Mata ki na Lotu
Keimami kerea tiko vei kemuni o ni dauveituberi vakavuvale mo ni matataka na Kalou vei ira na Luvena, mo ni lomani ira ka kauwaitaki ira ka masulaki ira na tamata o ni sa lesi kina.
Ena dua na gauna lekaleka sa oti a lako i nona vale ni oti na cakacaka e dua na marama yada, kau na vakatoka o Molly, ka raica ni sa luvu tu na buturara ni nona itabavale e ra ena rua na idi (5 cm) na wai. E totolo nona kila ni rairai eratou a savasava ka sisili beka vakalevu na vuvale e yasana kadua ka qai lesu yani vua na waica.
Ni oti nona kaciva o Molly e dua nona itokani me mai veivuke, ka tekivu me rau nima wai ka vakamamaca na lewerua. Qai taqiri na lali ni katuba. A kaila mai nona itokani, “O rau nomu dauveituberi ni matavuvale!”
A dredre o Moli. “Oqonaiotioti ni siga ni vula,” a sauma yani o koya, “ia au rawa ni vakadeitaka vei iko ni sega ni o rau noqu dauveituberi ni matavuvale.”
Ni sega ni vakaivava, tarausese suasua, ka vesu cake tu na uluna, kei na pea qaniliga vou, a lako yani ki katuba ko Molly. Ia na kena irairai yakusurasura e sega ni vakatauvatani rawa kei rau na duri tu mai katuba. “Sai rauna nona dauveituberi ni matavuvale!”
“E rawa ni o vakacibari au ena dua na ipamu! a qai kaya vei au e muri. “Oqo e dua na cakamana ni veituberi ni matavuvale—na kena mataqali era dau wasea na Veitacini iLiuliu ena vosa ni koniferedi raraba! “A tomana tale: “Ia niu se tovolea tiko meu lewa se kisivi rau se solia vei rau na ivakamamaca ni buturara, erau sa kaya, ‘Isa Molly, vosoti keirau. Keirau raica rawa ni o osooso tiko. Keirau sega ni via vakaosooso, keirau qai lesu tale mai ena dua na gauna.’ Ka rau gole yani.”
“O cei ya?” e kaci mai o nona itokani mai na tabavale e ra.
“Au a vinakata meu kaya, ‘E sega ni o iratou na Tolu na Nifai,’” a vakadinadinataka o Molly, “ia au tarovi au ka kaya yani vakamalua, ‘O rau na noqu dauveituberi ni matavuvale, ia erau nanuma ni sega ni gauna vinaka oqo me rau wasea na nodrau itukutuku.’”1
Kemuni na taciqu me da dikeva mada vakalekaleka na itavi ni matabete ka sa vakamacalataki me “imatai ni ivurevure veivukei ni Lotu” vei ira yadua na lewena kei na matavuvale.2 Sa vakayagataki na pepa mai na vuqa na veikau lelevu me tauyavutaki ka baci tauyavutaki tale kina. Sa tau oti e udolu na vosa ni veivakauqeti me vakayaloqaqataki kina. E sega na dautuva veilakoyaki vaka-Freud e veivanua kecega e rawa ni tuva na ilakolako ni kilaiyalona sa vakavuna na ulutaga oqo. Ia eda se sasaga dredre tikoga me da bau rawata e dua na ivakatagedegede ni veiqaravi vakadonui me baleta nona ivakaro na Turaga “me dausikovi ira ka vakauqeti ira tikoga”3 na veituberi vakamatavuvale ni matabete caka vakadodonu.
E dua na tiki ni bolebole eda sotava sai koya na veiveisau ni ivakarau ni rai ni lewenilotu. Ni sa wasei tu oqo ki na sivia na 30,000 na tabanalevu kei na tabana na keda lewelevu, ka da kunei ena 188 na matanitu kei na yasayasa, sa dredre cake kina na sikovi ni nodra veivale na tacida kei na ganeda mai na veisiga taumada ni Lotu, ni ra veisikovi toka ga vakayasa ni koro vata ena ka e vakatokai me “veivakavulici vakaitikotiko.”
Me kena ikuri, ena vuqa na taba ni Lotu, e sega soti ni levu na matabete era tu me ra veituberi vakamatavuvale, sa yaco kina me ra dau tauya 18 se 20 na matavuvale o ira na matabete e rawa ni ra veiqaravi—se sivia—me ra qaravi ira. E rawa talega ni tu na bolebole ena yawa ni vanua me lakovi, na kena sau levu kei na lailai ni sala ni veilakoyaki, kei na babalavu ni siga kei na macawa ni cakacaka. Vakuria kina na vakatatabu eso ni itovo vakavanua me baleta na veisiko sega ni sureti ki na veimatavuvale kei na veika tale eso baleta na veitaqomaki ka dau kunea ena veivanua e vuravura—io, sa tekivu me da raica na rabailevu ni leqa.
Kemuni na taciqu, na kena vinaka duadua e vuravura taucoko kei na veituvaki e rawa ni caka kina, ena sasagataka na Lotu, me sikovi vakadua e veivula na vuvale yadua. Ia me rawati ena vuqa na veivanua e veiyasai vuravura ena sega ni rawa ka da na vakavurea na yalodruka vei ira na turaga ni da kerea me ra cakava na ka sa macala tu ni na sega ni rawa ni caka, eratou a volavola na Mataveiliutaki Taumada vei ira na veiliutaki ni matabete ena Lotu ena Tiseba 2001, ka solia kina na ivakasala vakauqeti ka veivuke oqo: “E tu eso na vanua ena Lotu,” eratou vola, “ena … sega beka kina ni rawa na veituberi vakavuvale ki na veimatavuvale yadua e veivula baleta na sega ni veirauti ni iwiliwili ni matabete bulabula vakalotu kei na veika dredre tale eso ena nodra vanua. Ni yaco na veika vakaoqori, me ra cakava na iliuliu na nodra vinaka duadua me vakayagataki na veika e tu vei ira me ra vakatawani ka vaqaqacotaki na lewenilotu yadua.”4
Kemuni na taciqu, kevaka au sotava tiko ena noqu tabanalevu se tabana na mataqali ituvaki dredre vakaoqo, keirau na vakayagataka kei na noqu itokani Matabete i Eroni na nodratou ivakasala na Mataveiliutaki Taumada (ka sa tu ena ivoladusidusi ena gauna oqo) me vaqo: Taumada, veitalia ke taura e vica na vula me qai rawa, keirau na segata na ivakaro vakaivolanikalou me “dausikova na nodra vuvale na lewe ni lotu,”5 ka tuva e dua na ituvatuva ena kauti keirau ki na veivuvale ena tikinisiga e vakatau ena kena rawa. Na tuvai ena tikinisiga oqori ena vakaliuca na gauna e tu vei keirau kei na levu ni veitaratara vei ira era gadrevi keirau vakalevu duadua—o ira na vakadidike erau vakavulica tiko na daukaulotu, o ira na saumaki mai era se qai papitaiso vou, o ira era tauvimate tu, o ira na galili, o ira na luluqa tu vakalotu, matavuvale dua ga na kena itubutubu ka ra se tiko e vale na gone, kei na so tale.
Ni keirau qarava tiko neirau tikinisiga me sikovi taucoko na veivuvale, ka rawa ni taura e vica na vula me qai rawa, keirau na muria eso tale na sala ni veitaratara sa vakarautaka tu na Turaga, vei ira na tamata yadua kei na matavuvale ena neirau lisi. Io keirau na wadravi ira toka na neirau matavuvale ena lotu vakakina, me vaka e tukuna na ivolanikalou “era sa veivosakitaka na nodra bula.”6 Me kena ikuri, keirau na dau qiri, vakau imeli kei na teks, se vakauta e dua na veikidavaki ena dua vei ira na ivakarau ni vakauitukutuku vakaveimaliwai era sa tu. Me vukea na kena wali na leqa bibi eso, keirau na vakauta beka eso na tiki ni ivolanikalou se dua na malanivosa mai na dua na vosa ni koniferedi raraba se dua na itukutuku mai na Mormon Message ka tauri mai na iyaragi eso e vutuniyau tu kina na LDS.org. Ena nodratou ivosavosa na Mataveiliutaki Taumada, keirau na kitaka na kena vinaka duadua keirau rawata ena veituvaki ni bula eso keirau sotava mai na ivurevure eso e tu vei keirau.
Kemuni na taciqu, na kerekere au vakayacora tiko ena bogi nikua sai koya mo ni laveta na nomuni rai me baleta na veituberi vakavuvale. Ni yalovinaka, ena veisala vovou, vinaka cake, ni raici kemuni ni ko ni nona mata na Turaga vei ira na Luvena. Kena ibalebale oqori me vakanadakui na ivakarau tudei vaka na lawa i Mosese, me da qai kusa yani ena muanivula me laki soli e dua na itukutuku wiliki mai na mekesini ni Lotu ka ratou sa wilika oti na matavuvale. Keitou nuitaka ni ko ni na tauyavutaka e dua na itabagauna ni kauwai dina sara yavutaki ena kosipeli ena vukudra na lewenilotu, veiyadravi ka veikauwaitaki, wali na lewa vakayalo kei na leqa vakayago ena sala cava ga ni veivukei.
Me baleta na veika e “yaga” ena veituberi vakamatavuvale, na ka vinaka kecega o cakava ena “yaga,” solia na kena ripote! Sa dina sara, na ripote bibi duadua sai koya na nomu sa vakalougatataka ka vukei ira o veiqaravi ena vukudra, oqori e sega sara ga ni dua kina na betena na ituvatuva se na vanua. Na ka bibi o ya na nomu lomani ira na nomu ka vakayacora tiko vakavinaka na ivakaro mo “dau vakaraici ira na lewe ni lotu.”7
Ena 30 ni Me ni yabaki sa oti, a vasukasukataka yani vakamalua o noqu itokani o Troy Russell na nona lori mai na qaraji me laki solia nona cau ki na nodratou Deseret Industries. A vakila ni kabata cake e dua na ka nona taya e muri. Ni nanuma de so na iyaya era lutu mai na lori, a sobu mai ka raica ni sa davo vakatoboicu tu ena simede na luvena tagane yabaki ciwa vakamareqeti o Austen. Na qoqolou, na veivakalougatataki ni matabete, na veiqaravi vakavuniwai, na vakailesilesi ni valenibula—ena gauna oqo, era sa sega ni yaga. Sa takali o Austen.
Ni sa sega ni rawa me moce se sega ni rawa me kunea na vakacegu, sa sega ni vakayalovinakataki rawa o Troy. E tukuna o koya ni sega ni taura rawa ni sa na sega ni rawa mada ga ni toso tale. Ia ena loma ni gauna mosimosi oqori a yaco mai e tolu na kaukauwa veivueti.
Matai na nona loloma kei na yalo veivakadeitaki ni Tamada Vakalomalagi, e vakaraitaka mai na Yalo Tabu ka solia na vakacegu vei Troy, vakavulici koya, lomani koya, ka vakasolokakanataka vua ni kila na Kalou na ka taucoko me baleta nona yali e dua na Gonetagane taucoko ka vinaka. iKarua na watina o Deedra, ka a mokoti Troy voli e ligana ka lomani koya ka vakananuma tiko vua ni o koya talega sa vakayalia na luvena tagane oya ka sega ni vinakata me yali talega na watina. Katolu ena italanoa oqo o John Manning, dauveituberi vakavuvale vakasakiti.
Au sega ni kila dina se ena ituvatuva cava erau dau veisiko kina o John kei na nona itokani gone kina nodratou vale na Russell, se itukutuku cava a soli ni rau yaco yani e kea, se sala cava erau dau ripotetaka kina na veika erau sotava. Na ka ga au kila ena vulaitubutubu sa oti a dolele sobu kina o Baraca Manning ka tomiki koya cake mai na vakacalaka ena icurucuru ni motoka oya me vaka ga ni sa tomiki Austen lailai cake tiko. Me vaka na dauveituberi vakavuvale se ivakatawa se tacina ena kosipeli sa dodonu me vakakina, a colata o John na veimaroroi kei na veikauwaitaki vakamatabete vei Troy Russell. A tekivu ena nona kaya, “Troy, o Austen e vinakati iko mo tu tale e yavamu—vakakina ena rara ni basiketepolo—au na dau tu eke ena 5:15 e veimataka. Mo vakarau tu baleta au sega ni vinakata meu lako yani ka laki kauti iko mai—kau kila ni na sega ni vinakata o Deedra.”
“Au a sega ni vinakata meu lako,” qai kaya vei au e muri o Troy, “baleta niu dau kauti Austen ena veimataka oya kau kila ni mosi vakalevu na kena vakanananu. Ia a cike toka ga o John, au sa mani lako. Ena imatai ni siga oya niu sa lesu yani, keitou veivosaki—au a vosa—ka vakarorogo o John. Au a vosa tiko ena gauna taucoko ni lako i valenilotu vakakina ena draiva lesu i vale. Ena so na gauna au na vosa tiko ni keitou kele tu ena icurucuru ni motoka ka sarava na cabe ni siga e Las Vegas. A dredre taumada, ia ni toso na gauna au qai kila niu sa kunea na noqu igu mai vua e dua na dauqito polo berabera 6 na fute-2 na idi (1.88 na mita) ena Lotu, ka sega ni vinaka nona vakacurupolo rika, ia a lomani au ka rogoci au me yacova ni sa qai cabe tale na matanisiga ena noqu bula.”8
Kemuni na taciqu ena matabete savasava, ni da tukuna na veituberi vakavuvale se vakatawa se veiqaravi yadua ni matabete—se cava ga na yacana o na vakatoka kina—oqo na ka eda veitalanoataka tiko. Keimami kerea tiko vei kemuni o ni dauveituberi vakavuvale mo ni matataka na Kalou vei ira na Luvena, mo ni lomani ira ka kauwaitaki ira ka masulaki ira na tamata o ni sa lesi kina, me vaka na neimami lomani kemuni ka kauwaitaki kemuni ka dau masulaki kemuni. Mo ni lewa vakai kemuni na nodra vakatawai na sipi ni Kalou ena veisala e vinaka ki na nomuni dui ituvaki ni bula, au masu ena yaca ni noda iVakatawa Vinaka, niu sa nona ivakadinadina, io na Turaga o Jisu Karisito, emeni.