Waaki ma te Onimaki
E kan taetae nakoim Tamam are i Karawa. Aikai kawai aika ko kona iai ni kateimatoa te reitaki anne.
E kinako ao n tangiriko Tamam are i Karawa. E ongo am tataro, ao E tangiria ni kan taetae nakoim. Kuneakina bwa e kanga n taetae e bon kakaawaki—ao e kakaokoro nakoira ni kabane. Inanon te tai, ao ko na ataia bwa e taetae Tamara are i Karawa n am iango ao i nanom ngkana ko waaki—ma te tamnei ao n kamwakura am onimaki.
Kateimatoa te Reitaki
Ko kona n kateimatoa am reitaki ma Tamam are i Karawa n am tataro ni katoa tai Nakoina. Kamatebwaia Ana taeka inanon koroboki aika tabu. Ongeaba irouia Ana toro aika—Burabeti ao Abotoro. Ao ni kabanea am kona ni kawakin Ana tua.
A na kaoti kakukurei inanon maiura ngkana ti teimatoa n reitaki ma Tamara are i Karawa. E na buokira ni kaotaira n ana Ana Baire ao n namakina Ana tangira. Ti na kina bwanaana ngkana E taetae n ara tai ni kekeiaki ni karikerakea maiun tamneira.
Tei Moa
Inanon koroboki aika tabu, ao e kauring nakoira te uea: “Tei moa, ao kam na atai bwa te Atua Ngai” (Taian Areru 46:10; taraa naba Reirei ao Berita aika Tabu 101:16). E onrake te aonaba n te bwana ae kamangaongao, e aki karongoa ke ni kamaraki taninga bwanaan Tamara are i Karawa. E taetae n te “bana ae marara n rau” (1 Uea 19:12). Ti na kona n kina Ana kakairi ngkana ti tiku n rau.
Te katoto, kakaea am tabo n tataro ae aki karongoa, karekea am tai n nora tamaroan ana karikibwai te Atua, ke n ongora katangtang aika tamaroa ao n tarai korobanna aika tamaroa. A kona n ibuobuoki bwaai aikai ni kateimatoa nanom ma am iango nakon ana mwakuri Tamam are i Karawa.
Ira te Wirikiriki
E taetae nakoira Tamara are i Karawa n te wirikiriki. Ti na kanga n ataia bwa e roko te Wirikiriki mai Irouna? E kaota te kairi ae tamaroa te burabeti ae Moomon: “Bwaai ni kabane aika a kakao ma n anai nano nakon karaoan te raoiroi, ao nakon tangiran te Atua, ma te toro irouna, e bon roko mai iroun te Atua.” (Moronaai 7:13). E taku (1910–2008) Beretitenti Gordon B. Hinckley: “Anne bon te tutuo, ngkana a taekinaki ni kabane ao a kakoroaki nanoia. Tao e kairoroa temanna ni karaoa ae e raoiroi, n rikirake, n tei n rietaata, ni karaoa te bwai ae eti, n akoi, n tituaraoi? Ngkanne bon Tamnein te Atua.”
N na bae, ni wirikirikinaki bwa “N na nako ao N na Karaoi” (taraa 1 Nibwaai 3:7) ke n taekina te bwai teuana. Ngkana ti karaoi nanon wirikiriki aikanne—riki n te moan tai are ti namakinna iai—a na bati bwaai aika ti na karekea. Ngkana, ko namakinna bwa taekina ke ni karaoa te bwai ae tamaroa, karaoia! Ko na kona n ataia bwa e eti te bwai ae ko karaoia ngkana ko mwakuria.
Waaki Nako ma te Onimaki ao te kakoaua
Inanon te tai ao ti na kina bwanan te Atua. E bon kainanoa am onimaki ao am kakoaua bwa e na taetae nakoim Tamara are i Karawa ao ni buokiko ni karaoi bwaai aika a riaon am kona. E kakawaki bwa ko na uringnga bwa e onimakiniko Tamam are i Karawa tiaki ti bukin ukoran te kairi inanon maium ma bon ibukin naba kakabwaiakim ma naake irarikim.
Ko na aki kona ni karekei kaeka n kabane n tainako. Ko aki katauaki bwa kona karekei. Ma ko kaungaki bwa ko na kamwakura am onimaki. Ngkana ko karaoa aei, ko na kunea bwa e taetae te Atua nakoim n aro aika ko aki kantaningai. Inanon taina, ao e na tabe n teretere bwanana, Ana kairi, ao kaotina nakoim bwa e na buokiko n riki bwa te aomata ae tamaroa arona.