Wewehn Ahl en Inouo
Ahl en inouo weksang ahl teikan oh kesempwalpe poatopot.
Nan erein ah wie doadoahk, Presiden Russell M. Nelson onopkiehr oh kasukuhlihki Sapwellime serihkan duwen inou sarawi kan en Koht. Ohlo wia ehu karasaras lingan en aramas me kin kekeid pohn ahl en inouo. Nan ah keieun padahk ni eh wiahla Presiden en Mwomwohdisoht, Presiden Nelson koasoia:
Amwail inou en idawehn Sounkomouro sang ni inou sarawi kan me kumwail wiahiong Ih oh pil kolokol inou sarawi kan pahn ritingadahng kumwail wenihmw en kapai koaros en palingehn me langadahng ohl, lih, oh serih kan wasa koaros.
“… Tiahk sarawi kan en tehnpas sarawi oh inou kan me kumwail wiahda wasao wia mehn kakehlepen amwail mour, amwail pwopwoud oh peneinei, oh amwail kak en powehdi kasongosong kan me pahn kohsang rehn tepelo. Amwail kaudok nan tehnpas sarawi oh amwail sawas ong kadaudokamwail kan wasao pahn kapai kumwailda sang ni eh pahn kalaudehla pein amwail kaudiahl oh meleilei oh pahn kakehlakahla amwail inou en kekeidte pohn ahl en inouo.”1
Dahkot ahl en inou sarawi? Iei ahlo me kolahng wasa kaselel en wein Koht. Kitail tepda kekeid pohn ahlo ni atail pepdaisla oh eri “nantihla mwowe [ni amwail] tengidihong rehn Krais, sang ni koapworopwor unsek, oh poakong Koht oh aramas koaros [kosonned lap riauo] … lel ni imwi.”2 Nan ahl en inou sarawio, {me, ni mehlel, kin daulih mour wet), kitail kin ale tiahk sarawi koaros oh inou sarawi kan en komour oh kesepwilda.
Atail inondehn inouo iei en kin idawehn kupwuren Koht oh pahn kapwaiada Sapwellime kosonned akan nan mehkoaros me E pahn ketin mahsanihong kitail.3 Ideidawehn padahk oh kosonned akan en rongamwahu en Sises Krais rahn koaros me keieu kaperen oh kin kaitar atail mour. Ehu kahrepeo, aramas emen sohte kin lelohng nan kahpwal laud tohto oh kolkoluhla. I pahn doadoahngki ehu soai en mwadong kan, Nan mwadong en tennis, mie soangen sapwung kei me sounmwadong kin pein wiahda. Sapwung pwukat iei poakiala umpweio nan nedo de ansou me aramas me serve o kin poakiala umpweio liki de nan nedo pak riau kairekala. Soangen sapwung pwukat kin wiawi sang pein sounmwadongo kaidehn sang pelie sounmwadong teio.
Pak tohto kitail me kin pein wiahda atail kahpwal de kasongosong kan, sang ni atail pilipil sapwung, de sapwung kan me pein kitail wiahda. Ni atail kin poden idawehn inou sarawio, kitail sohte kin kalap lohdieng nan pein atail sapwung kan. Kitail kin wetsang songosongen tiahk me kin apwal en liksang. Kitail sohte kin pwupwudi nan lokaia likamw oh wiewia suwed. Kitail kin powehdi wiewia suwed oh dipen kamwahl. Kitail kin soikala aramas oh dipwisou kan, detehn ndand, me pahn suwediong paliwaratail oh palingenitail kan. Kitail kin soikala pilipil kan me pahn kamedeki de kapaisuwedi mehteikan oh uhd kin alehda tiahk kan en apwali pein kitail oh papah.4
Dene Elder J. Golden Kimball nda me, Mwein I sohte kin [kalap] alu nan ahl inen oh tehtikitiko, ahpw I kin [soang] en kote ahlo pak koaros me I [kak].5 Ni mehlelo, I kamehlele me Riei ohl Kimball pahn pwungki me kekeid powe, ahpw kaidehn kotehla, ahl en inouo wia atail koapworopwor keieu laud en perepere me kak perehrehla kapahtou oh kamangaiala apwalih me sohte kak perehrehla kahpwal kan en mour ong mehteio.
Ekei kak nda me, I kak wiahda pilipil mwahu kan ma I pepdais de soh; I sohte anahne inou sarawi kan pwe ien wiahla emen aramas wahun oh pweida. Mehlel, aramas tohto me, ni arail sohte kekeid pohn ahl en inou sarawio, kin aiahneki soangen pilipil oh pweida kan me duwehte en irail kan me kin kekeid pohn ahlo. Kumwail kak nda me irail dolung kapai kan en alialu pohn ahl me duwehte ahl en inou sarawio. Eri dahme ahl en inou sarawio wengkihla?
Uhdahno, dahme wekilao me ehusohng oh kesempwal poatopot. E iangahki mwomwen atail kin peik, mwomwen inou en Koht ong kitail, sawas sarawi me kitail kin ale, kapai kan me doke kapokonpenehn aramas en inouo, oh me keieu kesempwal, iei atail sohso poatopoto.
Inou en Peik
Keieu iei mwomwen atail peikiong Koht Palilahsang atail kin ahneki lamalam mwahu kan, kitail inoukihda ni mehlel kitail en momourki mahsen koaros me pwilsang nan dawas en Koht. Ni atail pepdaisla, “ih eri ketin kasalehiong aramas akan, ni eh pahn ketin wia aramasala pwe en ketin karakarahkala mwohn Sahmo, oh ketin kadehdehiong ih ni eh pahn ketin kolokol sapwellime kosonned akan.”6
Pwehki inou sarawi kan, kitail sohte kin men soikalahte sapwung kan de kin kanakanaiehng. Kitail kin ehukihong Koht atail pilipil kan oh atail mour kan. Kitail kin alehda mwaren Sises Krais. Kitail kin doudouloalihte Krais--kin kehlail nan atail kin kadehdeki Sises oh koadkoadohki wiewia en Krais.
Pwehki inou kan, atail kapwaiahda padahk en rongamwahuo padokala mehlel nan atail mour kan. I ese ehu pwopwoud me, ni ansou me ira kapwopwoud, liho sohte kin kalap iang sarawi oh ohlo saikinte wiahla emen tohn Mwomwohdiso. I pahn ekerkin ira Mary oh John, kaidehn uhdahn ederahko mwo. Ni en serihkan arail miehda, Mary kehnda laud anahnepen en kakairirailda, nin duwen me pwuhk sarawi kan koasoia, “ni epwele oh kaweid en Kauno.”7 John utungada. Mary tohnmeteikihla soahng kesempwal kei pwehn kak mih ni ihmwo oh poden kasukuhlki duwen rongamwahuo. Liho nantiheng pwe peneineio en kak ale kamwahu kan en iang kaudek oh mwekid kan en Mwomwohdisou. Mary oh John wiahla pahpa/nohnon kahlmengi ehu, oh neira serihkan (pwutak pwahtiet kei) keirda ni pwoson oh pwongih padahk oh kosonned akan en rongamwahuo.
En John ah pahpa/nohnou, en pwutangko arail pahpa/nohno kahlapko, perenkihda mour oh pweida kan en nein neira pwutangko, ahpw pwehki ara sohte kin pwungki Mwomwohdisou, ira wiahki me pweida pwuko wiawi sangete en John oh Mary ara kadek neitik. Detehn John sohte wia emen tohn Mwomwohdiso, e sohte pwungki ireo. Ohlo ngidingidiki me pweida pwuko wia wahn padahk kan en rongamwahuo--dahme nah pwutangko kin ale sang nan Mwomwohdiso iangahki dahme kin wiewiawi ni imwarailo.
Pein John alehier kamarain sang Ngehno, limpoak oh karasaras en ah pwoudo, oh kangoange kan sang nah pwutangko. Sohte pwand, ohlo pepdaisla, kapereniada tohn wardo oh kempoakepah kan.
Detehn pwopwoudo oh neira pwutangko kin alahle kasongosong , Mary oh John kamehlele ki ara mohngiong unsek me inou en rongamwahuo me poahsonehda kapai kan, ong emenemen irail oh peneineio pwon. Irail kilangehr pweidahn mahsen kan en Kauno nan mour kan en neirail serihkan oh arail mour kan: “I pahn kihdi ei kosonned nan kapehdirail kan on ntingihediong nan mohngiongirail kan. I pahn wiahla ar Koht, oh re pahn wiahla nei aramas.”8
Tengedi ong Koht
Pil ehu wiepen ahl en inouo iei atail ehuiong Mwohnsapwo. Inou kan me Koht ketikihong Sapwellime serihkan sohte kin kahluwahte kitail. Inou kan kin katengei kitaildi ong Ih, oh, tengedi ong Ih, kitail kak powehdi mehkoiaros.9
Ehu pako I wadek ehu soai nan doropwehn rohng me ntingda sang sounkair men me kawehwe me ni atail pepdais kan kitail kin kaduhdi ehu pihlim pwon nan pihl. Eri wehwehki me eden aramas koaros me pwarada nan pihlimo pepdaislahr. Soangen pepdais wet pahn mengei, inenen mengei, ahpw e sohte pohnese katep en ehuehu mour oh kesempwal en inou nan pwungen aramas oh Koht.
“[Sises] ketin mahsani … pedelong nan ewen kehl me tehtiko, pwe ewen kehl me tehtiko oh ahl me tehtiko kin kolahng mour, oh me malaulau me kin diarada.”10 Nin duwen koasoi, ewen kehlo me nohn tehtik kahrehda aramas pahn wad emen pedelong. Emenemen kin wiahda ah inou ong Koht, oh Koht kin ketin inoukihong emenemen, ni ederail, pwe kitail en liki oh kamehlele met oh kohkohlahte. Pwehki tiahk sarawi kan oh inou kan, manaman en me sarawi kan kin padokala nan atail mour kan.11
Sawas Sarawi
Met elehiong kitail en medemedewe kesiluhn kapai tohrohr en ahl en inouo. Koht ketin ketikihda kisakis kouwahlap ehu pwehn sewese me kin wiahda inou kan en kolokol inou kan: kisakis en Ngehn Sarawi. Kisakis wet iei pwung en poden ieiang, alahle perehre, oh kaweid en Ngehn Sarawi.12 Me pil kin kahdaneki Sounsawaso, Ngehn Sarawi “ketin audaudkidahr koapworopwor oh limpoak mehlel.”13 E mwahngi mehkoaros, oh kin kolokol mehkan me pid Sahmo oh Nahio,14 me kitail wiahki atail mehn kadehde.15
Pohn ahl en inouo kitail pil pahn diar kapai kesempwal kan en mahk oh kamwakel sang dihp. Sawas wet kin kak kohdo sangete ni kalahngan sarawi me kin kohda sang Ngehn Sarawi. Kauno mahsani, “Met iei kosonnedo: Koluhla, kumwail koaros me mihmi nan sampa pwon, oh kodohng ie, oh kohdo rehi oh pepdaisla ni edei, pwe kumwail en kak mwakelekelda ong ni amwail pahn alehda Ngehn Sarawi, pwe kumwail en mwakelekel ni amwail en kesihnen mwohi ni imwin rahno.”16
Pokonpene rehn Aramas en Inou
Irail me kin kekeid pohn ahl en inouo kin diar kapai kan nan songosongen kapokon pilipildahr kan. Kokohp kan en ehu kapokonpenehn irail mehn Israel kan me mwarahkpeseng ansou reirei ong nan sahpw kan me irail sohsohki kin dierek nan pwuhk sarawi kan.17 Pweidahn kokohpko oh inou kan met wiewiawi ni kapakonpenehn aramas en inou kan ong nan Mwomwohdisoht, wehin Koht pohn sampa. Presiden Nelson kawehwe me, Ni atail kin koasoia duwen kapokonpeneo, kitail koaskosoia duwen tepin padahk mehlel wet: koaros Sapwellimen Samatail Nanleng seri kan, paliet nan mour wet oh palio nan mour mwohn mour wet, ahniki mweimwei en rong padahk en rongamwahu kopwurpwurdo en Sises Krais.”18
Kauno kupwurki tohn Mwomwohdiso en Sises Krais en Souleng en Imwin Rahn-akan en uhda oh serseli, pwe amwail marain en kamarainda wehi kan; pwe kapokonpene pohn sahpw en Saion, oh nan steik kan, en kak wia mehn perehre, oh wasahn ruk sang melimel, oh sang kahpwal ansou me e pahn kipehdi wasa koaros pohn sampa pwon.19
Pil mie kapokon kan me kin wiawi wihk koaros ong aramas en inou kan nan imwen kaudek kan ni rahn en Kauno, pwe kitail en kak pere kitail sang wiewia suwed kan en sampa.20 Nan kapokon wet me kitail kin ale kamadipw sarawi en pilawa oh pihl katamanpen Tomw en Sises Krais oh ehu ansoun kaisihsol, kapakap, oh koasoiapene me pid irehtail oh atail mour kan.21 Ni ahi pwulepwulo, ngehite kelehpw me wia tohn Mwomwohdiso nan ahi pwihno. I kin pereniki patehng kempoakepahi kan nan sukuhl, ahpw I diarada me I kin inenen kasik kapokon en Rahn Sarawi wihk koaros pwehn kaweliakapwi oh kakehlaili palingeni oh paliwerei. Ia uwen atail luhs sang kapokon kaselel wet nin doken soumwahu doar wet, oh uwen atail kaskasik ansou me kitail pahn kak pwurehng pokonpene duwehte mahso.
Kaimwsekala, amaras en inou kan kin pokonpene nan tehnpas sarawi, tehnpas en Kauno, pwehn ale tiahk sarawi kan, kapai kan, oh kaudial kan me kin dierekte wasau. Ia kahrepen kapokon kan aramas en Koht kan sohte lipilipil sounpar depe nan sampa? Kahrepe keieuo iei en kauwada ehu tehnpas en Kauno wasa me E kak kasalehiong Sapwellime aramas akan tiahk sarawi kan en Tehnpase oh kilori kan en Sapwellime wehio, oh padahkihong aramas akan duwen komour; pwe mie tiahk sarawi kan oh kosonned akan me, kasukuhlparail oh wieparail kan, kin anahne en wiawi nan wasa, de tehnpas ehu me kokouda ong kahrepeo.22
Sohsohki Inou kan en Inou Sarawio
Ni imwio, kekeid pohn ahl en Inou ohte me kitail kak sohsohki kapai kan en Eipraam, Aisek, oh Seikop, inondehn kapai kan en komour oh kesepwilda me Koht kelehpw kak ketikihda.23
Kawehwe nan pwuhk sarawi kan me pid aramas en inou kin kalap wehwehki me aramas me wia kadaudoken Eipraam me kin kahdaneki “mehn Israel kan.” Ahpw aramas en inou kan pil iangahki koaros me alehier rongamwahu en Sises Krais.24 Paul kawehweda:
“Pwe kumwail papidaislahr ni miniminiong Krais oh alieir mouren Krais. …
Oh ma kuwail sapwellimen Krais, eri kumwail kadaudok en Eipraam, oh kumwail pahn ale dahme Koht ketin inoukidahr.”25
Irail me kin kolokol arail inou kan pahn iang irail me mwakelekel kan iasada.26 Irail wialahr aramas unsek pwehki Sises Krais me wia sountomw en inou kapwo. Iei irail pwukat me paliwararail kan inenen lingan, marain duwehte ketipino, rasehng klohri en Koht, me keieu lingan sang koaros.27 Pwe mehkoaros iei arail, ma momour de mehla, de mehn ansou wet, de me pahn kohdo kan, mehkoaros iei arail oh irail sapwellimen Krais, oh Krais sapwellimen Koht.28
Na emenemen kitail oh kitail koaros peikiong en soukohpo ah likwer kitail en kekeid pohn ahl en inouo. Nephi kilangadahr atail ansou nan ah ouramano: “Ngehi, Nephi kilangehr manaman en Simpwul en Koht, me mweredieng pohn souleng kan en mwomwohdiso en Simpwulo, oh pohn seri en inou en Kauno, me kouson seli ier pohn sampa pwon; oh irail pil kapwatkidahr me pwung oh pil manaman en Koht ni popohl kohwahlap.”29
Pwehki Nihpai, ahi mour kin pereniki inou sarawi kan en Kauno.30 Ni Rahn Sarawi en Ihster wet, I kadehdehki Sises Krais, me ketin Iasadahro iei atail koapworopwor oh kamehlel kehlail pen mehkoaros me inoupe wiawiher pohn ahl en inouo. Ni mwaren Sises Krais, amen.