Au na Kauta Mai na Rarama ni Kosipeli ki na Noqu Vale
E rawa ni da kauta mai na rarama ni kosipeli ki na noda vale, koronivuli, kei na vanua ni cakacaka kevaka eda vakasaqara ka wasea na veika vinaka baleti ira na tani.
Me isau ni nona veisureti o Sisita Linda K. Burton ena koniferedi raraba ni Epereli,1 e vuqa vei kemuni era sa vakaitavi tiko ena veicakacaka ni lomasoli kei na veinanumi ni yalololoma me sotavi kina nodra gagadre na ise ni valu ena nomuni veivanua. Mai na veisasaga rawarawa vakatamata yadua ki na veiparokaramu rabailevu vakaitikotiko, na veicakacaka oqori era vua ni loloma. Ni ko ni sa wasea na nomuni gauna, taledi, kei na veika e tu vei kemuni, sa vakararamataki na yalomuni—kei ira talega na ise ni valu. Na tarai cake ni inuinui kei na vakabauta kei na loloma cecere cake vei koya e ciqoma kei koya e solia, e vua ni loloma cecere dina ka na sega ni rawa ni levei.
E tukuna vei keda na parofita o Moronai ni loloma cecere e dua na itovonibula gadrevi vei ira era na bula vata kei Tamada Vakalomalagi ena matanitu selesitieli. E vola kina o koya, “Ia kevaka sa sega vei kemudou na loloma dou na sega ni rawata na matanitu ni Kalou.”2
Sa dina sara, o Jisu Karisito na ivakaraitaki uasivi sara ni loloma cecere. Nona soli koya ena bula taumada me noda iVakabula, Nona ivakarau ena Nona gauna taucoko ena bula oqo, Nona isolisoli vakalou ni Veisorovaki, kei na Nona sasaga tikoga me kauti keda lesu mai vua na Tamada Vakalomalagi era sa ivakaraitaki cecere sara ni loloma cecere. E cakacaka o Koya ena dua ga na inaki: nona lomana na Tamana vakaraitaka ena Nona lomani keda yadua. Ni tarogi baleta na ivunau cecere duadua, e sauma ko Jisu:
“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.
“Ai matai ni vunau oqo ka levu.
“A sa tautauvata na kena ikarua, Mo lomana na kai nomu me vaka ko lomani iko.”3
E dua na ivakarau uasivi e rawa ni tara cake ka vakaraitaka kina na noda lomana na kai noda sai koya meda dau veinanumi ena noda vakanananu kei na noda vosa. Ena vica na yabaki sa oti, a vola vaqo e dua na itokani mareqeti, “Na vatuka levu duadua ni loloma cecere oya me kua na veivakalewai.”4 Se dina tu ga nikua oya.
Ena dua na gauna wale toka ga qo, ni sara iyaloyalo tiko kei iratou na tacina o Alyssa yabaki tolu, a tukuna cake ena veilecayaki, “Na, e rairai duatani tu na toa oya!”
A raica yani o tinana ki na iyaloyalo ka sauma ena matadredredre, “Na peacock oqori, noqu lewa.”
Me vaka na yabaki tolu yalowai oya, so na gauna eda dau raici ira na tani ena vakasama cala sega ni taucoko. Eda raica tiko beka yani na duidui kei na cala eda nanuma vei ira era tu wavoliti keda, ia na Tamada Vakalomalagi e raici ira na Luvena, era buli ena Kena vatuka tawamudu, kei na vunilagi vakasakiti ka lagilagi.
A nanumi na nona a kaya o Peresitedi James E. Faust, “Ni sa toso tiko na noqu yabaki, sa lailai tiko ga mai noqu daulelewa.”5 Oqori e vakananuma vei au na rai ni iApositolo o Paula:
“Niu a gone, au a dau vosa me vaka na gone, au a kila ka me vaka na gone, au a dau vakanananu me vaka na gone: ia niu sa [qase cake], au sa biuta tani na ka vagonegonea.
“Io, edaidai eda sa raica me vaka na titiro ena iloilo buwawa; ia mai muri ena vaka na veirai ena matanavotu: edaidai kau sa kila vakatikina ga; ia mai muri kau na kila me vaka kau sa kilai.”6
Ni da sa raica vakamatata cake noda malumalumu, sa na lailai na noda dau raici ira na tani ena “iloilo buwawa.” Eda vinakata me da vakayagataka na rarama ni kosipeli me da raici ira kina na tani me vaka e dau vakayacora na iVakabula—ena yalololoma, inuinui, kei na loloma cecere. Ena yaco mai na siga eda na ciqoma vakavinaka kina na lomadra na tani ka da na vakavinavinaka ena loloma vakarisito ena soli vei keda—me vaka na noda dau vakananumi ira ka vosa vinaka vei ira na tani ena bula oqo.
Ena vica na yabaki sa oti, keimami a laki voce bavelo kei na dua na ilawalawa goneyalewa. E vakariseyate na totoka ni drano karakarawa buto ka vakavolivoliti mai na drokadroka ni delana veikauloa kei na veibarinivatu. E tatibi na wai ena neimami ivoce ni keimami tonia ena wai makare, ka cila katakata mai na siga ni keimami tasiri kosova na drano.
Ia, sega ni dede sa tekivu vakabutobutotaka na lomalagi na o, ka tekivu liwa e dua na batinicagi kaukauwa. Me rawa ni keimami toso, sa dodonu me keimami tonia vakatitobu na ivoce, ka sega ni cegu ena maliwa ni ibili yadua. Ni oti e vica na auwa voravora ni cakacaka vakekedaku, keimami sa yacova na itakelo ni drano vakaitamera ka raica ena kidacala kei na marau ni sa liwa yani na cagi ki na yasana keimami mua tiko kina.
Totolo, neimami sa vakayagataka na isolisoli oqo. Laudre mai e dua na tavuleni lailai ka vesu e rua na tutuna ena dia ni ivoce kei na tutuna tale e rua ki na yavai watiqu, qai dodoka yani o koya ki na bati ni bavelo. E uvuca na cagi na laca vakatovotovo, ka keimami toso yani!
Ni ra raica na goneyalewa ena bavelo tale eso na rawarawa ni neitou toso e dela ni wai, era cakava vakatotolo nodra laca. E mama na yalo ena veidredrevaki kei na vakacegu, na vakavinavinaka ena veivuke mai na veika dredre ni siga oya.
E rawa ni vaka na batinicagi lagilagi oya na veivakacaucautaki momona ni dua na itokani, na veikidavaki ena marau ni dua na itubutubu, na deguvacu ni veivakadonui ni dua na tacina, se na matadredre ni veivuke ni dua e cakacaka se kalasi vata, era solia kece na “batinicagi [savasava] ena noda laca” ni da valuta na bolebole ni bula! E biuta vaka oqo o Peresitedi Thomas S. Monson: “E sega ni rawa ni da lewa na matanicagi, ia e rawa ni da moica na laca. Baleta na marau, sautu, kei na yalovakacegu, me da digitaka e dua na ivakarau ni yalo vinaka.” 7
E tu ena vosa na kaukauwa veivakurabuitaki, ruarua me tara cake se basuraka sobu. E rawa beka ni da nanuma taucoko na veivosa rogo ca a bikai keda sobu kei na vosa tale eso ka laveta cake na yaloda. Ni digitaki me cavuti ga na veika e vinaka me baleta—vakakina vei ira—na tani ena laveti ira ka vaqaqacotaki ira era wavoliti keda ka vukei ira tale eso me ra muria na sala ni iVakabula.
Niu dua na goneyalewa lailai ena Lalai, au a cakacaka vagumatua meu culavata e dua na ivosavosa rawarawa ka vaqo, “Au na kauta mai na rarama ni kosipeli ki na noqu vale.” Ena yakavi ni dua na siga ena loma ni macawa, ni keimami veidreyaka sobu ka lako cake na goneyalewa na neimami icula ena isulu, qai talanoataka vei keimami na qasenivuli na italanoa ni dua na goneyalewa lailai ka vakaitikotiko ena dua na delana ena yasa ni dua na buca. Ena veiyakavi, e dau raica toka e delana ena yasa ni buca kadua e dua na vale tatalivaliva na kena katubaleka koula. Na nona vale o koya e ka lailai ka vaka me carukaica, ka tatadrataka tu na goneyalewa oqo me tiko ena loma ni vale totoka oya ka koula na kena katubaleka.
Ena dua na siga a vakatarai vua me vodoka nona basikeli kosova na buca. A gole yani ena nanamaki ka yacova na vale koula na kena katubaleka dau taleitaka tu ena dua na gauna balavu. Ia ni sobu mai nona basikeli, a raica ni sa lala tu na vale ka voleka ni rusa, sa tubulevu na co ena kena lomanibai kei na katubaleka iloilo duka. Ena yalorarawa, a vagoleya na goneyalewa na matana ki vale. Ka ni kidacala vua ni raica e dua na vale taliva ka koula na kena katubaleka e delana ena tai kadua ni buca, ka qai kila ni oya na nona vale ga!8
Ena so na gauna me vaka na goneyalewa oqo, eda na raica beka na veika e tu vei ira tale eso ka nanuma ni da lailai sobu. Sa yaco me da vakanamata ki na yasa ni bula vaka-Pinterest se Instagram se toboki keda na bula ni veisisivi vakakoronivuli se vanua ni cakacaka. Ia, ni da taura e dua na gauna lailai me da “wilika [noda] kalougata,”9 eda na raica ena kena irairai dina ka kila na vinaka ni Kalou vei ira kece na Luvena.
Se da yabaki 8 se 108, e rawa ni da kauta mai na rarama ni kosipeli ki na noda iyalava, se dua na valesaumi cecere mai Manhattan, dua na vale durubalavu mai Malaysia, se dua na valekulinimanumanu e Mongolia. E rawa ni da lewa me da vakasaqara na vinaka vei ira na tani kei na veika e yaco wavoliti keda. Na yalewa gone kei ira e sega soti ni gone e veivanua kecega e rawa ni da vakaraitaka na loloma cecere ni da digitaka me da vakayagataka na vosa e tara cake na yalodei kei na vakabauta kivei ira tale e so.
A tukuna o Elder Jeffrey R. Holland baleta e dua na cauravou ka ra dau vakalialia nona ilala ena gauna ni nona vuli. Ena vica na yabaki i muri, a toki yani, curu ena mataivalu, vuli, ka yaco me bulabula vaka-Lotu. Na gauna ni nona bula oqo a yaco kina eso na veika talei ka vakasakiti.
Ni oti e vicavata na yabaki, a lesu tale ki na nona koro dina. Era a sega ni via raica na tamata na nona tubu kei na nona sa vinaka cake. Vei ira, oqo se o “ka” tikoga ka ra vakayacora ga vua na ivalavala makawa oya. Sa yaco me kino yani na tamata vinaka oqo me dua ga na iyaloyalo ni tamata qaqa o koya tu e liu ka sega ni vakayagataka rawa na nona taledi a tarai cake vakavinaka me vakalougatataki ira kina era a vakalialiai koya ka sega ni ciqomi koya tale.10 Sa dua na maumau levu, vua kei na itikotiko!
E vakavuvulitaka na iApositolo o Paula, “Ia na ka me liu oqo mo dou veilomani vakalevu vakai kemudou: ni na ubia na ivalavala ca e vuqa na loloma.”11 Veilomani vakalevu, kena ibalebale “mai vuniyaloda,” e kena ivakaraitaki ni sa guilecavi na cala kei na malumalumu nei dua ka sega ni kubuta na ca se vakananuma lesu vei keda kei ira tale eso na malumalumu ni veigauna sa oti.
Na noda itavi kei na noda galala me da vakacerecerea na vinaka ena tamata kecega ni da segata me da vaka na noda iVakabula, o Jisu Karisito. Sa dua na ka taleitaki me da raica na rarama e matana e dua sa ciqoma na Veisorovaki i Jisu Karisito ka sa cakava tiko na veisau dina ena nona bula! O ira na daukaulotu era sa vakila oti na reki ni ra raica na nona sobura na wai ni veipapitaisotaki e dua sa saumaki mai ka curuma na katuba ni valetabu era sa ivakadinadina bula ni veivakalougatataki ni nodra vakatarai—ka vakayaloqaqataki—eso tale me ra veisau. O ira na lewenilotu era dau kidavaki ira na saumaki mai a nanumi ni ra na sega ni rawata na matanitu era na vakamamautaki ena nodra vukei ira me ra vakila na loloma ni Turaga. Na totoka cecere ni kosipeli i Jisu Karisito sai koya na dina ni tubu tawamudu—e sega walega ni da vakatarai me da veisau me da vinaka cake ia eda vakayaloqaqataki, ka vakaroti, meda tomana tikoga na vakasaqarai ni vinaka cake ka, yacova, na vinaka sara.
E vakasalataka o Peresitedi Thomas S. Monson: “Ena drau na veisala lalai, o ni daramaka kece tu na isulu ni loloma cecere. … Me sa kua na vakalewai [ira] na tani [se] veidusi, me tu vei keda na loloma savasava sara i Karisito vei ira na noda lewe ni ilakolako ena bula oqo. Me da raica ka kila ni da sa dui solia tiko [noda] vinaka duadua me da sotava kina na bolebole e yaco mai, me da segata me da cakava noda vinaka duadua me da veivuke.”12
Na loloma cecere, ena vosa vinaka, sai koya na vosota, yalovinaka, kei na yalovakacegu. Na loloma cecere sa dau vakaliuci ira na tani, sa yalomalua, sa dau lewai koya vinaka, vakaraica na vinaka vei ira na tani, ka reki ni dua e rawaka vinaka.13
Ni da veitacini ka veiganeni e Saioni, eda na yalataka beka me da “cakacaka vata kece … me vakayacori nai tavi ni bula, me kalougata na tamata kece [ena yaca ni iVakabula] ”?14 E rawa beka vei keda, ena loloma, kei na vakanuinui cecere, me da vakasaqara ka mareqeta na veika uasivi vei ira tale eso, vakatara ka vakayaloqaqataka na tubu? E rawa beka ni da reki ena veika era rawata na tani ni da tomana tiko na noda vakavinakataki keda cake?
Io, e rawa vei keda me da kauta mai na rarama ni kosipeli ki na noda vale, koronivuli, kei na vanua ni cakacaka kevaka eda vakasaqara ka wasea na veika vinaka baleti ira na tani ka laiva na ka e sega ni vinaka me seyavu yani. Na vakavinavinaka cava beka e sinai kina na yaloqu niu vakasamataka na veivutuni sa rawata na noda iVakabula, o Jisu Karisito, vei keda eda sa ivalavala ca ena vuravura sega ni vinaka sara ka dredre ena so na gauna oqo!
Au wasea na noqu ivakadinadina ni da muria na Nona ivakaraitaki uasivi sara, eda rawa ni ciqoma na isolisoli ni loloma cecere, ka na kauta mai vei keda na reki cecekia ena bula oqo kei na veivakalougatataki yalataki ni bula tawamudu vata kei Tamada Vakalomalagi. Ena yaca i Jisu Karisito, emeni.