Nuku non Kot Ousap Tipemwaramwar
Ika sia tiniken me sise tipemwaramwar non ach nuku ewe Samon epwe awatteno ach tufichin pwisin pwaracho ekkewe osukosuken manau.
Pwi me fefinei mi acheingicheing, ua mochen poputa ai afanafan ikenai ren ai pwarata pwe ua sinei pwe Preseten Thomas S. Monson i emon soufosun Kot non ach kei ran. Noun kewe chon aninis non ewe Aewin Presetensi me ekkewe Engon me Ruemon Aposel ir pwan soufos, chon ouseni, me chon pwarata. Ra tupuni ewe Samon Jises Kraist me mi wor ar mummuta ar repwe pwarata netipan minne a pwarata ngeniir. Ua pwarata pwe sipwe tumunu nupwen sia ausening ngeni ar kapasen emwen. Ewe Samon a pwarata ngeniir ar repwe sou afanafan usun ach sipwe apochokuna ach nuku non Semach won Nang me non Noun we, Jises Kraist, me non An Achesefan pwe sisap tipemwaramwar nupwen sia kuna ekkewe osukosuken ach kei ran.
Non ewe Puken Mormon sia anneani usun emon mwan a iteni Ammon a feita seni ewe fonuen Saraemla ngeni ewe fonuen Liai-Nifai an epwe eis usun pwir kewe. Ikkeweia a kuna King Limai me noun kewe aramas, ir mi nom non fotek ngeni ekkewe chon Leiman. King Limai a pwapwa ren ekkewe mettoch Ammon a aporausa ngeni i usun noun kewe aramas non Saraemla. Netipen a ur ren apinukunuk me pwapwa iwe a ochufengeni noun kewe aramas ngeni ewe tempel me a apasa:
“Iei minne, sachetai mokuremi, me oupwe pwapwa, me wanong ami apinukunuk non Kot .
“…Ika oupwe kun ngeni ewe Samon ren unusen mochenin netipemi, … me angang ngeni i ren unusen ami ekiek, … i epwe, anongonong won met a fich ngeni netipan me an mochen, angasakemino seni fotek.” 1
An noun King Limai kewe aramas nuku mi apochokunata ren ekkewe kapasen Ammon iwe ra pwon ngeni Kot ar repwe angang ngeni I me aponueta An kewe annuk, ese nifinifin nonnomumur mi weires. Pokiten ar nuku, ra tufichin fori eu kokkot ar repwe su seni nepoun ekkewe chon Leiman. .2
Ouse mochen oupwe ekieki usun auchean an King Limai tingor ngeni noun kewe aramas me met auchean ngenikich. A apasa: “sachetai mokuremi, me oupwe pwapwa, me wanong ami apinukunuk non Kot.” Ren ekkei kapas Limai a tingorei noun kewe aramas ar repwe nengeni ewe fansoun mwach ren mesen nuku; ar repwe siwini ar nuokus ren apinukunuk minne a feito seni ar nuku; me resap tipemwaramwar non ar nuku non Kot ese nifinifin nonnomur.
Manauach won fonufan mi eu fansoun sosot minne sipwe pwarata ika sipwe fori mettoch meinisin minne ewe Samon ach Kot a anuku ngenikich. 3 Epwe namwot epwe wor ach nuku mi pochokun non Kraist pwan non fansoun osukosuk. Epwe namwot ach sipwe nikitu ren nuku non Kraist, sipwe angei emwen seni ewe Ngun mi Fel, me sipwe nuku pwe Kot epwe awora met mi namwot ngenikich. 4
Nesoponon An afanafan won fonufan, me mwen a fotek, ewe Chon Amanau A aiti Noun kewe chon keao, “Fonufan epwe eriaffou kemi. Nge oupwe chok epinukunuk! Ua fen okkufatiw fonufan!” 5
Oupwe fitiei ne ekieki usun eu mettoch—Jises Kraist, Noun ewe Sam Anamon, ese tipis non manauan me a poracho ngeni sossot, metek, osukosuk, me riaffou meinisin non ewe fonufan. Chan a suputiw non ewe atakei Gethsemane; A riaffouni metik wachemuk nap seni met sia tongeni awewei ngeni. A pwisin angei ach kewe metik me semwen meinisin. A moneta an epwe aninis—anisi emon me emon kich—ren ach kewe weires. Non manauan, An riaffou, An mano, me An Manausefan, A okkufatiw mettoch meinisin mi epetikich ach sipwe pwapwa me weiri kinamwei won ei fonufan. Ekkewe feioch seni An angangen achesefan a katou ngeni aramas meinisin mi etiwa I me nikitano pwisin ir me ekkewe ra ekieta An irapengas me tapweno mwirin I pwe ir ennetin Noun kewe chon kaeo. 6 Iwe, nupwen sia anganga ach nuku non Jises Kraist me An Achesefan, sipwe angei pochokun, osach kewe repwe pwas, me ren I sipwe okkufatiw fonufan.
Pwi me fefinei, nupwen sia ekieki usun ewe pochokun me apinukunuk sia tongeni angei seni ewe Chon Amanau, mi wor eu popun ach sipwe sachetai mokurach, sipwe pwapwa, me nikitu ren nuku me esap wor ach tipemwaramwar pun “ika emon a tipemwaramwar, a ussun chok ekkewe no nemataw ra chok mwokutukut fetan ren asepwan. … Ena sokkun aramas ese tongeni sinei pwisin netipan.” 7
King Limai a pwan apasa, “Oupwe kun ngeni ewe Samon, … angang ngeni i ren unusen ami ekiek, ika oupwe fori ei, i epwe, anongonong won met a fich ngeni netipan me an mochen, angasakemino seni fotek.” 8
Ausening ngeni kapasen ewe Samon nupwen A tingoreikich:
“Ousap noninen are osukosuk. Oupwe nuku Kot o oupwe pwan nuku ei. …
“Ika ami mi tongei ei, iwe ouwe anneasosichi ai kewe annuk. …
“Ion a etiwa ai kewe annuk o apwonueta, i ewe emon mi tongei ei. Semei epwe tongei ewe mi tongei ei. Iwe ngang upwe pwan tongei i o upwe pwarieino ngeni i.” 9
Kot a efeiochukich anongonong won ach nuku. 10 Nuku a efisiata ach manau ren popun seni nang me wewen manauach ese much. Nuku a eu mettoch a esenipato ach tiniken. A eu manaman mi ennetin auchea a pwa non ach ekiek pwapwa me ach mochen fori mettoch meinisin minne Kot me Jises Kraist mi mochen senikich. A esenipato ach sipwe fotupukutiw me tingorei emwen seni ewe Samon me uta o fori fiti ach sinei pwe sipwe tongeni fori mettoch mi fich ren netipan.
Fitu ier me nom nupwen ua wiseni presetenin misin, ua angei eu koko seni seman me inan emon misineri me ra ereniei pwe fefinan a mano. Ua chechemeni, kinamwein memefin non ena fansoun , pwe ngang me ena misineri mi poraus usun an Kot kokkotun manau ese much mi amwarar fan iten Noun kewe semerit me ifa usun an sinei ei a tongeni ekinamwei i.
Inamo ika a mairu me a netipecho ren manon fefinan we, ei misineri—non an kechiw me an nuku non Kot—a pwapwaiti non manauan fefinan we. A pwarata an ennetin nuku non ewe chenin ewe Samon. Fiti pochokun, a apasa ngeniei pwe epwe sopweno ne fori an angangen misineri ren unusen nuku me tiniken an epwe tufichin weri ekkewe pwon minne Kot epwe awora fan itan i me an famini. Non ei fansoun osukosuk, ena misineri mi nukuchar a kunu netipan ngeni Kot, me a wanong an apinukuk non I, me a asofosefani an pwon an epwe angang ngeni I ren unusen tiniken.
Ika sise ennetin nuku non Kot me mochen angang ngeni I, ekkewe osukosuken manauach won fonufan epwe esenipato ach mefi pwe osach mi chou; me ach mochen manaueni ewe kapas allim mi tongeni poutsenikich. Ika ese wor ach nuku, sise tongeni aucheani ekkewe kokkotun ach Kot ren ekkewe mettoch epwap fis ngeni kich non manauach. 11
Non ekkei fansoun sosot, ewe chon koum ngenikich—ewe mi chok witiwit fansoun meinisin—a achocho ne ungenikich ren ach pwisin ekiek. A achocho ne aitikich pwe ese namwot ach sipwe manaueni ekkewe nongonongen ewe kapas allim. Ouse mochen oupwe chechemeni pwe ekiek an aramas “ese tongeni angei ekkewe niffang ra feito seni ewe Ngunun God. Ei sokkun aramas ese tongeni weweitir.” 12 Oupwe chechemeni pwe Setan “i chon koum ngeni Kot, me a fiu ngeni i fansoun meinisin, me tingorei me pesei [kich] ngeni tipis, me fori met minne mi ngaw fansoun meinisin.” 13 Sisap mut ngeni i an epwe otupukich; pun nupwen a fori, sia tipemwaramwar non ach nuku me a poutseni kich ewe manaman ne angei an Kot kewe feioch.
Ika sia tiniken me sise tipemwaramwar non ach nukum ewe Samon epwe awatteno ach tufichin pwisin pwaracho ekkewe osukosuken manau. Sipwe tufichin okkufatiw ekkewe ekiek mi ngau me sipwe tufichin pwaracho ekkewe epet ina mwo ika ra kon watte. Iei met a otufichi noun King Limai kewe aramas ar repwe su seni ar fotek ren ekkewe chon Leiman.
Ua tingoreikemi oupwe wanong ami apinukunuk non Kot me non afanafan an Noun kewe soufos. Ua tingoreikemi oupwe asofosefani ami kewe pwon mi pin ren Kot, ne angang ngeni I ren unusen netipemi, ese nifinifin nonnomun manauemi. Ua pwarata pwe me ren ewe manamanen ami nuku non Kraist, oupwe tongeni pichino seni ewe fotekin tipis, tipemwaramwar, netipingau, riaffou; me oupwe angei ekkewe feioch meinisin minne Semach mi tong a pwon ngenikich.
Ua pwarata pwe Kot mi ennet. A manau me A tongekich. A ausening ngeni ach kewe iotek non ach fansoun pwapwa me ach fansoun tipemwaramwar, netipingau, me osukosuk. Ua pwarata pwe Jises Kraist I ewe Chon Amanau me Chon Angaseno ewe fonufan.
Upwe osopwano ai afanafan ren ekkewe kapas seni eu kon mi fel “Not Now but in the Coming Years,” mi nom non ewe puken kon mi fel seni Portugal:
Ika mi wor kuchu esap saram non netipach,
Ika sia riaffou ren metik, sisap ekieki, sipwap sinei pwe En mi ennet.
Jises a emwenikich ren poun, me epwe aitikich pwata;
Ika sia ausening ngeni mongungun, Epwe aitikich ekis me ekis .
Nuku non Kot ousap tipemwaramwar, me mut ngeni An Epwe apochokunakich;
Konun Mwareiti I feinfeino, pun Epwap awewe. 14
Ua apasa ekkei mettoch fan iten ewe it mi pin iten Jises Krasit, amen.