2010–2019
De Ko ni Guilecava
Okotova 2016


De Ko ni Guilecava

Au a vakayaloqaqataki kemuni, vakabibi ena gauna ni bula dredre, ni o vakila kina na Yalotabu ka qaqaco tu na nomu ivakadinadina, ka nanuma tiko na yavu vakayalo o sa tara cake.

Ni bula vinaka, kemuni na taciqu kei na ganequ. Eda sa kalougata dina ena koniferedi oqo. E sa vakayalomalumutaki au na imatai ni noqu yabaki oqo ena Kuoramu ni iApositolo Le Tinikarua. E a dua na yabaki ni gu taka, tubu, ka yalodina, ki na vakamamasu deivaki vua na Tamaqu mai Lomalagi. Au sa vakila kina na nodra masu veitokoni na matavuvale, itokani, kei na lewe ni Lotu taucoko e vuravura raraba. Vinaka vakalevu na nomuni veinanumi kei na masu.

A so talega na gauna vinaka ni noqu sotavi ira na itokani vakamareqeti, eso mai na veiyabaki yani sa oti ka vuqa au mai sotavi ira tiko oqo. Ni oti noqu sotava e dua na itokani vinaka au kila ka lomana tu mai ena vuqa na yabaki au sa vakauqeti kina meu vakarautaka na noqu vosa nikua. Ena vuku ni inaki ni vosa oqo, au na vakatokai noqu itokani oqo me o David.

Ni keirau sa sota, a talaucaka mai noqu itokani ni sasagabula sara tiko. E vakila ni sa sotava tiko, me vaka a kaya o koya, na “leqa tiko ni vakabauta” ka kerea kina na noqu ivakasala. Au vakavinavinaka ni wasea rawa vei au na lomana kei na nona lomaleqa.

A vakamacalataka na nona gadreva lo tu na veika vakayalo a sotava tu e liu ka nanuma o koya ni sa vaka me yali tiko yani. Ni vakamacala tiko, au a vakarorogo sara vagumatua ka masu e lomaqu dina meu kila na ka e vinakata na Turaga meu kaya.

O noqu itokani me vaka eso vei kemuni, a taroga na taro e toqai tu vakamatau ena sere ni Lalai, “I Tamaqu Vakalomalagi ko ni sa tiko dina beka oqori?”1 Kivei kemuni o ni rairai taroga tiko na taro vata oqo, au gadreva meu wasea vei kemuni na ivakasala au a rawa ni solia vei noqu itokani o David ka nuitaka ni ko na dui kunea ni sa vaqaqacotaki na nomuni vakabauta ka vakavoutaki na nomu gugumatua mo sa tisaipeli yalodina i Jisu Karisito.

Meu tekivu ena noqu vakavotuya ni ko sa luvena tagane se yalewa na Tamada mai Lomalagi ka sa tudei tikoga na Nona loloma. Au kila ni yalo veivakadeitaki vakaoqo ni loloma e dau dredre toka me dau nanumi ena loma ni noda sasagabula vakatamata yadua se vakatovolei, rarawa se tatadra sa kavoro.

Sa kila tu o Jisu Karisito na sasagabula kei na veivakatovolei rerevaki. A solia na Nona bula me baleti keda. A vakamavoataki ena iotioti ni vica na nona auwa, ena kena eda sega ni vakamacalataka rawa, ia na Nona solibula baleti keda yadua sai koya na ulu ni Nona vakaraitaka tiko na Nona loloma sa uasivi sara.

E sega ni dua na caka cala, ivalavala ca, se digidigi ena veisautaka na loloma ni Kalou vei keda. E sega ni kena ibalebale o ya ni ivalavala ca ena vakadonui, sega talega ni vagalalataki noda digitaka meda veivutuni ni yaco na ivalavala ca. Ia kakua ni guilecava ni Tamada Vakalomalagi e kilai iko ka lomani kemuni yadua, ka sa tu vakarau me veivukei.

Niu vakasamataka vakatitobu na bula nei noqu itokani, au vakananuma kina na vuku cecere e kune ena iVola i Momani: “Ia oi kemudrau na luvequ, mo drau nanuma mo drau tara na nomudrau yavu e na uluvatu ni noda iVakabula, sai koya na Karisito na Luve ni Kalou, ia ni sa vakaliwava mai na tevoro na nona cagi kaukauwa kei na nona moto ena covulaca, ka sa yaviti kemudrau e na nona uca cevata kei na nona cagilaba, ena sega ni rawai kemudrau se dreti kemudrau sobu ki na ikeli ni rarawa kei na yaluma tawamudu, ni sa dei sara na uluvatu drau sa tara kina; ia kevaka sa tara cake na tamata e na yavu oqo, ena sega ni bale rawa.”2

Au vakadindinataka ni “vanua ni rarawa kei na yaluma tawamudu” e sega ni vanua e gadreva e dua me tiko kina. Ka sa nanuma na noqu itokani ni sa sirova tiko na rarawa oqo.

Niu dau vakasalataki ira eso, me vakataki noqu itokani, au vakadikeva na nodra vakatulewa ena veiyabaki ka vakavuna me ra guilecava na veika tabu era sotava, vakamalumalumutaki ira, ka yaco na vakatitiqa. Au a vakayaloqaqataki ira, kau vakayaloqaqataki kemuni nikua, mo ni nanuma lesu, vakabibi ena gauna ni bula dredre, ni o vakila kina na Yalotabu ka qaqaco tu na nomu ivakadinadina, ka nanuma tiko na yavu vakayalo o sa tara cake. Au yalataka ni ko cakava oqo, mo goletani mai na veika e sega ni tara cake ka vaqaqacotaka na nomu ivakadinadina se na kena e vakalialia na nomu vakabauta, ena yaco na veigauna talei oqori me lesu tale mai ki na nomu vakasama ena masu ena yalomalumalumu kei na lolo. Au vakadeitaka vei kemuni ni na yaco tale mo vakila na veitaqomaki kei na vinaka ni kosipeli i Jisu Karisito.

E dodonu meda dui vaqaqacotaki keda mada vakayalo ka qai laki vaqaqacotaki ira era tiko voliti keda. Vakasamataka vakatitobu e veisiga na ivolanikalou, ka nanuma tiko na veika o nanuma ka vakila ni ko wiliwili tiko. Vakasaqara na ivurevure ni dina tale eso, ia mo nanuma tiko na ivakasala oqo mai na ivolanikalou: “Ia sa vinaka na vuku kevaka era sa muria na ivakaro ni Kalou.”3 Mo tiko ena soqoni ni Lotu, vakabibi ena soqoni ni sakaramede, ka vakaivotavota ena sakaramede ka vakavouiya na veiyalayalati, oka kina na yalayala meda dau nanuma na iVakabula me tiko tawamudu ga kei kemuni na Nona Yalotabu.

Se cava sara na cala eda sa cakava se noda nanuma ni da sa tawadodonu, eda rawa ni vakalougatataka ka laveti ira cake na tamata. Na noda dodoliga yani ena veiqaravi sa va-Karisito ena rawa ni vukei keda meda vakila na loloma ni Kalou ena vu-ni-yaloda.

Sa ka bibi meda nanuma tiko na ivakasala kaukauwa e tiko ena Vakarua: “Vakatawa vinaka na yalomu, de ko ni guilecava na ka sa raica na matamuni, ka sa lako tani ena yalomuni ena veisiga kecega ko ni sa bula kina: ia mo ni vakavulica ga vei ira na luvemuni, kei ira na makubumuni.”4

Ena vakayaco-ka vei ira na itabatamata na digidigi eda cakava. Wasea na nomu ivakadinadina e na nomu matavuvale; vakayaloqaqataki ira me ra nanuma na veika era a vakila ni ra vakila na Yalotabu ena nodra bula ka me ra vola na veika oqori ki na nodra ivolaniveisiga kei na itukutuku yadua me rawa ni yaco na nodra vosa, ni gadrevi vakakina, me ra nanuma kina na vinaka ni Turaga kivei ira.

O nanuma tiko na nodratou a lesu o Nifai kei ratou na tacina ki Jerusalemi me tauri mai na peleti parasa e toqai tu kina na itukutuku makawa ni nodratou kawa, vakatikina, me ratou kakua kina ni guilecava na nodratou itukutuku makawa.

Vakakina, ena iVola i Momani, a vakayacani rau na luvena tagane o Ilamani vei “[nodra] qase” me rau kakua kina ni guilecava na vinaka ni Turaga:

“Oi kemudrau na luvequ mo drau muria na vunau ni Kalou. … Raica au sa vakayacani kemudrau ena yacadrau na noda qase ka rau a lako mai na vanua ko Jerusalemi; au sa kitaka oqo mo drau dau nanumi rau kina ena gauna sa cavuti kina na yacamudrau, ia ni drau sa nanumi rau, mo drau nanuma talega na veika erau sa cakava, mo drau kila ni sa dau vakacaucautaki ka volai tale tu ga, ni sa vinaka.

“Ia oi kemudrau na luvequ, mo drau kitaka talega na ka vinaka mena dauvakacaucautaki ka volai na kena itukutuku me vakataki rau.”5

E vuqa nikua sa tautauvata talega nodra vakayacani ira na luvedra vei ira na qaqa vakaivolanikalou se qase eliu yalodina me sala ni nodra vakayaloqaqataki me ra kakua ni guilecava na nodra isolisoli mai liu.

Ena gauna au sucu kina, a soli vei au na yaca Ronald A. Rasband. Na iotioti ni yacaqu e rokovi kina na kawa mai vei tamaqu. Na yacaqu e loma A a soli vei au meu nanuma tiko ni sa rokovi tiko kina na kawa vaka-Denisi mai vei tinaqu o Anderson.

Na tubuqu vakatolu o Jens Anderson e tadu mai Denmark. Ia ena 1861 a vakauta yani na Turaga e rua na daukaulotu ni Momani ki na itikotiko nei Jens kei Ane Cathrine Anderson, na vanua erau a vakaveikilaitaki rau kina kei na luvedrau tagane yabaki 16 o Andrew ki na kosipeli vakalesui mai. Sa tekivu mai kina e dua na isolisoli mai liu ni vakabauta ka mai taukena kina na noqu matavuvale. Rau a wilika na Andersons na iVola i Momani ka papitaiso ni oti ga vakalailai oya. Ena yabaki e tarava, ratou a rogoca na matavuvale na Anderson na kaci ni dua na parofita me ra takosova na Atelanitika me ra laki tomani ira na Yalododonu ena Vualiku kei Amerika.

E ka ni rarawa, a mate o Jens ena ilakolako e wasawasa, ia rau a tomana yani na ilakolako o watina kei na luvedrau tagane me yaco ki na Bucabuca e Salt Lake, ka yaco yani enai ka 3 ni Sepiteba, 1862. Dina ni tu nodratou dredrde kei na mosi ni yalodratou, a sega vakadua ni yamekemeke na nodrau vakabauta, ka vakakina vei ira e vuqa na nodrau kawa.

iVakatakilakila
Droini ena valenivolavola nei Elder Rasband

E lili toka ena noqu valenivolavola e dua na droini6 ka toka kina e dua na ivakananumi rairai totoka ni imatai ni sota oya mai vei iratou na tubuqu kei rau na daukaulotu taumada yalodina oya. Au sa yalataka meu na kakua ni guilecava na noqu ivotavota, ena vuku ni yacaqu au na dau nanuma tu ga na nodra isolisoli vakawa ni yalodina kei na solibula.

Kakua ni guilecava, taroga, se cakitaka na veikatabu vakayalo e dau sotavi. Na inaki nei vu-ni-meca me vagolei keda vakatani mai na ivakadinadina vakayalo, ka sa gagadre ni Turaga me vakararamataki ka vakaitavitaki keda ena Nona cakacaka.

Meu wasea mada e dua na noqu ivakaraitaki ni dina oqo. Au nanuma tiko vakavinaka na gauna au a vakauqeti kina vakayalo ni sa isau ni noqu masu gumatua. E a matata na kena isau ka kaukauwa. Ia, au a sega ni cakava ga e kea na veivakauqeti, ni oti ga vakalailai, au sa tekivu vakataroga lo vakacava ke dina beka na ka au a vakila. Eso vei kemuni ko ni a rawa talega ni rawai ena lawaki nei vu-ni-meca.

Ni oti e vica na siga e muri, a vakayadrati na noqu vakasama ena vica na tiki ni ivolanikalou kaukauwa:

“E dina, e dina au sa kaya vei iko, kevaka ko sa gadreva e dua tale na ivakadinadina, mo nanuma lesu ga na bogi ko a masu ka tagica kina. …

“Au a sega li ni vakaceguya kina na yalomu? Ai vakadinadina cava tale ko gadreva, me uasivia na ivakadinadina sa solia na Kalou?”7

Sa vaka e kaya tiko kina na Turaga, “Ia, oqo Ronald, au sa tukuna oti vei iko ka sa gadrevi mo cakava. Mo cakava sara!” Au sa vakavinavinaka ki na veivakadodonutaki kei na veidusimaki talei o ya! A vakacegu vakatotolo na yaloqu ena veivakauqeti ka rawa sara meu toso ki liu, kau kila e yaloqu ni sa rogoci na noqu masu.

Au mai wasea tiko oqo kemuni na taciqu kei na ganequ me vakaraitaka kina na totolo ni guiguileca ni noda vakasama ka rawa ni dusimaki keda na veika vakayalo eda sotava. Au sa vulica meda dau vakamareqeta na veigauna vakaoqo, “deu na guilecava.”

Kivei noqu itokani, kei ira kece era gadreva me vaqaqacotaki na nodra vakabauta, au yalataka oqo vei kemuni: ni ko bulataka ena yalodina na kosipeli i Jisu Karisito ka tiko ga ena kena ivakavuvuli, ena taqomaki na nomu ivakadinadina, ka na tubu cake. Maroroya na veiyalayalati o sa vakayacora se cava ga na nodra ivalavala o ira era tiko voliti iko. Mo itubutubu, tacida kei na ganeda, tubudra na gone, nei, momo, kei na itokani gugumatua e vaqaqacotaki ira na daulomani ena nomuni dui ivakadinadina ka wasea yani na veika vakayalo e sotavi. Mo yalodina tiko ka tudei, ke valuta mai na nomu bula na cagilaba ni vakatitiqa mai na nodra ivalavala eso tale. Vakasaqara na veika e laveta cake ka vakaukauwataki iko vakayalo. Drotani mai na isolisoli lasulasu e vakatokai me “dina” e dau tete yani vakarawarawa, ka nanuma tiko mo vola nomu a vakila na yalo ni “loloma, reki, vakacegu, vosota vakadede, yalomalua, yalololoma, na vakabauta, yalomalumalumu, [kei na] ivalavala malua.”8

Ena loma ni cagilaba rerevaki ni bula oqo, mo kakua ni guilecava na nomu isolisoli vakalou mai liu ni ko sa dua na luvena tagane se yalewa na Kalou se na nomu icavacava tawamudu o ya me dua na siga mo lesu ka laki bula vata kei Koya, ka na uabaleta na veika cava ga e solia ko vuravura. Nanuma tiko na vosa malumu ka kamica nei Alama: “Ia au sa kaya vei kemudou na wekaqu kevaka dou sa kaya ni dou sa veivutuni ka dou sa rekitaka na loloma dou sa vakabulai kina, a cava dou sa nanuma e na gauna oqo?”9

Kivei kemuni kece ko ni nanuma tiko me na vaqaqacotaki na nomuni vakabauta, au sa vakamasuti kemuni: Kakua ni guilecava! Yalovinaka kakua ni guilecava.

Au vakadinadinataka ni ko Josefa Simici a parofita ni Kalou. Au kila ni a raica ka vosa vua na Kalou kei na Luvena, o Jisu Karisito, me vaka ga a vola ni a tukuna. Au sa vakavinavinaka ni a sega ni guilecava me vola na veika sa sotava, me rawa ni da kila taucoko na nona ivakadinadina.

Au wasea na noqu ivakadinadina vakalou ni Turaga o Jisu Karisito. E bula tiko; au kila ni bula tiko o Koya ka sa liutaka tiko na Lotu oqo. Oqo na noqu ivakadinadina vakataki au ga, tu vakai koya ga mai na dua tale na domo se ivakadinadina, ka sa noqu masu ni daru na sega vakadua ni guilecava na dina tabu tawamudu—na kena imatai ka bibi duadua ni da sa luvena tagane kei na yalewa na noda iTubutubu Vakalomalagi dau loloma, e rau sa gadreva meda marau tawamudu. Au sa vakadinadinataka na dina oqo ena yaca i Jisu Karisito, emeni.