Kalohki Rongamwahu en Meleilei
Mie atail pwukoah sarawi en kin ehukiong en Sises Krais manaman oh meleilei ohng koaruhsie me pahn rong.
Maing Riei ko, I kasamwoh kumwail ong ni kapokon lap! Ngehi awihala rahn wet ni peren laud. I kin kapakapkin kumwail rahn koaros. I pil kapakapkiehr kapokon lap wet en wia ansoun wiliakapw ni palingehn ohng emen emen kumwail.
Sang kapokon lap samwalahro, kahpwal kan en sampah wie uselahte. Lipwen soumwahu lusuluso mihmihte nan mouratail kan. A met sampah wet pwuriamweikihla mahwen me kamasakada kiden ohl, lih, oh seri me sohte wia mehkot sapwung.
Soukohp ako kokohpkidahr rahn pwukat, iei ahnsoun mahwen kan, me sampah pwon pahn audaudki pingaping.1 Nin duwen werek kan en Sises Krais, se peki ni ngidingid kaun en wehi kan en kameleileidi nanpwungarail. Se peki rehn aramas koaros en kapakapkin irail akan me anahn, sewese irail akan me pwunod laud, oh rapahki Sapwellimen Kauno sawas pwehn kauhdi soangen uhpene kamasepwehk kan.
Riei ko, rongamwahu en Sises Krais inenen kesempwal rahn pwukat. Nanpwungsuwed kin uhwong Sapwellimen Sises Krais padahk kan koaros. I poakohng Sises Krais oh I kadehde me ihteSapwellime rongamwahu me wia ahl en meleilei mehlel. Rongamwahu wet iei rongamwahu en meleilei.2
Sapwellime rongamwahu kelepw me kak kamwahuwiala soahng koaros ni ahnsou me kiden aramas pwuriamweikihla ar masapwek. Ih uwen kesempwalpen atail pahn idawehn Sapwellimen Kauno ah mahsanihong tohnpadahk ko en “kohwei wasa koaros nin sampah oh padahkihong aramas koaros duwen rongamwahu.”3 Mie atail pwukoah sarawi en kin ehukiong mehteikan manaman oh meleilei en Sises Krais ohng emen emen me pahn rong oh mweideng Koht arail mour.
Aramas koaros me wiadahr inou sarawi rehn Koht inoukidahr me re pahn apwalih aramas oh papah irail me anahn akan. Kitail kak kasalehda pwoson Koht oh ansou koaros onopadahr kitail en sapeng ong irail me pahn idek duwen “koapwoarpwoar me mih [rehtail]”4 Emen emen kitail me pwukoahki kapwurpwurpenehn Israel.
Rahn wet I pwurehng kadehdehda ni kehlail me Kauno masahnihong mwanakapw kan koaros me warong en papah ni doadoahk en misineri. Ong mwanakapw kan me souleng en imwin rahn akan, doadoahk en misineri iei pwukoah en prihstud. Kumwail mwanakapw kan pilpildahr en mih nan irair en kapwurpwurpenehn Israel wet. Ni ahmwail pahn papah ni doadoahk en misineri, kumwail wia towe inenen kesempwal en mwekid wet.
Ong kumwail peinakapw kan, misin wia lepelepen ansou mwahu ieu, ahpw pein ahmw pilipil en wia. Se poakpoake misineri sister kan oh kasamwoh irail ni unsek. Meid kapwuriamwei dahme kumwail kak kapatahieng doadoahk wet! Kapakapki ke en ese kupwur en Kauno ni duwen ahmw pahn papah ni doadoahk en misineri, oh Ngehn Sarawi ahpw pahn sapeng ong uhk nan ahmw madamadau oh mohngiong.
Kempoakapahi pwulopwul kan, emen emen kumwail me inenen kesempwal ong Kauno. Kumwail pilipildahr en sewese kapwurehdo Israel nan ansou wet. Ahmw pilipil en wie doadoahk en misineri, ma misin en kalohk de misin en papah, pahn kapaiaiukada oh meteikan tohto Se pil kasamwoih misineri mah kan ni ansou me irail kak. Arail sawas me inenin katapan.
Misineri koaros kin padahk oh kadehde duwen Sises Krais. Rotorot ni palingehn nin sampah kahrehiong lapalahn anahnepen marain en Sises Krais ansou wet. Emen emen anahne en esehla duwen Sapwellimen Sises Krais rongamwahu kapuropwudo. Emen emen anahne en esehla ia wasa irail kak diarada koapworopwor oh meleilei me “[sipelesang] uwen ahmw kak wehwehki.”6
Kapokon lap wet en wia ansou en meleilei oh kamadipw en palingehn ohng kumwail. Kumwail en rapahki or alehda kaudiahl erein mihting pwukat, met iei ahi kapakap ni mwahr sarawi en Sises Krais, ahmen.