Parofita, Veiliutaki, kei na Lawa Vakalou
Dua na Yakavi vata kei Peresitedi Russell M. Nelson
Lotu ni iTabagone Qase Cake e Vuravura Raraba • 08 ni Janueri, 2017 • Brigham Young University
Kemuni na taciqu kei na ganequ daulomani, au kauta mai na vakanuinui kei na loloma kivei kemuni mai na Mataveiliutaki Taumada kei na Kuoramu ni iApositolo Le Tinikarua. Keitou vakavinavinakataka na nomuni tiko rawa ena bogi nikua kei na nomuni vakarautaka na lomamuni kei na nomuni vakasama mo ni vakavulici vakayalo. 1
Mai na Janueri 2016, ena noqu a vosa vei kemuni ena soqoni oqo ni lotu e vuravura raraba, au sa sotava e vuqa vei kemuni ena noqu ilakolako ki Japani, Filipaini, Jaina, Kenada, Igiladi, Welesi, Jamani, Itali, Sipeni, kei na veivanua e Amerika.
Ena Sepiteba sa oti, au a sotava e dua na ka tawaguilecavi rawa vata kei Elder M. Russell Ballard kei ira na iliuliu ni Lotu tale eso ni keimami a gole ki Baton Rouge, Louisiana, me sotavi ira na tamata ekea ni oti e dua na waluvu vakadomobula. Ena Sigatabu, keitou a vakayacora yadua e va na soqoni levu ni sakaramede—e dua me baleti ira na vakaleqai ka tolu me baleti ira na liga ni veiqaravi era a gole mai na vuqa na yasana me ra veivuke ena sasamaki. Na itaba eso oqo e vakaraitaki ira na ivavakoso ena Siga ni Vakacecegu oya ka umani tu kina e drau vakacaca era dara tu na siqeleti eda kilai tani kina na Mormon Helping Hands.
Raica matua na nodra mata dredredre na cauravou kei na goneyalewa era a biuta na nodra itikotiko me vukei ira na tamata era sega tu ni kila, ni donuya na draki katakata tunumaka sara e Louisiana, ka ra cegu ga ena Siga ni Vakacecegu me ra sokalou kivua na Turaga. Niu vakaraici ira tu na ivavakoso totoka ka daucakacaka oya, ka levu vei ira era tabavata kei kemuni, a tuburi au e dua na yalo veivakadrukai niu sa raici ira tiko na turaga kei na marama ka ra na iliuliu ni Lotu oqo ena dua na gauna lekaleka.
Ia na bogi nikua, ena noqu raitayaloyalotaka voli na nomuni soqoni tu e vuravura raraba, au na via vakadre ka vosa ena ka e vakavotui oya. Sai kemuni na iliuliu ni Lotu ni mataka ni Turaga! Ko ni sa vakarau tu li mo ni taura na itavi vakaveiliutaki?
Niu a vosa vei kemuni ena yabaki sa oti, au a bolei kemuni mo ni cadra cake mo ni tamata dina ni mileniumi o ni a sucu mo ni vakataka. Mo ni sa veivuke ni vakarautaka na vuravura me baleta na veiliutaki ni iVakabula ena gauna ni veisaututaki ena nodra vakasokumuni na digitaki mai na tutu vava kei vuravura, ka ni o ira kece na sa digitaka me ra cakava vakakina era na ciqoma na kosipeli i Jisu Karisito kei na kena veivakalougatataki taucoko. Au via vosa ena bogi nikua vei kemuni ena iwalewale mo na vakavakarau kina.
iMatai, dikeva na nomu bula vakawati kei na matavuvale. Vakayacora na veika o a vakila ena nomu rogoca na va na dina nei “Aunt Wendy” me baleta na dodomo kei na vakawati.
Na nomu itavi vua na Turaga mo veivuke ni vakasokumuni ira na digitaki mai na bula veilecayaki kei na iwase vakaitamera ni ivalavala ca e wavoliti keda tu ena noda gauna e sa sega sara ni tavi lailai. E sa vakayagataka voli o Lusefa kei ira na vakamuri koya na veisala kece ni tekinoloji kei na veitaratara me ra vakatetea kina na lasu eso me baleta na bula kei na ivurevure dina ni bula marau. Ia, mo cakava na ka o a lako mai kina ki vuravura mo cakava sa na gadrevi kina na kila matai vakaveiliutaki vinaka sara era rawa ni rawata na nomu itabatamata.
E vakavinavinakataki, ni sa tiko eso na ivakaraitaki momona sara me vakamuri. Ni na rairai wanonova tu o vuravura na ivakarau ni veiliutaki totoka ni turaga kei na marama me vakataki Napoleon, Joan of Arc, George Washington, Mahatma Gandhi, Mother Teresa, kei na so tale, au vakabauta ni o ira na iliuliu vinaka duadua ka sa lakova na vuravura oqo sai ira na parofita ni Kalou.
Me yacova mai oqo, sa digitaka oti na Turaga e 16 na turaga me Peresitedi ni Nona Lotu, sa vakalesui mai ena itabagauna oqo—oqo na itinitini ni itabagauna ena itukutuku makawa kei vuravura. Au sa kilai iratou vinaka e 10 na turaga e 16 oya. (Sa tukuna tiko oya na levu ni noqu yabaki mai na veika tale eso. Meda sa qai kaya ga kina vakaoqo: Ni sa matua sara na bula, ka sa na sega ni balavu na tiko.)
Ia, kevaka o sa vakabibitaka mo cadra cake ka tamata dina vakamileniumi, au sa vakamasuti iko mo vulica na nodra bula kei na ivakavuvuli na parofita ni Kalou e 16 oqo.2 Na vuli oqori ena veisautaka na nomu bula. Meu sa wasea mada e vica na ivakavuvuli vakaveiliutaki au sa vulica rawa mai vei ira?
Nai ka 10 ni Peresitedi ni Lotu, o Peresitedi Joseph Fielding Smith, a vakaitikotiko voleka toka ga mai na noqu itikotiko vakagone. Rau a noqu itokani tabavata na luvena tagane. Rau dau sureti au wasoma ki na nodratou itikotiko.
A Peresitedi ni Lotu o Peresitedi Smith ena 1971, ena noqu a kacivi meu Peresitedi Raraba ni Mata Wilivola ni Sigatabu. Ni keirau a tomani koya vata kei na watiqu sa leqa, o Dantzel, ena yabaki oya ki na imatai ni koniferedi ni iwasewase, ka vakayacori e Manchester, Igiladi, au a vulica e dua na lesoni kaukauwa ena veiliutaki momona ena nona taroga o Peresitedi Smith na ripote e so mai vei ira na Vakaitutu Raraba ka ra kumuni toka ena dua na rumu lailai ni bera na koniferedi.
Ni ra sa vosa oti taucoko, ena nona rawa ni soli vakatulewa ga vakataki koya, a duri vakamaqosa tu vakailiuliu o Peresitedi Smith, ka sureti ira voli me ra vuli mai na yalomatua ni nona yabaki 94, ni vakaraitaka tu na nona loloma kei na gagadre dina me vukei ira. Au kauwai ena qaqa ni iliuliu oqo ena cauraki ni loloma kei na yalodei kivei ira na nona tamata. Ni oti na koniferedi ni iwasewase, ni keirau vakavinavinakataki Peresitedi Smith ena nona itukutuku vakasakiti, a sauma ga okoya, “Au sega ni lako mai ke meu mai druka.”3
A tiko vua na vakabauta ni na dusimaka na Turaga na veika me vakayacori oya ni vakayacora o Peresitedi Smith ena nona kaukauwa taucoko me tosoya na cakacaka. Na vakabauta, masumasu, vuli, kei na cakacaka vakaukauwa sa vakavuna na qaqa ni cakacaka vata. Me vaka ga a sega ni gole i Igiladi o Peresitedi Smith me druka, sa talai iko mai ki vuravura na Tamada ena iotioti ni itabagauna oqo mo kakua ni druka ia mo rawaka—ka kune reki ena nomu cakava voli.
A lewe tu ni Kuoramu ni iApositolo Le Tinikarua o Peresitedi Ezra Taft Benson me rua walega na yabaki ni, ena Tiseba 1945, ni oti toka ga na revurevu ni iKarua ni Valu Levu, sa kacivi Elder Benson o Peresitedi George Albert Smith me veiliutaki ena Tabana ni Kaulotu e Iurope. A voravora sara na ituvaki ekea. Ena 10 na vula ni ilesilesi ni loloma kivei ira na lewenilotu era sa vakaleqai tu ena ivalu, a gole yani o Elder Benson ki Jamani, Poladi, Jekosolovakia, kei Scandinavia, ena veisoliaki ni kakana, isulu, kei na idavodavo kivei ira na Lewenilotu vakaleqai.4 A sotava veitaravi okoya na veika a nanumi me na sega ni wali rawa. Ia a vakaraitaka veitaravi okoya na “vakabauta yaloqaqa ena kaukauwa ni Turaga me ra-wa na dredre e so.”5
Ni oti e vasagavulu na yabaki, ena Noveba 1985, o Peresitedi Benson, ka sa mai tabaki me Peresitedi ni Lotu, a lesi au me dua na lewe ni Tinikarua gone meu sa laki tekivu vakatetea na kosipeli ki na veivanua ena Tokalau kei Iurope ka se vakarurugi tu vakominisi ena gauna oya.
Au a vakila na noqu tawavakarau tu ki na dua na ilesilesi veibolei vakaoqo, ia o Peresitedi Benson a sa tekivuna rawa na cakacaka oqo mai vei au. E rawa vakacava meu sega ni cakava me vaka e sa cakava okoya? Na nona ivakaraitaki a vakayaloqaqataki au meu masu ka cakacaka vakaukauwa sara ka qai sarava voli na liga dauveivuke ni Turaga veivakurabuitaki.6
Ni dua vei keda e vakila ni vakadrukai, sa rawa ni da vuli vakalevu mai vei Peresitedi Benson. E walu na yabaki na nona veiqaravi vakatautauvata tu vaka iApositolo kei na sekeriteri ni iteitei ena matabose ni peresitedi kei Amerika o Dwight D. Eisenhower.
E rawata vakacava okoya? Oqo na ka e a tukuna: “Au cakacaka ena kena levu taucoko au rawata ka cakava na veika kece ena noqu kaukauwa. Kau sa tovolea meu muria na ivunau. Kau sa qai laiva vua na Turaga me semata na duidui.”7 Sai koya oya na veivosa me bulataki.
A dua na iliuliu wararasa o Peresitedi Gordon B. Hinckley ka sa vakasakiti dina na nona veivakatavulici ena vakatulewataki ni Lotu. Ni bera na nona veiqaravi vaka ika 15 ni Peresitedi ni Lotu, e a daunivakasala tu okoya ki na tolu na Peresitedi makawa. Ena nona lesu mai na kaulotu vakacauravou ki Igiladi, a cakacaka ena Lotu okoya ena veitabana e so, ena nodratou vakatulewa ga na Mataveiliutaki Taumada kei na Kuoramu ni Le Tinikarua. A dau tarogi vakaveitaravi okoya me walia eso na bolebole veiganiti. Me kena ivakaraitaki, a lesi Baraca Hinckley o Peresitedi David O. McKay me vakaraica na iwalewale ni kena vakarautaki na cakacaka vakalotu ni edaumeni ena vakayagataki ni yaloyalo me rawa ni sotavi kina na gagadre eso ni vakavakadewa me baleta na tubu tiko ni Lotu.
E sa dua na dauniveivosaki o Peresitedi Hinckley daumaka vakaoti. A vosa vakadoudou okoya me baleta na kosipeli kivei ira kecega na tamata mai vei ira na dauvolaitukutuku matua ki na veiliuliu ni matanitu. Au a vakadinadinataka na nona a vakamalumalumutaka na lomai Mikhail Gorbachev, na peresitedi eliu kei Rusia, ka a levea taumada me sota vata kei Peresitedi Hinckley ena nona valenivolavola. Ia, a vinakata o Mr. Gorbachev me lako yani o Peresitedi Hinckley ena nona rumu ni otela. Ia na gauna rau sota kina ena Valenivolavola Liu ni Lotu, a dusia o Peresitedi Hinckley na kau masikuvui totoka ena rumu ni matabose ni Mataveiliutaki Taumada. Ni a tukuna o Peresitedi Hinckley vei Mr. Gorbachev na vanua a kau mai kina na kau oya, e a qoroqoro o Mr. Gorbachev! Na kau oya a gole sara ga mai na vanua a sucu kina o koya e Rusia!8 A veisau kusarawa sara na nona imoimoi.
E dau yalodei tu ga o Peresitedi Hinckley, na vatuka vakataucoko ni nona vakabauta na Turaga. Donuya volekata e 13 na yabaki vaka Peresitedi, a liutaka na Lotu okoya ena dua na gauna maucokona ni veiwalewale vovou, oka kina na vakarautaki ni valetabu lalai, na tara ni Vale ni Koniferedi, na kacivaki ni 79 na valetabu vou, kei na vakatabui se vakatabui tale ni 95 mai na 124 na valetabu era sa vakayagataki voli. Na raivotu nei Peresitedi Hinckley, kei na ka e gadreva vakaikoya me baleta na raivotu oya, e sega na kena icavacava.
A dua toka na kenadau ena itukutuku makawa ni Lotu o Peresitedi Hinckley. A daurairai talega okoya. Ni sa vaka tu oya, sa doudou okoya me vakatakila na veika sa tu mai liu. Rogoca mada na nona vosa: “Na cakacaka oqo [i Karisito] ena qiqi yani ena lagilagi kei na kaukauwa me vakatawana na vuravura. Na veikatuba era tasogo tu oqo ki na vunautaki ni kosipeli ena tadola. O Koya sa Cecere Sara, ke ganita, ena vakayavalata na veimatanitu me ra vakamalumalumutaki ira ka vakavuna me ra vakarorogo kivei ira na italai ni Kalou bula. Na ka kecega e gadrevi ena yaco vakakina.”9
Sa mai parofita bula ni Turaga oqo o Peresitedi Thomas S. Monson e vuravura. Eda sa lomani koya, tokoni koya, ka masulaki koya! Eda sa vuli vakalevu sara mai vua! Vakasamataka mada. A kacivi okoya me bisopi ena yabaki 22. Era okati ena nona tabanalevu e rauta ni 80 na yada. E a kacivi okoya me dua na iApositolo ena yabaki gone ni 36. E sa bula voli o Peresitedi Monson me vaka na ibole “Kevaka e gadreva na Turaga me caka e dua na ka, au vinakati Koya me kila ni sa rawa Vua me nuitaki Tom Monson me cakava.”10
E sa vakaraitaka vei keda okoya na iwalewale meda lako yani ka vueta mai na dua. E sa vakatavulici keda ena ivakaraitaki ni nodra vukei na tamata e sa dau ka bibi sara mai na vakatulewataki ni gauna, se soqoni, se ituvatuva eso.
Ena nona bula taucoko, sa dau taura o Peresitedi Monson eso na sala digitaki ki vale ni cava e dua na siga balavu ni cakacaka. So na gauna e tacegu okoya ena dua na valenibula me vakalomavinakataki ira na kune rarawa tu. So tale na siga ena vagolei okoya ki na so na vale vakatabakidua me veisiko. Dau vakavuqa me na sotavi ena matatagitagi na nona tukituki tawanamaki mai vua e dua ni kaya mai, “O kila vakacava ni oqo na siga ni ivakananumi ni mate ni luvei keirau yalewa?” se “O kila vakacava ni noqu siganisucu nikua?”
Ena nona bula taucoko, sa vakaraitaka vakamatata o Peresitedi Monson e rua na ivalavala momona ka yaco kina me ra iliuliu vakamareqeti na parofita ni Kalou: Matai, e sa vakatatamuria okoya nai matai kei nai karua ni ivunau levu—mo lomana na Kalou ena yalomu taucoko ka lomani ira na kai nomu, ira na luve ni Kalou, me vaka eda sa lomani keda. Ka kena ikarua, sa kila vakayadua na parofita na iwalewale me ciqoma kina na ivakatakila ka sausaumi kina vakatotolo ni sa basika mai. E sa ivakaraitaki matua ni veiliutaki yalododonu o Peresitedi Thomas S. Monson.
O ira na parofita ni Kalou e vuqa tu na ivakarau ni bula era tautauvata kina. Dua oya na parofita yadua e kila deivaki tu na bibi ni lawa vakalou. Sa cakacaka vata na kilai ni lawa vakalou kei na veiliutaki momona yalododonu. Na levu ga ni lawa ni Kalou o kila—ka vakabibi sara, na nomu bulataka—na kena momona vakalevu vakakina na nomu veiliutaki yalododonu.
Niu se vuli vuniwai voli, na noqu vulica vakabibi na yago ni tamata a vakauqeti au ni bula tiko na Kalou. Niu sa mai kila ni sa ibulibuli ni Kalou na yago, au a vakadrukai vakalevu ena lawa e so ni Kalou me baleta na cakacaka ni yago. Ena vakadidike levu vakavuniwai, au a vulica na lawa ka baleta na tavatukituki ni uto. Me tomani, au vulica ni sa rawa ni vakacegui tu vakawawa ka na tavatukituki ni uto me qaravi kina e so na ripea momona ni veisele. Oqo e rawa ni caka ni veisautaki na ivakarau ni sodium/potassium ena dra ka vakadrodroi ki na uto. Emuri, ni sa vakani na uto ena dra ena ivakarau donu ni sodium/potassium, sa na tavatukituki donu tale na uto. A yaco na veika a kunei rawa oqo me vakamareqeti, nuitaki, ka tomani voli.
A se qai noqu wale toka ga na madigi meu vakamacalataka oqo ki na dua na kalasi ni vuli vuniwai. A tarogi au e dua na parofesa kilai tani, “Ia vakacava ke sega ni na cakacaka?” Au a sauma, “E dau cakacaka tu ga! E cakacaka mai na lawa vakalou.”
Na lawa vakalou e sa tawacakitaki ka tawavakacalai rawa. E sega ni rawa ni cakitaki se veibataki na lawa vakalou. Ni ra sa vakamuri na lawa ni Kalou, sa dau vakavotukana tu ga na kena veivakalougatataki! Sa ra dau yalataki tu ga na veivakalougatataki ena talairawarawa ki na lawa e veiganiti kaya.11
E rawa ni vakamacalataka o ira na vakadinadinataka ni bula tiko e dua na ka; e rawa ni ra veidutaitaka na tawavakabauta ena vovodea ni nodra raica na veika dina—ni dina e sa dua ga na ka o sotakaya—na lawa ena lawa tikoga! Na dina ni Kalou e sa ka dina sara! Na ka e tukuna na Kalou e donu e sa donu! Na ka e tukuna o Koya e cala e sa cala!
O ya na vuna e sa ka bibi kina mo kila na lawa ni Kalou. Era tutaka na vuravura oqo kei na lewevuqa tale e so. Ni ra sa voroki na lawa vakalou, sa muria mai na kena revurevu. Dina ga ni mositi keda o ira na voroka voli na lawa ni Kalou, sa dodonu me tau na itotogi. Sa dodonu me muri na lawa vakalou.
Au a vulica oqo niu vuniwai ni veisele voli nei Peresitedi Spencer W. Kimball. Ni sa mai tasogo vakasauri na icegucegu buli ni nona uto, a mai kere veivuke vei au o Peresitedi Kimball. A kerei au taumada okoya meu solia vua e dua na veivakalougatataki vakamatabete. Oti na veivakalougatataki, ka yalataki kina na vakadodonutaki ni nona icegucegu tasogo, a qai kaya okoya veiau, “Sa kena gauna oqo mo cakava na cava ga o gadreva mo cakava me vakataudeitaki kina na veivakalougatataki oya.”
Au sa mani tomana na veisele. Ena waya ka vakau livaliva mai na icegucegu ki na nona uto, au kunea ni a cavuka toka na kena isema. Niu sa sosomitaka na waya ca oya, a cakacaka kusarawa tale na icegucegu, ka vakatara na uto nei Peresitedi Kimball me tavatukituki donu tale. Sa sega ni rawa mada ga ni vakatanitaki kina kivua na parofita ni Kalou na lawa ka semati ki na vakau ni livaliva.
Sa parofita vakaidina, ni Kalou o Peresitedi Kimball. Niu vakaraici koya vakavoleka voli ena veileqa eso ka vakadikeva tu na nona vuli vagumatua ena qarai ni ivakatakila, sa noqu ivakaraitaki dina okoya. Sa tawayalani na noqu loloma kivua!
Ni vakasinaiti tu na vuravura ena veilecayaki, sa sega ni dodonu me veilecayaki na lomamu kei na nomu vakasama me baleta na ka e dina kei na ka e sega ni dina. Na veika tawamacala e sa vakasucumi mai na itukutuku tawadodonu se tawakilai. Vaka e dua na iApositolo, au sa vakamasuti iko mo vulica na lawa tawaveisau rawa ni Kalou. Vulici ira ena vulika kei na vakabauta. Sa kena ibalebale oya, mai na veika tale e so, “[muria] na vosa kece ga sa lako mai na gusu ni Kalou.”12
Masulaka mo veidutaitaka rawa na lawa ni Kalou kei na kilaka vakatamata, oka kina na ivadi qaseqase ni vunica. Donuya na veigauna, e sa bulia vakamatau voli o Lusefa na nona ilawaki. Sa matai sara okoya ena veivagolei tani, veivakasewasewani, veidabui, kei na veicavilaki. Au vakamasuti iko mo levea na nona lawaki qaseqase me vaka e dua na mate rerevaki!
Na icori e so sa vakarautaka tu o Setani sa rawa walega ni kauta mai vei iko na vakaloloma, ivesu vakayalo, kei na mate.13 Sa dina oqo ena veigauna kece. Na revurevu vakatuburarawa ni rawai mai na veicavilaki nei Lusefa sa ra kilai levu, nuitaki, tomani voli, ka rarawataki.
Ni vakatauvatani, au yalataka ni o muria na ivunau ni Kalou, ni o bulataka na Nona lawa, o sa na vagalalataki vakalevu sara. Na veivagalalataki oqo ena vakatakila vei iko na nomu bula vakalou ka vakatarai iko mo rawaka. Ko na galala mai na ivesu ni valavala ca. Ko na galala mo bula vakataki iko—e dua na iliuliu momona ka yalododonu. Ko sa na vakarau tu mo veiliutaki ena ivakavuvuli kei na ivakaraitaki ena vanua cava ga o gadrevi kina. Ka ni marau, ni ra sa vakamareqeti, nuitaki, ka tomani voli talega na veivakalougatataki ni kena muri na ivunau ni Kalou.
Me vaka na lewe ni Nona Lotu vakalesui mai, eda kila ni o Jisu Karisito, na noda iVakavuvuli, sa noda iLiuliu duabau. Vaka e dua na dauniveisaututaki dina, o a sucu mo dua na tisaipeli dina i Jisu Karisito. Vakaidina, na sala duadua ga mo na dauniveisaututaki dina kina oya mo dua na Nona tisaipeli dina!
E rawa vakacava ni o vakalevutaka na nomu bula vakatisaipeli? E tiko vei au e dua na veisureti me na veivuke—e dua na ilesilesi taumada—kevaka o digitaka mo vakadonuya. Tekivutaka ena bogi oqo mo vakatikitikitaka e dua na tiki ni nomu gauna ena veimacawa mo vulica taucoko kina na veika a kaya ka cakava o Jisu me vaka e volai tu ena Veiyalayalati Makawa, ni sa Jiova o Koya ena Veiyalayalati Makawa. Vulica na Nona lawa era volai tu ena Veiyalayalati Vou, ni sai Koya na kena Karisito. Vulica na Nona ivunau me vaka e volai tu ena iVola i Momani, ni sa sega ni dua na ivolanikalou e vakatakilai vakamatata cake kina na Nona ilesilesi kei na Nona veivakalotutaki. Qai vulica na Nona vosa ka volai tu ena Vunau kei na Veiyalayalati, ni sa tomana voli o Koya me vakatavulici ira na Nona tamata ena itabagauna oqo.
Oqo ena rairai vaka e dua na ilesilesi levu, ia au sa vakauqeti iko mo vakadonuya. Kevaka o sa tekivu mo vulica taucoko na ka o rawata me baleti Jisu Karisito, au yalataka vei iko na nomu loloma me baleti Koya, kei na lawa ni Kalou, ena tubu sivita na veika o sa kila tu oqo. Au yalataka talega vei iko ni na vakalevutaki na nomu igu mo vakanadakuya kina na ivalavala ca. Ena cadra na nomu gagadre ni muria na ivunau. Ena rawarawa cake vei iko mo na lako tani mai na nodra veivakamarautaki kei na veivakataotaki na dauvakacacani ira na dau muri Jisu Karisito. Me vukei iko, rai ki na iDusidusi Vakaiulutaga me baleta na yavuduri e so ena ulutaga “Jisu Karisito.”14
Vulica ena masumasu na veika taucoko me baleti Jisu Karisito ka vaqara vagumatua mo kila deivaki na ka era vakaibalebaletaka vei iko vakayadua na Nona itutu kei na yaca e so vei iko. Me ivakaraitaki, sai Koya dina na nomu Dauveicuqeni vata kei na Tamada. Ena totaki iko o Koya. Ena duri o Koya ena vukumu. Ena vosa o Koya ena vukumu, ena veigauna kece, ni ko digitaka cake mo na vakataki Koya.16
Saga mo kilai Koya ena vulici taucoko ni veika sa tomana voli o Koya me vakatavulica mai vei ira na Nona parofita kei na iapositolo bula. Vulica “Na Matavuvale: Ai Vakaro ki na Vuravura.” Vulica na ivola “Na Karisito Bula”. Rau a ciqomi ruarua oqo ena ivakatakila. Vakabira ena initaneti kei na vanua o rawa ni raica kina ena veisiga.
Na veivosa vakatakilai oya sa ka era vakabauta na Yalododonu dina kece sara Edaidai. Masulaka e dua na ivakadinadina ni ra sa matataka na lawa vakalou na veidina oya. Vulica mo madila ena veidina oya ena nomu vosa. Vakatovotovo! Qai masu ka vakaraica na madigi e so mo vosataka na veika o vakabauta. Ena vakalevutaki na nomu igu mo veiliutaki ka veivakayarayarataki ena yalododonu ni ko cakava vakakina.
Ena dua na siga, o na tucake tu ena mata ni iVakabula. O na vakadrukai ena tonawanawa ni matamu mo tu e Matana tabu. O na sasaga dredre mo kunea na veivosa mo vakavinavinakataki Koya kina ena savai ni nomu ivalavala ca, ni vosoti iko voli ena itovo tawakilikili e so ki na so tale, ni vakabulai iko voli mai na mavoa kei na ivakarau tawadodonu e so ni bula oqo.
Ko na vakavinavinakataki Koya ni vakaukauwataki iko mo cakava na ka e tawarawa, ena vukici ni nomu malumalumu ki na kaukauwa, kei na kena rawati mo bula vakaoti vata kei Koya kei na nomu matavuvale. Na Nona ivakatakilakila, Nona Veisorovaki, kei na Nona ivakarau ni bula ena ka vakaidina ka matau saraga kivei iko.
Ia sega ni dodonu mo waraka sara na gauna oya. Digitaka oqo mo dua na Nona tisaipeli dina. Mo sa dua ka dau lomani Koya vakaidina, ka vinakata vakaidina mo veiqaravi ka veiliutaki me vakataki Koya.16
Eda sa Nona tamata! Eda sa yalayala meda kauta na itukutuku ni kosipeli ki na veimatanitu, veimataqali, duivosavosa, kei ira na tamata. Ni da cakacaka nakita voli meda sa iliuliu yalododonu, sa rawa ni da lagata ena yalovata, “Me da guta na cakacaka ni Kalou.”17
Ena gauna oqo, me vaka e dua na Nona iApositolo, au sa vatonaka na idola e so oya meu solia e dua na veivakalougatataki kivei kemuni yadua. Au sa vakalougatataki iko mo vulica na lawa ni Kalou ka bulataka voli. Au sa vakalougatataki iko mo dua na ivakaraitaki vinaka, ena vosa kei na ivalavala, vaka e dua na tisaipeli dina i Jisu Karisito. Au sa vakalougatataki iko mo na vagalalataki mai na ivalavala ca, mo vakacaudreva na bula vinaka kei na rarama ena sala me ra na vakauqeti kina eso tale ni vinakata me ra kila ka vakila na ivurevure ni nomu rarama. Au sa vakalougatataki iko mo na rawaka ena nomu vuli kei na qara cakacaka. Au sa vakalougatataki iko mo vakasaqara ka kauwaitaka na nomu itokani bula savasava. Kau sa vakalougatataki iko mo dua na iliuliu yalododonu ena nomu matavuvale, vanua vakaitikotiko, koro, kei na Lotu.
Au sa mai vakalougatataki iko, ka cauraka ni bula tiko na Kalou! O Jisu na Karisito! Oqo na Nona Lotu! Au sa vakadinadinataka ena yaca tabu i Jisu Karisito, emeni.
© 2017 ena Intellectual Reserve, Inc. Dodonu kece e vakatarai. Vakadonui me vaka-Valagi: 10/16. Vakadonui me vakadewa: 10/16. Vakadewa ni “Prophets, Leadership, and Divine Law.” Fijian. PD60002798 858