Mānava i teie nei ve’a

Tauturu nō te mau mahana fifi

’Aita te orara’a e tere noa mai tei mana’ohia. E mea au roa nā tātou te mau mahana tei ’ī i te mau ha’amana’ora’a ’e te ’oa’oa, i te tahi rā mau mahana ’ua ’ī i te māuruuru ’ore. I roto i teie ve’a, e ’ite mai ’oe i te tauturu nō taua mau mahana ra (hi’o te mau ’api 8, 14, ’e te 22).

Hō’ē o tā’u mau pāpa’ira’a mo’a au roa tei roto te hō’ē parau a’o ’e te parau fafau nō te mau mahana fifi. Tē tai’o nei te reira : « ’A fa’a’oroma’i i roto i te mau ’ati, nō te mea e rave rahi te mau ’ati e tae i ni’a iho ia ’oe na ; ’a fa’a’oroma’i i te reira, nō te mea, inaha, tei pīha’i iho vau ia ’oe, e tae noa atu i te hope’a o tō ’oe pu’e mahana » (Te Ha’api’ira’a Tumu ’e te mau Fafaura’a 24:8). Te parau a’o ’o te fa’a’oroma’i ïa.

Te tumu mau, te aura’a o te fa’a’oroma’i ’o te vai ’āueue-’ore-ra’a ïa i roto mai. E mea pa’ari paha te reira nō te rave, nō reira mea au roa nā’u te parau fafau « tei pīha’i iho vau ia ’oe ». Te aura’a o taua parau fafau ra ’aita tātou e tītauhia ’ia fa’aruru tātou ana’e i te mau mahana fifi. E tauturu mai te Fatu ia tātou ’ia vai ’āueue ’ore noa i roto mai.

Noa atu te ’ohipa e tupu i roto i tō tātou orara’a, te rāve’a maita’i roa a’e nō te tū’ati atu i te Metua ’o te pure ïa. Tei reira mau ’oia. E fa’aro’o ’oia ’e e pāhono mai i tā tātou mau pure. Tē fa’aro’o nei te Atua ’e tē paraparau nei i tāna mau tamari’i i te mau mahana maita’i ’e te mau mahana ’ino (hi’o ’api 2). ’Ua parau fafau ’oia e vai noa ’oia i pīha’i iho ia tātou.

Ma te aroha,

Emily Belle Freeman

Peresideni rahi nō te Feiā ’Āpī Tamāhine