’Ia ’ohipa ma te Vārua
Tē hina’aro nei te Metua i te ao e paraparau ia ’oe. Teie te mau rāve’a ’ia tupu tāmau noa teie ’āparaura’a.
’Ua ’ite maita’i ’e ’ua here tō ’oe Metua i te ao ra ia ’oe. Tē fa’aro’o nei ’oia ia ’oe ’ia pure ana’e ’oe, ’e tē hina’aro nei ’oia e paraparau ia ’oe. ’Ite nāhea ’oia e paraparau e mea faufa’a rahi ïa—’e e mea ta’a ’ē te reira nō tātou tāta’itahi. Mea pinepine rā, e ’ite mai ’oe ē tē paraparau nei te Metua i te ao ra i tō ’oe ferurira’a ’e i tō ’oe ’ā’au, ’ia rave ana’e ’oe i te ’ohipa—’ia ora i tō ’oe orara’a ’e ’ia ’ohipa ma te fa’aro’o.
’Ia vai tū’ati noa
E nehenehe ’oe e tāpe’a matara noa te tū’atira’a ’e te Metua i te ao ra ma te pure-pinepine-ra’a ’e ma te ’ā’au tae mau. ’Imi māite i tāna parau i roto i te mau pāpa’ira’a mo’a. Fa’aro’o ’e e pe’e i tāna mau tāvini mā’itihia—te mau peropheta ’e te mau ’āpōsetolo. ’E ’a ha’apa’o mai tā ’oe e nehenehe i tāna mau fa’auera’a.
E hōpoi mai tē vai-tū’ati-noa-ra’a i te Metua i te ao ra i te ’oa’oa ’e te aura’a i tō tātou orara’a. E tauturu te reira ia tātou ’ia māramarama maita’i a’e i tāna fa’anahora’a ’e ’ia putapū i tōna here. E ’ite mai tātou ’ia paraparau ana’e ’oia ’a tūtava ai tātou i te vai itoito noa i te pae vārua.
’A fa’atupua na
I roto i te mau pāpa’ira’a mo’a, tē fa’aha’amana’o mai nei te Fatu, « ’a fa’atupua na, ’ia ’ite mai ē, ’o vau te Atua » (Salamo 46:10 ; hi’o ato’a Te Ha’api’ira’a Tumu ’e te mau Fafaura’a 101:16). ’Ua ’ī te ao nei i te māniania ’e te mau fa’anevanevara’a, e ’ere rā te Metua i te ao ra i te pūai te reo ’aore rā i te māniania. E parau ’oia ma te « reo iti ha’iha’i » (1 Te mau Ari’i 19:12). E nehenehe tātou e ’ite mai i tāna fa’aurura’a ’ia fa’aea hau noa tātou.
’Ei hi’ora’a, ’a ’ite mai i te hō’ē vāhi hau nō te pure, ’a rave i te taime ’ia hā’atihia ’oe i te nehenehe o te mau poietera’a a te Atua i roto te nātura, ’aore rā, ’a ’oa’oa i te pehe marū ’e te anoihi. E tauturu teie mau mea ’ia vai matara noa tō tātou ferurira’a ’e tō tātou ’ā’au i te mau ’itera’a ta’a ’ē ’e te Metua i te ao ra.
Pe’e i te mau muhumuhura’a
E parau pinepine mai te Metua i te ao ra ia tātou ma te muhumuhu. Nāhea ïa tātou e ’ite pāpū ai nō ’ō mai te muhumuhura’a iāna ra ? ’Ua hōro’a mai te peropheta Moromona i te hō’ē arata’ira’a maita’i : « Te mau mea ato’a ’o tē tītau mai ’e ’o tē fa’aitoito mai ’ia rave i te maita’i, ’e ’ia here i te Atua, ’e ’ia tāvini iāna, e mea fa’auruhia ïa e te Atua » (Moroni 7:13). ’Ua parau te peresideni Gordon B. Hinckley (1910–2008) i te hō’ē taime : « E tāmatara’a teie, ’ia parauhia ’e ’ia rave-ana’e-hia te mau mea ato’a. E tītau ānei te reira i te hō’ē ta’ata ’ia rave i te maita’i, ’ia ti’a mai, ’ia ti’a ’āfaro, ’ia rave i te mea ti’a, ’ia hāmani maita’i, ’ia hōro’a hua atu ? Nō ’ō mai ïa te reira i te Vārua o te Atua ».
Pinepine, te hō’ē muhumuhura’a i te riro « e haere ’e e rave » (hi’o 1 Nephi 3:7) ’aore rā ’ia parau i te hō’ē mea. ’A rave ai tātou i teie mau muhumuhura’a—i te taime mātāmua iho ā ra e putapū tātou i te reira—e rahi atu ā te mau ’itera’a e tae mai. Nō reira, mai te peu tē putapū ra ’oe, e ti’a ia ’oe ’ia parau ’aore rā ’ia rave i te hō’ē ’ohipa maita’i ’e te pāpū maita’i, ’a rave i te reira ! E tae mai te ha’apāpūra’a ē, tei ni’a ’oe i te ’ē’a ti’a ’ia rave ana’e ’oe i te hō’ē ’ohipa.
Haere i mua ma te fa’aro’o ’e te ti’aturi
’Ite ’ia paraparau ana’e te Atua e hō’ē fa’anahora’a te reira. E tītau te reira i te fa’aro’o ’e i te ti’aturi ē, e paraparau mai te Metua i te ao ra ia ’oe ’e e tauturu ia ’oe ’ia rave hau atu i tā ’oe iho e nehenehe e rave. E mea faufa’a ato’a ’ia ha’amana’o ē, tē ti’aturi nei te Metua i te ao ra ia ’oe ’eiaha noa nō te ’imi i tāna arata’ira’a i roto i tō ’oe iho orara’a, nō te ha’amaita’i ato’a rā ’e nō te fa’ateitei i te feiā ’ati a’e ia ’oe.
E’ita ’oe e fa’ari’i noa i te mau pāhonora’a ato’a. ’Aita ’oe e fa’ahepohia. E fa’aitoitohia ra ’oe ’ia ’ohipa ma te fa’aro’o. ’A nā reira ai ’oe e ’ite mai ’oe ē, e nehenehe te Atua e paraparau mai nā roto i te mau rāve’a hau atu te rahi i tā ’oe e ’ore e mana’o. I te roara’a o te tau, e māramarama mai tōna reo, e pāpū a’e tāna arata’ira’a ’e e ’ite maita’i ’oe tōna aro nō te tauturu ia ’oe ’ia riro i te mea tāna i ’ite e nehenehe ’oe e riro mai.