Kaidehn nin duwen me Sampah wet kin Wia
Dipwsoun doadoahk kan me kitail anahne pwehn kapikada mour marain oh kakairada kapai en me mwahu mehlel kan nan wasahn kouson kan me inenen ngeder nan rongamwahu en Sises Krais.
Mwohn keieun Ihstero ni en Sises ah ketin kasarawilahr tiahk sarawi kapw en kamadipw sarawi me E ketin wiahiong meh Ehk-riemenko, E ketin tapiada Sapwellime keimwseklahn pwukoah oh ketla Kedsemeni, pangala, oh kalopwuhla. Ahpw, mwahngiada duwen madmadau oh ele lepelepen masepwehk me ohloko kasaledahr, Sises mahsaniong irail mepwukat (oh ong kitail:
“Dehr ahniki mwongiong nsensuwed de pahtou: kumwail pwoson Koht oh pil pwoson ie. …
“I sohte pahn likidmelieikumwailla: I pahn pwurodo rehmwail. …
“I kihong kumwail popohl, pein ei popohl me I kihong kumwail. I sohte kihong kumwail nin duwen me sampah wet kin wia. Kumwail dehr nsensuwed, oh pahtou, oh masak.”1
Ansou apwal kan kin pwarada nan mour wet, pil iangahki me pwoson kan, ahpw mahsen en kakehlail sang Krais ketihtiki me E, rasehng sihmpwul men me pakahrlahng en kamakamala”2 oh eri iasada, wiahla dahme sounkoulo nda, en wia “perehpatail oh atail kehl, me kin sewese [kitail] ni [ansou] apwal kan.”3
Kaskaswi duwen ansou apwal kan me mih mwohn Krais ni Ah ketiket kolahng ni lohpwuo oh Sapwellime tohnpadahngkan ni arail pahn kalohki Sapwellime rongamwahuo ong sampa ni ansouo, met kitail uhd dawih ehu padahk ong kitail towe kan en Mwomwohdiso en Sounkomouro ni imwin rahn-akan. Padahk wet pato nan ire tohto kei nan Pwuken Mormon me koasoia duwen songosongen kahpwal me pwarada sang en Laman oh Lemuel ara wiewia suwed kan lel nan keimwseklahn mahwin kan en sounpei kid kei. Ehu ire me keieu sansal mepid kemwekid en mahwin pwukat iei me dene Pwuken Mormon e ntingda ong aramas en imwin rahn-akan, irail pwukat me wia sounnting (mehlel irail sounpei kan) kohpadahng kitail me mie moromor oh pingiping me pahn wiawi nan pwungen aramas akan ni imwin rahn-akan,
Mehlel, ahi madmadau me pid uhpenehn imwin rahn-akan sohte uhdahn mehlel. Kerenieng sounpar 2,000 samwalahr, Sounkomouro kaparki me ni imwin rahn-akan pahn mie ”mahwin, ”4 mwuri mahsani me “popohl pahn sohrasang pohn sampah.”5 Sounkomouro, Kaun en Meleilei, padahngki me uhpene kin tepsang tepelo,6 anahne en iang Seme Sarawio mwahiei ki irail aramas akan me “sohte ahneki limpoak,” pwuhk sarawi masanih, oh sohte kak diarada mwomwen arail pahn kousonkipene limpoak.7
Riei ohl oh lih akan, kitail kin kilang lapalahn pingiping, uhpene, oh mwerkau limwahtail. Paiamwahu, pwe nan mwehi wet sakinte Mahwin Kesilu en Sampah wiawi, de kitail pil saikinte iang kehn paisuwed laud en sampah me duwehte me wiawi nan 1929 kolahng ni Paisuwed Lap ehu. Ahpw kitail kin sohsohpai ehu songen Mahwin Kesilu en Sampa me sohte kin pei pwehn kawehla atail imwintihti kan ahpw ehu wiepen kihpene seri en Koht kan en nsenohki laud emenemen oh sewese kamwahuwiala ohla kan me kitail kin diar nan sampah liseliping ehu. Paisuwed Lap me kitail sohsohpai met sohte pidada salongalahn atail nekinek kan ahpw iei e pid salongalahn atail likilik, oh sohralahn pwoson, koapworopwor, oh sapan wasa koaros. Ahpw dipwsoun doadoahk me kitail anahne pwehn kapikada mour marain oh kakairada kapai en me mwahu mehlel kan nan wasahn kouson kan me inenen ngeder nan rongamwahu en Sises Krais. Kitail sohte kak dapwin— oh pil sampah sohte kak dapwin—atail sohte itar en doadoahngki irehkan en rongamwahuo oh kakehlaili atail doadoahngki inou sarawi kan ni unsek.
Eri, nan sampah ehu me “direkihla kasongosong, oh sohte insenamwahu mie,” me duwehte dahme Siowa mahsani, e pahn ia mwomwen atail pahn kak diar me E ketin mahsanih duwen “inou sarawi en … popohl”? Kitail kin diar mekoato ni atail sohpeilahng Ih me mahsani E pahn ketkihong kitail mahk oh sapan poatopot oh ketkihong neitail serihkan meleilei.8 Eri, itarete kokohp kamwasepwehk kan oh pwuhk sarawi kasaledahr me meleilei pahn sohralahsang sampah, soukohp akan, me iahngahki kempoakepatail Russell M. Nelson, padahngkiher me e sohte wehwehki me e pahn sohrala sang emenemen kitail!9 Eri, nan Ihster wet kitail song kasalehda popohl en karanih nimwatail kan oh nan mohngiongitail kan, doadoahngki kupwur kalahngan oh lehn kakehlail en Tomw en Kaun Sises Krais ong mehn mpetail kan. Paiamwahu, mehel kapwuriamwei, kitail kin ale kakehlail kansenamwahu wet ni atail “sohte pwainki mwohni oh sohte isepe.“10
Anahnepen soangen sawas oh koapworopwor wet inenen laud pwehki nan kongkrikeisin en sampa wet rahn wet mie me mihmi nan kahpwal tohto--en paliwar de madamadau, patehng aramas de mwohni, de songosongen kahpwal kan. Ahpw kitail sohte ahneki koahiek en apwalih irail, pwe meleilei me kitail anahne sohte wia soahng me sampah wet kin kihda.11 Soh, ong kahpwal doar kan kitail anahne dahme pwuhk sarawi kin koasoia “manaman kan en nanleng,”12oh pwehn alehdi manaman pwukat kitail anahne momourki dahme irehn pwuhk sarawi pwukat kin koasoia “kosonned en me pwung kan.”12 Wehwehki ehupenehn koasondi oh manaman iei ireo me aramas en sampah sohte kin kak esehla, Koht en nanleng oh sampah me mahsani!13
Oh iahngeh kan iren padahk kan? Pwe re kairekdier pang kei nan neitail pwuhk sarawi kan, kasukuhl parail kin wiewiawi nan kapokon kan me duwehte me wet, oh nan mwehi wet, Soukohp Joseph Smith pil alehier kasukuhl pe me wia pasapeng pen ah mwahiei oh nda, “Ahi Koht, ahi Koht, dahme komw likidmalieikin iehla?”14 Nan Imweteng en Liberty me kepou oh epwel suwed mie, e esehla duwen padahk en me pwung kan me iangahki ahniki loaloapwoat en kanengamah, ohpampap, mpahi, oh limpoak mehlel.15 Ma sohte padahk pwuko, ni mehlel kitail pahn sohpai akipwung oh peirin.
Nan ire wet, I pahn koasoi inen me pid sohralahn nan ekei wasa koasondi pwung pwukat nan ansou wet. Nin duwen koasondi, I wia aramas pwahtiet, kaperen, oh kiden me mwahu oh lingan nan sampa. Kitail ahneki kapai en dipwisou tohto sang dih koaros nan poadopod, ahpw ni oralap tiahk en dih ke21 oh kin kalap dierek nan Mwomwohdiso, kitail kin kilekilangete mour kan me mihmi nan kahpwal, pwehki wiewia kan me kawelahr inou kan oh mohngiong tohto. Medewe soangen lokaia samin kan me pelpelian dipen nenek, ira koaros kin pwarada nan kasdo kan de nan delepeisin, de tehk kamwamwahl en nenek oh wiewia suwed teikan me kitail kin kalap wadek me wiewiawi nan wasahn doadoahk kan. Me pid inoun mwakelekel, dipwisou sarawi wialahr mehkoat mwahl oh me sarawi wiahlahr mehkoat suwed. Ong irail me alehier kasongosong en alu de lokaia nin duwen me sampa kin wia, nin duwen koaosi, dehr kasik me a pahn imwila mwahu; I inoukihong kumwail ni mwaren Kauno me e sohte pahn. “Suwed kaidehn mwahn popohl,”16 emen soukohp en kawaho nda ehu pako. Ansou me kahleko uhdi, sounkesengo pahn anahne ale pweine, oh pak tohto pweipweio kin mihmi ni pilen mas oh koluhla.17
De mwein kitail kin kilang ehusoangen wiepen kamwamwahl de kasohwahu. Kitail anahne inenen kanaiehng ni atail wia tohpadahk kei en Kauno Sises Krais pwehn dehr iang wia soangen wiewia pwukat. Sohte pak ehu kitail en dipekihda ehu soangen kamwamwahl de limeidihd de itonehng aramas en--kawehla paliwar de madmadau de mour en souleng de oakotme tohrohr. I tamataman ei dahkihla mwomwen Presiden Gordon B. Hinckley ni eh wia ehu padahk sang nan mwohl wet ong ohla kan en Mwomwohdisoht me pid irail kan me kin wie kawe arail peneinei kan.18
“Ia uwen kansensued laud oh kasohwahu me kin wiawi ong lih pwopwoud me kin wiakaula,” e apw mahsanih. “Sohte lipilipil ohl emen nan Mwomwohdisoht me kin wiakawe ah pwoud, me kin kasohwe, kasarowe, idingehng en wia sapwung pahn sohte warehng en kolokol prihsduhd. [E] sohte warehng en ale ehu doropwehn mweimwei en pidelong nan tehnpas sarawi.”19 Pil soangen suwed ohte, ohlo nda, iei wia kawe de kamwamwahli seri--de soangen kamwamwahl teikan.20
Ni wiewia tikitik, sohte wiawi ni madmadau, ele ohl, lih oh seri pwoson kan kak dipaniki lokaia lemei, mehlel wiakau, ong irail me irail katengetengpenehr ki tiahk sarawi nan tehnpas sarawi en Kauno. Aramas koaros ahneki pwung pwe aramas en poakohng, ahneki meleilei oh diar perehre nan imwarail. Menlau, kitail anahne koledi soahng pwukat. Inou en wia sounkameleilei wehwehki kumwail pahn ahneki Ngehn Sarawi pwehn ieiang kumwail oh kapai kan pahn pwilewei rehmwail “sohte kaupe” kohkohlahte oh poatopot.21 Sohte me anahne rong lokaia keng de lokaia suwed pwehn koulki koul en limpoak en soundoro.”22
Na I pahn uhdi wasa I tepda ie. Lakapw iei Ihster, ehu ahnsou me padahk pwung kan en rongamwahu en Sises Krais oh Sapwellime Tomw pahn “powehdi”—moromor oh uhpene, soukoapwoaroapwoar oh luwetala oh mehlel mehla. E wia ehu ansoun inoukihda en uhki mehlel Sihmpwul en Koht, me [ketkihsang] atail kapahtou kan, oh wahda atail katoutou kan,”23 nan Sapwellime koasondi en kaunsekala doadoahk en komour ong kitail.
Itarete wen pangala oh weirek, wen wiakaula oh loumwohmw oh dipen aramas koaruhsien, Ieros Ieias en Koht Ieias kak mahsendihdo pohn ahl reireio, mahsani kitail oh mahsani: “I kihong kumwail popohl, pein ei popohl me I kihong kumwail. I sohte kihong kumwail nin duwen me sampah wet kin wia. Kumwail dehr nsensuwed, oh pahtou, oh masak.”24 Kapai en popohl, meleilei en Ihster en ieiang kumwail. Kapai mwuledek kan koaros pweipweidier sang Kaun en Meleilei, me I kin poakohng ki ahi mohngiong unsek oh me I kin kadehdeki Mware, Kauno Sises Krais, amen.