Fefin mi Sinefichi
Fefin mi sinefichi ra anongonong won ewe Chon Amanau Jises Kraist o ra apinukunuku ewe pwonen An Achasefan.
Pwi achengicheng, aua fokkun tongeikemi me kinisou ngeni kemi ran ami umoumoch me pwapwaiti ne ponueni an ewe Aewin Presetensi tingor me ewe mwokutukutun #IWasAStranger. Ouse mochen oupwe soposopono ne iotek, ausening ngeni mongungun ewe Ngun, me fori met memef oua mefi.
Ika pwe ua sai non ewe neni ua nom non ika non unusen fonufan, ese sokkono an emon eis, “En mi chechemeniei?” Pokiten use ennetin unusoch, upwe fangeta pwe fan ekkoch use chechemeni it. Nge inamo, ua chechemeni ewe ennetin tong an Semach won Nang a mut ngeni kich sipwe mefi nupwen ua churi Noun fopun me anuon mi auchea.
Ua keran chok tufichin churi ekkoch fefin auchea non imwen kanapus. Nupwen aua apasa am ennetin kapongen feino, emon fefin a sio ngeniei, “Sister Burton, kose mochen kosap monnuki kem.” Ua anean pwe i me ekkoch ra mochen sipwe chemenir repwe mefi pwe use mwo monnuki ir nupwen ua urenikemi ekkoch ai ekiek.
Fefin mi Sinefichi non fansoun ewe Chon Amanau: Anonga won ewe Chon Amanau Jises Kraist
Pwi kana non ekkewe fansoun nom ra pwarata napanapan emon chon kunon Kraist mi nukuchar sipwe achocho ne manaueni. “Non ewe Testament sofo mi pachenong porousen fefin mi sinifichi, ekkoch kich mi sinei iter me ekkoch sise sinei, ekkewe ra nuku non Jises Kraist me non An Achasefan, ra kaeo me manaueni An afanafan, me pwarata usun An angang, manaman, me ning. Ekkei fefin ra winiti nenien appirun chon kuno mi echipwer me chon pwarata non ewe angangen amanau mi auchea.”1
Ekieki ekkei uruo non ewe puken Luke. Ewe aewin a fis fansoun an ewe Chon Amanau angang:
“Iwe, murin ekis fansoun … [Jises] a fein fetan non ekkewe teninimw me ekkewe sop o a afanafana ewe Kapas Allim usun ewe Muun Kot. Ekkewe engon me ruomon chon kaeo ra fiti i,
“pwan ekkei ekkoch fefin, … Mary (pwan itan Magdalene), … me Joanna … , iwe Susanna pwan chommong ekkewe fefin ra anisi Jesus.” 2
Ewe aruwan a fis mwirin An Manausefan:
“Ekkoch fefin … ra feinno unumweiran ren ewe peisas,
“… Nge rese tongeni kuna inisin we. Ra niwinsefanito o ra apasa pwe ra kuna ekkoch chon nang ra erenir pwe i mi manau.” 3
Ua fen anneani ekkei uruo fan chommong me akkom, nge iei uwa keran nenengeni ochu napanapen ekkewe fefin me non. Nupwen ua kon ekipwichi ekkei uruo, a fatoch ngeniei pwe ekkei fefin mi nukuchar ra tongeni iteni fefin mi sinefichi: pokiten ra “sinei,” “pwapwa,” “tipepochokun,” “pochokun,” “nukuchar,” “ennet,” me “wenechar.” 4
Nupwen ua ekieki ekkei kapas mi nap, ua chemeni ruomon me nein ekkei fefin mi sinefichi me non ewe Testament Sofo, ra apasa ar kapasen pwarata usun ewe Chon Amanau mi pwapwa, tipepochokun, pochokun, me wenechar. Nge, usun kich, ir fefin rese unusoch, ar pwarata mi aurouroch.
Chemeni ewe fefin sise sinei itan ren ewe ito ewe a tingorei ekkoch repwe feito me kuna met a fen kaeo seni ewe Chon Amanau? A apasa an sinefichin pwarata non napanapen eu kapas eis: Met epwe iei i ewe Messiah?” 5An kapasen pwarata me tingor mi fokkun pochokun iwe “chommong … ra nuku Jesus.” 6
Mwirin manon mongean we, Lazarus, Martha, ewe chon kuno mi achengicheng me chiechien ewe Samon, a kapas ren anonnonun netipengaw, “Samol, ika en mi nom ikei, mongeei we esap mano!” Ekieki usun an ennetin sinei nupwen a sopweno, “Nge ngang mi sinei, pwe God epwe ngonuk minne chok kopwe tingor ngeni.” A sopweno ne pwarata, “Ua nuku pwe en ewe Messiah, ewe Noun God, ewe epwe feito won fonufan.” 7
Sia kaeo seni ekkei pwipwi pwe fefin mi sinefichi ir mi chon kuno o ra anongonong won ewe Chon Amanau Jises Kraist o ra apinukunuku ewe pwonen An achasefan.
Fefin mi Sinefichi me Apwonueta ar Pwon mi pin non fansoun Niwinsefanito: Mochen Fangeno
Me nom, fefin mi sinefichi ra fangeno nupwen ra pwarata me manaueni afanafanen Jises. Fefin mi sinefichi non ekkewe akkomwen ranin ewe Niwinsefanito ra pwan fori usun chok. Drusilla Hendricks me an famini ir me nein ekkewe minafon chon ewe mwichefen, ra riaffou fansoun ekkewe Souneng non Clay County Missouri ra weri ninni. Punuwan we a paranais fansoun ewe Battle of Crooked River. A wisen tumun i me pwan awora mettochun manau ngeni an famini.
“Non ew fansoun mi ariaffou, nupwen ese chiwen wor anen ewe famini, a chechemeni pwe ew mongungu a ureni, ‘Witiwit chok, pokiten ewe Samon epwe awora.’”
Nupwen noun we at a volunteer ngeni ewe Mormon Battalion, akkom Drusilla ese mochen me a aunap non iotek ngeni Semach won Nang tori “usun ita ew mongungu a apasa ngeni, ‘Kose mochen ewe ning mi tekia?’ Neminewe a ponueni, ‘Ewer,’ me ewe mongungu a soposopono, “Ifa usun ka ekieki pwe kopwe angei tiwenon chok ika kopwe fangeno watte?’’ 8
Sia kaeo seni ei fefin mi sinefichi pwe kich chon kunon Kraist sipwe apwonueta ach pwon mi pin mi namwot sipwe mochen asorano ach kewe tufich.
Fefin mi Sinefichi Ikenai: Chechemeni me Mwoneta ne Apwapwai An Niwin
Ua fen kapas usun fefin mi sinefichi me non ranin ewe Chon Amanau me non ekkewe akkomwen ranin ewe Niwinsefaniton ewe kapas allim, nge met usun ekkewe nenien appiru me kapasen pwarata an fefin mi sinefichi non ach kei ran ikenai?
Non wisei nupwen ua no Asia, ua pwan aurour sefan me ren chommong fefin mi sinefichi ua churi. Ua wesen ingeno ren ekkewe aewin chon mwichefen non India, Malaysia, me Indonesia, ir ra achocho ne manaueni orenien ewe kapas allim non imwer, fan ekkoch nupwen ra fangeno watte pokiten ar manaueni ewe kapas allim mi ungeni orenien ar famini me fonuer. Ekkewe fefin mi sinefichi ra fen choni ewe mwichefen non fansoun nangatam ua churir non Hong Kong me Taiwan ra sopweno ne efeiochu manauen ar famini, chon Mwichefen, me nenier ren ar sopweno ne anongonong won ewe Chon Amanau o ra mochen asor ne apwoneta pwon mi pin. Usun ekkei fefin mi sinefichi ra nom ekkis meinisin non ewe Mwichefen.
Pwan emon fefin mi sinefichi a efeiochu manauei ren chommong ier a fiu ngeni ew semwen mi apwangapwangano, aweiresi, me angawano inisin a iteni inclusion body myositis non 15 ier. Ina mwo ika a kan chok mwokut fetan ren wan wincher, a achocho ne kinisou me sopweno an we “Etettenin mettoch mi Tongeni”: —ewe etettenin mettoch i mi chiwen tongeni fori, usun ua tongeni ngasangas, ua tongeni aromi, ua tongeni iotek, me ua tongeni mefi an ai Chon Amanau tong. A apasa an sinefichin pwarata mi anonga Kraist iteitan ngeni famini me chiechian.
Ua keran rongorong porousen Jenny. I a wes me angangen misineri inan me seman ra mu fesen nupwen a angangen misineri. A aporous ifa usun ekiekin an niwin ngeni imwan a “fokkun anuokus ngeni i.” Nge nesoponon an misin non Italy, nupwen a churi imwen ewe presetenin misin mwen an epwe niwin ngeni fonuan non Merika, emon fefin mi sinefichi, punuwen ewe presetenin misin, a afanafan pwetete ngeni ren an komwei mokuran.
Chommong ier mwirin, pwan emon fefin mi sinefichi, Terry—emon presetenin steik ren Fin Anisi me emon chon kunon Jises Kraist—a efeiochu manauen Jenny nupwen Jenny a koko ngeni presetenin wart ren Fin Anisi. Non na fansoun, Jenny a angangen an epwe awesi ew toropwen an epwe angei noun amuchunon tikri. Non wisen sou emwen Terry a auroura Jenny, a pwan mwot ren non 10 awa non ewe pioing nupwen a fat ngeni Jenny pwe a uri kanser. Terry a churi ewe pioing me uwei Jenny ngeni an appointment. Jenny a apasa, “Ai nuku ua fen mus fan ekkoch non wan we taraku.”
Inamo mi semwen, Jenny a sopweno ne achocho non wisan we presetenin wart ren Fin Anisi. Pwan mwo non an fansoun weires chapur, a koko me text me email seni won an pet, me a tingorei ekkewe sister repwe feito churi. A tinano toropwe ngeni aramas, tongei pwiin kewe seni towaw. Nupwen an we wart a tingor echo sasingin an we presetensi fan iten uruon wart, iei met ra angei. Pokiten Jenny i emon fefin mi sinefich a tingorei meinisin pwe sipwe aea fengen ach osukosuk, mi pachenong pwisin an.
Ren emon fefin mi sinefichi, Jenny a pwarata: “Sise chok nom ikei ach sipwe amanau ekkoch nge sipwe amanaua kich pwisin. Me ena amanau a feito seni ach chiechi ngeni Jises Kraist, seni ach weweiti An chen me An Achasefan me An memefin tong ngeni fin ewe Mwichefen. Ena a fis seni mettoch mi mecheres usun ach komwei mokuren emon; tinano toropwen apinukunuk me chen; mi fatatoch me, ika mut ngeni fefin repwe angang ngenikich.”9
Pwi kena, nupwen sia osukosuk, tipemwaramwar, nukunukumang, tipis, netipechou, ika ngunuch a pekus, amwo sipwe etiwa an ewe Samon tingor ne unumi An we konikin manau usun ewe fefin mi sinefichi ren ewe ito, a tingor ekkoch repwe pwan fori usun sia pwan apasa ach pwarata mi sinefichi: “Met epwe iei i ewe Messiah?”
Nupwen manau epwe weires, usun a fen fis ngeni Martha nupwen mongean we a mano—nupwen sia mefi netipechoun anamon, sise tongeni nounou, manon atongeach, poutuno senikich ewe tufichin pupunu me famini, keimufesenin sam me in, netipengau, semwenin inis ika mokur, weires, pekus, noninen, fotek ngeni mettoch, osukosuken moni, ika chommong pwan ekkoch—amo sipwe chechemeni Martha me affata usun ach sinefichin pwarata mi nonnofengen: “Nge ngang mi sinei … [me] ua nuku pwe en ewe Messiah, ewe Noun Kot.”
Amwo sipwe chechemeni ekkewe chommong fefin mi sineifichi rese mochen nikitano ach we Chon Amanau mi auchea fansoun An mefi riaffou won ewe irapenges nge ekkoch awa mwirin ra tufich ne anneanong nein ekkewe chon pwarata mi sinefichi usun ningen An Manausefan. Amwo sipwe pwa pwe kich mi arap ngeni I non iotek me ach kaeo pukefel. Sipwe mareno ngeni I ren ach amwonata me angei esisinen an achasefan mi monomon iteiten wik fansoun angangen ewe sakrament me nupwen sia apwonueta pwon mi pin ren ach angang ngeni ekkoch non fansoun ar osupwang. Eni mwirin sipwe ne nonnom nein fefin mi sinefichi, chon kunon Jises Kraist, ekkewe ra apwapwai An niwin mi ning nupwen epwe feito sefan.
Pwii kena, ua pwarata usun Semach me Inach won Nang; ach Chon Amanau, Jises Kraist; me An Achasefan esemuch fan itach. Ngang mi sinei ewe Soufos Joseph Smith a kefinita pwe epwe soufosun ewe Niwinsefanito. Ngang mi sinei ewe Puken Mormon mi ennet me a chiaku me ren manamanen Kot. Sia feioch ren emon soufos mi manau non ranich kei, Preseten Thomas S. Monson. Ngang mi sinefichi usun ekkei ennet! Non iten Jises Krasit, amen.
Esisin: Non April 1, 2017, Sister Burton a epichano seni wisan Presetenin Fin Anisi Unusen.