Jesus a Chok Nengeni Ren An Tongei
Fan ew kopwe mefi omw kopwe kapas eis ren omw we angang ka fori mi weires ngonuk, kopwe ekieki usun ewe Samol a chek nenengonuk ren an tongeok, me an mwochen kopwe tapweno mwurin.
Ekkoch ier a no ua kokko, fiti punuwei we, Jacqui, ngeni ai upwe nemeni ewe Washington Spokane Misin. Aua tori ewe misin ren am mefi nuokus me pwapwa ren ewe wis am pwe angang ngeni chommong misineri mi amwarar. Ra feito seni chommong neni me ra mwitir winiti usun pwisin noum at me nengin.
Ina mwo napengeni ir ra murino, ekkoch ra weires ren watten wururun wiser. Ua chemeni emon misineri a ureniei, “Preseten, Use chok sani aramas.” Ekkoch ra ureniei pwe ese wor rer ewe mochen ar repwe apwonueta annukun misineri mi tichik. Ua aureki me ekieki met aupwe fori ne siwini netipen ekkewe ekkoch misineri rese mwo kaeo usun pwapwan aneasochis.
Non ew ran nupwen ua sa won wai we taraku nein ewe masies mi pan unukun kianin Washington me Idaho, ua kan ausening ngeni ew teipen ewe Testamen Sofo. Nupwen ua ausening ngeni uruon ewe mwan mi pisekisek an feito ren ewe Chon Amanau ne eisini met I epwe fori an epwe angei manau esemuch, Ua angei ew anonnonun pwarata use fen esuku nge iei a ew achem mi monomon.
Mwurin an ausening ngeni Jises an apasa sefani ekkewe annuk ewe mwan a ponuweni pwe I a fen apwonueta ekkei seni nekukunun, Ua ausening ngeni an ewe Chon Amanau pwetete ne apungu: “Kopwe fori ew chok mettoch: … amomono pisekum meinisin, iwe ….feito fiti ei.”1 Nge ren ai mairu, ua rong fisu kapas me mwen ekkei uwokisin usun use mwo rongorong ika aneanir me akkom. Usun ita ra fen kapacheta ngeni ekkewe uwokisin. Ua ingeno ren ewe mirit minne a pwa ngeniei.
Met ekkei fisu kapas a watte anonnonun mwirimwirir? Kopwe ausening pwe kopwe katon ika kopwe esinna ekkei kapas, rese pwa non pwan ekkoch uruon kapas allim nge ra chok pwa non Kapas Allimen Mark:
“Nge emon mwan a ssano … iwe a eisini, Sense mi murinno, met upwe fori pwe upwe kuna manau ese much?
“Jesus a apasa ngeni atewe, …
“Ka fen sinei ekkewe annuk, Kote nninni, kote, nisou, kote sona, kote kapas chofona ren emon, kote nikotuputup, kopwe asamonu semom me inom.
“Ewe mwan a era … , Sense, me ne kukkuni chok ua fen apwonueta ekkei annuk meinisin.
“Iwe Jises a chok nengeni ren an tongei, iwe a ereni, Kopwe fori ew chok mettoch: Kopwe feinno o amommono pisekum meinisin o kopwe ngeni ekkewe aramas mi woungaw ewe moni, iwe kopwe pisekisekino non nang, iwe kopwe ne feito fiti ei.”2
“Jises a chok nengeni ren an tongei.”
Nupwen ua rongorong ekkei kapas, ew nios mi fatafatoch a aurano non ai ekiek usun ach ewe Samon a kouno me nengeni ei mwan. Nengeni—ren an anonnonun nenong me kuna ngunun, a esinna ochun me pwan tufichin, me pwan kuna met mi wesen auchea ngeni.
Iwe ewe kapas mi mecheres, Jises a tongei. A mefi ew tong mi nap me kirekiroch ngeni ei mwan mi och, iwe pokiten ei tong, mefiti ei tong, Jises a pwan tingorei ekkoch seni. Ua anapanapa epwe ifa usun ei mwan a mefi ren an ureno ren watten tong pwan mwo nupwen Jises a eisini epwe fori och mettoch mi fokkun weires an epwe amomono pisekin meinisin me ngeni ekkewe mi woungaw.
Non ena fansoun, Ua sinei pwe mi auchea esap chok netipen ekkoch noum kewe misinireri epwe siwin. Pwan netipei. Ewe kapas eis ese chiwen iei usun “Ifa usun an emon misin preseten mi mangaw epwe siwini emon misineri mi aweires ne fofforoch?” Nge, ewe kapas eis “Ifa usun ua tongeni ureno ren ewe tongen Kraist, pwe emon misineri epwe tongeni mefi an Kot tong seniei me mochen an epwe siwin?” Ifa usun ua tongeni nengeni I non ewe chok napanap ewe Samon a nengeni ewe mwan pisekisek, ai upwe wesen kuna ir ion me ion ra tongeni winiti, nap seni chok met ra fori me rese fori? Ifa usun upwe kon winiti usun ewe Chon Amanau?
“Jises a chok nengeni ren an tongei.”
Seni ena fansoun, nupwen ua sapengeni emon misineri mi weires an epwe aneasochis, non netipei iei ua kuna emon mwan ika fefin mi tupwon ewe a fori mochenin an epwe feito won misin. Iwe ua tongeni apasa fiti unusen memef usun emon sam: 3 “Elter ika Sister, ika use tongeok, usap ekieki met a fis won om misin. Nge ngang mi tongeok, iwe pokiten ngang mi tongeok, ua aureki met kopwe winiti. Iwe ua tingor ngonuk kopwe siwini ekkena mettoch mi weires ngonuk me winiti ion ewe Samon a mochen kopwe winiti.”
Iteiten fansoun ua feino ne interfiuni misineri, ua akkom iotek fan iten ewe niffangen tong ennet me pwe upwe tongeni kuna emon me emon elter me sister usun ewe Samon a kuner.
Me mwen mwichen zone, nupwen Ngang me Sister Palmer aua kapong ngeni emon me emon misineri, ukan kouno me nenenong ne meser, nengeni ir—ew interfiu ese fiti kapas—iwe mi kan fisioch, ua ureno ren watten tongren ekkei at me nengin mi auchea noun Kot.
Ua fen kaeo chommongun nesenin siwinin manau seni ai ei pwusin ausening ngeni Mark sopun 10. Ikkei ruanu me nein ekkei nesen I nuku epwe anisikich:
-
Nupwen sia kaeo ne kuna ekkoch usun ewe Samon a kuner nap seni ren pwisin mesach, ach tong ngeni ir epwe napeno me pwan ach mochen anisir. Sipwe kuna tufich non ekkoch rese pwisin kuna non ir. Ren tongen Kraist sisap nuokus ne kapas pwaracho, pun “tong mi unusoch a tongeni asueno sokkun nuokus meinisin.”4 Iwe sisap fangeta, chemeni pwe ekkewe mi weires ach sipwe tonger, mi fen kon auchea ngenir tong.
-
Ese wor asukun ika kaeo epwe fis nupwen a for non mangaw ika song, iwe netip esap siwin ika ese tong ese nonom. Ika sia foffor non wisen sam me in, sense, ika sou emwen, ennetin askukun epwe chok fis non memefin nuku nap seni ach apungur. Imwach kewe repwe nenien tumun ngeni nouch kewe semirit—nge esap nenien koput.
-
Sisap tongeni atou tong menon netipach nupwen emon semirit, chiechiach, ika chon ach famini ese fori met sia ekieki repwe fori. Sise sinei met a fis ngeni ewe mwan pisekisek mwurin an feino non netipengaw, nge ngang mi nuku pwe Jises mi chok unusen tongei inamo ika atewe a finata ewe aan mi mecheres. Meni nupwen an a watte, a kuna pwe pisekisekin rese auchea, a chemeni me fori met a fen fis ngeni nupwen An ewe Samon a nengeni I, tongei I, me tingorei epwe tapweno mwurin.
-
Pokiten I a tongeikich, a watte an ewe Samon mochen seni kich. Ika sia tekison, sipwe etiwa an ewe Samon tungor ren ach sipwe aier, sipwe fangeno, me sipwe angang pwe esisinen An ewe unusechuntong ngenikich. Iwe ew tingoren aier ina pwan ew tingor ach sipwe angei ewe niffangen omusomus mi amwarar me kinamwe. Ina minne, “o kosap netipom nupwen epwe fonok. Pun ewe Samol a fonou ekkewe aramas meinisin a tonger.”5
Pwii me fefinei, iei nupwen oua mefi pwe emon a tingorekemi oupwe fori och mettoch mi weires—nikitano oreni mi ngau ika mettoch mi nemeni kemei, poutano mettochun fonufan, fangeno urumot ka sani pokiten ina ewe Sabbath, amusano emon a muan ngonuk—ekieki ewe Samon a nengenuk,tongeok, me tingoreok kopwe nikitano mettoch me tapweno mwirin I.Me kinisou ngeni I ren an tongeok ne tingoreok kopwe fori pwan ekkoch.
Ua pwarata usun ach Chon Amanau, Jises Kraist, me esuku ewe ran nupwen I epwe roma kich ren poun, nengeni kich me pwenikicheno ren An tong mi unusoch. Non iten Jises Kraist, amen.