Loloma kei na Vakawati

Wendy Watson Nelson

Dua na Yakavi vata kei Peresitedi Russell M. Nelson

Lotu ni Tabagone Qase Cake e Vuravura Raraba • 8 ni Janueri, 2017 • Brigham Young University

Vinaka vakalevu, vei ira na matasere ena sere veivakauqeti oya.

Kemuni na taciqu kei na ganequ, keirau lomani kemuni ka taleitaka na mai tiko vata kei kemuni! Sai kemuni dina na inuinui i Isireli, o koya oqori na inaki au na wasea vakalekaleka vei kemuni eso na vakasama, sa noqu masu ni na vakavulica vei kemuni na Yalo Tabu na itukutuku koni na gadreva.

Ni bera ni keirau vakamau, au a parofesa tu ni vakavinakataki ni vakawati kei na matavuvale ni sivia na 25 na yabaki—na iotioti ni 13 eke sara ga e Brigham Young University. Au vakasalataki ira e udolu na veiwatini ka rogoca na italanoa vakatuburarawa ena veigauna kece baleta na kavoro ni matavuvale kei na vakawati sa mai vakacacani. Au raica vinaka sara ga na ka ena veivuke ena vakawati kei na ka ena sega. Au vulica na ka e rawa ni vukea na vakawati sa kakavorovoro kei na ka e rawa ni vakarusa ena dua ga na gauna lekaleka e so tale. Ia, nikua, ko na vakatara meu vosa vei kemuni ena dua na ulutaga talei vei kemuni? Loloma kei na vakawati?

Au gadreva meu wasea e va na dina au vakabauta ni na rawa ni vukei kemuni mai na momosi ni yalo e sega na kena yaga, ia ena vukei kemuni mo ni digitaka ka bula vata kei na dua na itokani dodonu ka qai bulia e dua na bula vakawati mamarau kei na dua na matavuvale dau rawa ka. ¹

Bogi nikua au nuitaka ni ko na raici au meu nomuni “Nana Wendy” niu na vosa veikemuni mai vuni yaloqu me vaka ga au dau cakava—kau sa cakava oti—vei ira na vugoqu kei na luvequ. Ia, oqo na va na dina baleta na loloma kei na vakawati nei Nana Wendy: ²

Dina #1: Na dina ni loloma kei na vakawati ena kauta mai vei keda na Yalo Tabu mai vua na Tamada Vakalomalagi. E tuva ka lewa me tiki ni Nona ituvatuva sega ni na veisosomitaki rawa na yavu ni bula marau.³ Na Yalotabu sa ikoya na italai me kauta na dina oqo. Au vakauqeti kemuni mo ni vaqara ka kilai ira vinaka.

Kena duidui, na lasu kece baleta na loloma kei na vakawati e basika mai ka vakavurea ga o Setani kei ira na nona ito. Na vuni ca e dau marau ni dua e temaki me vakayacora na veika e vakacacana ka vakasewasewana na loloma kei na vakawati. Ia, na dina ena dina tikoga, ka lasu ena lasu tikoga ia, ena sega ni dua na veivoli, se sasaga vakavuku ena veisautaka rawa o ya.

Dina #2: Na bula savasava vakayadua e ki kina loloma dina. Na kena levu ga ni kena totoka nomu bula savasava, nomu vosa kei na ka o cakava, na kena levu ni nomu rawa ni solia ka ciqoma na loloma dina.

Vakabauti au ena kena oqo: Ena veigauna kece ni o sovaraka na yalomu vua na Tamada Vakalomalagi ena masu, ka qai vakarorogo; ena veigauna ni o vulica na ivolanikalou ena nomu vaqara na isaunitaro mai yalomu; ena veigauna o drovaka kina na veika ena vakamavoataka na yalomu (me vaka na iyaloyalo vakasisila); ena veigauna o laki sokalou kina i valetabu; ena veigauna kece o cakava kina e dua na cakacaka vakalotu ni nomu qase ko sa digitaka tiko mo bula savasava.

Ena vakavinavinakataki iko o koya ena mai watimu baleta ena gauna sara ga oqori ko sa vakavakarau tiko yani kina gauna talei ni veilomani vakaveiwatini. Ni ko se dawai voli ka vakasamataka tiko se ko na vakavakarau vakacava kina veilomani dina, na kena isau oqo: Cakava ga na ka e rawa mo vakasamataka kina na nomu vakanananu, na veika mo vakila, nomu vosa kei na ka mo na cakava me savasava. Sureta na Yalotabu me vukei iko. O koya ena vukei iko! Kevaka mo sa vakawati, na noqu ivakasala ena tautauvata saraga na kena oqori!

Ni ko sa cakava mo bula savasava vakalevu cake, ena tiko vata vakawasoma sara kei iko na Yalo Tabu. Na nomu rawa ni ciqoma nomu ivakatakila ena tosoi cake sara ka kena ibalebale ni sa na matata vinaka sara na nomu ilakolako ena bula oqo. Ena levu cake nomu bula vakacegu kei na marau, lailai na bula galili, ka na vakanuinui vakalevu sara ena nomu veisiga ni mataka. Ena levu cake talega mai na matata ni nomu rai ni ko vuli tiko ka cakacaka. Me ikuri ni veika vivinaka oqo, na rawa ka ena cakacaka e veisiga me rawa ni ko na savasava cake, ko sa na vakalevutaka tikoga nomu na rawata na bula vakawati veilomani dina.

O ya na vuna sa caca sara ga ni ka na iyaloyalo vakasisila! Veibasai kei na ka era na kaya na dauvolitaka, na iyaloyalo vakasisila, ena tarovi iko mai na nomu na rawata na bula veilomani dina sara.

Ia, oqo, na dina ka tarava, Dina # 3 ena kureitaka nomu vakasama baleta ni oqo na veibasai sara ga ni ka ena vinakata na vuni ca vata kei vuravura raraba mo na vakabauta baleta na loloma kei na vakawati.

Dina #3: Dua na ka bibi me ivakatakilakila ni nodrau veilomani e dua na veiwatini, sa ikoya ni Turaga e vinakata me rau na marautaka vata na totoka ni tikovata.

Na tikovata ena bula vakawati sa ilesillesi mai vua na Kalou. Sa ivakaro ka vakatututaki mai Vua baleta ni na dreti rau vata vakavoleka e dua na veiwatini ka rau na voleka sara vua na Turaga! Na dina ni tikovata ena umani vata kina na yalodrau ruarua na veiwatini.⁴ Sa ikoya na nodrau na semati vata na yago kei na yaloi watina tagane kei na yaloi watina yalewa.

Na nodrau mai umani vata na veiwatini e vakaraitaka ga na nodra sa duavata tiko ena veika taucoko e baleta nodrau bula ni veiwatini. Erau na cakacaka vata vakaveitokani. Erau masu, qito, sasaga, tubucake, ka marau vata. Erau na solibula vakaveiwatini, ka veivakatataki cake vaka me rau na rawata na veika kece erau a sucu mai kina me rau rawata.

Kemuni na taciqu kei na ganequ, na tikovata ni veiwatini e ka vakatabui. Na kena dina, na tagane kei na yalewa vakawati erau na voleka sara vua na Kalou ena gauna ni rau sa sema dina ena tikovata vakaveiwatini.

Mo na vakavakarau vakacava kina ituvatuva ni tikovata vakaoqori? Ena gadrevi mo bula kilikili tiko me na rawa ni mai nomudrau itokani voli kei watimu na Yalo Tabu.

Oqo ena veimuataki yani kina Dina #4: Me na dina na tikovata ni veiwatini dodonu me na oka kina na Yalo Tabu. Ena sega sara ga ni na vakaibalebale na tikovata vaka veiwatini kevaka me yaco ena taudaku ni vakawati mai na kena ena yaco ena loma ni vakawati baleta ni Yalotabu ena sega ni tiko kina.

E vakavulica o Elder Parley P. Pratt ni Yalo Tabu e tiko vua na kaukauwa me tosoya cake, me vakalevutaka, me vakamacalataka, ka vakasavasavataka na veivinakati kecega kei na veikauwaitaki. ” ⁵ Vakasamataka mada: O koya e rawa ni vakasavasavataka na ka o vakila! Sa kena dodonu ni veika ena sureta mai na Yalotabu kina nomu bula kei na nona bula na watimu kei na nomu bula ni vakawati ena tosoya cake nomu na rawata na tikovata vakavinaka. E rawarawa sara ga ka mai totoka tu yani!

Ena dua tale na yasana, na veika ga e vakacudruya na Yalotabu ena vakalailaitaka na nomu na rawata na duavata kei watimu. Na veika vaka na cudru, garogaro, sega ni dauveivosoti, veiqati, ivalavala vakasisila, kei na cala sega ni veivutunitaki, ena vakalailaitaka nomu sasaga ni tikovata vaka veiwatini kina dua na ivakarau me sa ka tu ga ni vakanananu.

Ia, me da railesuva: na veiyacovi vaka-vuravura sa kena e lako mai vua na vuni ca ka oka kina na domona na irairai, dodomo o vakila, kei na garogaro ca, ia na tikovata ni vakawati ka sa vakatabuya na Kalou ena veiuqeti kina na Yalotabu ka na yaco kina na veituberi ni Yalotabu kei na gagano e savasava. Na dina, ena levu ga ni nomu savasava na kena na totoka cake tikoga na nomu bula ni tikovata vakaveiwatini.⁶

Na veiyacovi vakavuravura ena dau caka tu ga me rawa. Na tikovata vaka veiwatini ena dau qarauni sara vakavinaka me kakua ni dua na ka e vakacacana—mai na vosa kina ivakatagi kina iyaloyalo— ka na vakacudruya na Yalotabu, na yalomu kei na yaloi watimu.

Ni veivagarogaroi ka na vakamatea na loloma ni veimoceri vakavuravura, na tikovata vaka veiwatini ena vakalevutaka na veilomani.

Ena vakalolovirataka na tagane kei na yalewa na yagodrau na veiyacovi vakavuravura ia na tikovata vakaveiwatini ena vakamareqeta na tagane kei na yalewa ka na vakavinavinakataka na yago ni dua na icocovi ni bula vakayago.

Na tamata yadua ena vakila ena veiyacovi vakavuravura na nodra vakayagataki, vakalolomataki, ka na vakavuna vei ira na galili. Na tikovata vakaveiwatini erau na vakila na duavata ka veilomani, vakademeni ka vakamareqeti.

Na veiyacovi vakavuravura ena vakarusa na bula ni veiwekani. Na tikovata vakaveiwatini ena vaqaqacotaka na bula ni vakawati. Ena tokona, vakabulabulataka, ka vakamareqeta na nodrau bula veilomani na veiwatini.

Na veiyacovi vakavuravura sa vakatauvatani kei na dua na sici bitu ia na tikovata vakaveiwatini sa va ka e dua na mata ivakatagi raraba. ⁷

Na veiyacovi vakavuravura sa na veivakabobulataki baleta ni na sega ni vakataucokotaka na nona yalayala. Na Kalou sa vakatabuya na tikovata vakaveiwatini ni ka lagilagi ka na toso tiko yani ka tawamudu vei ira na veiwatini era maroroya nodra veiyalayalati.

Me vakalekalekataki, na tikovata vakaveiwatini ka sa vakadonuya na Yalotabu sa vakalougatataka na Turaga ka sa veivakasavasavataki. ⁸

Ia oqo me bulicake e dua na vakawati qaqaco ka marautaki e sega ni ka rawarawa! Au rawa ni vakadinadinataka o ya. Ia ena kauta mai vei iko na marau!

Ena yabaki 10 ni neirau vakawati, au dau vakananuma se na cava meu solia vua na watiqu me matataka na marau a kauta mai vei au na neirau sa mai veiwatini. Oqo na ka au solia vua:

Dua na ililili!

Kemuni na taciqu kei na ganequ lomani, kevaka mo ni na bulataka na va na dina oqo au sa vakabauta ni ko ni na tara cake e dua na bula ni vakawati marautaki ka na tokoni iko ka vakacegui iko me tawamudu. Sa na dua na vakawatini ena vakatarai iko mo rawa ni dua na ka o na rawata ka na sega ni rawata ena nomu bula ga vakai iko.

Au vakadinadinataka ni vakawati e dua na isolisoli vinaka duadua e solia na Kalou vei ira na luvena, ni vakawati ena rawa ni dua na ivurevure ni marau ka na sega ni dua na ka e vakatauvatani rawa kina kei na bula savasava ni tamata yadua, sa ikoya na ki kina marau o ya. Ena yaca i Jisu Karisito, emeni