Te Kawai Nakon te Aki Manga Bwaka
E beebete riki nakon are ko iangoia.
Kamataata n te tamnei iroun Eric Chow
“I tatangiria ni bwaka!”
Ko na bae n aki ongongo mai irouia aomata tabeman. Bon tiaki te bwai ae boou iroura te bwaka. E kona ni kamaraki, n urua ara babaire, ao n uotira nakon te kamaemaeaki.
Tera ngke arona bwa iai te kawai nakon te aki manga bwaka?
“Tei moa,” ao n iangoia. “Akea ae kororaoi. Ti bane n rinanon te bwaka. E na kanga aron temanna bwa e na aki manga bwaka?”
E kunea te kawai nakon te aki bwaka Thomas Edison ngke karaoa wikin te taura. “I aki bwaka 1,000 te tai.” e taku. “Bon 1,000 te mwaneka ibukin karaoan wikin te taura.”
A mwaiti kairua ake e rinanona Edison, e taraia bwa te kairua ma e karaoiroa ana taratara i aona. Ao anne te kawai! Karaoiroa am taratara! Ngkana ko karaoiroa am taratara, ao a na bon oneaki am “kairua” nakon te bwai ae boou ao n tamaroa.
Aikai aua kawai ibukin karaoiroan am taratara ni kaineti ma am kairua:
-
Atai bwaai aika ko kona n taobarai ma ake ko aki kona n taobarai. Tabetai te raoraoma bon ngaia te bwai ae ti aki kona n taobaraia. Te katoto, karekean te mwakuri. Ko kona ni karina am booma ibukin te kan mwakuri, ma ko aki kan butimwaea mwiin te babaire. Tai kabanea am tai n iangoa te “kairua,” ma kabanea am kona n te bwai are ko uaiakinna ao n onimakina te Uea. E berita bwa “Bwai a bane n ibuobuoki ni karika te raoiroi i bukia akana tangira te Atua.” (I-Rom 8:28). Ngkana e aki reke iroum te mwakuri anne? Bon tiaki am kairua! E ngae ngke ko aki kukurei ni mwiin te babaire, ma ko tokanikai, bwa ko a tia ni kabanea am kona!
-
Waaki nako ma bwaai ake ko taku bwa a raoiroi. Ngkana ko taku bwa ko kairua, kataia ni kananoa am taratara ni bwaai ake ko rinanoi. E aki reke n nem n te tiim n takakaro? Ko aki kukurei n am bwi n te reirei? Ngkana ko atai kabwakam ao ko na bon atai bwaai aika ko riai ni karaoia n taai aika na roko. Ngkana ko namakina te aki kukurei ni baike ko rinanona, kina raoi te namakin anne ao waaki nako ma ake a raoiroi. Ti kona n buokaki ni karekea te bitaki man ara kairua.
-
Uringnga bwa tiaki aio tokin kawaira. Iai te kibuntaeka ae rang kabuta taekana: “N tokin te tai ao ana nakoraoi bwaai ni kabane. Ti karaoi kairua, ma aio tiaki tokin kawaira.” E kuri n titebo ma ana reirei Moronaai. E taku, “E a roko te toki? Nooria, I taku nakoimi, E tuai; ao te Atua e tuai n toki arona are Atuan te kakai.” (Moomon 9:15). Ngkai ti onimakina te Atua, n waaki nako ma te onimaki, ao n uringnga bwa ngkana ti karaoa te kairua ao tiaki ae e a toki naba ikanne kawaira, are a na kaoti kakai ao “kairua” ake ti kaitarai ana bon oneaki nakon te tokanikai.
-
Tei ma Kristo. Aki kona n teimaan ara kairua, ibukina bwa e a tia ana Mwakuri ni Kamaiu Iesu Kristo. Iai inaomatara n rineia bwa ti na raira nanora, n anga ngaira nakon te Atua, ao ni bubuti Ana buoka. E reirei, Beretitenti Jeffery R. Holland, Bonomwi n Beretitenti n te Kooram n te Tengaun ma Uoman: “E ngae ngkana e mwaiti te kairua ae ko namakinna bwa koa tia n karaoia … , I kakoauaa bwa ko tuai riaon tian te tangira mai karawa. E kanganga bwa ko na iinako iaan otan ana mwakuri ni Kamaiu Kristo ae akea tokina.” Ngaia, are, ko na bon aki bwaka, ngkana ko tei ma Kristo!
E na kaotaki nakoim te kawai nakon te aki bwaka, ngkana ko tarai kairuam bwa te mwaneka nakon te tokanikai.
Kataia ni Karaoia! Ao ngkana ko bwaka? Uringnga—bwa ko aki bwaka. Inanon te tai, ao e bon tabe ni rikirake am konabwai.