Na Turaga o Jisu Karisito sa Vakavulica vei Keda Meda Masu
Ni ko sa masu, o sa masu vakaidina tiko se cavu masu tiko ga?
Ena 1977, au a laki kaulotu ki Cusco, mai Peru. A vakadonui vei au kei noqu itokani me keirau kauti ira taucoko na daukaulotu ena iwasewase e Cusco ki na ivovo totoka kei Machu Picchu makawa.
Ni vakarau oti na neimami sikova na ivovo makawa oqo, era a vinakata eso na daukaulotu mera gole ki na Inca Bridge, e tiki tiko ni sala ni ulunivanua. Vakasauri ga, au vakila e yaloqu ni sa vosa tiko mai na Yalotabu me kua na gole i kea. Na sala e toka ena bati ni dua na ulunivanua ka baba sobu ena 2,000 na fute (610 na mita). Ena vuqa na tikina e laki rabalailai ka rauta ga me ra lako yadudua kina na tamata. Keirau a qai kaya na veitokani vei ira ni sega ni dodonu meda gole ki na Inca Bridge.
Ia, era sa cike tikoga na daukaulotu me keimami gole e kea. Sa kaukauwa sara na nodra kerekere, e dina ga ni sa vosa oti vei au na Yalotabu au sa vakamuria ga na nodra veivakasaurarataki ka kaya vei ira ni keimami sa na gole tiko ki na wavu o ya ia me keimami na qaqarauni vinaka ga.
Keimami sa qai lakova yani na sala ki na Inca Bridge kau tu sara ena ilawalawa e muri, ka tekivu taubale sara tiko vakamalua na tamata yadua, me vaka sa vakadonui. Era sa qai tekivu mera taubale vakatotolo na daukaulotu ka cici talega. Era sa vakawalena na noqu kerekere, mera lako vakamalua. Au sa mani nanuma meu sa na laki toboki ira, ka kaya me keimami sa lesu. Au sa tu sara e muri, kau meu sa na cici totolo meu toboki ira.
Niu yacova yani e dua na igole, ena dua na yasana qiqo e sega ni rauta e le rua me lako kina, au raica sara e dua na daukaulotu ni sa tucake tu ka ravita vakanadaku tu na babavatu. Au a tarogi koya yani se cava e tucake tu kina e kea. A qai kaya mai ni sa vakauqeti vakayalo me tu vakadua ga e kea vakalailai kau meu na lako ga yani.
Sa yavalati tiko na yaloqu meu toboki ira sa liu tiko, a sa qai vukei au meu lakosiviti koya, ka rawa sara meu toso vakalailai yani ena sala oqo. Au raica sara ni co levu tu na qele. Au a butu yani ena yavaqu imatau, kau kila kina, niu sa lutu, ni a sega tu na qele e ra ena veico levu oqo. Au sa qai saga meu qumia eso na tabanikau ena babasobu ni sala oqo, Vakalailai ga noqu raica sobu rawa, na 2,000 na fute e ra, na Uciwai o Urubamba e takosova tiko na Buca Tabu kei Incas. Au vakila ni sa vaka me sa takali na noqu kaukauwa, ka sa voleka na gauna meu sega tale ni ququmi rawa. Ena gauna o ya, au a qai masu vakaukauwa. A masu lekaleka sara. Au a dolava na gusuqu ka kaya, “Tamaqu, ni vukei au!”
Era a sega ni kaukauwa sara na tabanikau me tabea cake tiko na kequ bi. Au kila ni sa voleka niu mate. Ena gauna sara ga au sa vakarau lutu kina, au sa vakila ni sa qumia na ligaqu e dua na liga kaukauwa ka dreti au cake. Ena veivuke o ya au sa qai sasaga kaba cake ka lesu rawa ena sala. Na daukaulotu ka a wawa toka o ya sai koya a vakabulai au.
Ia na kena dina a vakabulai au na Tamada Vakalomalagi. A rogoca na domoqu. Au a rogoca taumada vakatolu e liu na domo ni Yalotabu, ni a kaya meu kakua ni gole ki na Inca Bridge, ia au a sega ni muria na domo o ya. Au a sautaninini sara ga, a malumu na yagoqu, kau sega ni kila na cava meu tukuna. Kau qai nanuma rawa ni so na daukaulotu era a liu tiko vei keirau, ka keirau a gole yani ka laki vakasaqarai ira me yacova ni ra sa laurai ka tukuna vei ira na ka a yaco vei au.
Keimami sa qai lesu ki Machu Picchu, ka qaqarauni vinaka, ka gole galugalu yani. Ena ilakolako lesu, au a galu voli ga, kau vakasamataka sara ni a rogoca o Koya na domoqu ia au a sega ni via rogoca na Domona. A mosi bibi sara ga na yaloqu niu a talaidredre ki na voqa ni Domona ka yaco talega meu vakavinavinakataka na Nona loloma veivueti. A sega ni tauca vei au na Nona lewa ni veivakadodonutaki, ia na Nona loloma veivueti cecere vei au, a vakabulai au o Koya (raica na Alama 26:20).
Ni sa mai cava na siga o ya, ni sa gauna ni noqu masu duadua, au sa masulaka na yaloqu vua na “Tama ni loloma kei na Kalou ni veivakacegui kecega” (2 Korinica 1:3). Au a masu ena “yalodina, ena lomamudou taucoko, ka vakabauta na Karisito” (Moronai 10:4).
Ena mataka lailai ni siga vata o ya, au a cavu masu ena tebenigusuqu, niu sa voleka ni mate, au a masu Vua mai na vu ni yaloqu. Au a vakabibitaka na noqu bula ena gauna o ya. Au raica ena vuqa na gauna, ni sa daulomani au na Tamada Vakalomalagi. A vakavulica vei au e vuqa na lesoni ena siga o ya mai Machu Picchu vakakina e Cusco, mai Peru. Dua vei ira na lesoni cecere sara, o ya meu dau, “meu dau masu tikoga ena yalodina, [ka vakabauta] tiko na Karisito.”
Ena dua na gauna a laki “masu ena dua na yasana,” na Turaga o Jisu Karisito “ni sa qai tinia sa qai kaya vei koya e dua na nona tisaipeli, kemuni na Turaga, mo ni vakavulici keimami me keimami masu” (Luke 11:1). A qai vakavulici ira na Nona tisaipeli mera masu. Ia nikua sa vakavulici kemuni tiko kei au meda masu ni da raitayalotaki Koya ni sa masu tiko mai Kecisemani ka kaya, “Ia me kakua ni yaco na noqu lewa, me yaco ga na nomuni lewa” (Luke 22:42). Ni ko sa masu, o sa gadreva dina sara beka ga “ia me kakua ni yaco na noqu lewa, me yaco ga na nomuni lewa”?
E vakamacalataka vaka oqo o Paula na masu nei Jisu “e na veisiga ni nona tiko vakatamata,” vakabibi mai Kecisemani: “Ni sa cabora oti na kerekere kei na masumasu, kei na tagi ni sa vakawai na matana, vua sa rawata me vakabulai koya mai na mate, a sa rogoci ga e na ka sa rerevaka ko koya” (Iperiu 5:7). Ni ko sa masu, o sa masu vakaidina tiko se cavu masu tiko ga? E vakayago tu beka ga na nomu masu?
A masu sara vakaukauwa o Jisu ka veivosaki kei Tamana. “Sa papitaisotaki talega ko Jisu, ka ni sa masu tiko, sa wase rua ko lomalagi” (Luke 3:21). Ni ko sa masu, o vakila beka ni sa wase rua mai ko lomalagi? Nai iotioti ni gauna cava o a vakila kina na isema o ya kei lomalagi?
A vakarautaki Koya o Jisu me vakatulewa bibi ni masu yani vei Tamana.
“Sa lako ko Koya ki na ulunivanua me masu, a sa masu tiko vua na Kalou e na bogi ka siga vaka.
“Ia ni sa siga mai, sa kacivi ira na Nona tisaipeli: ka sa digitaki ira e lewe tinikarua mai vei ira” (Luke 6:12–13).
O sa vakarautaki iko tiko beka mo vakatulewa bibi mo na masu vua na Tamamu Vakalomalagi? O sa vakarautaki iko tiko beka mo sa laki masu yani?
Ni sa tadu yani o Jisu ki na vanua levu o Amerika, a vakavulici ira na tamata mera masu. “A sa qai kaya vei iratou ko Jisu: Dou masu tiko ga; ia sa sega ni mudu kina na nodratou masu” (3 Nifai 19:26).
Sa sureti keda tiko o Jisu meda “gumatua ena masu” (V&V 10:5). Sa kila tu o Jisu ni Tamada Vakalomalagi sa dau rogoca ka solia mai na veika sa vinaka duadua vei keda. Na cava na vuna eda dau sega kina ni via ciqoma ena so na gauna? Baleta na cava?
Ena gauna sara ga eda cavuta kina, “Tamaqu mai Lomalagi,” sa na rogoca mai o Koya na noda masu ka kauwai sara tiko mai vei keda kei na noda gagadre. Sa qai rai mai na Matana kei na Daligana me sema mai vei iko. E wilika na noda vakasama, ka vakila na yaloda. Ena sega ni rawa mo vunia mai Vua e dua na ka. Ia na ka totoka duadua ni na raici iko mai ena mataloloma kei na loloma veivueti eda sega ni vakasamataka rawa. Ia na loloma kei na loloma veivueti sa tu ga Vua ena gauna ga o cavuta kina, “Tamaqu mai Lomalagi.”
Koya gona sa yaco na masu me dua na gauna tabu vakaidina sara. E sega ni dua o Koya me kaya, “Sega, Au na sega ni rogoci iko ena gauna oqo, baleta ni ko lako ga mai vei au ni ko kune leqa kina.” Na tamata ga e cakava o ya. E sega ni dua o Koya me kaya, “Oilei, o sega ni vakasamataka rawa niu osooso sara tu ga oqo.” Na tamata ga e kaya o ya.
Au nuitaka ka sa noqu masu me da sa qai masu taucoko me vaka sa vakavulici keda kina o Jisu ena yaca ni Turaga o Jisu Karisito, emeni.