Eda Tukuni Karisito
Ni sa lailai na nona tukuni Jisu Karisito ko vuravura, me da tukuni Koya vakalevu cake o keda.
Au cavuta na noqu iloloma vei kemuni, na neimami itokani lomani kei na itokani vakabauta vata. Au qoroya tiko na nomuni vakabauta kei na yaloqaqa ena vica na vula sa oti, ni sa mai yavalata noda bula ka kauti ira na noda lewe ni matavuvale vakamareqeti kei ira na itokani lomani na mate taka e vuravura raraba oqo.
Ena gauna oqo ni veilecayaki, au vakila e dua na vakavinavinaka matalia ena noqu kila deivaki ni o Jisu na Karisito. Ko sa bau vakila beka e dua na ka vakaoya? Era tu na veika dredre ka dau bikai keda yadua, ia dau tu ga e matada o Koya a tukuna ena yalomalumalumu, “Koi au na sala kei na vu ni dina, kei na vu ni bula.” 1 Eda a vakayawaki keda voli vakayago mai vei ira tale eso me dua na gauna, ia me da na kakua sara ni vakayawaki keda vakayalo mai vei Koya sa kaci tu ena loloma vei keda, “Lako mai vei au.” 2
Me vaka e dua na kalokalo dau veidusimaki ena lomalagi makare ka butobuto, sa dau vakararamataka ko Jisu Karisito na noda sala. A lako mai ki vuravura ko Koya ena dua na valenimanumanu lolovira. A bulataka e dua na bula taucoko ko koya. A bulataka e dua na bula e uasivi sara. A vakabulai ira na tauvimate ka vakaturi ira cake na mate. A vakavulici keda o Koya me da dau caka vinaka, me da talairawarawa, ka veilomani. A mate ena kauveilatai, ka tucake tale vakaturaga ni oti e tolu na siga, sa rawa kina vei keda kei ira eda lomana me da bula sivita na ibulubulu. Ena Nona loloma uasivi sega ni vakatauvatani rawa, A taura Vua na noda ivalavala ca kei na noda vakararawataki, ka kauta mai na veivosoti ni da sa veivutuni kei na vakacegu ena cava ni bula oqo. Eda lomani koya. Eda qaravi Koya. Eda muri Koya. O Koya na ikelekele ni yaloda.
E taleitaki kina, ni tubu cake tiko e lomada na noda yalodina vakayalo, era tu e vuqa e vuravura se lailai sara na veika era kila me baleti Jisu Karisito, ia ena so na vanua e vuravura sa vunautaki tiko kina na Yacana me vica vata na senijiuri, sa seyavu tiko yani na vakabauti Jisu Karisito. O ira na Yalododonu bulabula mai Iurope era sa raica na kena naulu sobu na vakabauta ena nodra vanua ena loma ni veiyabaki. 3 E ka ni rarawa, eke e Amerika sa malumalumu sobu tale tikoga na vakabauta. Ena dua na vakadidike e vakavotui kina, ena loma ni 10 na yabaki sa oti e 30 na milioni na tamata e Amerika era sa lako tani mai na vakabauta na na itutu vakalou ko Jisu Karisito. 4 Ni da rai ki vuravura taucoko, sa tukuni ena dua tale na vakadidike ena veiyabaki sa tu mai liu ena sivia ni vakaruataki era na biuta na vakabauta Vakarisito mai vei ira era na karona. 5
Sa dina sara, eda rokova na dodonu ni tamata yadua me digidigi, ia a kaya vakaidina na Tamada Vakalomalagi, “Oqo na noqu Gone ni Toko: rogoci koya.” 6 Au vakadinadinataka ni na yaco mai na siga ena tekiduru na duru vakayadua ka vakatusa na yame kecega ni sa Karisito ko Jisu. 7
Na cava eda na cakava ena veiveisau eda sotava e noda vuravura? Ni so era vakawalena tiko na nodra vakabauta, eso tale era vakasaqara tiko na dina. Eda sa taura vei keda na yacana na iVakabula. Na cava tale e rawa ni da cakava?
Na Vakarautaki nei Peresitedi Russell M. Nelson
E rawa ni yaco mai e dua na tiki ni noda isaunitaro ni da nanuma mai na iwalewale a vakavulici Peresitedi Russell M. Nelson kina na Turaga ena veivula ni se bera na nona veikacivi vaka-Peresitedi ni Lotu. Ni vosa tiko ni vo e dua na yabaki me qai kacivi, a sureti keda o Peresitedi Nelson me da vulica vakatitobu na kena dusi vaka 2,200 na yaca Jisu Karisito ena iDusidusi Vakaiulutaga. 8
Ena tolu na vula i muri, ena koniferedi raraba ni Epereli, a vosa kina me baleta, ena veiyabaki sara mada ga ni nona bula yalodina vakatisaipeli, na vulici vakatitobu kei Jisu Karisito a tarai koya sara vakalevu. A tarogi koya o Sisita Wendy Nelson, me baleta na kena revurevu vua. A sauma o koya ka vaka, “Au sa veisau!” A tamata duatani o koya? Ni o sa yabaki 92, o sa duatani na tamata? A vakamacalataka o Peresitedi Nelson:
“Ni da sa solia na gauna me da vulica me baleta na iVakabula kei na Nona isoro ni veivakaduavatataki, eda sa vagolei [Vua]. …
“… Sa [yaco] me vakoti tu na noda rai vua na iVakabula kei na Nona kosipeli.” 9
E kaya ko Jisu, “Ia mo drau vakaliuci au ena nomudrau nanuma kecega.” 10
Ena dua na vuravura ni cakacaka, lomaleqa, kei na veisasaga kilikili, eda na vakacobara tiko na yaloda, noda vakasama, kei na noda vakanananu vei Koya na noda inuinui ka noda dauveivakabulai.
Kevaka a vukea na nona vakarautaki o Peresitedi Nelson na vakavoui ni nona vulica na iVakabula, ena sega beka ni vukei keda talega?
Ena nona vakabibitaka na yaca ni Lotu, a vakavuvulitaka o Peresitedi Nelson, Kevaka me da na rawata na mana ni Veisorovaki i Jisu Karisito—me savai keda ka vakabulai keda, me vaqaqacotaki keda ka vakalevulevui keda, ka qai vakacerecerei keda—sa dodonu me matata noda vakadinadinataka ni o Koya na ivurevure ni kaukauwa oqo.” 11 E vakavulica vei keda o koya ni kena vakayagataki vakadodonu e veigauna na yaca dodonu ni Lotu, ena vaka me dua na ka lailai walega, e sega saraga ni ka lailai, ia ena bulia cake na veisiga ni mataka kei vuravura.
Na Yalayala me baleta na Nomu Vakavakarau
Au yalataka vei kemuni ena noda vakavakarau, me vaka a vakayacora o Peresitedi Nelson, eda na duatani talega, eda na vakananuma vakalevu cake na iVakabula, tukuni Koya vakalevu cake, ena lailai na lomalomarua. Ni sa yaco me da kilai Koya ka lomani Koya vakatitobu cake, ena taladrodro vakavinaka cake na noda vosa, me vaka era dau vakayacora ni da tukuna me baleta e dua na luveda se dua na itokani lomani. O ira na vakarorogo vei iko ena lailai na nodra via veiba se biuti iko vakatikitiki ka vinakata me ra vuli mai vei iko.
O iko kei au eda sa tukuni Jisu Karisito, ia eda rawa ni vinaka cake vakalailai. Kevaka ena tukuni Koya vakalailai ko vuravura, o cei ena tukuni Koya vakalevu cake? O keda! Vata kei ira na vakabauta Vakarisito yalodina tale eso!
Tukuni Karisito ena Noda Vuvale
Sa tu beka na iyaloyalo ni iVakabula ena noda veivale? Eda dau tukuna beka vakawasoma vei ira na luveda me baleta na italanoa vakaibalebale kei Jisu Karisito? “Sa rawa me vaka na cagi cevaruru na italanoa kei Jisu ki yalodra na luveda.” 12 Ni ra tarogi iko na luvemu, vakasamataka vakavinaka mo vakavulica na veika e vakavuvulitaka na iVakabula. Taura mada, kevaka e taroga na luvemu, “Tata, na cava na vuna me da masu kina?” O na sauma beka vaqo, “Oqori e dua na taro vinaka. O nanuma beka na nona a masu o Jisu? Me da veitalanoataka mada na vuna a masu kina kei na iwalewale ni Nona masu.”
“Eda sa veivosakitaki Karisito, eda reki ena vukui Karisito, eda vunautaki Karisito … me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.” 13
Tukuni Karisito ena Lotu
Na ivolanikalou vata oqo e vakuria ni da “vunautaki Karisito.” 14 Ena noda sokalou, me da dau vakanamata tikoga vua na iVakabula ko Jisu Karisito kei na isolisoli ni Nona isoro ni veivakaduavatataki. E sega ni kena ibalebale ni sega ni rawa ni da tukuna e dua na ka e yaco ena noda bula se wasea na vakasama mai vei ira tale eso. Na noda ulutaga ena baleta beka na matavuvale se veiqaravi se valetabu se dua na kaulotu se qai oti wale toka, na veika kece ena noda sokalou e dodonu me dusia na Turaga o Jisu Karisito.
Ena tolusagavulu na yabaki sa oti, a tukuna o Peresitedi Dallin H. Oaks me baleta e dua na ivola a ciqoma “mai vua e dua na tamata a kaya ni a tiko ena dua na [soqoni ni sakaramede] ka vakarorogo ki na tinikavitu na ivakadinadina a sega ni bau rogoca me cavuti kina na iVakabula.” 15 Qai kaya kina o Peresitedi Oaks, “De rairai a vakalevulevui beka na ivakamacala oya [ia] au cavuta eke baleta ni dua na ivakananumi matata vei keda kece.” 16 Oti a qai sureti keda me da tukuni Jisu Karisito vakalevu cake ena noda vosa kei na veitalanoa ena kalasi. Au sa dikeva tiko ni da sa vakanamata vakalevu cake tikoga vei Karisito ena noda veisoqoni ni Lotu. Me da tomana ena qaqarauni na sasaga vinaka oqo.
Tukuni Karisito vei ira na Tani
Vei ira era tu wavoliti keda, me da dolavi keda yani vakalevu cake, me da tuvakarau me da tukuni Karisito. E kaya o Peresitedi Nelson, “O ira na tisaipeli dina i Jisu Karisito era sa tuvakarau me ra kilai tani, tukuna na lomadra, ka duatani mai vei ira na tamata e vuravura.” 17
Ena so na gauna eda dau nanuma, na noda veitalanoa kei na dua na tamata e dodonu me kena icavacava me ra lako mai lotu se me ra sota vata kei ira na daukaulotu Laiva na Turaga me dusimaki ira ni ra sa tuvakarau, ni da vakasamataka vakalevu cake na noda itavi me da vakavoqataka na Domona, me da dau nanuma ka tukuna yani na noda vakabauta. E vakavuvulitaka o Elder Dieter F. Uchtdorf ni dua e tarogi keda me baleta na noda muanimacawa, e dodonu me da tuvakarau me da sauma ena yalomarau ni da a taleitaka na noda rogoca na nodra lagata na gone ena Lalai, “I’m trying to be like Jesus.” 18 Me da vakadinadinataka ena yalovinaka na noda vakabauti Karisito. Kevaka e dua e wasea na leqa e tiko ena nona bula, eda na kaya beka, “Jone, Mere, o kila tiko niu vakabauti Jisu Karisito. Au vakasamataka tiko e dua na ka a kaya o Koya ena rawa ni vukei iko.”
Tukuna vakalevu cake ena tabana vakaitukutuku ni veimaliwai raraba me baleta na nomu vakararavi vei Karisito. E levu ena rokova na nomu vakabauta, ia kevaka e dua e tuvakasuka ni o tukuna na iVakabula, me vakayaloqaqataki iko na Nona yalayala: “Dou sa kalougata, ni dou sa vakasewasewani … ena vukuqu. … Ni sa levu na kena isau vei kemudou mai lomalagi.” 19 Eda kauwaitaka vakalevu cake na noda dau muri Koya mai na noda “taleitaki” mai vei ira era dau muri keda. E veivakasalataki o Pita: “Mo dou vakarau tiko mo dou tukuna vua na tamata yadua sa tarogi kemudou, na vu ni inuinui sa tu e lomamudou.” 20 Me da tukuni Karisito.
Na iVola i Momani sa dua na ivakadinadina mana kei Jisu Karisito. Na veitabana yadua e vakadinadinataka na iVakabula kei na Nona ilesilesi vakalou. 21 E vakasinaiti tu ena veitabana na kilaka baleta na Nona Veisorovaki kei na loloma soliwale. Ni itokani ki na Veiyalayalati Vou, e vukei keda na iVola i Momani me da kila vakavinaka cake na vuna e lako mai kina na iVakabula me mai vueti keda kei na ivakarau eda na lako mai kina ki Vua.
Eso na noda itokani vakabauta Vakarisito, ena so na gauna, e sega ni ra vakadeitaka na noda vakabauta kei na noda inaki. Me da reki vakaidina vata kei ira ena noda vakabauti Jisu Karisito vata kei na iivolanikalou ni Veiyalayalati Vou eda dau taleitaka kece. Ena veisiga sa tu e matada, era na gadreva o ira era vakabauti Jisu Karisito na veitokani kei na veitokoni vakataki ira. 22
Ni sa lailai na nona tukuni Jisu Karisito ko vuravura, me da tukuni Koya vakalevu cake o keda. Ni sa vakatakilai na rokada dina vaka Nona tisaipeli, e levu era wavoliti keda tu era na vakarau me ra vakarorogo. Ni da wasea na rarama eda sa ciqoma mai Vua, ena cilavi ira era sa tuvakarau me ra dolava na yalodra na Nona rarama, kei na Nona kaukauwa cecere ni veivakabulai. E kaya ko Jisu, “Au … sa lako mai ki vuravura meu kena rarama.” 23
Laveti Cake na Noda Gagadre meda Tukuni Karisito
E sega ni dua na ka e dau uqeta vakalevu cake na noqu gagadre meu tukuni Karisito mai na noqu raitayaloyalotaka na Nona lesu mai. Ni da sega ni kila na gauna ena lako mai kina, ena vakariseyate na veika ena yaco ena Nona lesu mai! Ena lako mai o Koya ena veio ni lomalagi ena vakaturaga kei na lagilagi kei ira kece na Nona agilosi savasava. E sega ni vica walega, ia o ira kece na Nona agilosi tabu. Oqo e sega ni o ira na jerupimi balu bota ka a droinitaka o Raphael, ka toka ena kadi ni Valentine. Sai ira oqo na agilosi ni vei yabaki sa sivi yani, na agilosi era a talai mai me ra sogota na gusudra na laione, 24 me ra dolava na katuba ni valeniveivesu, 25 me ra mai kacivaka na Nona sucu ka sa waraki tu mai vakabalavu, 26 me vakacegui kina ko Koya e Kecisemani, 27 me vakadeitaki kina vei ira na tisaipeli na Nona Cabe cake, 28 ka me dolava na kena Vakalesui mai ena lagilagi na kosipeli. 29
E rawa beka ni o raitayaloyalotaka mo lako ka veitata vata Kaya, ena yasa ni ilati oqo se ena yasana kadua. 30 Oqori na nona yalayala vei ira na buladodonu. Na veika totoka oqori ena vakaimawe tu me tawamudu e yaloda.
Sa dua na ka na levu ni noda vakavinavinakata na noda parofita lomani, o Peresitedi Russell M. Nelson, o koya sa laveta cake na noda gagadre me da lomana na iVakabula ka vunautaka na Nona vakalou. O au e dua na ivakadinadina bula ni liga ni Turaga ki vua kei na isolisoli ni ivakatakila ka tuberi koya voli. I Peresitedi Nelson, keimami sa waraka ka namaka na nomuni ivakasala.
Kemuni na noqu itokani lomani e vuravura taucoko, me da tukuni Karisito, ka namaka tiko na Nona yalayala lagilagi: “O koya yadua ena tukuni au ena matadra na tamata, au na tukuni koya talega ena matai Tamaqu.” 31 Au vakadinadinataka ni o Koya na Luve ni Kalou. Ena yacai Jisu Karisito, emeni.