Ngkana Ko Karawawataki
E katauraoi buoka Reirei ao Berita aika Tabu ngkana ko karekea te bwai ae aki boraoi ma are ko kantaningaia.
Tamnei iroun Luciana Abrão
Ko a tia n karawawataki? I a tia. Ni koauana, I namakina te karawawataki n te wiki ae nako. I aki kewe—I bon rangi ni kainnano.
E tua te Uea nakon Iotebwa Timiti, “Bwaina te taotaonakinano n tenaan karawawata, bwa ko na karekei aika a mwaiti.” I butimwaea karawawatakiu. I aki tangiria bwa n na rinanon te karawawataki.
I kakaitau, n reitan te kibu anne, “ma teimatoa n rinanoia, bwa, noria, I mena iroum, ni karokoa tokin am bong” (taraa Reirei ao Berita aika Tabu 24:8, e kairaki ma kabwarabwarana). RAOIROI. I namakina te aki rau.
Ngkana I iaiangoia, ao I ataia bwa e mwamwakuri i nanou te Uea n rawawatau ni kabane ake I mena i nanona. Aikai tabeua katooto:
Ngke E Aki Reke N neu …
Ngke 15 au ririki, I ira teuana te kaoti tarena ibukin rineaia kain te kaotioti n te reirei. I kataia bwa e na reke irou te nakoa ni kairiiri, ma n tokin te tai, ao e bon aki reke irou.
Te bwai ae rangi ni kaun, bwa e a tia te tia reirei n rineia naake a na ira te kaotioti, ao bon akea n neu ae katukaki. E tuangai bwa n na riki bwa te Tarekita ibukia Ataein te reirei, e bon rangi n nanoangai , ngaia are e karekea n neu—bwa nna riki bwa te tina ao n tekateka n aki kakarongoa i nanon 30 te miniti n tain waakin te kaotioti.
Eng. I bon tang.
… E kakorakorai te Uea
Ngkana I kaoka au ururing, ao I ataia bwa e buokai au Tia Kamaiu inanon au tai ni karawawataki. E anganai te korakora bwa n na kona ni kaota te banna ae raoiroi ao ni karinerine. N tokin te tai, ao I bon kukurei i nanon tai waakin te kaotioti.
“Ti riai ni kukurei ni karaoi bwaai ni kabane aika wene ni mwaakara; ao ngkanne ti aonga ni bon tei naba, ma te koaua ae korakora, n noora ana kamaiu te Atua, ao ibukin baina bwa e na kaotaki” (Reirei ao Berita aika Tabu 123:17, e kairaki ma kabwarabwarana).
N te Takakaro E Aki Reke Are I Tangiria …
Inanon au kabanea n ririki n te reirei n te kauarinan, ao I tangiria ni kan kaina (ke n roko) n te moan tiim n te teneti. I riai n tokanikai i aon temanna te ataeinaine are e mena ana bwi i aou bwa i aonga n roko n te moan tiim. Ngke I a bokakano ma ngaia, ao I konaki.
E ngae ngke I aki kukurei, ma e a reke n neu bwa n na takakaro n te kauoua n tiim. N ana kaitira ni bokakano te kauoua n tiim, ao e roko au bwii i moa. Kam ataia bwa e aera? I konaaki n au kabanea ni bokakano. I a manga tang—naba.
I a manga taonaki naba n te rawawata. Imwiin reken kanuangau ibukin raoiroin au bwii n te reirei ao n te takakaro, a baireia taan anga kanuanga bwa a na aki anganai kanuangau—ibukina bwa, e bon ti kona n reke te kanuanga aio irouia naake a takakaro n te moan tiim.
… Bon ti inanon “Te Tai ae Uarereke”
N te tai anne, I a rangi n tatangira te teneti, ao n tabe ni bua rawawatan nanou. I aki bae n iangoia bwa e teimatoa ni mena irarikiu te Tia Kamaiu, ao ni buokai. A bon aki teiman rawawata akanne, e ngae ko taku bwa e na reitinako.
“E na mena te rau n tamneim; am kangaanga ao kawararatakim a na riki ma tii n te tai ae uarereke; ao ngkanne, ngkana ko teimatoa n rinanona n te aro ae raoiroi, te Atua e na karietako i eta” (Reirei ao Berita aika Tabu 121:7–8, e kairaki ma kabwarabwarana).
Kataia n N Tokanikai i aon te Rawawata …
N tabetai, I kataia n totokoa reken te rawawata. Ngke 13 au ririki ni maiu ao e aki reke n neu bwa n na kaina aia kauntira ataein te reirei, I aki manga kan kataia riki, e ngae ngke te bwai ae I taku bwa e rangi ni kakukurei. I kabwara nanou bwa I rawa ni kan namakina riki te karawawataki.
… Ko na “tai maaku”
I riai n uringa bwa e mena irairikiu te Uea, inanon au tai n rawawata. Tabetai ti na rinanon baika ti aki boraoi n iango ma ngaia, ma E na buokira ni kaitarai rawawatara ao ni katai bwaai aika boou.
“Tanimai nakoiu n ami iango n taai nako; tai nanououa, tai maaku” (Reirei ao Berita aika Tabu 6:36–37, e kairaki ma kabwarabwarana).
Aki Koro Nanon ake I IangoiaNgke I Beku n au Mition …
Imwiin banen au tai man te kauarinan, I baireia bwa n na beku n te mition. Ma iai tabeua kangaanga n au beeba n tutuo are e a kabaea iai mwanangau n au tai are i kantaningaki iai bwa nna mwananga.
I taotaona nanou, ni karokoa I a weteaki bwa nna beku n te Mexico Guadalajara East Mition. I reireinia aomata aika rang tikiraoi, ao n katauraoia tabeman mai ibuakoia imwain aia bwabetito. E ngae ngke e rang bubura au onimaki, n ongeaba, ao ni mwakuri korakora, ma bon akea mai ibuakoia aika tiku ni kakaonimaki n te Ekaretia.
… I Onimakina Nanon te Atua
E rikirake, ni korakora au kanganga ao I aki kona uotau. I aki kona ni katoka au kangaanga n aorakiu. Ao n aki kona n taumatoaia aomata bwa na maiuakina te euangkerio. Ma I onimakina te Uea n ana tai ao n ana kawai.
“Ngaia are, katabuingkami bwa aonga ami iango n ti teuana nakon te Atua; … ao e na bon riki n oin ana tai, ao n oin ana kawai, ao ni kaineti nakon oin ana kantaninga” (Reirei ao Berita aika Tabu 88:68, kairaki ma kabwarabwara).
Ngke I Karawawataki n te Wiiki ae Nako …
I a ikawai ngkai. Ma L teimatoa n namakina te karawawataki. Eng, I nako ni kaea aia bwabwaro taan koro karaki n te wiiki ae nako. I ataia bwa a rang tamaroa tabeua au karaki, ma I rawawata n ongo aia kaeka tabeman taan koro karaki are a tuangai.
… E Mena Irarikiu
Ngkai, I kataia ni kakorakora onimakinan te Uea irou. Irian te maiu bon taian Karawawata. E aki nanonaki bwa a kairua baike ko karaoi.
Taraa, te kibu are tibwaaki n te moan. Eng, a na “mwaiti” karawawata ma taian kangaanga. Ma I ataia bwa e na raonai te Uea n rinanoi. Ao e na mena iroum.
“Bwaina te taotaonakinano n tenaan karawawata, bwa ko na karekei aika a mwaiti; ma teimatoa n rinanoia, bwa, noria, I mena iroum, ni karokoa tokin am bong” (Reirei ao Berita aika Tabu 24:8, kairaki ma kabwarabwarana).