Ningochun mi Pin
Semach won Nang a awora rech meinisin mi namwot pwe sipwe pin usun I.
Non ai ammonata ren ei mwich, netipei a kunungeni ekkewe fefin mi tupwon ua churi, non neniei me neni touau. Me rei, ir mi awewe non ewe konupin seni King David: “Oupwe mwareiti iten ewe Samon mi ning. Oupwe wato ami asor o tonong non an we imwenipin. Oupwe chapetiw me mwen ewe Emon mi Pin nupwen epwe pwato.”1
Ua kuna ewe ningochun mi pin non fefin ion netiper a nongonong won murinno, ekkewe ra mochen winiti usun ewe Samon. Ra fangeno unus netiper, ngunur, pochokkun me ekiek non napanapan manauer iteiten ran.2 Pin a nom non ewe achocho me nikiitu ngeni anneasochis ekkewe annuk me asamonu ekkewe pwon ren Kot. Pin ina finata ekkewe mettoch epwe ngenikich ewe Ngun mi Fel.3 Pin ina ach nikitano mochenin inis me winiti emon souneng ren ewe Achasefan an Kraist ewe Samon.”4 “Iteiten atun [non manauach] epwe pin ngeni ewe Samon.”5
Ewe Kotun nang a annuku ekkewe noun Israel, “Ngang ewe Samon, ami Kot, iwe oupwe tumunu kemi pwe oupwe pin, pun ngang mi pin.”6
Elter D. Todd Christofferson a aitikich: “Semach won Nang I emon Kot a mochen ach achocho. … I epwe epinano kich pwe sipwe manau non muun akkar (D&C 88:22) me nom fan mesan (Moses 6:57).”7 Ewe puk Lectures on Faith a awewei, “Ese wore mon a tongeni nom ren ika pwan wor an unusoch me pin.”8 Semach won Nang a sineikich. A tongeikich, me a awora meinisin mi namwot sipwe pin usun chok I mi pin.
Kich noun Semach won Nang nengin, me emon me emon mi wor ach popun mi pin. Semach won Nang a pwarata, pwe I ewe Kot, me itan ewe Emon mi Pin.”9 Non ewe manau mwen fonufan, sia tongei Semach me fen ngeni I. sia mochen sipwe usun chok I. Non an tong ennet, tongen Sam, a fangeno Noun we, Jises Kraist, pwe I ewe Chon Amanau. I Noun ewe Emon mi Pin.10 Itan mi Pin,”11 “ewe Emon mi Pin re Israel.”12
Ach mochen sipwe pin a nongonong won Kraist, An chen me umoumoch. Ren nuku non Kraist me an Achasefan, sipwe nimenimoch, unusuchuno, ika sipwe nikitano mochenin ewe inis13me ennetin aier. Sia papatais ren konik ren omusomusun tipisich. Ngunuch ra epinano nupwen sia angei ewe Ngun mi Fel ren netipach mi suk. Iteiten wiik, sia fiti angangen ewe sakramen. Non ach mochen aier, ren ennetin ach mochen nimenimoch, sia pwon pwe sipwe mwarei itan Kraist, chechemeni I, me soposopono ne annesochisi an kewe annuk pwe Ngunun epwe nom rech. Ran me ran, sia achocho pwe sipwe ew chok ren ewe Sam, ewe Nau, me ewe Ngun mi Fel, sia fitir non ar popun mi pin.14
Pin a feito ren Ach Asamonu ach Pwonepin
Sia esinna ekkewe sokkopaten sossot me osukosuk a tongeni erikakich seni met mi nimenimoch me murinno mwen Kot. Nge ekkewe sossotun manauach a mwut ngenikich sipwe finata met mi pin. Ekkewe fansoun fangeno fan iten ach asamonu pwonepin a nimeti me epinakicheno.
Ua kuna ewe pin non mesan Evangeline, emon nengin non Ghana a 13 ierin. Ew aanen an asamonu pwonepin ren an achocho non wisan non prestentin Beehive. A awewe pwe a feino churi chienan non imwer, ekkewe mi patapatano, pwe epwe kapas eis ngeni semer kewe pwe repwe tongeni fan. Ekkewe semanap ra era pwe a weires won Raninifen pun mi namwot repwe fori ar angang. Iwe Evangeline a anisir ren ar angang me ren an aninis chienan kewe ra tongeni fiti fan.
Ika sipwe asamonu ekkewe pwonepin, ekkewe angangen pristut mi pin repwe siwinikich, epinanokich, me ammonakich pwe sipwe nom ren ewe Samon.15 Sia mwarei osan ekkoch; sia apochokkuna ekkoch. Sia kuna omusomusun tipisich nupwen sia anisi ekkewe mi osupwang, echik, seneno, me semwen non pekin inis me ngun .16Sia pwan kuna nimenimoch ika sia epini ewe Ranin Sabbath me angei ewe sakrament non nimenimoch won an ewe Samon ran mi pin.17
Sia efeiochu ach famili me imwach ra neni mi pin. Sia tumunu mochenin ewe inis pwe sipwe uren tong mi nimoch me nomotam.18 Sia eitau pouch ngeni ekkoch ren kirokiroch me uta pwe chon pwaratan Kot. Sia winiti chon Zion, ew netip me ew ekiek, aramas nimenimoch sia nom fengen non tipeu me anneasochis.19 “Pun Zion epwe napano non ningoch me epinipin.”20
Pwii kana, feito non ewe tempel. Ika sipwe aramas mi pin me monnota ren an ewe Samon niwinsefan, sipwe uta me aufa ufoufoch mi nimoch.21 Non pochokun me sufon, sipwe nikitano aanen fonufan me asamonu ach pwonepin, pwe sipwe aufoufa nimoch, ewer, ewe mangakun pungoch.22
Pin ina etiwa ewe Ngun mi Fel pwe nouch chon emwen
Pin ina ew niffangen ewe Ngun mi Fel. Sia etiwa ei niffang ika sia finata ekkewe mettoch epwe apochokkuna nonomun ewe Ngun mi Fel non manauach.
Nupwen Martha a etiwa Jises Kraist non imwan, a watte an mochen angang ngeni ewe Samon non an nepwakoch. Pwiin, Mary, a mwot “ren pechen ewe Samon” pwe epwe rong an poraus. Nupwen Martha a mefi pekus pun ese wor chienan ne angang, a ngunungun, “Samon, kese pwan afanni pwe pwii a nikitiei upwe chok angang anaemon?”
Ua tongei kapasen fonu mi fakkun pwetete. Ren pungun an tong me umoumoch, ewe Chon Amanau a era:
“Martha, Martha, ka aurek o osukosuk ren chommong mettoch:
“Nge ew chok mi namwot. Mary a fen finata ewe mettoch mi pung iwe ese wore mon epwe angei seni.”23
Pwii kana, ika sipwe pin, mi namwot sipwe kaeo ne mwot mwen ewe Emon mi Pin o fengeno ekis fansoun. Kich mi nikiti ewe fon, ekkewe angangen imwach, me noninen minen fonufan? Iotek, anneani, me ausening ngeni ewe Kapasen Kot a korato an tufichin nimwoti me echikar ngunuch. Sipwe fangeno ekis fansoun pwe oupwe pin o uren Ngunun mi pin me nimenimoch. Ren ewe Ngun mi Fel ewe chon emwen, sipwe monnota ne etiwa ewe Samon non ningochun mi pin.24
Pin ina ach niwiniti souneng ren ewe Achasefan an Jises Kraist
Ren ekkewe kapasen pwarata seni King Benjamin, ekkewe ra winiti souneng ren an Jises Kraist achasefan ir ekkewe mi tipetekison, mosonoson, fangoch, me uren tong, usun ewe Chon Amanau.25 A pwarata pwe Jises Kraist, “ewe Samon mi unusan pochokkun o a nemenem, a fen, me epwe seni nepoputan tori fansoun ese much, me epwe feitiw seni nang nein ekkewe noun aramas, me epwe nom non inisin puun.” I a feito epwe efeiochu ekkewe mi samau, mok, seningepung me mesechun me amanaua ewe mi mano. Nge I a riaffou “nap seni met aramas repwe tongeni engino ngeni, tiwenon chok repwe mano ren.”26 Nge ika mo I chok epwe amanauakich, ra turunufasei o uromwotei o niieno. Nge ewe Noun Kot a pwata seni peias, pwe sipwe pworacho mano. I ewe epwe uta o apungu ewe fonufan non pungoch. I ewe epwe amanaua kich meinisin. I ewe Emon mi Pin re Israel. Jises Kraist I ewe Ningochun Pin.
Nupwen ekkewe aramasen King Benjamin ra rong an kapas, ra chapetiw, non ar tipetekison me ar asamonu ewe chenin me ningon Kot. Ra esinna ar nimengau. Kich mi esinna namwotun ach nongonong won an ewe Samon chen me umoumoch? Kich mi chechemeni pwe non an ewe Sam kokkot, kinamwe non ei manau me ning fochofoch repwe nom rech pokiten Noun we mi Pin?
Amo sipwe fiti ekkewe aramasen King Benjamin nupwen ra puchor fengen, “O epwe wor umoumoch, me aea ewe achasefanin ewe chan Kraist pwe am pwe tongeni angei omusomusen am kewe tipis, me netipen repwe tongeni nimenimochuno; pun am aua nuku non Jises Kraist, ewe Noun Kot, ewe a fori nang me fonufan, me mettoch meinisin.”27
Ua pwarata pwe sipwe feito ren ewe Emon mi Pin re Israel, ngunun epwe nom woch, pwe sipwe uren pwapwa me angei omusomusun tipisich me kinamwen ekiek.
Semach won Nang a ngeni kich ewe tufichin winiti mi pin. Amo sipwe achocho non ach pwonepin me ewe Ngun mi Fel epwe emwenikich. Ren nuku non Jises Kraist, sia achocho ne souneng ren an Achasefan, pwe sipwe angei manua fochofoch me manau ese much me ewe ning sipwe ngeni Semach won Nang. Amo manauach epwe ew asor mi pin, pwe sipwe uta mwen ewe Samon non ningochun mi pin. Non iten Jises Kraist, amen.