Ena Cakava na Kalou e Dua na Ka e Sega ni Vakasamataki Rawa

Koniferedi Raraba ni Okotova 2020

Ena Cakava na Kalou e Dua na Ka e Sega ni Vakasamataki Rawa

Mai vei Elder Dieter F. Uchtdorf

Mai na Kuoramu ni Apositolo Le Tinikarua

Sa Vakrautaki ira na Luvena kei na Nona Lotu na Kalou me baleta na veigauna oqo.

Sega ni dede ena nodra yaco mai ki na Bucabuca ni Salt Lake, sa tekivu me ra tara na Yalododonu Edaidai e dua na valetabu. Era nanuma ni ra sa qai raica e dua na vanua me ra qarava kina na Kalou ena sautu ka galala mai na veivakacacani.

Ia, ni voleka sara toka ga ni oti na yavu ni valetabu, a basika yani e dua na mataivalu ni Amerika me ra vakadabera vakasaurara e dua na kovana.

Ni ra sega ni kila na iliuliu ni Lotu se na vakaivei na kaukauwa ni nodra veisaqasaqa na mataivalu, a vakarota o Brigham Young me ra vagalala na Yalododonu ka buluta na yavu ni valetabu.

Au kila ni so na lewe ni Lotu era a vakataroga se cava beka na vuna e mai vakasevai tiko kina vakawasoma na nodra sasaga me ra tara na matanitu ni Kalou.

Sa qai yaco, ni sa siviti ira na gauna rerevaki oya, sa keli na yavu ni valetabu ka vakadikevi. Ena gauna oya era qai kila kina na ivuvu dautara vale ni vuqa sara na vatu taumada era sa kaca, sa sega kina ni ganita me ra yavu.

Sa donu sara, ni mai vinakata o Brigham me ra vakavinakataka na yavu ni vale me rawa ni taurivaka na lalaga ¹ granite ni Valetabu vakaitamera e Salt Lake. ² Sa qai mai rawa ni ra lagata na Yalododonu “Na Yavu Tudei” ³ ka ra kila ni nodra valetabu sa tara cake ena dua na yavu ena tudei tu ena veitabatamata muri mai.

iVakatakilakila

Na yavu ni Valetabu e Salt Lake

Na italanoa oqo e rawa ni vakavulica vei keda na nona dau vakayagataka na Kalou na veika dredre me vakayacori kina na Nona inaki.

E Dua na Mate Veitauvi e Vuravura Raraba

Kevaka e rogorogo matalia oqo, ni da raica na ituvaki eda tu kina nikua, e baleta ni vakina.

Au sega ni vakabauta ni tiko e dua na tamata e rogoca na domoqu se wilika na noqu vosa e sega ni kurei koya na mate veitauvi e vuravura raraba oqo.

Vei kemuni o ni lolositaki ira na lewe ni matavuvale kei na itokani, keimami lolosi vata kei kemuni. Keimami vakatakekere vua na Tamada Vakalomalagi me solia na vakacegu ka vakarurugi kemuni.

Na revurevu ni gauna balavu ni mate oqo e ulabaleta na bula vakayago. E vuqa na veimatavuvale sa kautani na ivurevure ni nodra ilavo ka sa volekati ira mai na waloloi, veilecayaki, kei na lomaleqa. Eda qoroya na sasaga sega ni nanumi koya ni lewevuqa me ra tarova na dewa ni mate oqo. E vakamalumalumutaki na yaloda ena nodra solibula sega ni laurai kei na sasaga vakaturaga o ira era sega ni rerevaka na mate me ra veivuke, veivakabulai, ka tokoni ira na tamata era vakaleqai tu. Sa vakasinaiti na yaloi keimami ena nomuni yalovinaka kei na yalololoma.

Keimami sa masu vagumatua me na dolava na Kalou na katuba ni lomalagi ka vakasinaita na nomuni bula ena veivakalougatataki tawamudu ni Kalou.

O Keda na Sorenitei

E se levu tu na veika tawakilai ni mate veitauvi oqo. Ia kevaka e dua na ka au kila, e sega ni kidacalataka na Tamada Vakalomalagi na matetaka oqo. A sega ni kaciva vata na ikuri ni mataivalu agilosi, se na mataveivosaki ni leqa tubukoso, se vagoleya na ivurevure eso mai na tabana ni buli vuravura me ra qarava e dua na leqa sega ni namaki.

Na noqu itukutuku nikua sai koya ni dina ga ni sega ni da a namaka se vinakata na matetaka oqo, na Kalou sa vakarautaki ira na Luvena kei na Nona Lotu me baleta na gauna oqo.

Eda na lako sivita, io. Ia ena levu cake na ka me da cakava mai na noda kati bati, tautauri matua, ka waraka me lesu tale na veika ki na kena itutu makawa. Eda na toso ki liu, ka vinaka cake.

Ena dua na sala, o keda na sorenitei. Me rawata na sorenitei na kena inaki e dodonu me bulu me rawa ni qai kadre. Sa noqu ivakadinadina ni dina ga ena so na gauna eda vakila ni vaka, me da sa buluti tu ena veivakatovolei ni bula se vakavolivoliti ena butobuto ni lomada, na loloma ni Kalou kei na veivakalougatataki ni kosipeli vakalesui mai nei Jisu Karisito ena vakavuna me kadre mai e dua na ka sega ni vakasamataki rawa.

Na Veivakalougatataki e Vua mai na Dredre

Na veitabagauna yadua sa sotava na kena veivakatovolei kei na dredre.

Era a bula ko Inoke kei na nona tamata ena gauna ni caka ca, veivaluvaluti, kei na vakadave dra. “Ia a lako mai na Turaga ka mai tiko kei ira na nona tamata.” A vakasamataka tiko e dua na ka sega ni vakasamataki rawa ena vukudra. A vukei ira me tauyavu ko Saioni—e dua na matatamata “yalovata ka duavata ena nodra vakasama” era sa dau “kitaka na ivalavala dodonu.” ⁴

Na cauravou ko Josefa na luvei Jekope, a viritaki ki na loma ni dua na qara, volitaki yani vakabobula, cakitaki, ka biliraki. ⁵ A rairai nanuma beka o Josefa ni sa guilecavi koya na Kalou. A vakasamataka tiko na Kalou e dua na ka sega ni vakasamataki rawa ena vukui Josefa. A vakayagataka o Koya na gauna ni vakatovolei oqo me vaqaqacotaka kina na itovonibula nei Josefa ka biuti koya ena dua na itutu me na vakabula na nona matavuvale. ⁶

iVakatakilakila

O Josefa Simici ena Valeniveivesu e Liberty

Vakasamataki Josefa Simici na Parofita ni tiko vakavesu voli ena Valeniveivesu e Liberty, na nona kerea tiko na vakacegu ena vukudra na Yalododonu era kune rarawa tu. A vakataroga voli beka se na tauyavu rawa vakacava ko Saioni ena ituvaki eso oya. Ia a cavuta vua na Turaga na vosa ni vakacegu, ka kauta mai na vakacegu vei ira na Yalododonu na ivakatakila lagilagi ka tarava mai—ka sa kauta tikoga mai na vakacegu vei iko kei au. ⁷

Sa vakavica beka ena veiyabaki taumada ni Lotu i Jisu Karisito ni Yalododonu Edaidai era a kune yaluma kina na Yalododonu ka vakataroga de sa guilecavi ira beka na Kalou? Ia ena loma ni veivakacacani, na bula leqaleqa, kei na veivakarerei ni veivakamatei, e dua tale na ka a tiko ena nona vakasama na Turaga na nodra Kalou na Isireli me baleta na Nona qelenisipi lalai. E dua na ka sega ni vakasamataki rawa.

Na cava eda vulica mai na veiivakaraitaki oqo—kei na drau vakadrau tale era tu ena ivolanikalou?

Taumada: e sega ni soli vei ira na yalododonu na galala me ra levea kina na buca ni yaloyalo ni mate. Me da na lakova kece na veigauna dredre, baleta ena veigauna dredre vakaoqo eda vulica kina na ivakavuvuli ena vaqaqacotaka na noda itovo ni bula ka vakavuna me da toro voleka vua na Kalou.

iKarua: e kila tu na Tamada Vakalomalagi ni da kune rarawa tu, ia baleta ni da Luvena, ena sega ni laivi keda tu. ⁸

Vakasamataki koya na dau yalololoma, na iVakabula, ka dua na iwase levu ni Nona bula a vakayagataki ena veiqaravi vei ira na tauvimate, na galili, o ira na vakatitiqa kei na yaluma. ⁹ O nanuma beka ni sega ni kauwaitaki iko o Koya?

Kemuni noqu itokani lomani, kemuni na taciqu kei na ganequ, ena yadravi kemuni tiko na Kalou ka vakatawai kemuni ena gauna ni veilecayaki kei na rere oqo. E kilai iko o Koya. Ena dau rogoca na nomuni vakatakekere. E yalodina ka nuitaki o Koya. Ena vakayacora na Nona yalayala.

E vakassamataka tiko na Kalou e dua na ka sega ni vakasamataki rawa me baleti kemuni yadudua kei na Lotu taucoko—e dua na cakacaka vakasakiti ka veivakurabuitaki.

Turaga Keitou Vuabale

Na noda veisiga vinaka e tu e matada, sega ni tu mai dakuda. Oqo na vuna e solia mai kina vei keda na Kalou na ivakatakila ni gauna oqo! Kevaka e sega, na bula ena vaka ni da veivukayaki vakawawa tu ka waraka me talave na kabu me rawa ni da ro mai vakavinaka. Na nona inaki na Turaga vei keda e cecere cake mai kina. Baleta ni nona na Karisito bula na Lotu oqo, ka dusimaki ira tiko na Nona parofita o Koya, eda sa toso tiko ki liu ka lako cake, kei na veivanua eda se bera ni lesu mai kina, ki na vanua cecere eda sega ni rawa ni raitayaloyalotaka!

E sega ni kena ibalebale oqo ni da na sega ni vakila na cagi vakacevaruru ena noda vukaca na bula oqo. E sega ni kena ibalebale ni na sega ni ca na iyaya, leqa ni misini, se veibolei ni draki kaukauwa sega ni namaki. Na ka dina, ni na ca vakalevu cake na veika ni se bera ni qai vinaka cake.

Niu a dua na pailate ni vala ka kavetani ni waqavuka usa pasidia na ivakarau ni noqu vakavakarau kei na noqu sotava. Na ka e gadrevi ena gauna ni leqa lelevu na veivakabauti malua kei na makare ni vakasama.

Meda cakava vakacava?

Eda sotava na dina ka lesu ki na veika bibi, na ivakavuvuli taumada ni kosipeli, ki na veika e bibi ccake. Vaqaqacotaka na nomu itovo yadudua vakalotu—me vaka na masu kei na vuli ivolanikalou ka rokova na ivakaro ni Kalou. Mo vakatauca na lewa e vakayavutaki ena veiwalewale sa vakaddinadinataki ni vinaka duadua.

Vakanamata ena veika o rawa ni cakava, sega ena veika o sega ni rawa ni cakava.

Vakasokumuna na nomu vakabauta. Ka vakarogoca na malanivosa veidusimaki ni Turaga kei ira na Nona parofita me tuberi iko yani ki na veitaqomaki.

Nanuma tiko, oqo na Lotu i Jisu Karisito—e liutaka tiko o Koya.

Vakasamataka mada na veivakatorocaketaki e yaco ena yabakitini sa oti. Meu cavuta mada ga e vica:

A vakabibitaki tale na sakaramede me ulu ni noda sokalou ena Siga ni Vakacecegu.
NaLako Mai, Mo Muri Au a vakarautaki me iyaya ni cakacaka yavutaki e vale ka tokoni mai na Lotu me vaqaqacotaka na tamata yadua kei na matavuvale.
Eda sa tekivuna e dua na sala cecere ka vakalou cake ni veiqaravi vei ira kecega na tamata.
E tete ka robota na Lotu na vakayagataki ni tekenolaji ena wasei ni kosipeli kei na kena caka na cakacaka ni Turaga.

Na veisoqoni sara mada ga ni koniferedi raraba ena sega ni yaco rawa ke sega na veiyaya ni cakacaka vakasakiti ni tekinolaji.

Kemuni na taciqu kei na ganequ, ni sa liutaka tiko na Karisito, ena sega walega ni donu na ka kecega; era na sega ni vakasamataki rawa.

Sa Toso Tiko ki Liu na Cakacaka ni Vakasokumuni Isireli

Taumada a vaka na kena irairai ni na dua na matetaka i vuravura raraba ka na itatao ni nona cakacaka na Turaga. Kena ivakaraitaki, na ivakarau tudei ni kena wasei na kosipeli sa vaka me sega ni rawa. Ia, sa vakatakila tiko mai na matetaka eso na sala vovou ka uasivi cake ni nodra yacovi yani na yalo dina. Sa toso cake tikoga na mana kei na igu ni cakacaka ni vakasoqoni vata kei Isireli. E drau ka udolu na italanoa era vakadinadinataka na ka oqo.

E dua na itokani vinaka ka vakaitikotiko mai na vanua totoka o Norway a vola mai vei Harriet na tubu ni iwiliwili ni papitaiso ena dua na gauna lekaleka oqo. “Ena veivanua se lailai kina na Lotu,” a vola o koya, “na tubucoke ena yaco me tabana, ka yaco na tabana me tabanalevu!”

Mai Latvia, e dua na marama a qai raica na Lotu ena nona kilikitaka e dua na itukutuku ni veivoli ena initaneti ka marau ena nona vulica na kosipeli i Jisu Karisito, a yaco mai kina ki na nona iloku ni se vo e dua na auwa, ia ni se bera ni oti na imatai ni lesoni sa kerea e dua na tikinisiga me papitaiso.

Ena Tokalau kei Iurope, e dua na marama a ciqoma e dua na qiri mai vei rau na daukaulotu a kailavaka, “Kemudrau na goneyalewa, na cava drau se sega ni qiri totolo mai kina? Au sa wawa tu!”

E levu na noda daukaulotu era sa osooso vakalevu cake sara. E levu era sa vakavulica tiko e levu cake sara na tamata. Sa levu cake na veitaratara vei ira na lewenilotu kei ira na daukaulotu.

Ena veigauna e liu, eda a vesuki vakalevu ena veiwalewale tudei ka taura me qai dolava na matada e dua na mate veitauvi. De lakolako eda se taravale tiko ena vatunuku ni sa tu oti na vatu duiroka kaukauwa. Me vaka na gagadre, eda sa vulica tiko ena gauna oqo na ivakarau me da vakayagataka kina na iwalewale duidui, oka kina na tekenolaji, me da sureti ira na tamata—ena kena ivakarau sa matau tu—me ra lako mai ka raica, lako mai ka veivuke, ka lako mai ka tiko dei.

Nona Cakacaka, Nona iVakarau

Oqo na cakacaka ni Turaga. E sureti keda me da kunea na ivakarau e dau cakava kina o Koya, ka ra na duatani beka mai na veika eda sa sotava oti.

A yaco oqo vei Saimoni Pita kei ira eso tale na tisaipeli era a laki qoli ena Wasawasa o Taiperia.

“A sa sega ni rawa e dua ena bogi koya.

“Ia ni sa qai mataka mai, sa tu mai matasawa ko Jisu. …

“A sa kaya vei ira ko koya, Dou viritaka na lawa ki nai [yasa kadua]ni waqa, ka dou na kunea kina.

Eratou sa qai virtaka na lawa ki na yasa kadua ka “era sa sega ni yavia rawa ni sa ka levu sara na ika.” ¹⁰

Sa vakatakila mai ka na vakatakila tikoga na KalouGod has revealed and will continue to reveal His almighty hand. Ena yaco mai na siga eda na railesu kina ka kila ni ena gauna oqo ni veika dredre, a vukei keda tiko na Kalou me da kunea na veisala vinaka cake—Nona sala—me da tara na Nona matanitu ena dua na yavu tudei.

Au wasea na noqu ivakadinadina ni oqo na cakacaka ni Kalou ka na cakava tikoga o Koya e vuqa na ka e sega ni vakasamataki rawa ena kedra maliwa na Luvena, na Nona tamata. E tauri keda tu na Kalou ena qeteqete ni Ligana dauveikauwaitaki ka yalololoma.

Au vakadinadinataka ni o Peresitedi Russell M. Nelson e parofita Kalou ni noda gauna oqo.

Niu dua na iApositolo ni Turaga, au sureti kemuni ka vakalougatataki kemuni mo ni “kitaka na veika kecega eda rawata ena yalo mamarau; io me da tudei sara ka nuitaka tu ni da na raica na veivakabulai ni Kalou, io me da raica na ligana ni sa vakaraitaka mai.” ¹¹ Kau yalataka ni na vakavuna na Turaga me yaco mai na veika e sega ni vakasamataki rawa me na yaco mai na nomuni cakacaka dodonu. Ena yacai Jisu Karisito, emeni.