Koko ngeni ewe Angang
Awisa ngeni angang non ew pwisin neni mi namwot, nge ese auchea usun ewe koko ngeni angang.
Preseten Monson, aua fokkun pwapwa ne ausening ngeni neuwom me angei om aurour. Aua tongeok, aua apochokunok, me aua iotek fan itom fansoun meinisin.
Ua iotek ren aninnisin ewe Ngun mi Fel ren ach sia ekkipwichifengen ekkewe nongonongun ewe angang mi napanapen afanafana ewe kapas allim ngeni muu meinisin, einang, sokopaten kapas me aramas.1
Koko ngeni Angang me Awisa ngeni Aninnis
Iteitan ier fitu ngeru anuan me fopun, pwan fiti chommong pupunu mi chinnap, ra mweturesin souni echo taropwe me ren Salt Lake City. Masouan ewe taropwe a mokutukutun manauan ewe emon a mak ngeni, pwan fiti an famini me chommong chon an piranku. Nupwen a war, ewe taropwe a tongeni suk non tumunuoch are non fitikokon atepwanepwan. Annean ei taropwe mi kan amwarar.
Ewe taropwe a sain ren itan ewe Presetenin Ewe Mwichefenin Jises Kraist ren Aramas mi Pin non Fanosun Soponon, me nepoputan ewe taropwe a mak, “Ren ei ka koko ngeni angangen misineri an Ewe Mwichefenin Jises Kraist ren Aramas mi Pin non Fansoun Soponon. Ka awis om kopwe angang non ewe ______ Nenian Misineri.”
Sipwe esinna pwe akkomwan a wor ewe koko ne fiti angangen misineri non an ewe Samon Mwichifen mi niwinsefanito. Aruan a afata ewe awisa ne angang non ew pwisin neniian misineri. Ewe sokkofesenin ekkei ru kinikin mi auchea pwe kich meinisin sipwe weweiti.
Non ewe erenian ewe Mwichefen, sia chok akapasa usun an emon a koko ngeni ew muu usun Argentina, Poland, Korea, are ewe United States. Nge emon misineri ese akoko ngeni ew neni; nge, i a akoko ngnei angang. Ewe Samon a affata seni ewe Soufos Joseph Smith non 1829 pwe ika a wor tipom ne anisi Kot, ka koko ngeni ewe angang.”2
Iteitan kokorun misineri me awisaer, are pwan ekesiwinin awiser, a fis me ren pwarata me non noun ewe Samon chon angang. Ew koko ngeni ewe angang a eto seni Kot me ren ewe Presetenin ewe Mwichefen. Ew awisan misineri ngeni ew nein ekkewe nuseni 400 nenian misineri won fonufan a eto seni Kot me ren emon non ewe Mwichen Engon me Ruemon Aposel, fan mwumwutan noun ewe Samon soufos mi manau. Ekkewe nifangen ouseni me pwarata mi fiti meinisin koko o awisan misineri.
Kininin 80 non ewe Doctrine and Covenants a mak rekotun ew kokorun misineri ngeni Stephen Burnett me ren ewe Soufos Joseph Smith non 1832. Ren ach sia anneani ei koko ngeni Pwipwi Burnett mi tongeni anisikich ne (1) weweitiochu sokofesenin “kokor ngeni ewe angang” ren misineri me “awisan angang” me (2) anapano ach kinisou ren pwisin wisach mi pin ne afanafanfetannei ewe kapas allim.
Wokisin 1 non ei kinikin mi ew koko nge angang: ewe Samon a ereni Nounwe chon angang Stephen Burnett an epwe feino won fonufan o afanfana ewe kapas allim ngeni meinisin mi tori neuwan.”3
Amwararan, wokisin 2 a esinna ngeni Pwipwi Burnett usun chienan misineri mi fen kefin: Ewe Samon a era pwe fanitan Stephen Burnett a mochen pwe epwe wor chienan, epwe ngeni i Noun chon angang Eden Smith.”4
Wokisin 3 a esinna ikkeweia ekkei ruemon misineri repwe angangia: Ewe Samon a era pwe Stephen Burnett epwe feino o afanafana ewe kapas allim. Ese nifinifin ia oua feinnoiam pun a sinei esapw mwan.”5
Nupwen ewe samon a apasa pwe non ei wokisin “pwe ese nifinifin” use nukku pwe I a era pwe I ese pwan afanni ia Noun chon angang mi angangia. Nge pungun, A fen fokkun aucheani. Nge pun fanitan afanafanan ewe kapas allim fen an ewe Samon angang, I a auoura, emwenei, o awena Noun kewe mwutan chon angang. Nupwen misineri ra achocho ar repwe pisekin angang mi pechekun nou Poun o wesewesen achocho ne apwonueta wiser, iwe “resap tongeni mwan”—ian chok ra angang ia. Amwo pwe ew mettoch Jises a aiti ngenikich non ei kapasen pwarata a pwe a awisa ngeni angang non ew pwisin neni mi namwot, nge ese auchea usun ewe koko ngeni angang.
Ewe wokisin mwirin a asarama met mi namwot ngeni manauan misineri meinisin: Ewe Samon a apasa pwe repwe apworausa ekkewe mettoch minne ra rong, o minne ra wesewesen nuku, o pwan minne met ra sinnei pwe mi ennet.”6
Ewe wokisin saingo a achema ngeni Pwipwi Burnett me ngenikich meinisin ion a eto meia ewe koko ngeni angang: Ewe Samon a apasa pwe ekkewe aurour a ngeni Stephen Burton mi fen netipan, me I a kokori, o pwe I noun we Chon Angasano, Jises Kraist.”7
Pworachon Wewengau.
Amow ekkoch neimi mi akanchang pwata ua fini pwe upwene pworaus non mwichen pristut non ewe mwichenapen mwichefen ei mecheresin weweiti sokofesenin ewe koko ngeni angang me ewe awisan ngeni ew neni. Penuan ei kapaseis mi fat: manauei a aiti ngeniei pwe ekkei nongonong rese kan aweweoch ngeni chommong chon ewe Mwichefen.
Ewe popunapan ai ua fos usun ei pun met ua kaeo seni nom usun netipengau, ewe weires, me fen ewe niamam pwan mi tori chommong misineri seni sokopaten popun ir mi ekkesiwini wiser ne angang non pwan ew nenian angang non ar fansoun misineri. Ekkei ekkesiwinin awis mi namwot fanekoch punun osukosuk usun feingau, amanganon me osukosukan fiisa, osukosukan mwuu, foratan me amasouan nenian misineri mi nafo, are pwan ekkewe osukosukan fonufan mi chok ekkisiwin non ewe angangen afanfafanan ewe kapas allim. .8
Nupwen emon misineri a angei pwan ew awisan nenian, ewe mokutukutun mi jok fiti an we akkomw. Chon ewe Mwichen Engon me Ruemon Aposel ra kutta saramennang me emwen non meinisin ekkan awis.
Non ewe ua fos ngeni emon mwan mi nukuchar mi apworausa ngeniei mefian netipan. Non ew mwich u keran awewe sokofesenin ewe koko ngeni angang o awisan ngeni ew neni. Ei pwipwi a kamwoch pei o fiti chenun mesan a apasa ngeniei, “Ekkewe mettoch ka anisei ne kaeo ikkenai mi ekieta seniei osei me won netipei ua a chok chouniei nuseni 30 ier. Nupwen ngang emon minafon misineri, uwa akkomw kokko ngeni ai upwe angang non South America. Nge use tufichin angei echo fisa, iwe neinei we a ekkesiwin ngeni Merika. Tori iei u kan anchang pwata use tufichin angang non ewe neni ua akoko ngeni. Iei ua sinie pwe ua akoko ngeni ewe angang esap ewe neni. Ua kan mairu ren om ka awewengeniei en”
Ua mefi netipengau ren weiresin ei mwan. Nupwen ua akaeo ekkei nongonong won unusan fonufan, tepetep aramas ra pwisin pwari ngeniei mefier usun chok mefian ei mwan. Ai ua fos usun ei iei fan itan ita esap wor emon pwisin chon ei Mwichefen epwe uwei na os mi nusmwanin wewengau, fatangau, netipeta, ika niamam usun ewe awisan nenian angang.
Ewe Samon a era pwe Stephen Burnett epwe feino o afanafana ewe kapas allim. Ese nifinifin ia oua feinnoiam pun a sinei esapw mwan.”9 Nupwen oua anchangei ekkewe kapasan ei wokisin o suki netipemi, ua anean o iotek pwe oupwe tingorei ewe Ngun mi Fel an epwe uweinong non ngunumi ewe weweioch, echikar, me apechekun mi namwot ngenikemi.
Pwan ew popun ua mefi me nang pwe upwe awewe ei itenap a fis seni wisei ne awisa misineri non ekkei chommong ier. Ngeni ekkewe Engon me Ruemon, ese pwan wor met mi afata pungunon soposopun pwaratan ei fansoun soponon nap seni ewe achochon ne weweiti netipan ewe Samon non am aua apwounueta wisam ne awisa ekkewe misineri ngeni ia repwene angang ia. Ua pwarata pwe ewe Chon Angasano mi sineikich me umoumouch ngenikich “emon me emon” o it me it.
Amonatan ren ew Koko ngeni ewe Angang
Iei u kan mochen ekkis fos usun ewe kinikin mi namwot nge ese pwan itefouno ren ewe ammonatan ren ew koko ngeni ewe angang.
Unungat kapas mi chok pachefengen mi awewe ngeni tetenin amonatan me fefeitan noun Kot kewe at: pristut, tempel, misineri. Fan ekkoch kich sam me in, chiechi, me chon ewe Mwichefen, sia wesewesen tichik ngeni amonatan misineri ngeni ekkewe anuan sia ekkis nemenano ekkewe pwan ekkoch kinikinin ewe anen pwon mi pin mi pwan namwot akkomwan poputan angangen misineri. Angangen misineri a chok ew nge ese chok ewe mi auchea nein ekkewe founongonongun ewe angangen fori ew nongonong mi pechekun ngeni manauan fefeitan me angang non ngun. Feiochun pristut me tempel, ir me ru mi fis me mwen emon a tori nenian wisan, mi pwan namwotun apechekunakicheta non ngun non unusan manauach.
Ami kana anuan, nupen oua apwonueta wisemi me asamonu ewe Pristut sen Aaron ika ewe pristut fan, oua amonakemita ne angei me apwonueta ewe akopon me pwon seni ewe Pristut seni Melkisetek ika ewe pristut tekia.10 Ach pwisin nimoch ina ewe aucheanapan ach sipwe angei ewe pristut tekia. Ew manauen angangen pristut non tongennnet a nom mwemi. Oupwe amonata iei ren ami akaninnisi aramas. Oupwe kaeo ne tongei ami nimenimoch. Oupwe nimoch. Oupwe nimoch feinfeino.
Mwirin oua angei ewe Pristut seni Melkisetek me ewe koko ngeni angang, emon anuan a tongeni kamwoch manaman11 me non ekkewe pwon mi pin me angang mi pin non ewe tempel. Ach fiti tempel me memmefin kinamwen ewe tempel mi fis akkomwan echipwurun angangen misineri. Ach pwisin nimoch mi napanapen namwot me mwen ami anuan pwan meinisn chon ewe Mwichefen oupwe angei feiochun ewe tempel. Nupwen ami oupwe manaueni ekkewe annukun ewe kapas allim, oupwe tongeni tonong imwan ewe Samon me fiti ekkewe angang mi pin non ami ierin serafo. Ami tong ngeni me weweitin ekkewe angang mi pinen ewe tempel epwe apechekuna me efeiochu kemi non manauemi.
Chommong serafo ra fen kamwoch echo taropwen ekkoch mwumwutan tempel. Ami chon Pristut seni Aaron oua kuta itan ami newo me fori paptais me epinipin fanitan ami famini non ewe tempel. Ami tumunun ewe taropwen mwumwutan tempel a pwari ami nimoch, me ami anisi aramas non ewe tempel mi auchea ngeni ami ammonnatan angei ewe pristut seni Melkisetek.
Ami kana anuan, emon me emon ami mi fen misineri iei. Unukumi, iteitan ran, mei wor chienemi me chon ami piranku rese tori ewe ennet pun rese mwo sinei ia repwe kuta meia.”12 Nupwen oua mefi aurourun ewe Ngun, oupwe apasa mefiemi, tingor, text, ika messech epwe esine ngeni chienemi ennetin ewe kapas allim mi niwinsefanito. Ousap uti chok ami koko ngeni misineri pwe oupwe ekkemuch ne fori angangen misineri.
Nupwen feiochun pristut, tempel, me mission ra ionifengen “non ew … non Kraist”13 me ra mokutukutfengen non netipan, tupuan, me ngunun emon misineri, a kofich ngeni ewe angang.14 An tufich a wateino ren an epwe apwonueta wisan ne tupweni ewe Samon Jises Kraist ren mwumwuta. Ewe pwichin non ngun an ewe chufengenin apwonueta pwon mi pinen pristut me tempel, angeian ewe manamanen ewe namanamen kot”15 me ren angang mi pinen pristut,16 aninis non tong ennet, me esinnatan ewe kapas allim ese much ngeni noun Kot mi etufichi emon anuan an epwe”pochokun me tipepos non ewe nuku”17 me “anongonong won i o epwe mammarita ren [Kraist].”18
Non imwach me non ewe mwichefen, sipwe nenne ren ach aucheani ekkewe unungat kinikinin an ewe Samwon tetenin ammonatan me fefeitan ekkewe noun Kot at mi nukuchar: pristut, tempel, misin. Mi namwot ngeniir me unungat pwe sipwe kaeo ne tongei ach nimenimoch. Sipwe nimoch. Sipwe nimoch feinfeino.
Iotek me Kapasen Pwarata
Pwi kana mi achengicheng, ua pwon pwe ewe nifangen ngunun pwarata epwe fiti ami na koko ngeni ewe angangen esinafetannei ewe kapas allim me ami awis ngeni ew pwisin neni are ekkoch nenian angang. Nupwen oua tiniken iei ne amonakemita ren tong ennetin aninisin pristut me tempel, ami kapasen pwarata usun ewe Samon mi manau epwe apechekuneta. Tong ngeni I me An angang epwe aura netipemi. Ren ami oupwe kaeo ne tongei ami nimoch, oupwe winti pisekin angang mi pechekun non poun ewe Samon ne efeiochu me anisi chommong.
Non ai pwapwa, ua pwarata pwe Samach won Nang me Noun we Achengicheng, Jises Krasit mi manau. Pwe sipwe fiti Ar angang mi ew feioch mi napanap sia tufich angei non manauach. Ua pwarata ekkei non iten ewe Samon mi pin Jises Kraist, amen.