Parau ’āfaro atu

Nāhea tātou ’ia ora i roto i te ao nei ’e ’ia « ha’apae i te mau mea nō teie nei ao » ?

Te mau pipi ’o tāna i mā’iti, nā Casey Childs

’Ua parau te Fatu, « e ha’apae ’oe i te mau mea nō teie nei ao, ’e ’ia tītau ho’i i te mau mea maita’i a’e » (Te Ha’api’ira’a Tumu ’e te mau Fafaura’a 25:10). ’Aita te reira e parau nei ē, e tāu’a ’ore tātou i tō tātou mau hina’aro pae tino ’e pae mātēria, te aura’a rā ’oia ho’i ’eiaha tātou e tu’u i tō tātou ’ā’au i roto i te tao’a rahi, te mana, te ti’ara’a ’aore rā te fa’ati’ara’a a tō te ao nei. Teie te tahi mau parau tumu ’o tei ha’api’ihia ia tātou nō ni’a i te orara’a i roto i te ao nei :

’A tu’u i te mau mea a te Atua nā mua roa. « E mata na ’outou i te ’imi i te bāsileia o te Atua ’e te parauti’a nāna ra » (Mataio 6:33). I roto i tō tātou ’ā’au ’e tō tātou orara’a, ’ua riro te mau fa’auera’a a te Atua ’e tā tātou mau fafaura’a ’e ’ōna ’ei ’ohipa mātāmua nā tātou.

’Imi i te ’ite « ’A ha’api’i ai ’outou nō ni’a i teie ao e fa’a’ati nei ia ’outou, ’a ha’api’i ato’a mai nō ni’a i te Fa’aora. […] Rahi noa atu tā ’oe e ha’api’i mai, rahi noa ato’a atu ’oe i te tauturu i te patura’a i te bāsileia o te Atua ’e i te fa’aurura’a i tō te ao nei i te maita’i » (Nō te pūai o te feiā ’āpī : E arata’i nō te rave i te mau mā’itira’a [2022], 31, 32).

Te ’ohipa. « Te ’ohipa e parau tumu faufa’a roa nō te ’evanelia. E fa’aitoito te reira i te tupura’a ’e e fa’ananea ia tātou. […] ’Aita te Fatu e hina’aro noa ’ia ’imi tātou ’ia ora maita’i tō tātou ’utuāfare, ‘’ia ’ana’anatae [ato’a rā tātou] i te ’ohipa maita’i’ [Te Ha’api’ira’a Tumu ’e te mau Fafaura’a 58–27] » (« Te ’ohipa », Te mau parau tumu ’e te mau uira’a, Vaira’a buka ’Evanelia).