Wiliakapwalahng Kupwuren Koht
Pein atail wiliakapw kin iangahki atail pwukoah en ehukiwei rongamwahu en Sises Krais ong sampah.
I inenen pereniki en President Russell M. Nelson ah kaweid kehlail en lukweri doadoahk en misineri oh en President M. Russell Ballard oh Marcos A. Aidukaitis ahr padahk kaselel me pid duwen misineri nimenseng o.
Doadoahk en misineri ehu ong Great Britail ni imwin pahr teio mweidohng ie I en katamando duwen irair sarawi kei me wia poahsoan en ai madamadau en iang wia misineri men.1 Ansou me I sounpar 15 riei pwutak me laud, Joe, sounpar 20, mihmi ni sounpar en kak iang wia misineri men. Nan United States, pwehki mahwen en wein Korea, me malaulau te me kin mweimweida en kin papah. Emente me kin alehdi pwukoah en misineri sang ehu ehu ward nan pahr ehu.2 E inenen kapwuriamwei ansou me bishop peki rehn Joe en tuhkiong aht pahpao ire wet. Joe wie kaukaunop nah doropwe en kohla sukuhl en wini. Aht pahpao, sohte kin pereniki kohla sarawi, e kounopada sent en sewese ih nan ah sukuhl ahpw sohte nohn pereniki Joe en kohla wia ah doadoahk en misineri. Pahpa padahkiong Joe me e pahn mwahu douluhl ma e kohla wia sukuhl en palien wini. Met wia lapalahn ire ehu nan aht peneinei o.
Ni ai kin kosokosoi ong riei pwutak laud me loalokong oh kin wia karasaras mwahu ong ie, se koasoanehdi ah madamadau en ma e pahn kohla wia ah misineri oh kapwandehla ah sukuhl o mih ni peidek siluh: (1) Sises Krais iei kisehn Koht? (2) Pwuhk en Mormon iei Mahsen en Koht? oh (3) Joseph Smith iei Soukohp en Kopwuropwurdo? Ma pasapeng en peidek pwukat ei, e sansal me Joe kak wia mehkot mwahu ni ah pahn kalohki rongamwahu en Sises Krais ong sampah sang ah pahn wiahla toahkte men ansou mwadang. 3
Nihpwongo I kapakap ni ngidingid oh ni ineng mehlel. Ngehno, ni mwomw sansal douluhl, kamehlele iong ie me pasapengpen peidek siluh wet koaros me mehlel. Met wia mwekid kapwuriamwei ehu ong ie. I diarada me mehlel siluh pwukat kak kamwakid pilipil koaros me I pahn wiahda erein ai mour. I pil ese me I pahn wia ai misineri ma I pahn alehdi ansou mwahu wet. Nan ansou en papah oh mwekid kan me ih kehn sang ngehno, I esehla me wiliakapwala mehlel kin kohsang ni alehdi kupwur en Koht, oh kitail kak mwekidki Ngehn Sarawi.
I ahnekier kadehde me Sises Krais me sarawi oh ih me Sounkomourpen sampah, Nihpwongo I alehdier kadehde sang ngehno duwen Pwuhk en Mormon4oh Soukohp Sosep Smith.
Sosep Smith Wiaier doadoahk nin Limen Kauno.
Amw kadehde pahn kehlailla ansou me ke ese nan amw mohngiong sang ni omw kapakap ma Soukohp Sosep Smith wia doadoahk nin limen Kauno. Sounpar waluh samwalahro, ehu ai pwukoah doadoahk nan Wahnpoaron Ehk-Riemen o iei wadek oh tehk doaropwehn Sosep Smith koaros oh nting kesempwal akan oh ropirop kan me karehda kokoudahn pwuhk enKosoiepen Souleng Kan.5 Ai kadehde oh ai pereniki Soukohp Sosep Smith inenen kehlailla oh laudla mwurin ai wadek pisetikpen ah mour oh doadoahk en soukohp me e alehdi.
En Sosep kawehwedi Pwuhk en Mormon sang ni kisakis oh manaman en Koht wia poahsoan en Kapwurupwurdoh.6 Pwuhk en Mormon inenen pisetik, intingdi mwahu, oh audaudki pasapengpen peidek en nan mour. Iei pil ehu kadehdepen Sises Krais. I kadehde me Sosep Smith me pwuhng, direkihla pwoson, oh wi doadoahk nin limen Kauno ong ni ah wahdo Pwuhk en Mormon.
Kaudiahl akan oh mwekid kan me ntingdiehr nan Doctrine oh Covenants kolokol kih kan, tiahk sarawi kan, oh inour sarawi kan me anahn ong komour oh waunla kohkohlahte. Re kasalehda soahng koaros me anahnpe ong ni koukoudahn Mwomwohdiso ahpw e pil wahdo mahsen mehlel kan me pahn mweidohng kitail en wewehki kahrepen mour oh kihong kitail kamarain soutuk.
Ehu karasaras laud me Sosep Smith wia nan pwukoah en soukohp emen dierekda nan irelaud 76 nan Doctrine oh Covenants Iei kaudiahl kapwuriamwei en nanleng, me iangahki wehi lingan akan, me Soukohp Sosep oh Sidney Rigdon alehdier ni February 16, 1832. Nan ansou pwuko, pali tohto en mwomwodios kan wie padapadahngki duwen Tomwpen Sounkomour ah sohte kak komourala pali laud en aramas. Re kamelelehier me malaulau pahn komourala, oh pali tohto pahn kohla nan kisiei oh lokolok, me iangahki lokolokme sohte imwi me inenen sakanakan me sohte me kak kosoiahda.7
Kaudiahl wet audaudki nan irelaud 76 kasalehda duwen kasansal kaselel duwen dake lingan kan wasa me pali ngeder en seri en Sahm Nanlengme poadidi nan arail mour mwohn mour wet pahn ahneki kapai laud mwurin ansou en kadeik o. Kasansal en wasa lingan siluh, me keieu tikitik me “siksang soangen wehwe koaros,”9 iei kin kapwungala padahk sapwung en ahnsowo me dene pali tohto en aramas akan pahn kohla nan kisiniei oh lokolok soutuk.
Ansou me ke diarada me Sosep Smith sounpar 26, sohte sukuhl laud, oh ekis de sohte nohn wehweki lokaia teikan me pwuhk sarawi kawewehdier sang ie, e wia en doadoahk nin limen Kauno. Nan iretikitik 17 en irelaud 76, e alehdi pepehm en doadoahngki lepin lokaia kan sohte pwung a kaidehn lokolok soutuk me Rongamwahu en Sohn doadoahngki.10
E kapwuriamwei mwurin sounpar 45 kaun en mwomwohdiso en Anglica me inenen kesempwal oh loaloakong nan ah pali,10 Frederic W. Farrar, intingihda Mour en Krais11 wehwe en lokolok soutuk nan pwuhk en King James Version en Pwuhk Sarawi kohsang ni kawehwe sapwung kan sang kawehwe kan en Hebrew oh Greek ong Lokaiahn Wai.12
Nan atail mwehi et tohto pwungkidahr lamalam me dene sohte pweinen dihp. Irail kin utung wiahda dihp oh sohte koluhla. Atail padahk mehlel kan me kapwurupwurdohu kaidehn te uhwong madamadau me palilaud en aramas pahn lokolok nan kisiniei oh lokolok soutuk ahpw e pil kaweidki me koluhla wia ehu kosonned uhdahn anahnepe pwehn alehda Tomwpen Sounkomouro oh iang sohsoki wein celestial. 13 I kadehde me Sosep Smith ni mehlel wia doadoahk nin limen Kauno ni ah kalelehdo Kapwurupwurdohn Sapwellime rongamwahu o!
Pwehki sang ni Kapwurupwurdohn rongamwahu en Sises Krais, se wehwehki kesempwal en koluhla oh “doadoahk en pwung” koaros.15 Kitail wehwehki duwen doadoahk kaselel me pid Tomwpen Sounkomour o oh Sapwellime tiahk sarawi kan oh inou kan, me iangahki me kin wiawi nan tehnpas sarawi.
“Doadoahk en pwung kan” kin pwilisang oh wia wahn wiliakapw. Wiliakapwala ni mehlel kohdo sang ni amw alehda sang loalomw oh inoukihda me ke pahn idawehn kupwuren Koht14 Laud en dahme pwarada kan oh kapai kan me kin kohsang wiliakapwala me mehlel oh tengeteng nan meleilei oh pein amw anahn en peren laud15mendahte kahpwal en mour wet.
Wekila ong Sounkomour o kin wekidala emen aramas ong sarawi, ipwsapahl, aramas mwakelekel—aramas kapw men rehn Krais Sises.17
Tohto Me Sohte ese me Mehlelo Pwehki Irail Sohte Ese Ia wasa Re pahn Diar Ie
Dahme pwukoa kan me kin pwilisang omw wiliakapwala? Nan Liberty Jail Soukohp Sosep intingihdi me tohto “me sohte ese me mehlel o pwehki irail sohte ese iawasa re pahn diar ie.”18
Nan sapwellimen Kauno kapehsehn Doctrine oh Covenants, Sapwellimen Kauno kahrepe ong kitail sansal. E mahsanih, “Eri, Ngehi Kauno, ese duwen apwal me pahn kohdong koaros pohn sampah, malipe nei ladu Sosep Smith, Jun., oh mahsanihong ih sang nanleng, oh kihong ih kosonned akan.” E pil doulahte oh masanih, “Me unsekpen Sapwellime rongamwahuo en kalohk sang me luwet oh koaros ong sampah pwon.”19 Me iangahki misineri kan. Met me iangahki emen emen kitail. Met anahne inenen sansal ong koarusie me kapaikidahr arail wiiliakapwalahng kupwuren Koht. Sounkomour o luke kitail en wia Sapwelime mahsen oh Sapwelime peh kan.20 Limpoak en Sounkomouro pahn wia serepatail. Sounkomour o padahkiong Sapwelime werek ko, “Kohwei wasa koaros, oh padahk ong wasa koaros.”21 Oh ong Sosep Smith, E masani, “Padahki ai rongamwahu et ong koaros aramas me saikinte alehda.”2
Wihk ehu mwurin kasarawih en Tehnpas Sarawi en Kirtland ni Epreil 3, 1836, me iei Rahn Sarawi en Easter oh pil Pasohpa, Kauno pwaredo ni kasansal kapwuriamwei ehu ong Sosep oh Oliver Cowdery. Kauno alehda tehnpas sarawio oh masanih, “Iei met tepin kapai me pahn kohiong pohn moangen nei aramas akan koaros.”23
Mwurin kasansal wet eh sohrala, nanleng kan pwurehng ritidahng kiht; Moses pwarada “oh kihong kiht … kih kan en kapwurepenehn Israel sang keimw pahieu kan en sampah, oh kahluwahdon keinek eiseko sang sahpw me mih paliepeng.”24
President Russell M. Nelson, atail soukohp en rahnpwukat me kolokol kih kohte, padahngki ni mensengo: “Kumwail mwanakapw pwulopwul kan kaunopongehr rahn pwukat ansou me kohpene en mehn Israel kan wiewia. Ni amwail pahn wia amwail doadoahk en misineri kei, kumwail iangehr ahneki pwukoah nan mwekid kesempwal wet!”24
Kosonned en Sounkomouro en ehukiwei rongamwahu en wiahla kisehn ihs kitail, kitail anahne wiliakapwalahng kupwuren Koht; kitail anahne en poakohng mehn mpatail kan, ehukiwei kapwurupwurdohn rongamwahu en Sises Krais, luke koaros en kohdo oh kilang. Ni ai wia towe men en Mwomwodiso wet, kitail pereniki pasapeng me Soukohp Sosep wiaiong John Wentworth, soun nting en Chicago Democrat, nan 1842. E wie pekipeki koasoipen Mwomwodiso wet. Sosep kaimwisekala ah pasapeng ni ah doadoahngki “Momouriki Mehlelo” me wia poahsoan en Iren Pwoson eisek siluho. Ire pwukat kihwei, ni oaretik, dahme pahn anahne wiawi.
“Sohte aramas men me sohte warohng pahn kak kauhdi keirdahn doadoahk; kailok pahn kak wiawi, pwihn suwed kan pahn ehupene, sounpei kan pahn kohpene, lahlawe pahn wiawi, ahpw me mehlel en Koht pahn kohwei ni eimah, ni wahu, oh uhtohr, lau e pahn lel nan sahpw laud koaros, pahn lel nan salengen aramas koaroslau doadoahk en Koht pahn pweida, oh Siowa Wasa lapalapie pahn mahsanih doadoahko imwseklahr.”26
Met iei poahngok ong dih kei en Souleng-en-Imwin-Rahn-Akan, ahpw mehlel misineri kan. Nan ngehn en Kolokol en Mehlel o, se inenen kapingki nan ansou apwal en soumwahu dou nan sampah misineri pwoson kan kin kalohkiwei te rongamwahu o. Misineri kan, se poakohng kumwail! Kauno peki emen emen kitail en ehukiwei Sapwellime rongamwahu o ni koasoi oh wiewia. Pein atail wiliakapwala me iangahki pwukoah en kalohki rongamwahu en Sises Krais ong sampah.
Kapai pen ehukiwei rongamwahu o me rasehng kalaudehla atail wekiong kupwuren Koht oh mweimweidohng Koht en kaunda atail mour kan.27 Se kapaiakihda meteikan en iang kehn “lapalahn wekila” en mohngiong.27 Mie mehlel en peren soutuk nan sewese ngehn kan ong Krais.29 Toutoukihla amw wekila ong pein kowe oh pil meteikan ieiwiadodohk komwad ehu.30 I kadehdehki mepwukat ni mwaren Sises Krais, ahmen.