Atail ehu ong Koht
Sohte lipilipil dahme kitail lelohng nan mour wet pahn kak sondi, kitail kak likih Koht oh diar popohl Reh.
Duwehte Sohp nan Kadehde Mering, nan ansou en lokolok ekei kin medewe me Kauno manokeiraila. Pwehki kitail ese me Kauno sapwelimaniki manaman en doarehla de ketkihsang kahpwal kan, kitail kin kak en lemehda akupwungki ma E sohte kin ketin kapwaiada, oh ekei pak peidengki, “Ma Koht sohte ketkihdo dahme ih kin kapakapki, ia mwomwen ai pahn pwoson Ih?” Mie ehu ansou nan ah lokolok, ohl mwahu Sohp ahpw koasoia:
“Eri ese me Koht ketin kaloke ie oh kapilkiniehdi sapwelime lidip.
“Itarete ei wie weriwer, ‘apw i sapwung!’ Sohte me sapeng ie; i kin pil luklukwerki ahi peksawas, sohte douluhl sawas i kak alehdi,”1
Nan Sapwellime pasapeng ong Sohp, Koht mahsanihong, “Ke wiahki me ngei me sapwung, a kowe me pwung?”2 De “Ke songosong kadehdehda me ngei me sapwung? Ke pahn kak inda me ngei me sapwung pwe ken kak pwungila?”3 Siowa kataman kieng Sohp duwen Sapwellime manaman koaros oh duwen soahng koaros me E ketin mwahngih, oh Sohp ni karakarahk wehkada me sohte mehkot me eh ese me karanih eripit, manaman, oh unsek en Koht oh sohte kak kadeik Wasa Lapalahpieh.
“I patohwan me sohte mehkot me komw sohte kak wia,” e ahpw patohwan, “oh sohte madamadau ehu me komw sohte pahn ese.
“Ih patohwan me ih sohte wehwehki; soahng kan me nohn kaselel ong ie, me ih sohte wehwehki.
“Iei me I patohwan namenengkilahr mehkoaros me I patohwandahr, oh I koluhlahr nan pwelpar oh pehs pwukat.”4
Ni imwio, Sohp ahniki ansou mwahu en kilang Kauno, oh “Kauno eri kupwuramwahwihala luhwen ahnsoun mouren Sohp laud sang ni tapio.”5
Kitail pweipwei pwehki atail madamadau ah kin luwet karehda kitail kin kak medewe en kadeik Koht, ni atail pahn kin medewe, karasarasiki,“Ih sohte insenamwahu, eri mwehin Koht sohte wia mehkot me pwung.” Ong kitail, Sapwellime serih kan nan sampa pwupwila wet, me ese ekiste duwen mahso, nan ansou wet, oh ansou kohkohdo kan, Eh ketin masanih, “Soahng koaros sansal ong ie, oh Ih ese irail koaros.”6 Seikop ahpw kaweidki me dehr song en kaweid Kauno, ahpw en alehda sapwellime kaweid nin lime. Pwe kilang, peihn kumwail ese me E kin ketin kaweidki eripit, oh ni pwung, oh mahk, ong ni Sapwellime doadoahk koaros.7
Ekei sohte wehwehki me Sapwelimen Koht inou kan me wehwehki en peikiong Ih pahn kasalehda pisetik en pweidah kan me koasondier. Irail kak medewe, “ma Ih pahn mehlelieng wia ai misin, Koht pahn ketin kapai iehda ong ni pwopwoud kan oh seri” de “ma ih pahn kainapwihsang ie wia ai sukuhl kan rahn sarawi, Koht pahn ketin kapai iehda nan ahi sukuhl” de “ma ih pwain ahi meirong, Koht pahn ketin kapaiehda ong doadoak me ih men wiahu.” Ma mour kin sohte idawehn dahme re kin medemedewe me pahn wiawi, re kin kak medewe me Koht sohte taman irail. Apw soang koaros sohte kin pweida nan mour wet. Kitail dehr kin medewe me sapwelimen kauno pilahn duwehte mesihn me kitail (1) kin kak padikte kapai, me kitail mwahuki, (2) kieng wen doadoahk mwahu me anahnepe, oh (3) dahme anahno kin ansouohte alahldi.8
Koht pahn udahn kapwaiada sapwellime inou oh padahkih emen emen kitail. Kitail dehr kin pwunodiki soang pwukat.9 Manaman en tomw en Sises Krais—me ketdihla pahn mehkoaros oh pil pwurada wasa ileile10 oh me kolokol manaman koaros en nanleng oh pohn sampah11—ese me Koht kak oh pahn udahn kapwaiada Sapwelime inoun kan. E inenen kesempwal kitail en idawehn Sapwellime kosonned akan, apw kaidehn kapai koros kohsang ni kosoned en peik12 me mwomwe, wiepe oh ahnsou me kitail kasik en wiawi. Kitail wia wen atail kak apw mweideng ih en kosonehdi kapai kan, koaros ong paliwar oh pali ngehn.
Preseden Brigham Young kawewehda me ah pwoson sohte poasonkihda pweidah kan me pwarada de kapai kan ahpw sang ni ah kadehdeh oh ehuieng Sises Krais. E mahsanih me: “Ai pwoson sohte mih pohn Sapwelline Kauno doadoahk me sansal pohn dekeh kan sehd akan, ong aramas akan me e ketkihdo wasaht, de pil kapai kan me ketkihong aramas pwukat de aramasoko, de pil ma kitail kapaida de soh, ahpw ai pwoson poasondahsang Kaun Sises Krais, oh eripit me i alehdihsang ih.”13
Atail koluhla oh peik, atail meirong oh atail doadoak mwahu kan udahn katapan. Kitail men iang duwehte irailoko me Ether kawehwe “asnou koaros wiewia me mwahu.”14 Apw e sohte itar pwehki ekei ireh kan nekinekla nan pwuhk en selestial. Mepwukat kesempwal pwe e kieng kitail ineng en iang patehng Sapwellimen Kauno doadoak oh iei me kahrehda kitail kak ehuieng Ih ni atail pahn weliakapwala oh wiahla souleng men.15 Dahme Samatail nanleng ketkieng kitail iei Pein Ih oh Sapwellime Ieros, ehupene paotoapoat ong Ira sang kupwurkalahngan en Sises Krais, atail Soundoar.
Kitail iei Sapwelimen Koht seri, me kohdo pohn sampah pwe en alehda mour soutik. Atail ouraman iei en wia Weliepe ehu rahn, “patehng keinek en Krais.”16 Samatail Nanleng onopadahr pwehn kahluwa emen emen kitail ong Sapwellime inou ni ahl akan me wiawidahr ong atail anahn oh Sapwelime kosondi en mour mwahu Reh. Kitail kak kasik wen koapwoaroapwoar laud oh pwoson Samatail Nanleng oh Sapwelime Ieros, Ara limpoak ah kin lalaudla, oh kansenamwahu en kaweid en Ngehn Sarawi.
Oh pil, ahl wet sohte mengei ong kitail. Mie soahng laud ehu me anahnepe pwe en kak mengei. Sises masanih:
“Ngei iei tuhkeu, oh Semei iei me kin apwalih.
“Rah koaros me uhsang ie me sohte wah [Sahmo] kin ketkihsang: oh rah koaros me kin mie wah, E kin ketin apwalih, pwe en kin kak mie wah tohto.”17
Wiepen en Koht ah kin ketin apwalih oh kamwakele, ni ansou me kin konehng, e kin inenen apwal oh kamadek ekei pak. Katamando en Paul kawehe me, “kitail euh rehn Krais; eri ma iei ah kitail en iang Ih lokolok, pwe kitail en pil iang Ih linganla.”18
Eri, nan werengen kisiniei wet eh wie karakar, kitail en dehr lingeringerieng Koht, ahpw kitail keido karanih Koht. Lukwerieng Samatail Nanleng ni mwaren Sapwellime Ieroso. Iang Ira aluhkiwei Ngehno, nan ehu ehu rahn akan. Mweidehng Ira wen ansou laud ehu pwe Ira en kasalehda Ara loaloapwoat ong kumwail. Kohdo oh ese Irahla mwahu oh pil esehla mwahu pein kowe.19 Mweidehng Kauno amwail mour pwon.20 Sounkomouro kamehlelehieng kitail:
“Rong Ih me wia weliepe rehn Sahmo, me kin pekipekimahngki atail wiewiah kan mwohn Silangih—
“Indinda: Semei, kilang lokolok oh mehlahn ih me sohte dipe, ih me Komw ketin keremwelki, komw sahkih ntahn Sapwellimomwi Ieroso, ntahn ih me Komw ketkihdi pwe Komw en linganla;
“Eri, Semei, kamourala irail riei pwutak kan [oh riei serepein kan] me kamehlele edei, pwe irail pahn kohdo rehi oh ahneki mour soutuk.”21
Kitail kilang karasaras kan eh ohl oh lih pwoson akan me kin likih Koht, koapwoaroapwoar me Sapwellime kapai en inou kan pahn mihmi rehrail nan arail mour nan mour wet de pil ansou en mehla. Arail pwoson sohte poasonkihda dahme Koht ketin wia de sohte wia nan ansou akan de ni ansou ehu ahpw sang ni arail ese Ih ni Ah wia Sapwellimarail Sahm soutuk oh Sises Krais arail Soundor.
Ni ansou me padre en Isip en Elkehna pahn meirongkihla Abram, E werieng Koht oh peki en ketin doarehla ih, oh Koht ketin doarehla.22 Abram mourla pwehn wiahla pahpahn me pwoson kan me wahrail kan me wia peneinei koaros en sampah me kapaida.23 Ansou kis samwalahro, pohn pei sarawiohte, padre en Elkehna pil patohwanda meipwon silimen “pwehki arail mwakelekel, irail pahn sohte porehdi oh pwongih koht akan en tuhke de takai.”24 Irail mehla wasahu pwehki dahme irail kamehlele.
Sosep mehn kawaho, me peihn rie pwutangko netkihla ih, ni ah wie lokolok e sohpeilang Koht. Ekis ekis kohla, e tepda wiahla aramas kesempwal nan imwen ah kaun nan Isip ahpw soahng koaros me e kodoahkehda ahpw kopwurupwursang pwehki loakaia likamw kan me en Podipar pwoud wiahng. Sosep kak medewehda, “Eri imweteng me ih pahn ihmwaneki ma ih pahn kolokol oh kapwaiada kosonned en mwakelekel.” Ahpw e pouselahte sopehiong Koht oh pil inenen pweida nan imweteng. Sosep pil ahnikihdi lokolok ni ansou me kempoakepah me e tuhwongdi nan imweteng pitihdi, monokehla ah inou ong Sosep, monokehla soahng koaros me pid duwen ih pwehki sang ni pwukoah ehu me e alehdi nan mwoalen kopwung en Paraoh. Ahpw ni imwilao, ni amwail ese, Kauno ketin malipehieng Sosep en alehdi pwukoah keieu laud en likilik oh manaman limwahn Paraoh, kieng Sosep en kak kapitala peneinei en Isrehl oh aramas tohtoh kei. Sosep udahn kak kasalehda ni sansal me soahng koaros kak doadoahk pene mwahu rehrail me kin poakoahng Koht.”25
Abinadi kosonehdi me e pahn udahn kapwaiada dahme e kosondien wia. “Ih kanekelahr ai koasoi,” E patohwan, “oh sohte katepe [dahme pahn wiawi ongie], ma iei e konehng me ih pahn mourla.”26 E kamala pwehki sang ah kamehlele, apw ni mehlel e komourla nan Sapwellimen Kauno wei, oh ih emen aramas keneinei, Alma, wekidala poadoapoaden mehn Nihpai kan oh iei me leledohng ketdohn Krais.
Alma oh Amulek wisiksang imweteng en Ammonihah sang ni pasapeng pen ara pekipek, oh sounkadip kan kamakamala.27 Mwowehsang mwo, sounkadip kan pil kesehlong irail lih akan oh serih kan nan kisiniei mwehlo pwehki sang dahme irail kamehlele. Alma, kadedehier duwen kahpwal laud, me ngehno mihla loale kaidehn mwekid en manaman en Koht pwe “en kapitala irail sang kisiniei o”28 pwe irail en kak alahlda nan lingan en Koht.29
Soukohp Sosep Smith luwetala nan imweteng en Liberty nan Missouri, sohla ah kehlail en kak kak sewese Souleng kan ni arail kin kamakam oh pokousang nan imwarail kan nan lemwlemwuro. “Oh maing Koht, ia komwi?” Sosep ahpw werikihla. Ia uwen werei en ai sohte pahn wia mehkot?”30 Kauno ahpw sapeng, oh inoukihda: “me ahmw kahpwal oh lokolok me ke pahn ahniki ahpw ongete ansou kis; oh ma, ke pahn powehdi mwahu, Koht pahn ketin kasapwul komwihda. … Ke saikinte duwehte Sohp.31
Ni eh leledohr ansouo, Sosep kakehr koasoia duwen Sohp, “Mendahte [Koht] kaleweiehdi, ih pahn koapwoaroapwoarki Ih.”32
Elder Brook P. Hales karasaieng soi pen Sister Patricia Parkinson me ipwikihdi meseh kau kak kilang mwahu ahpw ni ah lel sounpar [eisek] 11 e masukunla.
Elder Hales ahpw katamando me: “I ese Pad erein sounpar kei oh me keren I ndahiong me I kin kapingki en serepeino eh kin kalapw mehlel oh peren. Serepeino ahpw sapengki, ‘Eri, ke saikinte iang ie mi ni imweio, de ke iangehr? E kin mie ahi ansou kan. Mie ansou me I kin ahniki pwunod laud, oh kin sengiseng pak tohto.’ Ahpw, e pil kapatahieng, ‘Sang ansou me I tepda sohla kilang wasa, e koasoakoaiek, ahpw I ese me Sahm Nanleng oh Sounkomouro kin ketiket rehn ahi peneinei oh ngehi. Ong irail kan me kin idek rehi ma I kin lingeringerki pwehki ih maskun, I kin sapengki, ‘Ihs me I pahn lingeringer pah? Sahm Nanleng kin ieiang ie nan irair wet; I sohte kelkelehpw. E ketin ieiang ie ansou koaros.’”33
Ni imwin mehkoaros, e wia kapai en karanih oh ieiang Sahm oh Nah me kitail kin rapahki. E kasalehda wen wekpeseng kan oh e inenen katapan. Se pahn iang Paul kadehdehki “me lokolok en nan ansou wet [mour] ahnsou sohte pahn warohng en kak karasaieng lingan me pahn pwaredohng kitail.”34 I kadehdeki me sohte lipilipil dahme kitail lelohng nan mour wet pahn kak sondi, kitail kak likih Koht oh diar popohl Reh.
“Likih Kauno ni mohngiongomw unsek; dehr koapwoaroapwoarki peihn ahmw wewehki.
“Nan soahng koaros kin pohnese ih, oh e pahn kahluwa iuk nan ahl akan.”35
Ni mwaren Sises Krais, amen.