Na Mata me Raica
Ena kaukauwa ni Yalo Tabu, ena vukei keda o Karisito meda raici keda ka raici ira na tani me vakai Koya.
Laurai na Liga ni Turaga
Au dau taleitaka na italanoa mai na Veiyalayalati Makawa baleta e dua na cauravou ka dauveiqaravi vei Ilaisa na parofita. Ena dua na mataka lailai ni yadra mai na cauravou, a gole yani ki tuba, ka raica e dua na mataivalu levu ka wavokita tu na koro ka nakinaki tiko me vakaqeyavutaki ira. A sa cici vei Ilaisa: “Isa, noqu turaga! a cava me daru cakava?”
A sauma vua o Ilaisa, “Kakua ni rere: ni ra sa lewe vuqa era sa tiko kei kedaru, ka lewe lailai era sa tiko kei ira.”
E kila o Ilaisa ni sega ga ni gadreva na cauravou na veivakadeitaki malua; e gadreva o koya na raivotu. Ka “A sa masu ko Ilaisa, … Jiova, … vakayadrata mada na matana, me rai rawa ko koya. A sa vakayadrata na matana na cauravou ko Jiova; a sa rai ko koya; ka raica sa oso na ulunivanua e na ose kei na qiqi bukawaqa, era tiko vakavolivoliti Ilaisa.” 1
E na tiko na gauna, ko na vaka na dauveiqaravi, ena nomu sasaga dredre mo raica e cakacaka vakacava na Kalou ena nomu bula—na gauna ko vakila ni ko bikai voli—e na gauna e vakavuna mo tekiduru ena vakatakekere na veivakatovolei ni bula vakayago. Wawa ka nuitaka na Kalou kei na Nona gauna, baleta ni rawa ni ko nuitaka na Yalona ena yalomu taucoko. Ia e tiko e rua na lesoni eke. Kemuni na taciqu kei na ganequ, e rawa talega ni o masu vua na Kalou me dolava na matamu mo raica na veika o sega ni dau raica.
Raici Keda me vaka e Raici Keda na Kalou
Sa dina sara na veika bibi me da raica vakamatata se ocei na Kalou ka ocei dina o keda—eda luvena tagane kei na yalewa na itubutubu vakalomalagi kei na noda “ituvaki ni bula vakalou kei na noda icavacava tawamudu.” 2 Kerea vua na Kalou me vakaraitaka vei iko na dina oqo, vaka talega na Lomana me baleti iko. Na levu ni nomu kila na kemu ivakatakilakila kei na inaki dina, vakatitobu sara e yalomu, na levu ni kena na vakayarayarataki iko na veika oqori kei na veika kece ena nomu bula.
Noda Raici Ira na Tani
Noda kila deivaki na sala e raici keda kina na Kalou e vukei keda meda raici ira talega na tani me vakataki Koya. Na dauvolavola o David Brooks a kaya: “Na leqa levu ena noda vanua e drodro mai na nodra vakila na tamata ni ra sega ni laurai se kilai. … E tiko na ivakarau titobu … e dodonu meda vakavinakataka kece, sai koya qori na ivakarau meda veiraici vakatitobu ka raici vakatitobu.” 3
E raica vakatitobu na tamata o Jisu Karisito. E raici keda yadua na tamata o Koya, noda gagadre, kei na ituvaki ni bula eda rawa ni yacova yani. Ni ra raica na tani na gonedau, tamata ivalavala ca, se na dau kumuni vakaicavacava, o Jisu e raici ira me tisaipeli; ni ra raica na tani e dua na tamata ka curumi tevoro, e rai sivita o Jisu na leqa kilai levu, e kila na tamata oya, ka qai vakabulai koya. 4
Ena vei osooso ni noda bula, e rawa ni da vakamuria na ivakaraitaki i Jisu ka raici ira yadudua—nodra gagadre, nodra vakabauta, nodra sasaga, kei na ituvaki era rawa ni yacova yani. 5
Ni’u masuta na Turaga me dolava na mataqu me’u raica na veika au dau sega ni raica, au dau vakataroga e lomaqu e rua na taro ka vakarogoca voleka sara na veivakauqeti e dau yaco mai: “Na beka au cakava tiko e dodonu me’d kakua ni cakava?” kei na “Na beka au sega ni cakava tiko sa dodonu me’u tekivu cakava?” 6
Vica na vula sa oti, ena gauna ni sakaramede, Au tarogi au na veitaro oqo ka’u kidacala ena veivakauqeti ka gole mai. “Kua ni raica na nomu talevoni ena gauna o wawa tiko kina ena laini.” Noqu dau raica na talevoni niu wawa tu ena laini sa vaka me ka e matau; au kunea ni dau gauna vinaka me’u qarava kina e vica na itavi, raica na noqu imeli, raica na ulutaga levu ni veisiga, vakaraica e dua na vakauitukutuku raraba.
Ena mataka ka tarava, au baci wawa tu e na dua na laini balavu ena sitoa. Au dreta mai noqu talevoni ka qai nanuma na veivakauqeti au ciqoma. Au biuta lesu na noqu talevoni ka vakararai wavoki. Au raica e dua na turaga qasecake ka tu e liu vei au ena laini. Na nona qiqi ni volivoli e lala tu vakavo ga e vica na kava ni kena na pusi. E via sakasaka vei au, ia au tukuna yani au raica ni tiko e dua na nomu pusi.” A kaya o koya ni lako tiko mai e dua na cava, ka sega ni vinakata me vakaogai ni sega tu na kena na pusi. Keirau veitalanoa vakalekaleka, ka kaya mai vei au, “Kila na cava, au se sega ni tukuna vua e dua, ia nikua na noqu siganisucu.” E luvuci na yaloqu. Au vakanuinui vinaka vua ki na dua na siganisucu marautaki ka solia e dua na masu lo ni vakavinavinaka ni’u sega ni vakaraica tikoga noqu talevoni ka calata na madigi me’u raica vakaidina ka semati vata kei na dua tale na tamata e gadreva tu.
Mai na vu ni yaloqu au sega ni vinakata me’u vaka na bete se dua na luve i Livai ena sala ki Jeriko—e dua sa raica ka lako vakatikitiki tani. 7 Ia e vakalevu na gauna au nanuma ni’u sa o au oya.
Raica na Nona Cakacaka na Kalou vei Au
Ena dua na gauna lekaleka sa oti au vulica kina e dua na lesoni talei me baleta na rai vakatitobu mai vei dua na goneyalewa ka yacana o Rozlyn.
Na italanoa a wasea vei au e dua na noqu itokani ka kavoro ni sa biuti na watina ni 20 na yabaki. Ni wasei tu na nodratou gauna na luvedrau vei rau na itubutubu, na vakasama ni gole ki valenilotu vakai koya sa vaka me veivakayalolailaitaki. A nanuma lesu:
“Ena loma ni lotu ka vakabibitaki kina na matavuvale, na dabe duadua tu e rawa ni ka mosimosi. Na imatai ni sigatabu oya au vakamamasu ni’u taubale yani ki loma me kua ni dua e vosa mai vei au. Sa dredre sara me’u taura vata tiko, na wai ni mata sa voleka sara tiko ni drodro. Au dabe ena vanua vata ga, ka nuitaka ni na sega ni dua e kauwaitaka na rairai ni kena lala na idabedabe.
“E dua na goneyalewa ena neitou tabanalevu a vuki mai ka vakaraici au. Au saga meu matadredredre yani. A matadredredre lesu mai o koya. Au rawa ni raica na kauwai e matana. Au kerea lo me kua ni mai vosa vei au—ni sega ni tu e dua na ka vinaka vei au me’u tukuna ka kila ga ni’u na tagi. Au rai sobu ki na yavaqu meu levea na sota ni matai keirau.
“Ena auwa e tarava, au raici koya ni vakararai tiko ga mai vei au ena so na gauna. Ni oti ga na soqoni, a lako sara mai vaka dodonu vei au. ‘Bula Rozlyn,’ au a kaya vakamalua. Sa mokoti au o koya ka kaya, ‘Sister Smith, au rawa ni raica ni sega soti ni siga vinaka vei iko nikua. Isa vosota sara. Au lomani iko. Me vaka sa tukuni oti tiko, sa lako mai na wai ni mata ka mokoti au o koya. Ia ni’u sa taubale tani, au vakasamataka, ‘Sa na rawa beka niu cakava na ka oqo.’
“Na goneyalewa totoka oya, ka voleka ni lailai mai na veimama na noqu yabaki ni bula, e dau raici au e vei Sigatabu kece me yacova ni cava na yabaki ko ya me mokoti au ka taroga, ‘Sa vakacava tiko?’ E vakavuna e dua na duidui levu ki na veika au vakila baleta na lako ki valenilotu. E dina sara ni’u sa tekivu me’u vakararavi ki na nona dau mokoti au. E dua a raici au. E dua e kila ni’u tiko ekea. E dua e veikauwaitaki.”
Me vaka na vei isolisoli e sa solia tu na Tamada, me rawa ni da rai vakatitobu ena gadrevi vei keda meda kerei Koya—ka qai cakacakataka. Kerekere mo raici ira na tani me vakai Koya—Na Luvena tagane kei na yalewa dina kei na nuidei vakalou ka tawamudu. Qai cakava ena loloma, veiqaravi, ka vakadeitaka na kedra yaga kei na nuidei me vaka ko sa vakauqeti. Ni sa mai vaka me dua na iwalewale ni noda bula, eda sa na kunei keda me vaka “sa muria dina … Jisu Karisito.” 8 O ira na tani sa rawa ni nuitaki na yaloda kei na yalodra. Ena iwalewale oqo eda sa rawa ni kunea kina na keda ivakatakilakila kei na inaki dina.
A vakananuma lesu na noqu itokani e dua na ka a sotava ena nona dabe toka ena idabedabe lala vata ga oya, duadua ga, ka vakasamataka kevaka sa sega ni yaga na sasaga ni 20 na yabaki ni bulataki ni kosipeli e nona vale. Sega ga ni gadreva o koya na veivakadeitaki malua; e gadreva o koya na raivotu. E vakila o koya ni coka na yalona e dua na taro: “Na cava na vuna o cakava kina na veika oya” O cakava beka baleta na kena isau, nodra vakacaucau na tani, se na veika vinakati?” E lomalomarua vakalailai, vakasaqara na yalona, ka sa qai sauma ena yalodei, “Au cakava baleta ni’u lomana na iVakabula. Ka’u lomana talega na Nona kosipeli.” E dolava na Kalou na matana me vukei koya me raica. Na veisau kaukauwa ka rawarawa ni raivotu e vukei koya me tomana nona toso tiko vei Karisito, veitalia na veika sa mai yaco.
Au vakadinadinataka ni lomani keda o Jisu Karisito ka rawa ni solia vei keda na mata me rai—ena gauna ni dredre, ena gauna ni oca, ena gauna ni galili, kei na gauna a sega ni yaco na veika eda a nuitaka. Ena Nona loloma soliwale, e vakalougatataki keda o Koya ka vakalevutaka na noda yalayala. Ena kaukauwa ni Yalo Tabu, ena vukei keda o Karisito meda raici keda ka raici ira na tani me vakai Koya. Ena Nona veivuke, eda rawa ni raica vakamatata na veika e gadrevi. E qai rawa ni tekivu me da raica na liga ni Kalou ni cakacaka ena veika lalai ni noda bula—kevaka eda na rai vakatitobu.
Ia ena, siga koya “ni sa rairai mai ko Koya, eda na tautauvata kaya, ni da na raica na matana dina; me da rawata na inuinui oqo” 9 sa noqu masu, ena yaca i Jisu Karisito, emeni.