Mo Cegu, Mo Maravu Mai
E vakavulici keda na iVakabula na sala me da vakila kina na vakacegu, se mani vakacava sara na liwa kaukauwa ni cagi, kei na biau lelevu e dau lako mai me vakadromuca na noda inuinui.
Ni ratou se lalai na luvei keirau, keitou a tiko vakamatavuvale ena vica na siga ena dua na tobu totoka. Dua na yakavi, eso vei ratou na gone a daramaka nodratou kote ni ciri ka lade sara yani ena loma ni wai. Na luvei keirau yalewa gone duadua a saravi ratou vakavinaka toka yani na tuakana, ena vakatitiqa. Ena nona yaloqaqa taucoko, e a boboka na ucuna ena dua na ligana qai lade. Vakasauri nona lako cake mai e dela ni wai ka kaila ena rere, “Vukei au! “‘Ni vukei au!
E sega ni dua na leqa e yaco vua ni dara vinaka tu na nona kote ni ciri, ka ciri vinaka tu o koya. E rawarawa saraga me keitou dreti koya cake mai ena wavu. Ia, namai nona rai, e gadreva okoya na veivuke. Baleta beka na batabata ni wai se na ka vou ni veika e sotava. Sa mani kaba cake mai ena wavu, keirau vakaisulutaki koya ena tawelu mamaca, ka vakacaucautaka na nona qaqa.
Kevaka eda qase se gona gone, e levu vei keda dau lako curuma na gauna dredre, ka dau tukuna lo ena yalo ni taqaya na vosa oqo “Vukei au!” “Vakabulai au” se “Kerekere, sauma noqu masu!”
Na veika vata oqo a yaco vei ratou na tisaipeli Ii Jisu ena Nona veiqaravi e vuravura. Ena ivola o Marika eda wilika ni o Jisu “sa ia tale ko Koya me vakatavuvuli e matasawa: a sa lewe vuqa sara era sa soqoni vata vua.” 1 Era sa sinai mai na lewe vuqa, sa “vodoka kina na waqa” o Jisu 2 ka vosa mai ena dela ni waqa. Na siga taucoko oya era dabe ena matasawa ka vakatavuvuli taka o Koya na vosa vakatautauvata.
Ia ena siga koya, “tukuna o Koya vei ira nona tisaipeli, “Me da lako yani ki tai kadua. Ia ni ra sa laivi ira mada na lewe vuqa,” 3 era biuta mai na matasawa ka gole sara kina baravi o Kalili. Kunea o Koya e dua na vanua ena waqa e rawa ni vakacegu kina, davo ko Jisu ka totolo sara na lutu ni nona moce. Sega ni bera “a sa tubu e dua na cagi levu sara, a sa seva na waqa na biau, a sa qai [voleka] ni sinai” kina 4 na wai.
E vuqa vei ira na tisaipeli i Jisu era kena dau ni siwa ka kila vinaka tu na iwalewale ni waqa ena gauna ni cava. Era sa nuitaki – vakaidina, ira na Nona itisaipeli lomani. Era biuta tu mai na nodra cakacaka, na nodra gagadre ni bula, kei na nodra dui matavuvale ka muri Jisu. E vakilai na nodra vakabauti Koya ena nodra tiko ena loma ni waqa. Ia oqo sa vakaleqai tu na waqa ena lomadonu ni cava, ka sa tekivu me dromu.
Eda sega ni kila se vakacava na balavu ni kena sagai tiko me kakua ni dromu na waqa, ia era vakayadrati Jisu ena loma leqa ni domodratou ka kaya: “Vakavuvuli, ko sa wele beka ga ni da mate?”
“Vakavuvuli, ko sa wele beka ga ni da sa mate?” 5
“Kemuni na Turaga, vakabulai keda: eda sa mate” 6
Era kacivi koya “Vakavuvuli,” sa o Koya dina oqori. Sai Koya “ko Jisu Karisito, na Luve ni Kalou, na Tama ni lomalagi kei na vuravura, na Dauniveibuli ni veika kecega mai na ivakatekivu.” 7
Mai na Nona nona itutu ena waqa, tucake o Jisu ka vunauca na cagi ka kaya ena wasawasa, “Mo cegu, mo maravu mai. A sa ruru na cagi, a sa maravu levu mai.” 8 O Jisu na dau ni Vakavuvuli, e vakatavulici ira Nona tisaipeli e rua na taro rawarawa ka sinai ena loloma. A taroga o Koya:
“Dou sa rere ena vuku ni cava?” 9
Sa evei na nomu vakabauta?’” 10
E dau matau vei keda na tamata, kevaka madaga me veitemaki, ni da dau lako curuma na veivakatovolei, dredre, se veika rarawa eda dau tagicaka yani, “Vakavuvuli, ko sa wele beka ga ni da mate? Vakabulai au.” Vakamamasu talega o Josefa Simici mai na vale ni veivesu, “Oi Kemuni na Kalou, o Ni ko ni sa tiko evei e vei? Evei na vale ni vakaruru sa ubia na nomuni ivunivuni? 11
Sa dina, na iVakabula ni vuravura e kila vakavinaka na veika e yalani keda tu, ka vakavulica o Koya na sala me da vakila kina na vakacegu, se mani vakacava sara na liwa kaukauwa ni cagi, kei na biau lelevu e dau lako mai me vakadromuca na noda inuinui.
Vei ira sa bulataka na vakabauta, na vakabauta vaka na gonelailai, se na vakabauta lailai duadua sara, 12 Veisureti ko Jisu ka kaya, “Lako mai vei au.” 13 “O ira na vakabauta na yacaqu.” 14 “Mo vuli vei au, ka muria na noqu vosa.” 15 E vakarota o Koya, “Veivutuni ka [dou] papitaisotaki ena yacaqu”, 16 “mo dou veilomani; me vaka, ka’u au sa lomani kemudou,” 17 ka “dou dau nanumi au tikoga.” 18 A vakamacalataka o Koya: “A veika oqo kau sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa: ia mo dou vakacegu; au sa vakamalumalumutaki vuravura.” 19
Au raitayaloyalotaki ratou na tisaipeli I Jisu ena loma ni waqa ena gauna ni cava, nodratou sarava toka yani na levu ni biau e tavutu tiko mai ena dela ni waqa, kei na kena nimati na wai. Au rawa ni raici ratou ni ra dodoka na laca ni waqa ka saga me tudei na waqa mai na veika eratou sa kila tiko. E vakatabakidua tiko na nodratou vakanamata ena gauna o ya, ka sa ka dina sara na nodratou kere veivuke.
E levu vei keda e vaka saraga oya ena gauna oqo. Na veika e yaco tiko ena gauna oqo ena vei yasai vuravura, ena noda vanua, noda itikotiko, kei na matavuvale e vakayavalati keda ena veivakatovolei sega ni namaki. Ena gauna dragita vaka oqo na noda vakabauta ena tadre me yacova na iyalayala ni vosota vakadede kei na kila vakavinaka. Na biau ni rere e rawa ni da lomaleqa kina, e rawa meda guilecava kina na vinaka ni Kalou, ka vakalekalekataka na noda rai. Ia ena ilakolako voravora oqo ka na dodo tu kina na noda vakabauta ni rawa ruarua me tovolei ka vakadeitaki.
Se mani cava na noda ituvaki, e rawa ni da nakinakitaka na noda sasaga me tarai cake ka vakalevutaki noda vakabauti Jisu Karisito. E da dau vakaqaqacotaki ni da nanuma tiko ni da luve ni Kalou ka lomani keda ko Koya. Ena tubu na noda vakabauta ni da vakatovotovotaka na vosa ni Kalou ena inuinui, cakacaka, sasaga ena noda igu me da muria na vakavuvuli nei Karisito. Ena vakalevutaki na noda vakabauta ni da digitaka me da vakabauta, mai na vakatitiqa, veivosoti ka sega ni vakalelewa, veivutuni ka sega ni talaidredre. Ena vakamatatataki na noda vakabauta ni da vakararavi ena nona cakacaka vakadodonu, kei na loloma cecere, kei na nona loloma soli wale na Mesaia Tabu. 20
“Na vakabauta e sega ni noda kila taucoko vakavinaka na ka,” Tukuna o Elder Neal A. Maxwell, “ia e kauta mai e dua na inuinui titobu vua na Kalou, o Koya ka taucoko vinaka na nona kila.” 21 Ena gauna sara madaga ni yavavala, na vakabauta na Turaga o Jisu Karisito ena vakaukauwataki iko ka vukea na nomu kukube matua. Ena vukea na kena biu tani e so na lomaleqa e tu e sega ni bibi. E vakauqeti keda me da mua tiko ena sala ni veiyalayalati. Na vakabauta e na tosoi keda ena maliwa ni veivakayalolailaitaki ka vakatarai keda me da sotava na veisiga mai muri ena yalodei. Ena vakavuna me da kere veivuke, kei na kune vakacegu ni da masu vua na Tamada ena yaca ni Luvena. Ia ni da dau nanuma ni sega ni saumi na noda masumasu, na noda cakacakataka tiko na vakabauta i Jisu Karisito ena vakavurea mai na vosota, yalo malumalumu, kei na igu me da cavuta ena vakarokoroko, “Me yaco na nomuni lewa.” 22
E vakatavulica o Peresitedi Russell M. Nelson:
Ia da kua ni laiva me vakaisosomitaki na noda vakabauta ena rere. E rawa ni da valuta na rere ena noda vaqaqacotaka na noda vakabauta.
Tekivu vei ira na luvemuni. Laiva me ra vakila na nomuni vakabauta, kevaka sara mada ga o ni sotava tiko na veivakatovolei mosimosi. Me vakanamata tiko na nomu vakabauta vua na Tamada Vakalomalagi dau loloma kei na Luvena Daulomani o Jisu Karisito. Vakavulica vei ira yadua na gonetagane kei na goneyalewa talei ni o koya na luvena na Kalou, e buli ena Kena ivatuka, ena dua na inaki kei na icavacava tabu. Era dui sucu mai kei na bolebole me vakamalumalumutaki kei na vakabauta me tarai cake.” 23
Wale tiko ga oqo, au rogoca e rua na gone yabaki va ni rau wasea na nodrau vakabauti Jisu Karisito ena nodrau sauma na taro “E vukei iko vakacava o Jisu Karisito?” Na imatai ni gone a tukuna, “Au kila ni lomani yau au o Jisu baleta e a mate ena vukuqu. E lomani ira talega na uabula.” Na ikarua ni gone e tukuna, “E dau vukei au o Koya niu dau rarawa se meu cudrucudru. E vukei au talega o Koya niu dromu.”
“Ia, ko koya yadua sa veivutuni ka lako mai vei au me vaka e dua na gone lailai, au na vakabulai koya ni sa vakaoqo ko ira na lewe ni matanitu ni Kalou.” 24
“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.” 25
Ena dua na gauna lekaleka sa oti, a Yyalataka o Peresitedi Nelson “na vakalailaitaki ni rere kei na vakalevutaki ni vakabauta ena muri mai” ni da “tekivu yani oqo me da vakarogoci koya vakaidina ka muria na vosa ni Vakabula.” 26
Kemuni na taciqu kei na ganequ, na veivakatovolei eda lako curuma tiko oqo e sega ni mai cavacava ni vanua tawamudu. Ni da lewena Na Lotu i Jisu Karisito ni Yalododonu Edaidai, eda sa yalataka ni da sa taura na yaca i Jisu Karisito. Eda vakabauta na kaukauwa ni Nona veivueti, kei na inuinui ni Nona iyalayala talei. E dodonu me da marautaka ni noda Turaga na iVakabula e kila taucoko tu na noda leqa, na rarawa, kei na veika eda gadreva. Vaka ga Nona tiko voli o Jisu kei ira nona itisaipeli ena gauna makawa, sa tiko talega o Koya ena noda loma ni waqa! Au vakdinadinataka e sa solia na Nona bula, me rawa kina vei iko kei au me daru kua ni rusa Me da vakabauti koya, muria nona ivakaro, ka rogoci Koya ena vakabauta ni kaya, “Mo Cegu, Mmo Mmaravu Mmai.” 27 Ena yaca tabu savasava i Jisu Karisito, emeni.