Koht ketiket Rehtail
Koht ketket rehtail--oh kin ketin ieiang emen emen kitail oh kaukauweid Sapwellime seri kan.
Nan ereihn sounpar kei, Koht kin ketin mahsaniong Sapwellime sounpapah kan, irail soukohp akan.1 Ni menseng wet, kitail ahniki ansou mwahu en rong soukohp en Koht mahsen ong sampa pwon. Se poakoahng kumwial, ngei oh Presiden Nelson koangoange aramas koaros nan wasakoaros en onopiki oh tehk mwahu amwail koasoi kan.
Mwohn ei pahn sounpar 12, aht peneinei idihdieng pak riau en kohkohsang wasahn aht kouson oh pwurehng tapiada mour nan ansou me pingiping, masepwehk, oh sohkasikpe kan me pwarada sang mahwen oh koasondihn pwoledik kan wiewiawi. E wia ehu ansou kapwunod ong ie, ahpw ong ahi pahpa oh nohno e wia ehu ansou kahpwal laud ong ira.
Ahi nohno oh pahpa ehukieng kiht seri pahmeno ara kisin katoutou me ira ahniki. Ira weuwa ara katoutou oh lokolok ni uwen ara kak koaros. Masepwehk kouwahlapo kangalahr ara ansou oh katikalahr ara koapworopwor.
Ansou kapahtou wet mwurin Mahwen Keriauo wia lipwalipw laud ehu pohn sampa. E wia lipwalipw ehu rehi.
Nan ansou kan me I kin ahniki loloid laud, I kin kalap medewe ma, “E miehte koapworopwor pohn sampa?”
Tohnleng kan Rehtail
Ni ansou me I kin medemedewe peidek wet, I kin medewehla nait misineri pwulopwul kan sang America me wihwia arail pwukoah doadoahk nan ereihn pahr ko. Irail kohkohsang wasahn arail kouson me mie nsenamwau oh perehre oh seilok lahng Sehmen--sapwen arail imwintihtih kan--pwehn ehukieng aramas akan me mie koapworopwor. Irail sohte kolahn kapwopwohnki, kapahrengki, de kanameniki. Irail inengieng en pwilikihdi arail mour en me pwulopwul kan ni arail sohte medewe peren en sampa, ihte arail ineng en sewese mehteikan en diar popohl oh meleilei me irail ahnikier mwoweu.
Ong ie, mwahnakapw oh peinakapw pwukat me unsek. I ese me mwein kin mie arail sapwung, ahpw ong ie sohte. I pahn ansou koaros medewe me irail kesemwpwal sang mour--tohnleng kan en marain oh lingan, tohn papah kan en limpoak, me mwahu, oh me mehlelo.
Nan ereihn ansouo me sampa wie kikihrkihla peikasal, lingeringer, kailok, oh masepwehk, karasaras oh padahk kan en aramas pwulopwul pwukat kadirehkiniehla koapworopwor. Rongamwau me irail sawaskihda dauli pwolidik kan, poadopod, peirin kan, kapahtou kan, oh en emenemen pilahn akan. E ketkihda pasapeng pwung kan ong peidek kesemwpwal akan me kitail ahniki nan ansou apwal pwukat.
Rongamwahuo me iei Koht ketin ieias oh e kin ketin kupwurohkin kitail, pil nan awa pwukat me kahpwal, sawehwe, oh pingiping wiewiawi. Iei mwo me E ketdihdohki nan atail ansou pwehn kapwurehdo me mehlelo oh marain-- Sapwellime rongamwauo oh Sapwellime Mwomwohdiso. Iei mwo me E ketin pil ehu mahsenieng soukohp akan; me Koht ketiket rehtail--oh kin ketin ieiang emenemen kitail oh wie kaukauweid Sapwellime seri kan.
E inenen kin kopwuriamwei dahme kitail kin esehla ni ansou me kitail kin ekis keido kilang mwau sapwellimen Sahm Nanleng pilahn en komour oh lapalapala, pilahn en peren soutuk, ong Sapwellime seri kan. Ni ansou me kitail kin lamalam tikitikla, pokousla, oh sohla me taman kitail, kitail ese me kitail kak ahniki koapworopwor me Koht sohte likidmaliekitaila; ni mehlel, me E ketin ketkiong Sapwellime seri kan mehkot ehu me apwal en medewehieng: iei wiahla sapwellimen Koht keinek kan, oh patkipenehn keinek kan rehn Krais.2
Ia wewehn met?
Me iei kitail pahn mihmihpene kokohlahte, ahniki popohl unsek,3 oh ahniki paiamwau en iang sohsohki sehr en nanmwarkih kan, wehi kan, sahpw kan, oh manaman kan.4
Inenen ahniki aktikitik en ese me songen koasondi kaselel oh lingan me mih mwohtail kak wiawi--kaidehn pwehki ihs me kitail ahpw pwehki iei ih me Koht.
Ni atail esehier met, ia duwen atail pahn wie mwahmwahiei, akahkupwung, de wie kakansensuedih mehteikan? Ia duwen atail pahn wie kilekilengdihte nan pwehl ni ansou me Nanmwarkihn nanmwarki kan lukei kitail en idawehnla oh kapwaiada peren soutuk kaselel me mih mwohtail?5
Komouro mihmi Rehtail
Pwehki Sapwellimen Koht limpoak unsek ong kitail oh tohnmetei soutuk en Sises Krais, dipatail kan--me laud oh tikitik--kak sohrala oh sohte pahn mie katamanpe.6 Kitail kak kesihnenda mwohn Sises ki atail mwakelekel, warohng, oh sarawiala.
Ahi mongiong direkihla kaping kalahngan ong Semei Nanleng. I patohwan me E saikinte likidmeliela Sapwellime seri kan en lelehng kahpwal nan mour wet ni ah pahn sohte mie koapworopwor ong mour soutuk me mih mwohtail. E ketin kaunopadahr mehn kaweid kan me pahn kasalehda ahl en pwurala Reh. Oh me keieu kesempwal ni mehkoaros iei Sapwellime Ieros Sises Krais,7 oh Sapwellime tohnmetei ong kitail.
Sapwellimen Sounkomouro Tomw soutuk wekidala mehlel mwomwen atail kilang atail kahpwal akan oh souitar akan. Pwe kitail en dehr iangedi oh pehm me kitail solahr kak pwungila, de solahr mie koapworpwor, kitail kak esehla sang irail oh pehmada koapworopwor.8 Mwakelekelda sang ni kisakis en kolula kin mweidehng kitail en pwilikihdi dipatail kan oh pwurodo wia aramas kapw men.9
Pwehki Sises Krais, atail sapwung kan sohte anahne en kasalehda ihs kitail. Irail kak kamwakeleikitailda.
Duwehte mehn sosohng en pirakdis keseng, kitail kin kilang atail kin tiaki sapwung, wasa me kin sapwungala kan, oh dihp kan ni ah kin wia ansou mwahu en kitail en kin tetehk, loalikihla oh katehlapahla limpoak mehlel ong mehteikan, oh mwahula pwehki sang ni koluhla.
Ma kitail koluhla, sapwung kan sohte kahrehiong atail sohla warehng. Irail wia kisehn atail kekeirda.
Kitail koaros wia kisin seri pwelel me rasohng lingan oh kaselel en aramas ekei me kitail wiawikihda en wiahla. Sohte emen me tepte limwahdek mwuri alu mwuri tang me sohte dipekelekel, loi, oh ohla. Ih mwomwen atail kin esehla.
Ma kitail nantihlahte mwowe prakdihs, ansou koaros kapwaiada Sapwellimen Koht kosonned akan, oh kolokolete atail kak koaros en kin koluhla, dadaurete, oh doadoahngki dahme kitail esehla, ehuehu ire, kitail pahn kapilkipene marain nan atail mour.10 Oh mwein kitail saik ni unsek esehla dahme atail kak koaros met, “kitail esehier me, ni ansou me [Sounkomouro] pahn ketdo,” kitail pahn kilang Sapwellime lingan loaletail, oh “pahn patohwan Ih ni songen mwohmwohte.”11
Ia duwen songen inou lingan wet!
Ehi, sampaht kahpwal laud. Oh ehi, mie atail luwet akan. Ahpw kitail sohte anahne itiengkihdi atail nsensued ni soukoapworopwor, pwehki kitail kak liki Koht, kitail kak liki Sapwellime Ieros, Sises Krais, oh kitail kak alehda kisakis en Ngehno en kahluwaikitail ong ahl kolahng mour ehu me audauwudkihda popohl oh peren soutuk.12
Sises ketiket Rehtail
I kin kalap medewe, Dahme Sises pahn padahngki oh wia ma E ketin ketiket rehtail rahnwet?
Mwurin Iasadao, Sises ahpw ketin kapwaiada Sapwellime inou en pwarek Sapwellime “sihpw teiko.”13
Pwuhken Mormon: Ehu Kadehdepen Sises Krais me mahsanih duwen ansou me E ketin pwarek irail aramas akan nan wehin Amerika. Se kolokol rekohd kesempwal wet ni eh wia mehn kadehde teng en Sapwellimen Sounkomouro doadoahk.
Aramas akan en nan Pwuken Mormon kin kouson ni elep sahpwo--arail poadopod kan, tiahk kan, oh mesenleng kan inenen weksang mehlel aramasoko me Sises ketin padahkehng nan erein Sapwellime ansou me E ketketki sampa wie papah. Oh ahpw E ketin padahkieng irail soahng tohto me duwehte soahng kan me E ketin padahngki nan Sahpw Sarawio.
Dahme E ketin wiahki mwo?
Sounkomouro kin kalap padahngki me mehlel akan kin sohte mie imwi. Irail kin doadoahngkieng aramas sohte lipilipil sounpar oh ni sohte lipilipil ni mwekid kan.
Sapwellime mahseno me wia oh met me iei mahsen en koapwropwor oh kiseh--me wia kadehde ehu me Koht atail Sahnm Nanleng saikinte likidmelielha Sapwellime seri kan.
Me Koht ketin ketiket rehtail!
Pahr riepwiki samwalahro, Sounkomouro ketin sapahldo pohn sampaht. Patehng Koht Sahm Re ketin pwarohng sounpar 14 Joseph Smith oh wia sounsawas ong Kopwurupwrudohn rongamwahuo oh pil Mwomwohdiso en Sises Krais. Sang mwo kohla, nanleng ahpw ritidahr, oh tohnleng kan ahpw ketdihdo pwehn wahdo rohng. Marain oh eripit ahpw widekdihdo sang pohn sehr en nanmwarki en wasa lapalahpie.
Kaun Sises Krais ahpw ketin pwurehng mahseniong sampa.
Dahme E ketin mahsani?
Ong kapai patail, pali tohtohn Sapwellime mahsen akan kileldi nan Doctrine and Covenants--me mweimweiong aramas sohte lipilipil pohn sampa me inengieng en wadek oh onopkin irail. Ia wen kesemwpwal en mahsen pwukat ong kitail rahnwet!
Oh kitail sohte pahn pwuriamweiki ma Sounkomouro pil ehu padahngki padahk keieu kesemwpwal nan Sapwellime rongamwahu me iei: “Kumwail poakohng Kauno amwail Koht sang nan amwail mohngiong unsek, amwail kehl unsek, amwail madmadau, oh roson; oh ni mwaren Sises Krais kumwail pahn papah Ih.”14 E ketin koangoangoahkin kitail en rapahki Koht15 oh momourki padahng kan me E ketin kasalehiengehr Sapwellime tohn papah kan, pil soukohp akan.16
E ketin padahkieng kitail en poakoahng mehteikan17 oh en ahniki limpoak mwakelekel ong aramas akan koaros.18
E ketin lukei kitail en wia Limeh kan, en kowei oh wia me mwahu.19 “Atail limpoak en dehr mihmihte ni lepin lokaia ahpw en mihmihte ni udahn limpoak mehlel me pahn sansal sang ni atail wiewia kan.”20
E ketin koangoangoah kin kitail en tetehk mwahu Sapwellime kaweid kan: en limpoak, ehuieng, lukehieng koaros ong Sapwellime rongamwahu oh Sapwellime Mwomwohdiso.21
E ketin ruwesei kitail en kawada tehnpas sarawi kan oh pidolong loale oh papah wasahu.22
E ketin padahkihong kitail en wia Sapwellime tohn papah kan--pwe atail mongiong kan en dehr rapahki pein atail kehl, kopwehpwe, pwungkihte, de pwukoah. E ketin padahkieng kitail en “pwilikihdi dipwisou kan en sampa oh rapahki soahng kan me pahn mwahu.”23
E karuwahkin kitail en rapahki popohl, kamaraihn, meleilei, peren,24 oh inou en momour werei oh mour soutuk.25
Na kitail alehda oh wenla mwowe. Ma Sises ketwei ni amwail ward, ni amwail branch, de ni amwail wasahn kouson rahnwet. E pahn ia mwomwe?
E pahn mahsenweite mahsani nan amwail mohngiong kan. Mwohmwamwail pahn sohla kesemwpwal. E pahn ketin mwahngih ihs kumwail. E pahn ketin mwahngih dahme amwail mongiong kan kin inangih.
Irail kan me kin aktikitik oh karakarahk me E pahn ketin limehda.
Me soumwahu kan me E pahn ketin kamwauihala.
Me peikasal kan me E pahn ketin audehkinirailda pwoson oh ahniki kehlail en kamehlele.
E pahn ketin padahkieng kitail en ritingadahng Koht atail mongiong kan oh ehuieng mehtei kan.
E pahn ketin kasalehda oh wauniki me kin mehlel, karakarahk, ohpampap, pwoson laud, mahk, oh limpoak mwakelekel.
Ni atail pahn kilang Sapwellime wasahn irong kan oh kitail udahn pahn sohte duhduwehte. Kitail pahn udahn wekila kohkohlahte. Weliakapwala ni wiewia mwahu kan me pweidahr pwe Koht ketin ketiket rehtail.
Dahme Kitail Pahn Wia?26
I kilengla ni ai ahniki kadek ni ansou I wia pwutak pwulopwul wie kekeirda ereihn sounpar kei. Ma I kak pwurala mwuri, I pahn koaloalemwahui oh indahng en nantiheng raparapahki. Oh i pahn indahng en lukehieng Sises Krais nan ah mour, pwehki Koht ketiket rehtail.
Ong kumwail, riei ohl oh lih oko, ong kempoakepahi kan, oh ong koaros me raparapahki pasapeng kan, me mehlelo oh peren soutuk, I pil iang patehng oh lukei kumwail ong kaweidohte iei: nantiengete raparapahki oh pwoson oh kanengemah.27
Peki, oh kumwail ahpw pahn ale. Letelet, e ahpw pahn ritidahng kumwail.28 Liki Kauno.29
Nan atail mour en ehuehu rahn akan wia ehu atail pwukoah keieu kesemwpwal oh ansou mwahu en tuhwong Koht.
Ni atail pahn pwilikihdi pohnmwahso oh kohla ni Sapwellime sehr lapalap ki mohngiong karakarahk oh ngehn peik,30 E pahn ketin ketdo karanih kitailla.31
Ni atail pahn kin rapahki oh idawehn Sises Krais oh keid nan ahl en tohnpapah, sang ni ehuehu ire, rahno pahn leledo me kitail pahn kehn kisakis keieu kaselel en alehdi popohl unsek.
Kempoakepahi ko, Samatail Nanleng poakoahng kumwail ki limpoak unsek. E ketin kasaledahr Sapwellime limpoak ni soahng kei me sohte imwi, ahpw me keieu laud iei E ketkihda Sapwellime Ieros en wia mehn meirong oh wia kisakis ehu ong Sapwellime seri kan pwehn wia ahl ehu en pwurala rehn samatail oh inatail nanleng.
I kadehdehki me Samatail Nanleng ieias, oh me Sises Krais me kaukaweid Sapwellime Mwomwohdiso, oh me Presiden Russell M. Nelson iei Sapwellime soukohp.
I kihong kumwail ahi limpoak oh kapai ni Ihster kaperen wet. Ritingadahng Sounkomouro oh Soundoro amwail mongiong kan, sohte lipilipil songen mour da me kumwail mihmi loale, kahpwal akan, lokolok kan, de sapwung kan; kumwail kak ese me E ketin ieias, me E ketin poakohng kumwail, oh pwehki Ih, kumwail sohte pahn kelehpwla.
Koht ketiket rehtail.
Sang ni met me I kadehdehki oh kasalehda ni kadehde sarawi ni mwaren Sises Krais, amen.