Veivutuni: Dua na Digidigi Rekitaki
    Footnotes

    Veivutuni: Dua na Digidigi Rekitaki

    E sega walega ni rawa na veivutuni ia ena rekitaki talega ena vukuna na noda iVakabula.

    Kemuni na taciqu kei na ganequ, niu yabaki 12, a vakaitikotiko noqu matavuvale e Göteborg, dua na siti e baravi ena ceva kei Suwiteni. Me da kila tikoga, sai koya na nona koro na noda itokani lomani Elder Per G. Malm,1ka sa mai takali ena vulaikatakata oqo. Eda sa nanumi koya vakalevu. Eda vakavinavinakataka na nona itovo vakaturaga kei na nona veiqaravi kei na ivakaraitaki ni nona matavuvale taleitaki. Ka da masuta vakaidina me nodratou tiko na veivakalougatataki cecere ni Kalou.

    Ena limasagavulu na yabaki sa oti, keitou dau lotu ena dua na vale levu se qai caka vou. Ena dua na Sigatabu, keirau sota e valenilotu kei noqu itokani o Steffan,2 na ikarua ni dikoni ena neitou valenilotu, ena veimarautaki. Keirau a lako ki na isema ni valenilotu, ka dreta mai nona taga e dua na rokete kacabote levu kei na masese. Ena ivakarau doudou ni itabagone, au taura na rokete kacabote ka waqaca na kena wa dravu balavu. A noqu inaki meu qai bokoca ni se bera ni kacabote. Ia ni sa kama na noqu iqaqalo ena noqu tovolea tiko, au mani laiva na rokete. Keirau qai sarava tu ena domobula kei Steffan ni sa toso na kama ni wa.

    A kacabote na rokete, ka sinai na loma ni isema ni valenilotu ena kubou boica. Keirau kumuna vata na ivovo ni rokete sa kabuwacara tu ka dolava na katubaleka me rawa ni lako tani na iboi, ka nuitaka ena yalowai me na sega ni dua e kila. Kalougata, ni sega ni dua a mavoa ka sega na vakacaca.

    Ni ra yaco mai ki na soqoni na lewenilotu, era a boica na iboi kaukauwa. Dredre me sega ni dua e boica. E veivagolei tani mai na bibi ni soqoni na iboi oya. Ni vica walega na Matabete i Eroni—kei na ka ena rawa beka ni tukuni me vagolei tani ni vakasama—au veisoliyaka na sakaramede, ia au vakila ni sega ni kilikili meu vakayagataka. Ni soli yani vei au na tere ni sakaramede, au sega ni taura na madrai sega talega na wai. Au lomaleqa vakalevu. Au madua, kau kila ni veika au cakava e sega ni marautaka na Kalou.

    Ni suka na lotu, a kerei au meu lako yani ki na nona valenivolavola, na peresitedi ni tabana, o Frank Lindberg, e dua na turaga qase cake ka dokai, ka sikoa na uluna. Niu sa dabe, a raici au mai ena mataloloma ka kaya ni raica niu a sega ni vakayagataka na sakaramede. A taroga na vuna. Au vakabauta ni sa kila tiko. Au kila ni ra sa kila kece na ka au cakava. Niu sa tukuna vua, a taroga se vakaivei na noqu nanuma. Ena matatagitagi au tukuna cacavukavuka vua meu vosoti kau kila niu sa vakacudruya na Kalou.

    A cega o Peresitedi Lindbergh e dua na ilavelave makawa ni Vunau kei na Veiyalayalati ka kerea meu wilika eso na tikina sa lainitaki tu. Au wilika i cake na veika oqo:

    “Raica ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale na nona ivalavala ca.

    “Raica oqo ga na sala dou na kila kina na tamata sa veivutuni vakaidina—ena tusanaka na nona ivalavala ca ka biuta laivi sara vakadua.”3

    Au na sega vakadua ni guilecava na matadredredre ni yalololoma nei Peresitedi Lindberg niu raicake yani ni oti noqu wiliwili. Ena luluvu, a tukuna vei au ni vakila ni sa rawa niu tekivu vakayagataka tale na sakaramede. Niu biuta mai nona valenivolavola, au vakila na reki e sega ni vakamacalataki rawa.

    Na reki vaka oqori e vua ni veivutuni dau yaco wasoma. Na vosa veivutuni e kena ibalebale “mo qai kila e muri” kena ibalebale “veisau.”4 Vaka-Suwiteni, na vosa na omvänd, ka kena ibalebale “me vuki lesu mai.”5 Na dauvolavola vakabauta Vakarisito o C. S. Lewis e vola baleta na kena gadrevi kei na iwalewale ni veisau. E tukuna o koya ni veivutuni e oka kina “na biu lesu ena gaunisala donu. Dua na isoqoni cala vakafika e rawa ni vakadodonutaki,” e kaya, “ia ena rawa duadua ga ni o lesuva tale me yacova ni o sa raica na cala qai tekivu cakacakataka tale mai kea, ka na sega vakadua kevaka o toso tikoga.6 Veisau na itovo ka lesu ki na “gaunisala donu” e tiki ni veivutuni, dua walega na tikina. Na veivutuni dina e okati talega kina me vuki na yaloda kei na lomada vua na Kalou ka cata sara na ivalavala ca.7 E vakamacalataki ena Isikeli, na veivutuni sai koya “lesu mai ko koya mai na nona ivalavala ca, … cakava na ka e dodonu ka vinaka; … vakasuka na ka sa butakoca, … [ka] muria na vunau ni bula, ka sega ni cakava na ka ca.”8

    Ia na ivakamacala mada ga oqori e se bera ga ni taucoko kina. E sega ni vakamacalataka vakadodonu na kaukauwa e rawa kina na veivutuni, na isoro ni veivakaduavatataki ni noda iVakabula. Na veivutuni dina e oka kina na vakabauta na Turaga o Jisu Karisito, vakabauta ni rawa ni veisautaki keda o Koya, vakabauta ni rawa ni vosoti keda o Koya, kei na vakabauta ni na vukei keda o Koya me da levea na caka cala tale. Na mataqali vakabauta vakaoqori ena mana kina Nona Veisorovaki ena noda bula. Ni da qai “kila e muri” ka “vuki lesu mai” ena nona veivuke na iVakabula, eda na vakila na inuinui ena Nona yalayala kei na reki ni veivosoti. Kevaka e sega na Dauveivueti, na vakanuinui tudei kei na reki ena seyavu ka yaco na veivutuni me vakavoui walega ni itovo ca. Ia ni da cakacakataka tiko noda vakabauti koya, sa yaco me da saumaki kina Nona rawa kei na Nona lomasoli me vosota na ivalavala ca.

    A vakadeitaka o Peresitedi Boyd K. Packer na yalayala nuitaki ni veivutuni ena Epereli 2015 ena iotioti ni nona koniferedi raraba. E vakamacalataka na mana ni Veisorovaki ni iVakabula me ia kina na veivakabulai ena ka au nanuma ni yalomatua sa rawata ena veimama ni senijiuri ni veiqaravi vakaipositolo. E kaya o Peresitedi Packer: “Na Veisorovaki e sega ni laiva tu e dua na imawe, dua na ivakatakilakila. Na veika e vakavinakataka ena vinaka. … E veivakabulai ga, ia na veika e vakabula ena bula tu ga.”9

    E tomana o koya:

    “Na Veisorovaki, ka sa rawa meda taukena yadua, e sega kina na mawe ni mavoa. Sa kena ibalebale se cava sara na veika eda sa cakava se eda a tu mai vei se a yaco vakacava, kevaka eda na veivutuni dina, sa yalataka tu o Koya ni na sorovaki keda. Ni sa sorovaki keda, sa yaco sara ga e kea.. …

    “… Na Veisorovaki ena rawa ni vakasavasavataka vakadua na duka yadua se cava sara na kena dredre se kena balavu se levu ni gauna a vakayacori tikoga kina.”10

    Na tatara ni Veisorovaki ni iVakabula e sega ni yalani na kena raba kei na kena titobu, vei iko kei au. Ia ena sega vakadua ni vakasaurarataki vei kedaru. Me vaka e vakamacalataka na parofita o Liai, ni sa “soli vua na tamata” me “kila na vinaka mai na ca,”11 eda sa “sereki me ra digitaka na galala kei na bula tawamudu ena vukui koya na Dauveisorovaki ni tamata kecega, se me ra digitaka na tiko vakabobula kei na mate.”12 Ena dua na kena itukutukuni, na veivutuni e dua na digidigi.

    Eda rawa—ka so na gauna dau—duatani na ka eda digitaka. Na mataqali digidigi vakaoqori e sega beka ni dau cala tu ga e veigauna, ia era na vakalatia na veivutuni dina, ni sa yaco oqori sa na tarova noda segata na veivutuni dina. Taura mada, eda na digitaka beka me da bilitaki ira eso. Niu yabaki 12 mai Göteborg, a rawa niu bilitaki Steffan. O koya a kauta mai na rokete kacabote levu kei na masese ki valenilotu. Ia na veibilitaki, kevaka sara mada ga e dina, ena vakatara me da vakaiulubaletaka na noda ivalavala. Ni da vakayacora vakakina, eda biliga kina na icolacola ni veika eda cakava vua tale e dua. Ni da sa biliga na icolacola, eda sa vakalailaitaka ruarua kina na gadrevi kei na noda rawa ni cakava. Eda sa biuti keda kina me da kalouca, ka sega ni dauvakatulewa ka rawa ni cakacaka vakataki koya.13

    E dua tale na digidigi dau vakalatilati ki na veivutuni na noda vakalailaitaka noda cala. Ena vakacabote rokete mai Göteborg, a sega ni dua na mavoa, sega ni dua na vakacaca tudei, a vakayacori ga na soqoni. Ena rawarawa beka me tukuni ni a sega ni dua na vuna me caka kina na veivutuni. Ia ni vakalailaitaki na noda cala, kevaka sara mada ga e sega ni laurai e dua na kena revurevu totolo, ena kauta tani na yalo me ia na veivutuni. Na mataqali vakasama vaka oqo ena vakabuwawataka noda raica rawa ni noda cala kei na ivalavala ca e tiko na kena revurevu tawamudu.

    Ia e dua tale na sala ni da nanuma ni sega ni dua na ka na noda ivalavala ca baleta ni lomani keda na Kalou veitalia na ka eda cakava. E dau veitemaki ni da vakabauta na ka e vakavuvulitaka na dauveicavilaki o Neori vei ira na kai Saraemala: “Ni ra na vakabulai na tamata kecega ena siga mai muri, ia me ra kakua ni rere se sautaninini … ia, era na rawata kecega na bula tawamudu.”14 Ia na vakasama veicavilaki oqo e lasu. E lomani keda na Kalou. Na ka eda cakava e dua na ka Vua ka dua talega na ka vei keda. E matata na Nona ivakaro me baleta na noda itovo. Eda vakatoka oqo me ivunau. Nona veivakadonui kei na noda bula tawamudu e vakatau ena noda itovo, oka kina noda lomasoli me da segata ena yalomalumalumu na veivutuni dina.15

    Kena ikuri, eda na calata na veivutuni dina ni da digitaka me da wasea tani na Kalou mai na Nona ivunau. Mai na veika kece, kevaka a sega ni bibi na sakaramede, ke sega soti ni dua na ka na veivakacacani ni iboi ni rokete kacabote ena soqoni ni sakaramede oya mai Göteborg. Sa dodonu me da qarauna noda sega ni kauwaitaka na ivalavala ca ena noda vakawalena na ivakaro sa solia na Kalou. Na veivutuni dina e gadreva noda vakadinadinataka ni Kalou na iVakabula kei na dina ni Nona cakacaka ena gauna e muri oqo.

    Me da digitaka na veivutuni mai na vakaiulubale. Ena veivutuni, eda rawa ni kilai yaloda tale kina, me vaka na gonecidroi ena italanoa vakaibalebale,16 ka vakasamataka vakatitobu na bibi tawamudu ni noda ivalavala. Ni da kila na ivakarau e rawa ni vakayaco ka kina ki na noda marau tawamudu na noda ivalavala ca, eda sega walega ni na veivutuni dina ia eda na segata talega me da vinaka cake. Ni da temaki, ena rawa ni yaco me da tarogi keda, ena vosa nei William Shakespeare:

    Na cava au rawata, niu rawata na ka au vakasaqara?

    Dua na tadra, dua na icegu, tovure ni reki lailai.

    O cei e volia na marau dua na miniti me qai tagiyaso ena dua na macawa,

    Se volitaka na tawamudu me rawata e dua na ka ni vakatatalo?17

    Kevaka sa buwawa vei keda na tawamudu ena vuku ni dua na ka ni vakatatalo, e rawa ni da digia me veivutuni. Ena Veisorovaki i Jisu Karisito, sa rawa kina e dua tale na madigi. Kena ibalebale, e rawa ni da veisautaka na vakatatalo eda a volia tu vakayalowai ena imatai ni gauna ka ciqoma tale na inuinui ni tawamudu. Me vaka e vakamacalataka na iVakabula, “Ia sa mai mate sara na Turaga na nomudou iVakabula; io sa mai colata na nodra rarawa na tamata kecega, me ra veivutuni kina ka lesu tale vua.”18

    Sa rawa ni veivosoti o Jisu Karisito baleta ni sa sauma oti ko Koya na isau ni noda ivalavala ca.19

    Sa digitaka na noda Dauveivueti me veivosoti ena vuku ni Nona yalololoma, loloma cecere, kei na loloma.

    E vinakata na noda iVakabula me veivosoti baleta oqo e dua na Nona itovonibula vakalou.

    Ia, me vaka ni iVakatawa Vinaka ko Koya, sa dau reki vakalevu ni da digitaka me da veivutuni.20

    Ni da vakila na yaluma vakalou ena vuku ni noda ivalavala,21 ni da digitaka me da veivutuni, eda sa sureta vakatotolo na iVakabula ki na noda bula. Me vaka e vakavuvulitaka o Amuleki, “Ia dou lako mai ka kakua ni vakaukauwataka tiko na yalomudou; raica oqo sara ga na gauna kei na siga mo dou vakabulai kina; ia kevaka dou sa yalomalumalumu ka veivutuni, ena kau yani vakatotolo vei kemuni na ituvatuva ni veisereki.”22 Eda na rawa ni vakila na yaluma vakalou me baleta na noda ivalavala ena gauna vata ga eda na vakila na reki ni nona veivuke na iVakabula.

    Na dina ni rawa me da veivutuni sai koya na itukutuku vinaka ni kosipeli!23 E rawa ni “taviraki laivi” na kilai yaloda ni cala.24 E rawa ni da vakasinaiti ena reki, rawata na vakabokoci ni noda ivalavala ca, ka kune “vakacegu e yaloda.”25 E rawa ni da vagalalataki mai na yaluma kei na veivakabobulataki ni ivalavala ca. E rawa ni da vakasinaiti ena rarama vakasakiti ni Kalou ka “sa oti noqu rarawa.”26 E sega walega ni rawa na veivutuni ia ena rekitaki talega ena vukuna na noda iVakabula. Au se nanuma tikoga na veika au a vakila ena nona valenivolavola na peresitedi ni tabana ni oti na vakacabote rokete. Au kila niu sa vosoti. E seyavu na noqu kilai yaloqu taka tu noqu cala, e yali na yalorere, ka mamada mai na yaloqu.

    Kemuni na taciqu kei na ganequ, ni da mai tinia na koniferedi oqo, au sureti kemuni mo ni vakila vakalevu cake na reki ena nomuni bula: reki ni da kila na dina ni Veisorovaki i Jisu Karisito; reki ena nona rawata, lomasoli, kei na gagadre ni iVakabula me veivosoti; kei na reki ena noda digia me da veivutuni. Me da muria na idusidusi ni iVakabula me da “takiva ena reki … na wai mai na mataniwai ni bula.”27 Me da digia me da veivutuni, me da biuta vakadua noda ivalavala ca, ka vagolea na yaloda kei na lomada me muria na noda iVakabula. Au vakadinadinataka ni bula tiko o Koya. O au e dua na ivakadinadina ka sa ciqoma vakalevu na Nona yalololoma, loloma cecere, kei na loloma sega ni vakatauvatani rawa. Au masuta me nomuni na veivakalougatataki ni veivueti ni Nona Veisorovaki, ena gauna oqo—kei na gauna tale e vuqa ena nomuni bula taucoko,28 me vaka ena noqu bula. Ena yaca i Jisu Karisito, emeni.

    iDusidusi

    1. A veiqaravi vaka-Vitusagavulu Vakaitutu Raraba o Elder Per Gösta Malm (1948–2016) mai na 2010 me yacova ni mate. E dina ni a sucu mai Jönköping, Sweden, erau a tara nodrau itikotiko kei na watina, o Agneta, e Göteborg, Sweden. Ena nona vosa vakasakiti ena koniferedi raraba ni Okotova 2010, a vosa talega o Elder Malm ena dua na ivakatayaloyalo mai Göteborg (raica “Me Vakacegu na Yalomudou,” Liaona, Nove. 2010, 101–2).

    2. Dina ni sega ni yacana dina noqu itokani o Steffan, mai talanoataki na italanoa ena nona veivakadonui.

    3. Vunau kei na Veiyalayalati 58:42–43.

    4. Na vosa Vakirisi metanoeo e kena ibalebale “mo qai kila e muri” (meta, “e muri,” kena ibalebale “veisau”; noeo, “qai kila”; nous, “na vakasama, na idabedabe ni vakanananu savasava”). Raica na The New Strong’s Expanded Exhaustive Concordance of the Bible: Greek Dictionary of the New Testament (2010), 162.

    5. Noqu ivakadewa ni omvänd. Om e rawa ni vakadewataki me “lesu mai.” Vänd e rawa ni vakadewataki “me vuki.”

    6. C. S. Lewis. The Great Divorce: A Dream (1946), viii. Ena ikau ni ivola, e vola kina o Lewis ni so era tovolea me ra “vakaduavatataki” lomalagi kei eli mai na nodra digia e dua vei rau. E kaya o koya ni so vei keda e nanuma ni “veivakatorocaketaki se veisau se veivakasavasavataki ena vukica na ca ki na vinaka. … Na nanuma oqo au raica ni dua na cala vakaitamera. … Eda sega ni bula tiko ena dua na vuravura era liganikaloko balavu na sala kecega, ia o ira kecega, ni balavu na kena lakovi tiko, sa na qiqo mai ka sota e lomadonu. …

      Au sega ni vakabauta o ira kece era digitaka na gaunisala cala era na rusa; ia na nodra vueti e okati kina nodra biu lesu ena gaunisala donu. … E rawa ni vakadodonutaki na ca, ia ena sega ni vakatorocaketaki ki na vinaka. Ena sega ni vakabula na gauna. Me na vakadodonutaki vakalalai … ke sega ena sega ni rawa.” (5–6).

    7. Raica na Bible Dictionary, “Repentance.”

    8. Isikeli 33:14–15.

    9. E sega ni tabaki na ivakadinadina nei Peresitedi Boyd K. Packer ena soqoni ni veiliutaki vakarau kina koniferedi raraba ni Epereli 2015. Na itukutuku oqo e kau mai na noqu volavola o au, a tauri ena gauna oya.

    10. Boyd K. Packer, “Na iTuvatuva ni Marau,” Liaona, Me 2015, 28.

    11. 2 Nifai 2:5.

    12. 2 Nifai 2:27.

    13. Raica na 2 Nifai 2:26.

    14. Alama 1:4. Era a sega ni vakabauta o Neori kei ira na nona ilawalawa na veivutuni (raica na Alama 15:15).

    15. Raica na Russell M. Nelson, “Divine Love,” Liaona, Fepe. 2003, 12–17.

    16. Raica na Luke 15:17; raica talega na tikina 11–24.

    17. William Shakespeare, The Rape of Lucrece, laini 211–14.

    18. Vunau kei na Veiyalayalati 18:11.

    19. Raica na Aisea 53:5.

    20. Raica na Luke 15:4–7; Vunau kei na Veiyalayalati 18:10–13.

    21. Na veivutuni dina e okati kina na “yaluma vakalou” (2 Korinica 7:10). E vakavuvulitaka o Elder M. Russell Ballard: “Vei ira era sa lakosese, sa vakarautaka na iVakabula e dua na sala ni lesu mai. Ia e sega ni sega kina na mosi. E sega ni rawarawa na veivutuni; e taura na gauna—gauna mosimosi!” (“Keeping Covenants,” Ensign, Me 1993, 7). Vakavuvulitaka talega o Elder Richard G. Scott, “So na gauna na ikalawa ni veivutuni dau dredre ka mosimosi” (“Finding Forgiveness,” Ensign, Me 1995). E okati ena iwalewale ni veivutuni na yaluma vakalou kei na mosi, ia na vuana e ka rekitaki ni sa vakilai na veivosoti.

    22. Alama 34:31; vakaikuritaki.

    23. Raica na Bible Dictionary, “Gospels.”

    24. Inosi 1:6.

    25. Mosaia 4:3.

    26. Mosaia 27:29.

    27. Aisea 12:3.

    28. Raica na Mosaia 26:29–30. Sa yalataka na Kalou me na veivosoti walega, na ivalavala ca nakiti qai vakanuinui ena loloma cecere ni iVakabula me rawarawa kina na veivutuni sa ka vakasisila sara vua na Kalou (raica na Iperiu 6:4–6; 10:26–27). E a kaya o Elder Richard G. Scott: “Na itukutuku rekitaki vua e dua e gadreva me kaulaivi mai vua na revurevu ni digidigi cala e liu, sai koya, na Turaga e duatani nona raica na malumalumu mai na talaidredre. Ia sa vakasalataka oti na Turaga ni talaidredre sega ni veivutunitaki ena kauta mai na itotogi, ni dau vosa na Turaga me baleta na malumalumu, ena lakovata e veigauna kei na loloma cecere” (“Qaqaco Yadudua kei na Veisorovaki i Jisu Karisito,” Liaona, Nove. 2013, 83).