“Kilang! Ngehi iei Koht me kin Wia Doadoahk Kapwuriamwei kan”
Manaman kan, kilel kan, oh me kapwuriamwei tohto kin pwarada rehn me ideidawehn Sises Krais rahn wet, nan amwail mour kan oh pil ahi mour.
Riei souleng kan, ih ahniki ansou mwahu pwe ien kesinen mwomwail rahn wet. I patehng irail kan me tiengehr mwohi nan kapokon wet, I kadehdeki me Sises Krais ketin ieias. E kin ketin kaweihd Sapwelime Mwomwohdiso; E kin mahsaniong Sapwelime soukohp, Presiden Russell M. Nelson, oh Eh kin ketin poakoahng Sapwelimen Sahm Nanleng seri kan koaros.
Rahn Sarawi en Ihster wet kitail kataman Iasadahn Sises Krais, atail Sounkomour oh Soundor,1 Koht Lapalap, Kaun en Meleilel.2 Sapwelime Tomw, kaimwsekala Sapwelime Iasadahu mwurin rahn silu sang nan sousou ehu me pekpekpe wiawi, iei me kasalehda manaman keieu laud nan poadoapoad en aramas. “Na Kilang,” Eh mahsani, “Ngehi me Koht; oh ngehi Koht en doadoahk kopwuria akan.”3
“A doadoahk kopwuriamwei kan uhdier pwehki Krais ketidalahr nanleng, oh ketidier ni palimaun en Koht?”4 soukohp Mormon idek nan Pwuken Mormon. Eh ahpw sapengki, “Soh; pil tohnleng kan sohte kin uhdihsang arail kin sewese aramas akan.”5
Mwurin Kalopwualahu, tonleng en Kauno men pwarehng Mary, oh ekei lih, me kolahr ni sousouo pwehn keiedi kahlepen Sises. Tohnlengo ahpw mahsanih:
“Dahme kumwail raparapahkihki me momour emen nanpwungen me melahr akan?”6
“E sohte ket met: E ketin kaiasadahr.”7
Soukohp Abinadi nan Pwuken Mormon kasalehda mwokid manaman wet:
Ma Krais sohte ketin iasadasang me melahr akan, … sohte iasada pahn kak wiawi.
“Ahpw mie iasada, eri sousou sohte kak powehdi, oh Krais powehdier tehtehn meninkau en mehla.”8
Doadoahk kapwuriamwei kan en Sises Krais kareiong tohnpadahngko arail kin ndinda: “Ihs ohl menet, me kin mahsoniongete kisinieng oh iloak kan, a re kin peikiong.”9
Ni en tepin Wahnpwaron kan ideidawehn Sises Krais oh karongeier Ih padahngki rongamwahuo, irail kilangehr manaman tohto. Irail kilangehr me “duwen me maskun kan ar kin kilangada wasa, duwen me nehtuk kan ar kin alu, duwen me tokutok kan ar kin mwakelekella, duwen me salengepon kan ar kin rongada wasa, me melahr kan ar kin mourda, duwen Rongamwahu eh lohkseliher rehn me paisuwedlahr akan.”10
Manaman kopwuriamwei kan, kilel kan, oh kapwuriamwei tohto kin pwarada rehn me ideidawehn Sises Krais rahn wet, nan amwail mour kan oh pil ahi mour. Manaman kopwuriamwei kan wia mwokid sarawi kei, kilel kei, me kasalehda manaman akan en Koht oh iei Ih me ketin “dueduhete aio, rahnwet, oh kokolahte.”11 Sises Krais, me kapikada sehd akan, kak kameleileidi; Ih me ketkiong me maskun kan en kilangada wasa pil kak ketkiong kitahil marain en kilangada nanleng; Ih me kamwakelehda me tokutok kan pil kak kasorehla atail kapwal kan; Ih me kamwauila ohl me ahniki soumwahu kak lukeiong kitail en iangih “Kohdo, Idawehn ie.”12
Me tohto kumwahil kilangehr manaman tohto, tohto sang me kumwail ese. Re pahn mwomwen tikitik karasaiong en Sises ketin kapwourada me mehla. Ahpw uwen saisi sohte kasalehda ehu manaman, pwe ihte e kohdo sang rehn Koht. Ekei kin nda me manaman kopwuriamwei kan kin wiawi sang ni depweila de paiamwahu ehu. Ahpw soukohp Nephi keriahla irahil me kin sopeisang manaman oh kapwuriamwei en Koht, oh padahngki me dene pein irahil me ese oh kasikuhlki, pwe ren kak ale pweipweiki.13
Mwokid manaman kan kin wiawi sang ni manaman en Ih me kak en komourla.14 Mwokid manaman kan pwildohsang koasondi en Koht poatopoto; mwokid kapwuriamwei kan wia kisehn komour kan en nanleng ong sampah.
Nan Fall samwalaro Sister Rasband oh ngehi seilok lang Goshen, Utah, ohng tupenehn kapokon en sampah me pahn wiawi nan wehwe ohng aramas tohtohsang 600,000 ni soangen lokaia 16.15 Prokrahmo koasondi pwehn doke duen Kopwuripwurdohn Rongamwahu en Sises Krais oh iangahki kalalapak kan me sang irail me pwulopwul kan nan sampah. Ngehi oh Sister Rasband kilangehr peidek pwukat; irail kieng kiht ansou mwahu sen kak kadehdeh me Joseph Smith iei soukohp en Koht, manaman en kaudial ohng atail mour, rongamwahu en Sises Krais me wiwiawi, oh me mehlel akan oh kosonned kan me kitail kin kesempwalki. Tohto me rongorong ranwet iang kisehn mwokid kapwuiamwei o.
Ni mehlel kasdohu doke Sacred Grove nan New York, wasa Joseph Smith kadehdehki: “I kilang umwpwul en aramas riemen, marainsang marahin en ketipin oh me i sohte kak kawehwehda, keskesihnen mwohi nan wehwe. Emen ira mahsendohng ie, lukwerihkinie edei oh mahsanih, idilahng mehteio —Met Nei Pwutak Kempoake. Rong Ih!”16 Iei mwo, riei ohl oh lih akan, e wia mehkot kopwuriamwei ehu.
Soumwahu keper nan sampah kahrehda keseulahn pirokrahmo ong Goshen, Utah, wasa me Mwomwohdiso en Sises Krais wiahda, pelien kasdo, ni mwomwen Jerusalem en mahso. Sister Rasband oh ngehi sohte nohn dohsang Goshen nisoutik en Rahn Sarawio ni ansou me se kilangada ediniei mosul kohdasang wasa me so kokolahngo. Kisiniei laud wasa koaros, oh se perkihda pwe kahpwal de mie nan ansoun kasdo. Met mehlel, minit 20 mwohn 6:00, mwohn aht wie kasdo pahn tepda, lioal nan wasahu pwon kunla. Sohte liol! Sohte kasdo wiawi. Mie ehu generator me ekei aramas medmedewe me se kak doadoahngki, apw mwein e sohte kak katanga dipwisoun doadoahk kan.
Kiht koaros me mih nan prokrahmo, iangahki tohn kaweid, tohn koul kan, tohn doadoahk kan, iangahki me pwulopwul 20 sang nan aht peneinei kan, udahn pwuriamweikihla dahme wiawio. Ih ekiste alusang nan arahil wie sengiseng oh pwunpwunod oh peki rehn Koht sapwelime sawas. Sahm nanleng, I kapakapkier, I sohte kin kalap peki ehu manaman, ahpw met I pekpeki ehu ansou wet. Tupene wet anahne en wiawi ohng koaros me pwulopwul pohn sampah. Se anahne lioal en mie ma iei Kupwuromwi met.
Minit isuh mwurin kuloak 6:00, mwurinte eh kun lioal, e pil mwadangete pwurodo. Soang koaros mwahuer, mehn keseng lel mehn lokaia kan ohng kasdo oh koaros dipwisou kan. Se tepier oh soang koaros tangamwahu. Se alehier mwokid manaman ehu.
Ansou me Sister Rasband oh Ngehi pwuripwur kohla nimwato ni soutik en rahno, Presiden oh Sister Nelson eker kiht oh inda: Ron, se men ken ese me ni ansou me se rongada me sohte lioal, se kapakapki ehu manaman.
E intingdier nan pwuhk sarawi en imwin rahn akan: “Pwe Ngehi, Kouno, kapaweiehr pehikat oh kiwei manaman en nanleng; kumwahil sohte kak kilang ansou wet, ekis keieng ah kumwahil ahpw pahn kilang, oh ese me iei ngehi, oh me I pahn kohdo and kounda nei aramas. ”17
Ihme udahn wiawier. Koht ketin ketkidohr Limeh kan oh liaol pwurodohr.
Doadoahk kopwuriamwei kan kin pweida sang ni manaman en pwoson, duwehte dahme Preseden Nelson padahngki nan tiepene me nekiero. Soukohp Moroni padahkieng ehr aramas akan, “Ma sohte en aramas akan arail pwoson Koht sohte pahn ketin wia manaman kopwuriamwei kan rehrahil; eri, E sohte pahn ketin wia mehkot lau miehda arail pwoson.”
E pil ketin doula:
Kilang, pwehki en Alma oh Amulek ara pwoson me karehda kalapwuhso eh mweredi ong nan pwehl.
Kilang, pwehki pwoson en Nephi oh Lehi me karehda mehn Laman kan wekla, oh irahil pepdaislahr ki kisiniei oh Ngehi Sarawi.
Kilang, pwehki pwoson en Ammon oh rieh kan me karehda mie mwokid kopwuriamwei wiawi nan pwungen mehn Lamanaids akan.
Oh sohte ansou ehu me pahn mie mwokid kapwuriamwei lau mwurin arail ahnikihda pwoson, eri kahrehda irail anahne kamehlele mahs Iehros en Koth.18
I pil kak kasalehda nin duwen me sansal nan iren pwuhk sarawi kan me iei pwoson en me pwulopwul kan, tohn wia kasdo kan, kaun en Mwomwohdiso kan oh toweh kan, wahnpoaron, oh soukohp en Koht me karehda mwokid kapwuriamwei en liol eh pwurodo pwehn kamakid kasdo me wiawi nan Goshen, Utah.
Mwokid kapwuiamwei kan kak wiawi ni pasepeng pen kapakap. E sohte kin kalap wiawi ni dahme kitahil kin peki de kasik, ahpw ni atahil kin koapwoaroapwoarki Koht, Eh pahn mih wasahu, oh E pahn mehlel. E pahn doadoahngki mwokid kapwuriapwei ni ansou me kitahil anahne.
Kouno kin ketin wia mowkid kapwuriamwei pwehn katamankiohng kitahil Sapwelime manaman, Sapwelime limpoak ong kitail, Sapwellime manaman nanleng ohng aramas pohn sampah, oh Sapwelime koasondi en kasukuhlihkin kitail dahme keieu kesempwal. Irail me pwoson ie pahn mwahula, E ketin masaniong souleng kan nan 1831, oh inou wet pil doudoulahte lel rahn wet, oh sohte pahn mehla, e pahn mwaula.19 Mie kosoned kei mih nanleng, oh kitahil pahn kin idawehn irahil.
Mie ekei pak kitahil kin kapakapki mwokid kapwuriamwei en kamwahuihla atahil peneinei, pwe kitahil en kapwungala atahil sapwung kan, de en kansenamwahuila mwongiong en irahil me kailok de madmadau sapwung ohng arahil mour. Ni atahil kin tehk mehkan me pid sampah, kitahil kin anahne Kauno en ketin kauhdi, oh kamwahuwiala me olahr akan. Sang ni pwoson, mehkot kapwuriamwei pahn wiwawi, e kak kaidehn ansou me kitahil mwahuki de ni ansou me kitahil anahne. Met wehweki me atahil pwoson tikitik de sohte warehng Sapwellime sawas? Soh. Kauno ketin poakong kitail. Eh ketkihda Sapwellime ieias pwehki kitahil, oh Sapwelime Tomw doareikitahil sang nan lokolok oh dihp ma kitahil koluhla oh kohdo Reh.
Kouno kataman ohng kitahil, “Audepen nan kupwurei sohte duwehte audepen amwail lamalam.”20 E ketin mahsanih “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla”21.—komoal sang pwunod, saruawaru, masepwehk, sapeihk, pwunodiki kempoakepahmwail kan, me salongalahr de ouraman sohte pweidah kan. Meleilei nan ansoun kapwunod de pahtou iei mehkot kapwuriawei ehu. Tamataman en Kouno masan: Ahi koasoaia mepwukat sohte kamalailaidi amwail madmadau kan? Songen kadehde da me kumwail kak ahniki me pahn kaidehn sang rehn Koht?22 Mehkot kapwuriamwei iei me Sises Krais, Siowa lapalap, Iehros en me Lapalahpieo, pahn ketkihdo meleilei.
Duehte ni Eh ketin pwarehng Mary nan mwetuwelo, likuerih ede, E ketin eker kitahil en doadoahngki atahil pwoson. Mary raparapaki pwehn papah Ih oh apwali Ih. Kaidehn Sapwelime Iasadahu me e kaskasik, ahpw sang ni pweidahn pilahn en peren soutik.
“Komw ketdihdosang pohn lohpwuwen,”23 pokon en aramas me sohte kamehleleko kapailoke Ih pohn Calvary. Eh kak ketin wia ehu manaman kapwuriamweio. Ahpw E mwahngi dahme pahn pweida sang ni tapio, oh E nantiong pwoson sapwelimen Sahmo koasondio. Karasaras wet en dehr sohrala sang retahil.
Ong kitail nan ansoun kahpwal kan E ketin mahsanih, “Kilang lipwen ohla ni pengpengeiet, oh pil lipwen metehkan nan pehi ka oh ni paten nehi kat; ahniki pwoson, kapwaiada ahi kosonned akan, oh kumwail apw pahn sohsohki wehin nanleng.“24 Riei souleng kan, manaman kapwuriamwei wet me inoupe wiawiongehr kitahil koaros.
Rahn Sarawi en Ihster wet, ni atail perepereniki mwokid kapwuriamwei en Iasadahn atail Kaun, ni ei wia emen Wahnpoaron en Sises Krais, i kapakap ni karakarahk me kumwail pahn kehn manaman en Soundoro nan amwail mour, me soang kan koaros me kumwail pahn peki rehn Samatail Nanleng pahn pweida sang ni limpoak oh inou me Sises Krais kasalehda nan Sapwellime padahk. I kapakapki me kumwail pahn kak ahniki kehlail en kesinenda oh ahniki pwoson laud nan dahme pahn pwarada mwuhr. Oh I kapai kumwail me mwokid kapwuriamwei pahn lel kumwahil ni atahil kilangehr nan Goshen—ma iei kupwuren Koht en pweida. I kapakapki me kitail en kak, ni pwoson oh kaping, nantieng en“rapahki Sises me soukohp oh wahnparon akan ntingihdier, me kalahngan en Koht Sahm, oh pil Kaun Sises Krais, oh Ngehn Sarawi, me miehier poadeperail, en kak oh mihmi rehtail kohkohlahte”25 Ni mwaren Sises Krais, amen.