Ionfengeni ewe Faminien Kot
Kot ewe Sam a mochen Noun kewe repwe niwin ngeni sefan, non famini me ning.
Pwii me fefinei achengicheng, ua pwapwa ren ei tufich ne nonnom remi ren poputan ei mwichen mwichenapen mwichefen. Ua unusen etiwa kemi.
Mwichenapen mwichefen a ew fansoun chufengen an ekkewe Aramas mi pin non Fansoun Soponon. Ewe Mwichefen a fen watteno me nom an epwe chufengen non ew chok neni, nge ewe Samon a awora aan fan iten ekkewe feiochun mwichenapen mwichefen repwe torikemi ese nifinifin ian oua nom ie. Ina mwo mi amwarar ne kuna chufengenin Souneng non ei watten Conference Center, am ekkewe aua uta ren ei rong aua aneanei ekkewe minionun aramas ra chufengen rech non nunusen ewe fonufan ne katon me ausening ngeni ewe mwichenap. Chommong me neimi oua chufengen ren ami famini; ekkoch ra chufengen ren chiechier ika chiener chon Mwichefen.
Ian chok oua nom ia, me non met napanap oua ausening ngeni neuwei, oupwe sinei pwe ina mwo ika ouse nom rech ikei, aua mefi pwe oua nom rem non pekin ngun. Aua anean ami meinisin oupwe mefi ochufengen ngenikem—pwe oupwe mefi ewe manamanen ngun a feito nupwen ew mwichen chon nuku ra chufengen non iten Jises Kraist.
Ua fen mefieta me ren ewe Ngun pwe upwe kapas ngeni kemi ikenai usun pwan ew sokkun chufengen. Ei chufengen ese chok fis iteiten wonu maram, usun mwichenapen mwichefen a kan fis. Nge, a fen chok fifis seni ekkewe akkomwen ranin ewe Niwinsefaniton ewe Mwichefen, me a fen mwitir non ekkei ier. Ewe chufengen ua kapas usun ina ewe chufengenin ewe faminen Kot.
Ai upwe anapanapa ei chufengen, eni epwe och ne kapas usun me mwen ach uputiw, mwen met ewe Paipel a eita ngeni “nepoputan” (Genesis 1:1). Non na fansoun, sia nom ren Semach won Nang nge kich Noun semirit ngun. Ei mi ennet usun emon me emon aramas mi nom won fonufan.
Kopwe weweiti, ekkewe itenap “pwii” me “fefinei” resap chok it mi chen ach aea ngeni emon me emon. Ir napanapen ew ennet esemuch: Kot I wesen Semen aramas meinisin; kich kinikinin An we famini esemuch. Pokiten I a tongei kich ren ewe tongen emon Sam mi unusoch, I a mochen kich sipwe fefeita me winiti usun chok I. I a forata ew kokkot ren minne sipwe feito fonufan, non famini, me weri met epwe amwonata kich ne niwin ngeni I me manau usun chok I.
Ewe popun kinikinin ei kokkot ina ewe pwon pwe Jises Kraist epwe fangeta Inisin pwe epwe ew asor, ne angasa kich seni tipis me mano. Wisach non ena kokkot pwe sipwe etiwa an ewe Chon Amanau we asor ren ach aneasochisi ekkewe annuk me angangepin an ewe kapasa allim. En me ngang sia etiwa ei kokkot. Ennetin, sia pwapwaiti, ina mwo ika sipwe su seni me mwen Semach we me monnuki met sia fen sinei ikewe ren.
Nge sise etto ikei non unusen rochopwak. Emon me emon kich a kawor ngeni och kinikinin an Kot we saram, a iteni ewe “Saramen Kraist,” pwe epwe anisi kich ne esinna nefinen och me ngau, pung me muan. Ina popun pwan ekkewe ese watte ar mirit ika ese wor ar sinei usun an ewe Sam we kokkot mi pwan tongeni mefi, non netiper, pwe ekkoch foffor mi pung nupwe ekkoch rese pung.
Ach mefi usun pung me muan a aro napeno npuwen sia amari nouch kewe semirit. Meinisin sam me in a wor rer ewe mochen ne aiti nour semirit napanap mi murino. Iei kinikinin manamanen an Semach won Nang kokkot. A mochen Noun kewe repwe feito fonufan, usun ewe tettenin famini esemuch mi fis non nang. Famini ikena ekkewe aewin nongonong non nang, me a mochen ir repwe pwan aewin nongonong won fonufan. Ina mwo famini won fonufan rese unusoch, ra ngeni noun Kot semirit ewe tufichin feito fonufan seni ren ewe chok tong won fonufan a arap ngeni met sia mefi me non nang—tongen in me sam. Famini pwan ina ewe ochun aanen ach sipwe tumunu me annomu mwokutukut mi murino me nongonong ennet ekkewe repwe emwenikich sefan ngeni mwen Kot.
Ekis chok kinikinin noun Kot kewe ra angei, fansoun ei manau, ew unusochun miritin an Kot we kokkot, fiti ewe mumuta ngeni angangen ewe pristut me pwon mi pin ewe a fori an ewe Chon Amanau manamanen achasefan epwe unusen och non manauach. Pwan mwo ekkewe semer me iner mi murino repwe manau tupwon anongonong won ewe saram mi wor rer nge rese mwo rongorong usun Jises Kraist ika emon ese mwo tingor ngenir repwe papatais non Itan. Ei mi ennet ren chommong minion pwich me fefinach non uruon fonufan.
Ekkoch repwe ekieki pwe ei ese och. Repwe fen weweiti pwe ew pungun pwe ese wor kokkot, ese wor mettoch mi auchea ngeni manau—repwe mefi pwe emon Kot mi pung me tong esap fori ew kokkot mi kawor ngeni chok ekis kinikinin Noun kewe. Ekkoch repwe nuku pwe Kot a fen finata me akkom menni nein Noun kewe I epwe amanaua me awora ewe kapas allim ngenir, nupwen ekkewe rese mwo rongorong ewe kapas allim rese “kefinita.”
Nge en me ngang mi sinei, pokiten ekkewe ennet ra niwinsefan seni ewe Soufos Joseph Smith, pwe an Kot kokkot mi uren tong me pung seni ena. Semach won Nang mi ennetin mochen achufengeni me afeiochu meinisin An famini. Inamo, I mi sinei pwe esap meinisin ir repwe finata ne chufengen, An kokkot a ngeni emon me emon Noun kewe ewe tufich ne etiwa ika pepeni An tingor. Me famini ir popunapen ei kokkot.
Ngerou ier a no, ewe soufos Malachi a apasa pwe non ew fansoun mwach, Kot epwe tinato Elijah ne akunnu netipen ekkewe sam ngeni ekkewe semirit, me netipen ekkewe semirit ngeni semer kewe” (Malachi 4:6).
Ei uruo mi fokkun auchea, ewe Chon Amanau a apasa sefani nupwen A churi Merika mwirin An Manausefan (nengeni 3 Nifai 25:5–6). Me nupwen ewe chon nang Moronai a churi ewe Soufos Joseph Smith, I a pwal apasa ewe uruo usun Elijah me netip, sam, me semirit (nengeniJoseph Smith—History 1:36–39).
Ikenai April 1. Ru ran seni iei, April 3, a esisinata 181 [ipuku wanik me ew] ier seni ewe ran nupwen an Malachi osini a pwonueta. Non na ran, Elijah a feito, me ngeni Joseph Smith ewe manamanen pristut ne rifengeni famini fochofoch. (nengeni D&C 110:13–16).
Seni ena ran ngeni ikenai, mochenin kutta an emon uruon famini a fen mwitir watteno. Ren ei mwitir a napeno, aramas ra sani porousen mwirimwirir nap seni chok ar mochen sinei. Ekkewe nenien ach kutta neuo, neni mi chiechi ngenir, me pisek amwarar ra foruta non unusen ewe fonufan ne anisi ei mwokutukut. Ewe pochokunen internet a anapano porous fengen nefinen famini ne angang fengen ne fori uruon famini ren mwitir me unusoch ese tufich me akkom.
Pwata meinisin ekkei a fis? Iei ewe it mi och sia eita ngeni ei ewe “ngunun Elijah.” Sia pwan tongeni eita ngeni apwonuetan osini. Ua pwarata pwe Elijah a fen feito. Netipen ekkewe semirit—netipom me netipei—ra fen kun ngeni semach kewe, ach neuo. Ewe tong ka mefi fan iten om neuo ina kinikinin apwonuetan ena osini. A fen nom non ennetin ion en. Nge a nap seni chok met ka angei seni om neuo non pekin inis.
Ren awewe, nupwen ka tapweno mwirin ekkewe aurour ne kaeo usun uruon om famini, kopwe fen kuna pwe tettenin aramasom a chok taitap nikinikin mesemi ika ami sani puk ika ami angoch ne kon. Eni epwe fen amwarar me pwan fen weweoch. Nge ika om angang a kouno ikena, kopwe mefi pwe och mettoch ese nom. Ei pokiten achufengeni me etipewfengeni an Kot famini mi auchea epwe wor nap seni chok ach sanir. Mi auchea epwe wor pwon mi pin epwe fis fiti angangen pristu.
Chommong me nein ach kewe neuo rese mo angei ekkei angang mi pin. Nge Kot a fen awora aan pwe en kopwe tongeni. Me Kot mi sinei pwe kopwe mefi om kopwe kun ngeni om neuo non tong me epwe wor reom ekkewe pisek mi auchea ne kutta ir. A pwan sinei pwe kopwe nom non ew fansoun nupwen mumuta ne tonong ngeni tempel mi pin, ikewe sa fori angang mi pin, epwe chommong nap seni non uruo. Me I mi sinei pwe epwe nukuk ne apwaonueta ei angang fan iten om kewe neuo.
Ewer, kich meinisin mi wor wisach mi atapwanapwan me auchea ekkewe ach fansoun me ekiek mi auchea ngenir. Kich meinisin sia churi mettoch ewe Samon a mochen sipwe fori ewe sia ekieki pwe sise tongeni. Nge, ewe Samon a awora aan ren ach sipwe angei apinukunuk me menemenoch non ach angang meinisin, mi pachenong angangen uron famini. Sia angei pochokkun ne fori met I a tingor seni ach nuku pwe ewe Samon esap awora annuk “tiwenon chok ika a amonnata ew an ngeni [kich] ach [sipwe] apwonueta ewe mettoch minne I annuku” (1 Nefai 3:7).
Ngang mi sinei pwe mi ennet seni met pwisin fis non manauei. Chommong ier a no, nupwen ua emon chon sukun non university, ua churi emon mwan a angang non ew kompenien ren kampiuter mi watte nein meinisin. Ei non ekkewe akkomwen ranin kampiuter, iwe mi pwan fis pwe an we kompeni a tinano pwe epwe amomo kampiuter ngeni ewe Mwichefenin Jises Kraist ren Aramas mi Pin non Fansoun Soponon.
Ren met ngang mi mefi, ei mwan chon amomo ese wor an namanam. Nge a apasa fiti mwar me mairu, “Non ei mwichefen ra fori met ra eita ngeni ‘uruon neuo,’ ra kutta iten aramas mi mano, ra achocho ne kutta mwirimwirir. Aramas ra nenenong non chommong kapet, ne kut porous non kukkunun torpwe. Nupwen ua kuna auchean met ra achocho ne fori, ua apareni pwe ua kuna ewe popun kampiuter ra for.”
Iwe, I a ekis pung. Kampiuter repwe ew auchean kinikinin angangen uruon family non ekkan ran mwach—nge esap ekkewe kampiuter a amomo. Emon sou emwenin ewe Mwichefen mi angei an aurour a finata an esap moni noun kewe kampiuter. Ewe Mwichefen a awitiwiti ekkewe pisek non ena fansoun ese mo tongeni ekiekieta. Nge ua fen kaeo non ekkewe chommong ier seni ena fansoun pwe pisekin kampiuter mi och esap tongeni siwini pwarata seni nang, usun ewe sou emwenin Mwichefen mi kirekiroch a angei. Ei ew angangen pekin ngun, me ewe Samon a emweni seni Noun we Ngun mi Fel.
Ekkoch chok wik a no, ua angang won uruon ai famini fiti emon chon aninis mi mwomwot unukui me pwan emon chon aninis won ewe fon. Won ewe kampiuter me mwei mi wor ew osukosuk use tufich pwisin fori me me kutta ponuan we. Ua kuna ru it, ren amwararen pekin kampiuter emon a tinareto rei, iten aramas ra witi ar angangen tempel. Ekkewe it mi sokkono, nge mi wor popun ua nuku pwe ir emon chok. Ai angang pwe upwe finata met ewe ennet.
Nei kewe ruomon chon anisiei ra tipew pwe upwe finata, me ra ennetin sinei pwe upwe kuna ewe ennet. Ewe kampiuter, fiti pochokunan meinisn me met mi awora, ra nikiti ngeniei ewe feiochun ai upwe poputa won ekkewe it won ewe kampiuter, ai upwe auku ekkewe porous mi wor, kutta ekkoch pwan aninis, neukukun ne iotek, me kuna met mi ennet. Nupwen ua iotek, ua sinei fiti ennet met upwe fori—usun chok ua fen fori non ekkoch napanap nupwen ua mochen anongonong won aninisin nang ne apungano ew osukosuk.
Sise sinei met mettoch mi amwarar Kot epwe auroura aramas repwe fori ne aninis non An angangen achufengeni An Famini. Nge met chok mettoch mi amwarar epwe feito, anganger epwe auchea ngeni an ewe Ngun epwe angang non aramas usun en me ngang. Ei esap amairu kich. Pokiten, ekkei ir noun Kot at me nengin mi achengicheng. I epwe tinato memef mi auchea pwe epwe ngenir ewe tufichin niwin sefan ngeni I.
Non ekkei ier, serafon ewe Mwichefen ra fen ponueni ewe ngunun Elijah non amwararen napanap. Chommong ra kamwoch nour toropwen mumuta non tempel mi aukuk me nounou fan chommong. Nenien papatais non tempel ra kon busy nap seni nom; ekkoch tempel ra fen pwan siwin ar kokkot ne anisi napenon mwichen serafo ra no non tempel.
Akkom pwe ese kan kon fifis nge ew mettoch mi ketiw ren serafo ar wato iten ar neuo ngeni ewe tempel. Iei a ew mettoch mi fifis, me napengeni ekkewe serafo ir ekkewe ra kutta iten ar kewe neuo.
Mi kapacheta, chommong serafo ra fen kuna pwe ar aea pwisin ar fansoun ne fori uruon famini me angangen tempel a awatteno ar kapasen pwarata usun ewe kokkotun amanau. A fen anapano amemefin ewe Ngun non manauer me ekisano amemefin ewe chon koum. A anisir ar repwe mefi arap ngeni ar famini me arap ngeni ewe Samon. Ra fen kaeo pwe ei angang ese chok amanaua ekkewe mi mano; a amanau kich meinisin (see D&C 128:18).
Ekkewe serafo ra fen kuna ochun uron famini me angangen tempel; iei semer me iner repwe pwan fori ena usun. Iei a chommong aramas ra etiwa ar repwe papatais me non ewe nenien ngun, pokiten ewe angang serafo ra fori, me ra ewitiwiti ekkoch angangepin ekkewe chok menimwuk ra tongeni fori non ewe tempel. Ewe angangen achufengeni an Semach won Nang famini esap an chok serafo, me esap chok an semer me iner kewe chinnap. An meinisin. Kich meinisin chon achufengen.
Iei ewe angangen ach fansoun, met ewe Aposel Paul a eita ngeni “kinikinin unusochun fansoun,” nupwen Kot epwe “ochufengeni forian kewe meinisin non nang me won fonufan fan nemenien Christ” (Ephesians 1:10). Ei a tufich me ren ewe angangen achasefan an Noun Kot mi Achengicheng, Jises Kraist. Pokiten I, chon ach we famini, ekkewe mi towaweno me noom ra fen kaneto me ren chan Kraist. Pun I ach kinamwe, ewe a fori ir me ru repwe chok ew, me atano ewe titin nefinach (Ephesians 2:13–14). Oua fen mefi ei, usun ua mefi, nupwen oua mefi ew napenon tong nupwen oua nenengeni sasingin ami neuo. Oua fen mefi me non ewe tempel, nupwen ewe it won ewe toropwe a nap seni chok ew it, ouse tongeni pepeni pwe ei aramas mi sinei usumi me mefi ami tong.
Ua pwarata pwe Kot ewe Sam a mochen Noun kewe repwe niwin ngeni sefan, non famini me ning. Ewe Chon Amanau mi manau. A emweni an angang, me A tumunu kich me emwenikich. A kinisou ngeni kemi ren emi angang mi nikitu ne achufengeni An Seman we famini, me ua pwon ngeni kemi ewe aurouren aninis oua kutta me mochen. Non iten Jises Kraist, amen.