Ohiyac Muhtahl ac Finsrak Ma Pahtpaht Lom
Nga suli kom in ahksuwohsye moul lom an nuh sin Jisus Kraist ac esam ma pwacye yohk ke theme luhn Muhtwacn Fuhsr ah.
Tahmtahel sacohk wiyuck, kuloh ke oasr lowos uh. Nga arulacna srui in wi tuhkweni luhn muhtwacn ke toeni luhlahp se inge. Utuckuh pac pacl wo luhk in wi kuhlahs luhn Muhtwacn Fuhsr. Tuhsruhk lwelah ngacn fahkwack ke sie ma kahlwem—Nga tiac fuhsr, ac tiac muhtwacn se pa nga! Nga lotwelah, ohinge, lah nga tiac puhla srisrilac fin nga kuh in wi muhtwacn fuhsr inge ritwelah theme lalos ke Young Women uh. Mwe lutlut loal se ma lutiyuck ke theme luhn Muhtwacn Fuhsr uh1 yohk srihpac nuh sin muhtwacn fuhsr uh, tuhsruhk fal nuh sin mwet nuhkwewa, wi kuhtuh sesr suc tiac muhtwacn fuhsr.
Theme luhn Muhtwacn Fuhsr uh muhtwacwacack ohinge, “Nga sie muhtwacn sacohk nuhtin ninac ac pahpah inkuhsrao, ke ohiyac muhtahl ac finsrak ma pahtpaht.”2 Sacntacns soko inge oasr ma yohk srihpac pwacye ahkosr kac. Ma se met, kom muhtwacn sacohk se. Wacngihn ma kom oruh—kuh tiac oruh—kuh in ekuhllah ma se ingacn. God El Luhngse kom ke sripen kom muhtwacn nguhn Nahtuhl. Kuhtuh pacl uh kuht kuh in tiac puhla luhngse Lal uh, tuhsruhk oasr pacl nuhkwewa. Luhngse luhn God uh suwohswohs.3 Kuh lasr in akihlen luhngse se inge uh wacngihn.
Nguhn Muhtahl el oruh kunohkohn yohk srihpac lal in fahkwack luhngse luhn God nuh sesr.4 Tuh, kolyuck luhn Nguhn Muhtahl uh kuh in “afyucfuh ke puhla fokoko, kain se ke ahngyahng, sruhnga, … [kuh] sahngweng … oacna ke kom srihke in ema sie grape ke pacl se kom kang pwepuh fol se uh. … [Sie emah] el kuhtanglah emah se sahyac ah.”5 Na oacyacpac, elah ma ahkloesye kuht lac liki Nguhn Muhtahl, weacng ma koluk uh, weacng ma koluk,6 oruh in upac kuht in liye luhngse luhn God nuh sesr uh.
Etuh lasr ke luhngse luhn God kuh in lohsrlah ke ma upac ac mas luhn mahno kuh nuhnak, ac kuhtuh ma sahyac. Ke ma inge kwewa, kahs in kahsruh luhn mwet kol kuh mwet ma oasr etuh la wacna wo nuh sesr. Kuht kuh pac in srihke in ahkwoyelah kahlwem lasr nuhke luhngse luhn God ke kuht siyuck sesr sifacna uh, “Kuh luhngse luhk nuh sin God uh oasr ke pacl nuhkwewa kuh nga luhngse El ke pacl wo nuh sihk, ac tiac arlac ke pacl koluk nuh sihk?”
Ma pwacye se ahkluo an pa oasr ninac ac pahpah tuhmwacsr inkuhsrao, pahpah se ac ninac se.7 Mwe lutlut kacn Ninac Inkuhsrao uh tuhkuh ke mwe fwackyuck ac ke luhlahlfongi luhn Mwet Luhlahlfongi ke Lwen sahflah. Prestuhn Dallin H. Oaks el ahkuhtweyac yohk srihpaciyacn ma pwacye se inge: “Mwe lutlut ke alu uh muhtwacwacack ke ninac ac pahpah inkuhsrao. Finsrak se emeet lasr pa in oacna eltahl.”8
Srihklac ma etweyuck kacn ninac inkuhsrao, tuhsruhk ma kuht etuh uh ahkfototoyeyucklac ke ma sihmlac ma sukokyak ke Gospel Library uh.9 Ke pacl se ma kom ritwelah ma inge uh, kom ac etuh ma nuhkwewa ma nga etuh ke ma se inge. Nga finsrak ngacn etuh yohk pac kac. Kom pac sahp srwackna oasr kihsensiyuck lom ac kena lom in konwacack pac kuhtuh top nuhkac ah. Suk kahlwem yohk kac pa ip se ma yohk srihpac ke kapkapwack luhn nguhn lasr, tuhsruhk nuhnak muhnahs sensenkihn. Srihpac uh tiac kuh in ahollah fwackyuck.
Ma motkweyuck uh fah tiac kol kom lac nuh ke etwacack yohk luhn nguhn, tuhsruhk kuh in kohllah nuh ke kikiacp kuh ekuhllah lohacng lasr liki ma fwackyuck tari.10 Mwet in Molwelah El luti mwet tuhma lutlut Lal, “Pruhe pacl nuhkwewa nuh sin Pahpah ke innek.”11 Kuht ukwe pactuhn se inge ac alu nuh sin Pahpah tuhmasr Inkuhsrao ke inen Jisus Kraist ac tiac pruhe nuh sin Ninac kiacsr Inkuhsrao.12
Ekena pacl se ma God El kuneyac mwet pahluh Lal, ituckyang kuh lalos in sramsram Aholuhl. Tuhsruhk elos tiacna fahkwack ke mwe lutlut ma elos sifacna orwaclah”13 kuh luti ke ma ma tiacna ahkkahlwemyeyuck. Nuhnkuh ke kahs lal mwet pahluh Balaam ke Wuhlweacng Mahtuh, ma srihfeyuck in kuhnahoslah mwet Israel in wo nuh sin acn Moab. Balaam el fahk, “Fin [tohkohsrah luhn acn Moab] el ac use sie lohm nwacnwaclah ke kol ac silfuhr, nga tiac kuh in som ahluhkwelah fahk luhn Leum nuh sihk, in oruh srihk liki kuh yohk liki.”14 Mwet pahluh ke lwen-sahflah kuh pacl inge el oacpacna. In sapkihn mwe fwackyuck sin God El tiac wo ac wacngihn ma tuhkuh kac. Kuht sanel Leum ac pacl Lal in ikucslah ma pwacye Lal ke pacl Lal sifacna ke ohiyac ma El oakiyac inge.15
Ma pwacye ahktolu ke muhtwacwacackiyacn theme luhn Muhtwacn Fuhsr pa oasr “ohiyac muhtahl se” lasr. Kuht pa inge na pwacye. “Isuslac” na ke nguhn, kuht eislah sin pahpah ac ninac inkuhsrao,16 ac tiac enenuh orekma upac sesr. Ma se kacsr inge pa yohk sripac emeet uh, finne lah kuht sulaclah in ahkuhtwekuhti fuhkah. In kahlwem ke ma pwacye se inge el yohk sripac nuh sin mwet nuhkwewa tuh yohkiyac na mwet ma wi u ma ahkkolukyeyuck uh. Esam lah ma yohk srihpac se emet yurowos uh pa ma pwacye lah kowos pa tuhlihk nuhtin God.
Ma pwacye se ahkahkosr an pa oasr “moul ma pahtpaht” lasr. Inkacnek se inge ac tiacna fohrsiyuck nuh sesr. Tukun misac, kuht fah eis ma fal nuhke orwaclah lasr ac “pwacyekihn [muhkwena] ma [kuht] luhngse eis muhkwena.”17 Etweyacn finsrak ma pahtpaht lasr uh epacl nuh ke sulwaclah lasr uh. Enenuh in orwaclah ac liyacacng olwelah muhtahl. Inkacnek in olwelah soko inge pa inkacnek soko ma kuht tuhkuh nuh yurin Kraist ac fal nuh ke ma pwacye ac ma pahtpaht, wacngihn eklac luhn masap sacn. Kuht tiac kuh in orwaclah innek lasr sifacna ac nuhnkuh muh God El ac use olwelah Lal. In nuhnkuh ke mwe insewowo Lal ke kuht tiac ukwe masap ma pahtpaht Lal oacna ke fwackyuck uh18 el tena suwohs, oacna ke kuht nuhnkuh muh kuht kuh in kahl sie stof fol ac “sulaclah” in tiac follah uh.
Kom kuh in etuh lah nga tuh karihngihn mwet maskihn art lalos. Ma sikyak wo nuh selos emeet uh ma tuhkuh ke ukweyuck wo plwacn ma oreklac in ukweyuck uh. Finne elos etuh ma se inge, kuhtuh sin mwet mas inge srihke in orekmakihn seina plwacn. Elos fahk, “Nga tiac ke eis ono puhkantwen” kuh “Nga tiac ke eis test puhkantwen.” Aok, mwet mas inge elos sukohsohk in oruh sulaclah lalos sifacna, tuhsruhk elos tiac sulaclah ma fal nuh selos, ma sikyak nuh selos uh arulacna upac. Mwet ma maskihn art lalos uh tiac kuh in sulaclah innek fihsrwacsr na sang mwacta uh nuh sin taktuh nuhke art uh ke ma sikyak tena wo uh.
Ma se inge el pwacye pac nuh sesr. Plwacn lal Pahpah Lucng uh kol kuht nuhke ma wo emeet. Kuht sukohsohk in sulaclah, tuhsruhk kuht tiac kuh in sulaclah ma ac tuhkuh kac uh ke kuht tiac ukwe innek ma utuckuh nuh sesr uh.19 Leum El fahk, “El suc kuhnahoslah masap, ac tiac ukwe masap, tuhsruhk suk in orwaclah masap la sifacna, … tiac kuh in ahknwacsnwacsyeyucklac ke masap, kuh nuhnak muhnahs, masap in lain, kuh nuhnuhnkweyuck.”20 Kuht tiac kuh in fahsr liki innek lal Pahpah Lucng tari kuht sang koluk uh nuh Sel ke ma tiac wo kuht puhlakihn kac.
Pacruhkrahf ahkluo ke theme luhn Young Women el rit ohinge: “Ke nga ekihn sie mwet tuhma lutlut Lal Jisus Kraist, Nga kampare in eklac oacna El. Nga suk ac mukwikwi ke fwackyuck ma tuhkuh nuh sihk ac luti nuh sin mwet sahyac ke ine muhtahl Lal.” Kuht kuh in sramtweack luhlahlfongi lasr ke Jisus Kraist ke kuht orekma fal nuhke luhlahlfongi lasr uh.21 Kuht kuh in eis mwe sang “in etuh lah Jisus Kraist pa Wen nuhtin “God, ac acnwucki El ke ma koluk luhn facluh.” Kuh kuht kuh in eis mwe sang in luhlahlfongi ke kahs luhn mwet ma etuh,22 neke na kuht sifacna etuh. Kuht kuh in ukwe mwe lutlut luhn Mwet Lahngo ac kahsruh mwet sahyac in tuhkuh nuh Yohrohl. Ke ohiyac se inge, kuht Weluhl ke orekma Lal.23
Theme luhn Muhtwacn Fuhsr uh el tahfwelah, “Nga ac tu oacna sie mwet loh luhn God ke pacl nuhkwewa ac ke ma nuhkwewa ac ke acn nuhkwewa.” Mempucr nuhkwewa ke Alu uh enenweyuck in mwet loh luhn God,24 finne Mwet Itngucul kunweyucki in ekihn mwet loh ke inen Kraist.25 Nuhnkuh ke sie sritacl soccer ma mwet in sang tweng se muhkwena karihngihn tweng se. Ke wacngihn kahsruh luhn tim lal, mwet in sang tweng sac ac tiac kuh in karihngihn tweng sac ac tim lalos ac kuf pacl nuhkwewa. Oacna ke mwet nuhkwewa enenweyuck ke tim luhn Leum uh.26
Pacruhkrahf sahflah ke theme luhn Muhtwacn Fuhsr el muhtwacwacack, “Ke nga kampare nuhke moul ma pahtpaht, nga sacohkkihn mwe sang luhn auliyak ac suk in wollac ke kais sie lwen.” Ke sripen kihsackuhnlah luhn Mwet Lahngo lasr, kuht kuh in auliyak, lotwelah ke tahfonglac lasr, ac tiac nuhnuhnkweyuck kac. Prestuhn Russell M. Nelson el luti, “Puhkantwen mwet nuhnkuh muh auliyak pa mwe kaiyuck se. … Tuhsruhktuh puhla se ke nuhnuhnkweyuck inge tuhkuh sel Satan. El srihke in tulokihn kuht in ngwet nuhsel Jisus Kraist, suc tu ke paho ikacklah, finsrak ac mwesahs in onwelah, nuhnakmuhnahs, ahkkweye, ahknwacsnwacsye, ac ahkmuhtahlye kuht.”27
Ke kuht auliyak pwacye uh, kihnet mahi nuhkwewa wacngihnlac, lah meac kuht orwaclah, fuhkah luhpan upaciyac, kuh pacl ekahsr kuht kalweni na.28 Pacl nuhkwewa kuht auliyak ac suk nuhnak muhnahs ke inse pwacye, kuht kuh in nuhnak muhnahs nuh se.29 Fuhkah wolacnaiyacn mwe sang se kuht eis sin Mwet lahngo lasr Jisus kraist!30 Nguhn muhtahl el kuh in ahkpwacyei nuh sesr lah Leum El nuhnak muhnahs nuh sesr. Ke kuht akihlen engan ac mihs,31 auli lasr uh ac wacngihnlac,32 ac kuht tilac ahkkolukyeyuck ke ma koluk lasr.33
Finne tukun auliyak pwacye, tuhsruhktuh, kuht kuh in puhtatlac. Tiac kalmeyacn puhtatlac pa tiac fal auliyak lasr, kalmeyac uh na pa mwet uh muhnahs. Fuhkah woiyac in etuh lah Leum El liye muhnahs uh sienna liki ke El [liye] ma lainyac uh.” Kuht tiac enenuh in tahfuh luo ke kuh Luhn Leum in kahsrwe kuht ke muhnahs lasr ke sripen “ke Leum El sramsramkihn muhnahs lasr, pacl nuhkwewa ma ke pahkomuhta.”34
Theme luhn Muhtwacn Fuhsr uh ahksahfye ke, “Ke luhlahlfongi, nga fah ahkfokokoye lohm sihk ac sucu luhk, oruh ac karuhnguhnwacng wuhlweacng muhtahl, ac eis akwuck ac mwe insewowo luhn tempuhl muhtahl.” Ahkfokokoye lohm ac sucu kuh in kalmac pa oraclah kuhpahsr se met ke luhlahlfongi, us fahlac na luhlahlfongi se inge, kuh fohlohkohnwack.35 Sahyacn ma inge, kuh uh tuhkuh ke luhlahlfongi ke Jisus Kraist ac ke kuht orwaclah olwelah muhtahl lasr.
Lun tempuhl ah, kuht etwaclah lah suc kuht uh ac kuht muhta oyac met. Mwet suhmaht Roman suc pahngpahng Cicero el fahk, “In tiac etuh ke ma sikyak met liki kom isuslac uh pa ekihn tuhlihk se pacl nuhkwewa.”36 El sramsramkihn, ahok, ma sikyak met liki pacl lasr, tuhsruhktuh fahk lal kuh in ikacsyucklac nuh ke ma puhkantwen. Kuht moul ekihn tuhlihk ne tok fin kuht tiac lohacng nuhke ngetnget ma pahtpaht eisyuck in tempuhl uh. Lun tempuhl kuht kapkapwack ke Leum, “eis fohnlah luhn Nguhn Muhtahl,”37 ac eklac mwet sap na pwacye luhn Mwet Lahngo.38 Ke kuht liyacacng olwelah lasr uh, kuht eis kuh luhn God ke moul lasr uh.39
Nga suli kom in ahksuwohsye moul lom an nuhsel Jisus Kraist ac esam ma pwacye yohk ke theme luhn Muhtwacn Fuhsr ah. Fin kom luhngse, Nguhn muhtahl ac fah kol kom. Pahpah tuhmasr Inkuhsrao El kena kom in mwet usrui Lal ac eis ma nuhkwewa Lal uh.40 El tiac kuh in usot yohk liki. El tiac kuh in olwelah nuh sum yohk liki. El luhngse kom yohk liki ke kom etuh uh ac kena kom in engan ke moul se inge ac ke moul se fahsruh uh. Ke inen Jisus Kraist, amen.