Ahneki Limpoak, Ehukihong Aramas, Luke Irail
Ni atail pahn kin ahneki limpoak, ehukieng aramas, oh luke irail, kitail kin iang wia Sapwellimen Kauno doadoahk me kin kaunopada sampah ong ketdohn Sounkomouro.
Iangie medewe, ni ansou kis, keskesihnen pohn dohl nan Galilee, kadkadehde duwen kapwuriamwei en iasadahn Sounkomouro. Ia uwen kapwuriamwei ma ke pahn rong koasoi pwukat, me e ehukieng irail, Me e inangihen kohla, oh padak nan wehi koaros, papdaisih irail ni mwaren Sahm oh Nah, oh Ngehn Sarawi.”1 Mehlel, koasoi pwukat pahn kiheng kitail manaman, sair kitail, oh kamwakid kitail, duwehte eh pil wiahiong Sapwellime Wahnpoaron kan. Ni mehlel, ihme re poadidi ong erein arail mour.
Me kapwuriamwei, kaidehn Wahnpoaron kohte me mourki Sapwellimen Sises mahsen kan. Tohn mwomwohdiso en kawao, sangete me keieu kahpw kolahng me wereilahr, iang kapwaiada sapwellimen Sounkomouro kehkehlik, iei ehukihong rongamwahuo irail akan me re tuhwong oh me re ese. Arail ngoangki ehukihda arail kadehde en Sises Krais sewese Sapwellime Mwomwohdiso kapw en kekeirda mwadang.2
Kitail pil, nin duwen Sapwellimen Krais tohnpadahk kei, alehdi luhk en pil kapwaiada Sapwellime kehkehlik rahnwet, me duwehte atail pil iang mihmi pohn dohlen Galilee ni eh tepin mahsen duwe. Kehkehlik wet pilehu tepda nan par 1830, ni ansou me Sohsep Smith kasarawiala rie pwutak Samuel en wia doadoahk en misineri nan Mwomwohdiso en Sises Krais.3 Sangete ansouwo, tohtohsang misineri rar limalopw samwa seiloaklahng wasa tohto en nin sampah padapadahk ong wehi koaros oh papdaisihla irail akan me alehda sapwellime mwomwohdiso kopwurpwurdoh.
Ih atail padahk mehlel. Atail ineng mehlel.
Sang neitail seri tikitik kan lel me keieuhn laud nanpwungatail, kitail kasik ansou me kitail kak wia sapwelimen Sounkomouro pwukoa oh ehukihong tohn sampah rongamwahu. I ese me kumwail pwutak oh serepein pwulopwul kan kehn manaman sang atail Soukohp aio ni ah luke kumwail en kaunopehng wie doadoahk en misineri duwehte dahme Sounkomouro wia ong Sapwellime Wahnpoaron ko.
Duwehte soun tang kan ni wasahn tepdahu, kitail kin awihawih luhko, me kin iangahki menginpehn Soukohpo, me kin tapiada weirintango. Ineng wet me katapan mehlel oh kamarain; ahpw, medemedewe mahk kalelapak wet: dahme kitail koaros sohte tepkihda ahnsou wet?
Ke kak idengki,“Ia mwomwen ai pahn wia misineri men ni ah sohte nei badge me edei nting powe?” De kitail kin medemedewe, “Misineri kan kin kasarawihala pwehn wia doadoahk wet. I men iang sawas apw mwein mwuhr ansou me mour pahn ekis meleileidi.”
Riei Soulengko, e mengei sang mwo! Ni kalahngan, Sapwellimen Sounkomouro kehkehlik kesempwalo kak pweidkihda sang ni padahk mengei kan me kin kohieng kitail sang ni atail tikitik: ahneki limpoak, ehukihong aramas, oh luke irail.
Limpoak
Me Keieu me kitail anahne ahneki limpoak duwehte Krais ah kin sapwellimaneki limpoak.
Atail mohngiong kan toutouki kahpwal oh nsensued me kitail kin kilang nan sampah apwal wet. Apw, kitail pil kak sairkihda limpoak laud oh doadoahk en sawas kan me wiawihsang aramas kan wasa koaros sang ni arail nantihong sewese irail me mwamwahllahr oh wiekaulahr—irail kan me solahr mih nimwarail kan, me solahr mih rehn arail peneinei, de pil mihmi nan pahtou de nsensued kan.
Me keren, soun pakair kan pakaireki me Nohno kei nan Poland, sang ni arail pwunodki, irail akan me kohkohsang arail peneinei kan, kihdi weren seri kan mehn dakadak kan ni kairekidi inen ehu ni wasahn train, onopadahr ong irail nohno kan oh seri kan me sopohsang nan apwal me pahn uhdahn anahne irail ansou me re pahn doudisang traino. Mehlel, Samatail Nanleng kin kupwurpereniki wiewia mwahu kan me duwehte met, pwe ma kitail kin sawaskipene atail wisik toutou kan, kitail kin kapwaiada Sapwellimen Krais kosonnedo.”4
Ansou koaros me kitail kin kasalehda limpoak en Krais ong men mpetail kan, kitail kin padahngki rongamwahuo—mendahte ma kitail pil sohte wia koasoi.
Poakohng mehteikan me kasalepen keriau en kosonned lap me iei poakohng men mpomwail akan;5e kin kasalehda wiepen Ngehn Sarawi ah kin doadoak nan loaletail. Sang ni atail pahn kin kasalehda Sapwllimen Krais limpoak ong mehteikan, kitail kak kahrehieng mehteikan me kilang atail doadoahk mwahu en “kapinga Samatail me ketket Nanleng.”6
KItail kin wia me ni atail kin sohte kasik ketingpe.
Atail koapworopworki, ni mehlel, me irail pahn alehda atail limpoak oh atail padahk, ahpw pein nsenarail dahme re pahn wiahiong.
Dahme kitail wia oh ihs kitail ni mehlel.
Sang ni limpoak en Krais ong mehteikan, kitail kin padahngki mwahu lingan en wekideklahn mour kan sang ni rongamwahu, oh kitail patehng kapwaiada Sapwellime kehkehlik kesempwalo.
Ehukiheng
Me keriau me kitail anahne wia iei ehukieng.
Ni tepidahn sounpwong en soumwahu en COVID-19, Brother Wisan men Thailand kehn me e anahne ehukieng ah madamadau oh soahng kan me e esehla ni ah wadwadek Pwuhk en Mormon nan nah social media. Nan ehu ah kasalada ko, e ehuki soiepen misineri riemen nan Pwuhk en Mormon, Amulek oh Alma.
Rie pwutak, Winai, me tengedi nan pein eh lamalam, inenen sairkihda dahme e kasalehda oh sapeng ni sohte kasikpe idek, “I kak ale pwuhken ni lokaiahn Thai?”
Wisan koasoanehdi me sister misineri ko pahn wahla ehu Pwuhk en Mormon rehn rie pwutako, oh ira ahpw tepda padahkihong ih.
Wisan kin pateng kasukuhl kan me e ehukihong irail ah madamadau pid duwen Pwuhk en Mormon. Winai esehla kapakap oh pil kasukulki duwen idawehn ngehno, en alehda oh mourki mehlelo. Mwurinte sounpwong kei, Winai ahwp papdaisla!
Wisan koasoia,“Atail pwukoa kitail en wia Sapwellimen Koht soun doadoahk, oh kitail pahn kin ansou koaros onopada ong Ih pwe kitail en wia Sapwellime doadoahk nin duwen sapwellime koasoandi kan sang kitail.” Mehkot kapwuriamwei kohdo nan arail peneinei pwe Wisan ehukihong rongamwahuo ni wiepe mengei.
Kitail koaros kin euhkihong mehteikan mehkot. Kitail kin kalapw wia. Kitail kin ehukipene kasdo kan oh mwenge me kitail kin iouki, mehkot kaperen me kitail kin kilang, wasa kan me kitail kohla ie, mahlen kan me kitail pwungki, lepin kahs kan me kitail mwahuki.
Ia mwomwen atail pahn kak kapataieng soahng kan me mieier me kitail kin ehuki dahme kitail mwahuki duwen rongamwahu en Sises Krais.
Elder Dieter F. Uchtdorf kawehwe: “Ma mie me idek ia iren amwail wihkend, kumwail dehr perki koasoia dahme kumwail wia ni ihmw sarawio. Koasoia duwen kisin seri kan arail kin kesihnen mwohn pokono oh koul ni arail kin ahneki peren en arail kin nannantiheng en duwehla Sises. Koasoia duwen me pwulopwul kan me kin doadoahngki arail ahnsou en sewese me likeilapalahr kan ni arail wasahn kousoan akan pwe en kihpene koasoiepen arail mour.”7
Euhkieng kaidehn “itonehng” aramas rongamwahuo. Ke sohte anahne intingihdi wiepen sarawio de kapwungala an emen sapwung.
Ni ansou en doadoak en misineri, Koht sohte anahne ken wia nah police; Ahpw, Me e mwahuki, ken wia en ehukieng mehteikan.
Sang ni atail kin ehukieng mehteikan dahme kitail ese duwen rongamwahuo, kitail kin iang Sounkomouro kapwaiada Sapwellime kehkehlik kesempwal.
Luhk
Kesiluh en me kitail kak wia iei Luhk.
Sister Mayra apwtehn iangala mwomwohdiso sang Ecuador. Ah peren en rongamwahuo madangete lohseli wasa kan mwurin ah papdaisla e luke ienge kan oh kompokepah kan nan social media. Pali tohto en ah peneinei oh kompokepah kan kilangada nah kilel kan oh peidengki reh soangen peidek kei. Myra kin ehuong irail, ekeipak kin lukeieng irail nimweo pwe ren kin tuheng misineri kan.
En Myra pahpa nohno, rie kan, me e pahn nohnoki, riemen me e pahn rianiki, oh ekei kompokepah kan papdaisla pwehki eh eimah en luke irail en “kohdo oh kilang,” “kohdo oh papah,” oh “kohdo oh mihmihla.” Sang ni ah kin luhk ong aramas, kahrehda aramas riehk samwa pwungkihda ah luhk en papdaisla oh wiahla towe mehlel en Mwomwohdiso en Sises Krais. Met e wiawi pwe sister Mayra luke mehteikan en iang kehn peren me e ahniki ni ah wiahla tohn Mwomwohdiso wet.
Mie soangen luhk epwiki kei me kitail kak ehukihong metei kan. Kitail kak luke mehtei kan en “kohdo oh kilang” wiepen sarawi, kapokon en ward, de kasdo me pahn kak kawehwe duwen rongamwahu en Sises Krais. “Kohdo oh kilang” kak wia luhk en wadek Pwuhk en Mormon de kohla ni tehnpas sarawi ni ah pahn langada mwohn kasarawi. Ekei pak, luhko wia mehkot me kin mihmi loaletail—luhk ong pein kitail, kihong kitail pepehm oh marainki soahng kan me mihmi limwatail oh wia mehkot.
Nan mwehiet, tohn mwomwohdiso kin kalapw ehukihong kitail padahng kan nan social media. Mie soahng mwahu epwiki kei, de soahng kid kei, me kumwail pahn men ehukihong metei kan. Mepwukat kihong kitail luhk en “kohdo oh kilang,” “kohdo oh papah,” oh “kohdo oh mihmihla.”
Ni atail kin luke metei kan en kin esehla duwen rongamwahu en Sises Krais, kitail kin iang kapwaiada Sapwellimen Sounkomouro kehkehliko.
Ni Kaimwisekala
Maing riei souleng kan, kitail koasoiaier soahng siluh rahnwet me sohte apwal—me mengei—me aramas koaros kak wia. Soahng kei meke kak wia! Mwein ke wiewiahier mepwukat—ni amw sohte nohn tehk me ihme ke wiewia.
Ih luke kumwail en kin tehk mwahu mwomwen amwail pahn kak ahneki limpoak, ehukieng aramas, oh luke irail. Ni amw pahn wia met, ke pahn kak kehn peren laud ni amw iang kalohki Sapwellimen Sounkomouro mahsen kan.
Dahme I songosong ken wia kaidehn wiepe kapw ieu. Ke rongehr padahk pwukat mwowe. Kaidehn met “mwekid kahpw ieu” me Mwomwohdiso uhd mwahuki ken wia. Soahng siluh pwukat me wia kasalepen dahme kitail wiaier nin duwen tounpadahk kei en Sises Krais.
Sohte anahnepen badge me edomw nting powe de kisin likou.
Sohte anahnepen ale malipilip.
Soahng siluh pwukat wia kisehn Ihs kitail oh ia mwomwen atail momour, re kak wiahla kasalepen limpoak mehlel ni saledek sang pein nsenatail.
Ni ansou me tounpadahk en Krais ko kohpene pwe ren kaskuhl sang Ih nan Galilee pahr riekid samwalahro, Kitail pil kak iang kesempwalkihda Sapwellimen Sounkomouro poahngok oh kohseli nan sampah padapadahngki Sapwellime Rongamwahuo.
Ni atail pahn kin ahneki limpoak, ehukieng aramas, oh luke irail, kitail kin iang wia Sapwellimen Kauno doadoahk me kin kaunopada sampah ong ketdohn Sounkomouro.
Pwe kitail en kak iang wia Sapwellimen Sounkomouro doadoak oh nantihong kapwaiada Sapwellime kehkehlik kesempwal iei ih ai kapakap ni mwaren Sises Krais, ahmen.