Kaukauwa Tudei
Na vakabauta ga kei na vosa ni Kalou ka vakatawana na vu ni yaloda e rauta me tokoni keda—ka vakatarai keda meda rawata na Nona kaukauwa.
Ni da vakaraica lesu na ivakavuvuli ni noda parofita lomani, o Peresitedi Russell M. Nelson, au kunea e dua na vosa e vakayagataka vakalevu o koya ena vuqa na nona vosa. Na vosa oya na kaukauwa.
Ena imatai ni koniferedi raraba ni oti na nona tokoni me dua na Apositolo, a vosa o Peresitedi Nelson baleta na kaukauwa. 1 E sa tomana o koya na nona veivakavulici me baleta na kaukauwa ena veiyabaki. Mai na gauna e tokoni kina me noda parofita o Peresitedi Nelson, sa vakatavulica o koya na ivakavuvuli ni kaukauwa—vakabibi na kaukauwa ni Kalou—kei na sala meda rawata kina. E vakavulica o Koya na sala me da ciqoma kina na kaukauwa ni Kalou ni da veiqaravi vei ira na tani, 2 na sala e sureta na veivutuni na kaukauwa i Jisu Karisito kei na Nona Veisorovaki ki na noda bula, 3 kei na sala na matabete—na lewa kei na dodonu ni Kalou—e vakalougatataki ira kece era vakayacora ka maroroya na veiyalayalati kei Koya. 4 Sa vakadinadinataka talega o Peresitedi Nelson ni drodro na kaukauwa ni Kalou vei ira kece sa vakalougatataki ena valetabu ni ra maroroya na nodra veiyalayalati. 5
E tarai au vakalevu na ibolebole ni Peresitedi Nelson ka solia ena koniferedi raraba ni Epereli 2020. E vakavulici keda meda “vuli ka masu mo vulica vakalevu na kaukauwa kei na kila-ka o sa vakaedaumenitaki oti kina—se na veika mo qai vakaedaumenitaki kina.” 6
Ena isau ni bolebole oqo, au sa vuli ka masu ka vulica eso na veika yaga me baleta na kaukauwa kei na kila-ka au sa vakaedaumenitaki kina—se na veika au na qai vakaedaumenitaki kina.
Noda kila na veika e gadrevi meda rawata na kaukauwa ni Kalou i noda bula e sega ni ka rawarawa, ia au sa mai kunea ni rawa ni caka ena noda vulica ena noda vakasama ka masuta me vakamakaretaki keda na Yalo Tabu. 7 A wasea o Elder Richard G. Scott na ibalebale matata ni cava mada na kaukauwa ni Kalou: na “kaukauwa meda cakava na ka ena sega ni rawa meda cakava ena noda kaukauwa ga vakai keda.” 8
Na vakatawani ni noda uto vakatalega kina na yaloda ena vosa ni Kalou kei na yavu ni vakabauta i Jisu Karisito e ka bibi ni da tautauri mai na kaukauwa ni Kalou me vukei keda ena gauna dredre oqo. Ni da sega ni ciqoma na vosa ni Kalou kei na vakabauti Jisu Karisito ki na vu ni yaloda, na noda ivakadinadina kei na vakabauta e rawa ni malumalumu, ka e rawa ni da sega ni rawata na kaukauwa e via solia mai vei keda na Kalou. Na vakabauta vakarairai e sega ni rauta. Na vakabauta ga kei na vosa ni Kalou ka vakatawana na vu ni yaloda e rauta me tokoni keda—ka vakatarai keda meda rawata na Nona kaukauwa.
Ni keirau susugi ira cake tiko na luvei keirau kei Sisita Johnson, keirau vakauqeti ira yadua mera vulica mera vakatagitaka na iyaya ni ivakatagi. Ia keirau vakatarai ira ga mera tauri lesoni kevaka ira vakayacora nodra itavi ka vakatovotovotaka na nodra iyaya ni vakatagi e veisiga. Dua na siga Vakarauwai, na luvei keirau yalewa a mamarau ni na lai qito kei ira na nona icaba, ia e sebera ni vakatovotovo ena piano. Ni kila ni dodonu me vakatovotovo me 30 na miniti, a nakinaki o koya me biuta e dua na gauna, baleta ni sega ni vinakata o koya me sivia e dua na miniti ni gauna e dodonu me vakatovotovo kina.
Ena nona lako sivita na ivakatakata ni kakana livaliva ki na piano, a cegu vakalailai ka tabaka eso na bulukau. Ia a sega ni mani tabaki walega na gauna, ka qai tabaki tu na vakasaqa me 30 na miniti ena ivakatakata ni kakana livaliva, qai tekivutaki sara. Ni oti e 20 na miniti ni vakatovotovo, a taubale lesu ki na valenikuro me lai raica e vica na miniti sa vo ka kunea ni sa kama tiko na ivakatakata ni kakana livaliva.
A cici yani i tuba vei au e daku ni vale, ka kaikaila ni sa kama na vale. Au cici vakatotolo yani ki loma ni vale, ka, kunea vakaidina ni sa yameyame tu na ivakatakata ni kakana livaliva.
Ena noqu sasaga meu taqomaka na neitou vale mai na kama, au dodoka yani na ligaqu ki na daku ni ivakatakata ni kakana livaliva, luvata mai, ka vakayagataka na wa ni livaliva meu laveta tani kina na ivakatakata ni kakana livaliva mai na ivatavata. Nuinui meu na qaqa ka taqomaka na veika e vakarau yaco ka vakakina na neitou itikotiko, au vukataka na ivakatakata ni kakana livaliva yameyame tu ena iwirini vata kei na wa ni livaliva me tiko tani mai na yagoqu, yaco yani ki na rara i muri, kei na dua tale na cawiri au vukataka yani na ivakatakata ni kakana livaliva ki na rara. E kea, au sa qai bokoca na yameyame ena dua na paipo.
Na cava beka e leqa? Na ivakatakata ni kakana livaliva e gadreva e dua na ka me ciqoma na kena kaukauwa, ni sa sega ni tiko e dua na ka i loma me ciqoma na kaukauwa, na misini vakai koya sa na ciqoma na kaukauwa, katakata vakalevu, ka rawa ni yameyame cake, ka rusa me yameyame kei na binibini dravusa. 9 A yameyame cake na neitou ivakatakata ni kakana livaliva ka kama ni sega ni dua na ka e tiko i loma.
Vaka talega kina, o ira e tiko nodra vakabauta kei na vosa ni Kalou e vu ni yalodra e rawa ni ciqoma ka uabaleta na veigasau vidi waqa, ka na tala mai na meca me vakarusai keda. 10 Kevaka e sega, na noda vakabauta, inuinui, kei na kila dei e rawa me seavu yani, ka vaka na ivakatakata ni kakana livaliva lala, o keda e rawa ni dua e vakaleqai.
Au sa mai vulica ni tiko na vosa ni Kalou e vu ni yaloqu, sema vata kei na vakabauta na Turaga o Jisu Karisito kei na Nona Veisorovaki, e vakatarai au meu rawata na kaukauwa ni Kalou meu uabaleta na meca kei na veika kece ena viritaka mai vei au. Ni da sota kaya na vei bolebole, eda rawa ni vakararavi ki na iyalayala ni Turaga a vakavulica o Paula: “Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma, kei na yalomatua.” 11
Eda kila ni se gone na iVakabula a “tubu cake, a sa yalomatua mai, sa sinai ena vuku, sa tu vei koya na loloma ni Kalou.” 12 Eda kila ni sa qase cake mai o Koya, “A sa tubu cake ko Jisu e na vuku kei na ituvaki vakayago, a sa vinakati koya vakalevu cake tikoga na Kalou kei ira talega na tamata.” 13 Keda mai kila ni gauna me sa tekivu kina na Nona kaulotu, o ira era rogoci Koya “sa kurabui sara e na nonai vakavuvuli: ni sa vosa ko koya e na kaukauwa vakai koya.” 14|
Ena vuku ni vakavakarau, sa tubu na iVakabula ena kaukauwa ka sa rawa vua me vorata kece na veitemaki nei Setani. 15 Ni da vakamuria na ivakaraitaki ni iVakabula ka vakavakarau ena vulici ni vosa ni Kalou ka vakatitobutaka noda vakabauta, eda rawa talega ni rawata na kaukauwa ni Kalou meda vorata na veitemaki.
Ena gauna oqo ni vakatabui tu na sokomuni ka vakadredretaki na gole ki na valetabu, au sa cakava e dua na tikina meu tomana noqu vuli ka vulica vakalevu sara me baleta na kaukauwa ni Kalou ni dau lako mai vei keda ni da cakava ka maroroya na veiyalayalati ni valetabu. Me vaka sa yalataki ena masu ni vakatatabu ni Valetabu e Kirtland, eda biuta na valetabu vakayaragitaki ena kaukauwa ni Kalou. 16 E sega ni dua na siga yalani ena kaukauwa sa vakatikora na Kalou vei ira era sa cakava ka maroroya na veiyalayalati, ka sega na vakatatabu me baleta na kena vakayagataki na kaukauwa oqori ena gauna ni matedewa raraba. E yali na Nona kaukauwa mai na noda bula kevaka eda sega ni maroroya na veiyalayalati ka sega ni bula kilikili kaya me vakataotaka na noda ciqoma na Nona kaukauwa.
Niu veiqaravi tiko vakailiuliu ni kaulotu vata kei na watiqu lomani e Thailand, Laos, kei Myanmar, keirau raica na imatai ni kaukauwa ni Kalou ni lako vei ira sa cakava ka maroroya na veiyalayalati tabu ena valetabu. Na iLavo ni Veivuke vei Ira na Veisiko ki na Valetabu e cakava me rawa kina vei ira ena tolu na matanitu oqo mera gole ki na valetabu ni ra cakava oti kece na veika era rawa ni solibula yadua kina kei na vakavakarau. Au nanuma noqu sotava e dua na ilawalawa ni 20 na Yalododonu yalodina mai na rara ni waqavuka i Bangkok, Thailand, me vukei ira mera dewa ki na dua tale na rara ni waqavuka i Bangkok mera vodoka na nodra waqavuka ki Hong Kong. Era sa mata mamarau na lewenilotu oqo ni ira sa na qai lako yani ki na vale ni Turaga.
Ena gauna ni nodra lesu mai na Yalododonu oqo, sa vakilai na vakuri ni matua ni kosipeli kei na kaukauwa e vu mai na nodra ciqoma na edaumeni ni valetabu kei na curu ki na veiyalayalati kei na Kalou. O ira na Yalododonu oqo era gole mai na valetabu “vakaiyaragitaki ena [Nona] kaukauwa.” 17 Na kaukauwa oqo mera cakava na ka era sega ni rawata vakai ira e solia vei ira na igu me ra vosota na ibolebole ni lewe ni Lotu ena nodra vanua ka ra kauta yani “na itukutuku rekitaki ka lagilagi vakalevu sara, ena yalodina,” 18 ni ra tomana tiko na taracake ni matanitu ni Turaga i Laos.
E na gauna eda sega ni rawa ni vakaitavi ena valetabu, eda sa vakararavi li ki na veiyalayalati eda cakava ena loma ni valetabu ka tuvana e dua na veidusimaki e matata, ka sega ni veisau ena noda bula? Na veiyalayalati oqo, kevaka e maroroi, e solia vei keda na raivotu kei na nanamaki me baleta na veisiga ni mataka kei na igu matata me da rawata ka ciqoma na veika kece sa yalataka vei keda na Turaga ena vuku ni noda yalodina.
Au sureti kemuni mo ni vakasaqara na kaukauwa e via solia vei kemuni na Kalou. Au vakadinadinataka ni da vakasaqara na kaukauwa oqo, eda na vakalougatataki ena dua na kila cecere ni loloma i Tamada Vakalomalagi vei keda.
Au vakadinadinataka ni baleta ni lomani iko kei au na Tamada Vakalomalagi, a solia kina na Luvena Daulomani, o Jisu Karisito, me sa noda iVakabula ka Dauveivueti. Au vakadinadinataki Jisu Karisito, o Koya e taukena kece na kaukauwa, 19 ka kitaka vakakina ena yaca i Jisu Karisito, emeni.