Kapaiada ni Mware
Kahrepen atail kin alehda prihsduhd iei pwehn mweidohng kitail en kapaiada aramas akan ong Kauno, oh met kin kasalehda atail kin wia ni Mware.
Riei ohl akan, sounpapah kan nan prihsduhd en Koht, e wia wahu lap ehu ong ie I en koasoi ong kumwail pwohng wet. I inenen wauneki oh kaping kin kumwail. Ni ahi kin kapahrek rehmwail oh rong amwail pwoson laud, I kin kamehlele me mie manaman en prihsduhd nan sampa wie lalaudla, pwihn kan kekehlailla oh towe pwoson kan me kolokol prihsduhd pil wie tohtohla.
Nan ai kisin ansou kis soutik wet, I pahn koasoi ong kumwail kan me men kadaiala arail papah en prihsduhd. Kumwail ese duwen kehkehlik me kumwail en katehlapiala amwail malipilip pwehn papah.1 Ahpw kumwail kin medemedewe ia pahn wehwehn kalaudehla amwail pwukoah kan ong kumwail.
I pahn tepda rehn dihken kapw kan pwe irail me pahn keieu peidengki ia pahn wehwehn katehlapiala arail papah en prishduhd. Elder kapw kan me apwtehn kasarawi pil pahn anahne rong. Oh pisop men me wie doadoahk nan keieun wihk ele pahn pil men rong.
Met me katapan ong ie I en sohpeila mwuri oh kilang rahn akan me I wia emen dihken. I men tehno aramas emen en ndahng ie ansouwo dahme I pahn kak koasoia met. Pwe e pahn kak seweseiehda laud nan pwukoa en prihsduhd koaros me I ale lel met--mehlel pil pwukoa kan me I ale rahn pwukat.
I kasarawiong wiahla dihken nan branch ehu me inenen tikitik ngehi kelehpw me dihken oh riei pwutak Ted kelehpw me wia sounpadahk, Aht peneineio kelehpw me iang brancho. Brancho pwon kin tuhpene ni imwato. Kaun en prihsduhd ong rieio oh ngehi iei emen souleng kapw me apwtehn alehda prihsduhd. I kamehlele ansouo me ihte pwukoahn prihsduhd me I ahneki iei en kin kapahseli kamadipw sarawi nan ahi wasahn mwongeo.
Ni ansou me ahi peneineio keseudo Utah, I diar ehu ward laud me dihken tohto iang towe. Nan ahi keieun mihting en kamadipw sarawi wasao, I kin kasawih dihken kan--duwehte sounpei kan, ong ie--kin mwekmwekid pahrek ni arail kin kapaseli kamadipw sarawio likamw irail kasukuhlkiher.
Uen ahi saloh kahrehda ni Rahn Sarawi en mwurio I sangkala ni imwen kadeko pwehn kelekelehpw oh sohte me kak kilang ie. I taman me iei Ward en Yalecrest nan Salt Lake City oh mie sansal takai wasahu. I kohla nan tihnsewen sansal takaio oh kapakap ngidingid peki sawas pwe I en ese wiepe oh sohte sapwungala ni ahi ale oh nehk kamadipw sarawio. Kapakapo pasapengla.
Ahpw met I ese me mie wiepen kapakap ehu me mwahusang oh pwehn kin medemedewe ni atail kin song en keirda nan atail papahn prihsduhd. Ih wehwekidahr kahrepen en aramas kan kin alehda prihsduhd. Kahrepen alahldi en prihsuhd iei pwehn mweidohng kitail en kapaiada aramas ong Kauno, ni eh kin wiawi ni Mware.2
Sounpar kei mwurin ei wia dihken men me I esehda wehwehn pwukoa wet. Me duwehte, ni ahi wia emen ahi prihst, I alehdi pwukoahn pwarek ehu wasan epwel pwehn wia mihting en kamadipw sarawi. I kepwukoaieng en kapaseli kamadipw sarawi. I sohte medemedewe duwen pahrek ni ei kin kapaseli kamadipw sarawio, ahpw ihme I wia I kin kilekilang nan mesen emenemen aramas mah kan. I kilang me pali tohtohn irail wie sengiseng. Emen liho koledi pehn ahi sehto, kilangdadohng ie, oh nda ni ngil laud, Oh kalahngan en komwi, kalahngan en komwi.
Kauno ketin kapaiadahr ahi papah me wiawiher ni Mware. Ni rahno I kapakapki ehu manaman en kohdo ahpw sohte kapakapki pwe I en wia ahi pwukoa ni pwung. I kapakapki pwe aramasko en kehn limpoak en Kauno sang ni ahi wie papah ni limpoak. I esehda me iei kih en papah oh kapaiada mehteikan ni Mware.
I rong ehu mwekid me keren me katamanehng ie soangen limpoako. Ni en mihting koaros en Mwomwohdiso ar kakommoldi pwehki soumwahu doaro, emen ohl me kin wie sausawas alehda ehu pwukoa sang ah presiden en pwihn en elderko pwehn kapaiada oh kihda kamadipw sarawi ong lih emen me ohlo kin sesewese. Ni en ohlo eker liho pwehn wahla kamadipw sarawio, liho pwungkihla ni menseiren, pwe e sohte men ohlo en kohsang ni imweo ansou kepero oh pil kamehlele me mehkoars pahn mwadangete mwahula.
Ni en ohlo lella ni imwen liho ni menseng en Rahnkaunopo, liho peki rehn ohlo mehkoat. Ma ira kak aluhla ni ihmw teio oh pil wia kamadipw sarawio wasao rehn mehn mpe lih sounpar 87? Pwehki pisop mweidada kahrehda ohlo pwungkihla.
Nan erein wihk tohto kei, oh ni arail kin kanaiehng oh idawehn irairdi kan, pwihn en Souleng tikitik pwukau kin pokonpene ni ehuehu Rahn Sarawi pwehn ale kamadipw sarawi. Lepin pilawa malaulau kei oh kep en pihl kei--ahpw e kin kakerehdi pilenmas laud pwehki kalahngan sang Koht limpoako.
Sohte pwand, olen sawaso, ah peneinei, oh lih me e kin pwareko eri kakehr pwulara sarawi. Ahpw lih me sounpar 87 o, me kin mihte limwahrail, pwehki sang ni kahrepe, anahne mihmite ni imweho. Ohl en sawaso--tamataman me ah pwukoahu kin dokehte mehn mpe kan oh sohte iangahki lih laudo--lel rahn wet e kin kohla ni imwen lih laudo Rahn Sarawi koaros, weuwa pwuhk sarawi oh ehu kisin pilawa nan pehko, pwehn kihda kamadipw sarawi nin duwen Konot en Soutik en Kauno.
En ohlo papahn prihsduhd, duwehte ahio nan wasahn epwelo, wiawi sang ni limpoak. Me keren, ohl en sawaso peki rehn ah pisopo ma mie ekei aramas nan wardo me e kak apwali. En ohlo ineng en katehlapiala ah papahn prihsduhd keirdahr ni ah kin papah ni mwaren Kauno oh ni mwohmw ehu me Ih kelehpw me mwahngi. I sohte ese ma ohl en sawaso kin kapakap, duwehte me I wia, ong irail kan me e papah pwehn ese limpoak en Kauno, ahpw pwehki en ohlo papah wiewiawiher ni mwaren Kauno, dahme pweida ni imwio pahn duwepene.
Soangen pweida kohte kin wiawi ansou me I kin kapakap mwohn ei kin kihda kapai en prihsduhd ong aramas me soumwahu de mi nan kahpwal. E wiawi pak ehu nan imwen wini ni ansou me toahkte men sohla kak ih karuawahkin ie--me inenen karuaru mehlel--ahpw ruwese ie--ien mwadang oh keisang mwowe pwe irail en kak wia arail pwukoah doadoahk, ahpw sohte kiheng ie ai ansou en kihda kapai en prihsduhd. I mihmi oh kihda kapaio. Oh kisin serepein me i kapaiada rahno, me doahkte kau leme me e pahn mehla, e mourla. I inenen kapingki mehlel ansou wet ni rahno, i sohte mweidong ai pepehm kan en tiengla mwohi ahpw i kehn me Kauno kupwurki kisin serepeino en ale kapai. Oh i ese mehnia kapai mwo: i kapaiada en mwahula. Oh kisin serepeino mwahula.
E wiawiher pak tohto ni ei kin kihda ehu kapai ong aramas me kerenieng mehla, oh tohn ah peneinei kan kapel ah pehto, kaskasik ehu kapai en kakehlail. Itarete ahi ansou kin tikitik, I kin kalap kapakap ansou koaros pwehn ese soangen kapai da me Kauno ketin kolokol pwe I en kak kihda ni Mware. Oh I kin peki pwehn ese Kupwure pwehn kapaiada aramaso oh kaidehn dahme ngehi oh aramas akan me keskesihnen limwah wasao mwahuki. Ihme I eselahr me ni ansou me kapaio sohte wia dahme mehteikan anahne ong pein irail de ong kempoakeparail kan, Ngehno kin sair arail mohniong kan pwehn alehda oh nsenamwahudi ahpw sohte pahtou kihla.
Soangen kamarain ohte kin kohdo ansou me peidriark kan kin kaisihsol oh kapakapki kaweid pwehn kihda kapai me Kauno kupwurki ong emen aramas. Pilehu, I pil rongehr kapai kan me kohdahr me kapwuriamwei ihie oh pil kapwuriamwei ih aramas me ale kapaio. Mehlel, kapaio kohdo sang rehn Kauno--iangahki kapar kan oh inou kan me wia kisehn kapaio sang ni Mware. Kapakap oh kaisihsol en peidriark kin ale keting sang Kauno.
Ni ei wia pisop men, I esehda ni ei kin wia kapeidek en warehng kan pwehn kapakap peki Kauno en kaweid kin ie Kupwure ong aramaso, I kin kanaiehng kamarain kan sang Kauno pwe pein ahi madamadau en dehr karotongala. Met kin apwal ma Kauno, pwehki limpoak, kin kupwurki en kapaiada aramaso ki peneu. Kitail anahne nantihong kasawiada kupwuren Kauno sang dahme kumwail mwahuki oh aramas teio pahn anahne.
I kamehlele me kitail kak katehlapiala atail papahn prihsduhd nan erein atail wie momour oh pil pallahsang. E pahn pahsan atail ngoangki esehla kupwuren Kauno oh atail nsenohki rong Kepitie pwe kitail en kak ese mwahu Kupwure ong aramas me kitail wie papah pwehki Ih. Katehlapalaho pahn wiawi ni wad ekis, Ele e kakete pasapengla ekis ekis, ahpw udahn e pahn pweida. Kauno ketin inoukihong kitail me:
Pwe mehmen me pwoson oh ale prihsduhd riau pwukat me I koasoiahier, oh katehlapiala arail malipilip, kasarawilahr sang Ngehno ong weliakapw en paliwararail kan.
Irail wialahr nein Moses oh Aaron oh kadaudoken Eipraam, oh mwomwohdiso oh wehio, oh aramas pilipil kei en Koht.
Oh pil irail koaros me ale prihsduhd wet pil ale ie, Kauno mahsani.3
I kadehde me kih kan en prihsduhd alahldier rehn Soukohp Joseph Smith. Sounpapah kan en Kauno pwaredo sang nanleng kapwurehdo prihsduhd ong doadoahk lap akan me wiawiher oh mihmi mwohtail. Israel pahn kapokonpene. Aramas akan en Kauno pahn kaunopada ong Sapwellime Ketdo Keriau lingano. Kopwurupwurdohu pahn kohkohlahte mwowe. Kauno pahn ketin kasalehda Kupwure ong Sapwellime soukohp akan oh Sapwellime sounpapah kan.
Kumwail pahn kehn amwail tikitikla ni amwail karasa kumwail ong doadoahk lap akan me Kauno pahn ketin wia. Ma kumwail wia met, I luke kumwail en kapakap peki kumwail en ese mwomwen en Kauno ketin mahsani kumwail. E ketin mwahngi ihs kumwail, Ih me ketkida prihsduhdo pohmwail, oh amwail uhda oh katehlapiala prishduhdo wia mehkoat kesempwal Reh pwehki E ketin poakong kumwail oh E ketin liki kumwail en kapaiada aramas akan me E ketin poakoahng ni Mware.
I kapai kumwailda met pwehn kak kehn Sapwellime limpoak oh Sapwellime likilik ni mwaren Kauno Sises Krais, amen.