac etuh yohk Lal, ac Job el mongfihsrwacsrlac na upac ac fahk lah wacngihn ma lal, suhfallaclac tiac oacna etuh, kuh, suwohswohs luhn God ac el tiac kuh in tu ye nuhnuhnkuh luhn God Kuhlacna.
“Leum God, nga etu lah ku nukewa oasr sum,” el fahk, “ac kom ku in oru ma nukewa kom lungse.
“… Nga tuh kaskas ke ma su nga tia kalem kac, ke ma usrnguk su yoklala nu sik in etu kac. …
“Ke ma inge nga arulana mwekin ke ma nukewa nga tuh fahk ah, ac nga akkalemye auli luk ke nga muta inmasrlon kutkut ac apat.”4
Sahflahiyac ah, Job el eis lacne wo in liye Leum, ac “Leum God El akinsewowoye tafun moul lal Job tok yohk liki na tafun moul lal meet ah.”5
Kuht tahfonglac fin kuht pahngon na muh kuht kuh in nuhnuhnkuh God, in nuhnkuh, ke srihkasrak, “Nga tiac engan, sahp God pa ahkkolukye yuc uh.” Nuh sesr, tuhlihk suhkkawihl Nahtuhl fin facl puhtatlac se, suc etuh srihk ke ma meet ah, ma ingena, ac ma fah tuhkuh, El fahk muh “Ma nuhkwewa oasr Yuruk, tuh Nga etuh ma nuhkwewa.”6 Jacob el use kahs in kahsruh: “Nikmet suk in kai Leum, tuhsruhk in eis kaiyuck ke pahol. Tuh liye, kowos sifacna etuh lah El kai ke lahlmwetmwet, ac ke nuhnuhnkuh suwohs, ac ke pahkotwen yohk, ke orekma Lal nuhkwewa.”7
Kuhtuh mwet uh nuhnkuh muh olwelah luhn God pa kuht fin ahksol na mwe insewowo ac tuhkuh ke pacl na sa. Elos sahp ac nuhnkuh, “Nga fin som kuhlwacnsap ke misin, God El ac ahkinsewowoye yuc in pahyuck ac in oasr tuhlihk nuhtihk” kuh “Nga fin tiac oruh homework luhk ke Lwen Sacnri, God El ac ahkinsewowoye yuc ke teng wowo” kuh “Nga fin sang sie tahfuh singucul, God El ac ahkinsewowoye yuc ke orekma se ma nga kena sruokyac.” Fin moul uh tiac sikyak nuh ke ohiyac se inge kuh nuh ke lusen pacl ma kuht finsrakkihn kac, sahp elos ac puhlakihn pihlesreyuck sin God. Tuh tiac ohinge ke ohiyacn moul muhtahl. Kuht tiac in nuhnkuh tuh plwacn luhn God oacna stoh se ma kuht (1) liye mwe insewowo kuht luhngse, (2) sang luhpah se ke orekma wowo in fal in eis, ac (3) eis ingena.8
Pwacye lah God El ac karihngihn wuhlweacng ac olwelah Lal nuh sesr kais sie. Kuht tiac enenuh in fosrngah ke ma ingacn.9 Kuh in iwaclah luhn Jisus Kraist—suc som ye ma nuhkwewa na sohkwack nuh lucng10 ac oasr kuh nuhkwewa lal inkuhsrao ac fin facluh11—pa oruh God El kuh ac fah ahkpwacyeiye olwelah Lal. Enenuh se na kuht in ahkfuhlwactye ac ahkos masap Lal, tuhsruhk tiac kalma pa mwe insewowo nuhkwewa tuhkuh tukun na ahkostwen nuh ke masap12 uh luhmweyucklac, oreklac, ac kuniyucki pacl fal nuh ke finsrak lasr uh. Kuht sang kuhiyacsr tuhsruhk enenuh na in sang nuh Sel kolyuck luhn mwe insewowo ingacn, kwewa na ma facluh ac inkuhsrao.
Prestuhn Brigham Young el ahkuhtweyac lah luhlahlfongi lal tiac muhsahyak ke kuhtuh ma finsrakkihnyuck kuh mwe insewowo tuhsruhk ma ke srihpen el lohoh kac ac ke kuhpahsr lal nuh sin Jisus Kraist. El fahk muh luhlahlfongi luhk uh tiacna fihliyucki fin orekma luhn Leum ke fin tuhka in meoa uh, ke utuckuh luhn mwet uh nuh yenuh, … kuh ke ma wo El ahkinsewowoye mwet inge kuh nuh sin mwet ingoh, tiac pac ke lah kuht ahkinsewowoyeyuck kuh tiac ahkinsewowoyeyuck, tuhsruhk luhlahlfongi luhk uh nga fihliyac fin Leum Jisus Kraist, ac etwacack luhk nga eis Yohrohl.13
Auliyak ac ahkostwen lasr, kuhlwacnsap lasr, ac kihsac lasr uh yohk srihpac. Kuht ke wi inmahsrlolos suc ahkuhtweyucki sel Ether oacna “sesseslah ke orekma wo.”14 Tuh tiac yohk srihpac ke srihpen sihmihsyucklac ke sie puk inkuhsrao. Ma inge yohk srihpac ke srihpen ma inge oruh kuht wi orekma luhn God ac ma inge pa oruh kuht Weluhl ke eklac lasr sifacna liki ohiyacn moul luhn mwet facluh se nuh ke mwet luhlahlfongi.15 Pahpah tuhmasr Inkuhsrao El Usacluh sifacna ac Wen Nahtuhl nuh sesr, kuhpahsr fokoko se yohrohlos nuh ke luhng kuhlwacng ac iwaclah luhn Jisus Kraist, Mwet in Molwelah lasr.
Kuht tuhlihk nuhtin God, akmuhsraiyucklac in eis moul kawihl ac moul ma pahtpaht. Ohiyac sahflah lasr pa in usru ma nuhkwewa Lal, “ac kut fah oayapa ipeis yurin Christ.”16 Pahpah tuhmasr El kena kol kuht kais sie nuh ke inkacnek in olwelah Lal kais kuhtuh in kahsre kuht sifacna ke ohiyac fal nuh sesr ac plwacn Lal nuh ke engan yohk lasr Yohrohl. Kuht kuh in kapkapwack in eis luhlahlfongi yohk ke Pahpah ac Wen, puhla yohkwelihk luhn Luhngse Lalos, ac kahsruh ac kolyuck luhn Nguhn Muhtahl.
Finne ohinge, inkacnek se inge tiac fihsrwacsr nuh sesr. Oasr enenweyac in ahkmuhtahlyeyucklac nuh kac in muh fihsracsr. Jisus El fahk:
“Nga fain pwaye, ac Papa tumuk El mwet yukwiya.
“El kotala lah nukewa in nga ma tia isus fahko, ac [Pahpah] el kofela lah nukewa ma isus fahko tuh in nasnas ac isus fahko pus liki meet ah.”17
Ohiyacn God in ahknwacsnwacsye ac ahkmuhtahlye, enenuh in oasr kweok ac orekma upac. In esam kahs lal Paul, “kut fah oayapa ipeis yurin Christ; tuh kut fin wi Christ keok, kut fah oayapa welul in wolana lal.”18
Na, finne inmahsrlon e in ahknwacsnwacs, likina in ahngyahng sin God, fahsr fototo nuh sin God. Pahngon Pahpah ke inen Wen. Weluhlos fahsr ke Nguhn, pengana lwen. Sang pacl Lalos in ahkkahlwemye oaru Lalos nuh sum. Srihke in etwaclos na pwacye ac etwekom sifacna na pwacye.19 Lwelah God Elan kuhtanglah.20 Mwet Lahngo El ahkkweye kuht:
In porongel suc pa mwet iwe yurin Pahpah, suc ngihsre keim ye muhtahl—
Fahk: Pahpah, liye kweok ac misac lal suc tiac oruh ma koluk, ke el suc kom luhngkihn; liye srahn Wen nuhtum ma kahklah, srahl suc kom sang tuh kom sifacna kuh in ahkfuhlwactyeyuck;
Ohinge, Pahpah, karuhnguhnwacng tamuhlwel wiyuck [ac tahmtahel wiyuck] inge ma luhlahlfongi ke inek, tuh elos in kuh in tuhkuh nuh Yuruk ac eis moul ma pahtpaht.21
Nuhnkuh ke kuhtuh mwe srihkasrak luhn mukul ac muhtwacn oaru suc luhlahlfongi God, etuh na lah mwe insewowo wihliyuck Lal ac puhtati nuh fwaclos ke moul kuh ke misac. Luhlahlfongi lalos tiac ma ke srihpen ma suc God El tiac oruh kuh oruh ke sie ohiyac kuh ke sie pacl ah, tuhsruhk tuh ke etuh lalos Kacl muh pa Pahpah Kuhlwacng ac Jisus Kraist muh paa Mwet in Molwelah oaru lalos.
Ke Abraham el apkuhran in kihsackihnyucklac sin mwet tol Egypt luhn Elkenah, el pahngon God in kahsrel, ac El kahsrel.21 In moul lal Abraham el eklac pahpah tuhmwacn mwet luhlahlfongi ke fihtac luhn sucu nuhkwewa fin facluh ac ahkinsewowoyeyuck.23 Met liki ma inge, ke loang se pacna ingacn, mwet tol se pacna luhn Elkenah el uniyac muhtwacn nwacsnwacs tolu ke srihpen suwohs lalos … elos ac tiac epahsr ac alu nuh sin ma sruhlwaclah oreklac ke sahk kuh yot.24 Elos misac we oacna mwet acnwucki uh.
Joseph ke pacl omeet ah, suc fuhsr na kuhkwackihnyucklac nuh ke moul in kohs sin tamuhlwel wiyacl sifacna, ke kweok lal el forlah nuh sin God. Kais kuhtuh na ne, yohkwaclihk wal lal ke lohm sin mwet kol lal fin acn Egypt tuhsruhktuh kapkapwack inge eisyucklac luhkwel ke srihpen ahkkoluk kikiacp luhn muhtwacn kiyacl Potiphar Sahp Joseph el kuh na in nuhnkuh, “Na nga srohuh ke srihpen nga liyacacng masap ke nwacsnwacs.” Sahyac na el sifilpac forlah nuh sin God ac tuh ahkinsewowoyeyuck el finne ke nien kapihr. Joseph el sifilpac ahkkweokyeyuck ke sie mwet srohoh suc el kawuckyak se, finne el tuh olweacng nuh sel Joseph, el muhlkuhnuhllah tukun el taltallah fohlohklac nuh ke kunohkohn lal sel Pharoah. Fahsr ne, oacna ke kom etuh, Leum El kihfas inkacnek tuh Joseph elan sruokyac wal fuhlwact se emet fototo nuh sel Pharaoh, ahkkweyacl Joseph in molwelah mwet Israel. Pwacye lah Joseph el sahp kuh na in ahkkahlwemye “tuh in ma nukewa, God El oru tuh in oasr wo tuku kac nu selos su lungse El.”25
Abinadi el insacnweacng na in ahksahfye kunohkohn muhtahl lal. “Tuh nga sahflah ke pweng luhk,” el fahk, “ac wacngihn elyah lah [sikyak nuh sihk], fin fahsr ne wo nga painmoullac.”26 El misac ke luhlahlfongi lal, ac pwacye lah el moliyucklac ke tohkohsrahi luhn God, ac mwet sefanna el ekuhllah nuh luhlahlfongi, Alma, el ekuhllah sramsram mahtuh luhn mwet Nephi fahfahlac na ne ke tuhkuh luhn Kraist.
Alma ac Amulek tuh moliyucklac liki nien srohoh fin acn Ammonihah tukun elos pruhe, ac mwet suc ahkkweokyaclos tuh misac.27 Tuhsruhk met liki ma inge, mwet ahkkweok inge tuh tohllah muhtwacn suc luhlahlfongi ac tuhlihk nahtuhlos nuh ke e fihrihr. Alma, suc liye ma ahksahngweng inge ke suhpwacr kosrweyucklac sin Nguhn in tiac orekmakihn kuh luhn God in “molweloslac liki e uh”28 tuh elos in eisyuck nuh sin God ke wolacna.29
Mwet Pahluh Joseph Smith ke el kweok in kaclpous fin acn Liberty, Missouri, ac tiac kuh in kahsruh Mwet Luhlahlfongi ke elos ahkkolukyeyuck ac lihsyucklac liki lohm selos ke pacl ohyucu na upac. “O God, kom oasr yac?” Joseph el tuhng [siyuck lah]. Lusackah Poum fah an na?30 In topuk, Leum El olwelah muh: Ongaiyac lom ac mwe kweok lom ma na nuh ke kihtin pacl, ac na, kom fin muhtwacnglah wo, God El fah kaksakihn kom. … Kom sonna oacna Job.31
Ke sahflah, Joseph el kuh in weluhl Job fahk muh finne [God] El eislah moul luhk, tuh ngwac luhlahlfongi in El.32
Elder Brook P. Hales el akacsruhi ke sramsram se lal Tahmtahel Patricia Parkinson, suc isuslac wona muhtahl, tuhsruhk ke el yac 11 ah kunlac muhtahl.
Elder Hales el tuh fahk: “Nga etwacl Pat ke yac puhs ac kihtin pacl somlah ah, nga fahk nuh sel lah nga luhngse na pwacye ke el wo ac engan pacl nuhkwewa. El topuk, ‘Koacl, kom soenna wiyuc nuh lohm sihk ah, pwacye? Oasr pacl luhk. Oasr pacl upac nga puhlakihn suhpwacr, ac nga tuhng upac.’ Ne ohinge, el fahk, ‘Ke pacl se muhtuhk muhtwacwacack ohkohklah, upac suhpah, tuhsruhk nga etuh lah Pahpah Lucng ac Mwet Lahngo Elos wiyuc ac sucu luhk. … Nuh selos suc siyuck sihk fin nga ahngyahng mweyen nga kun, nga topuk, ‘Suc ngac ahngyahng se uh? Pahpah Lucng El wiyuc in ma inge; nga tiac muhkuh. El oasr yuruk pacl nuhkwewa.’”33
Ke sahflah, mwe insewowo se in oasr kuhpahsr fokoko lasr nuh sin Pahaph ac Wen pa kuht suk uh. Ac fah ekuhllah moul lasr ac ahkinsewowoye kuht ne tohk ma pahtpaht. Kuht ac weluhl Paul in fahkwack lah “keok kac in pacl se inge tiana ku in lumweyuk nu ke wolana su God El ac fah akkalemye nu sesr.”34 Nga fahkwack loh luhk lah finne fuhkah ma ohiyacn moul lasr uh, kuht kuh in luhlahlfongi God ac konwacwacack engan in El.
“Luhlalfongi Leum God ke insiom kewa. Nimet lulalfongi etu lom sifacna.
”Esam Leum God in ma nukewa kom oru ac El ac fah akkalemye inkanek suwohs nu sum.”35
Ke inen Jisus Kraist, amen.