Pagpangita kang Jesukristo

Ni Janae Castillo

Mga Magasin sa Simbahan

Samtang magtuon kamo sa Doktrina ug mga Pakigsaad karong tuiga, sulayi ang paghunahuna sa Pagpahiuli sa lahi nga paagi gamit kining tulo ka pangutana.

Karong tuiga magtuon kita sa Doktrina ug mga Pakigsaad. Samtang inyong buhaton, ania ang tulo ka pangutana nga makatabang ninyo sa paghunahuna mahitungod sa Pagpahiuli sa lahi nga paagi.

Ngano nga gikinahanglan man ang Pagpahiuli?
Unsa ang nahatag sa Pagpahiuli kanato?
Unsa ang kahulogan sa Pagpahiuli ngari nako?

Samtang maghunahuna kamo niini nga mga pangutana, ania ang pipila ka butang nga angayang hunahunaon.

Ngano nga ang Pagpahiuli Mahinungdanon?

Hunahunaa kini:

Sa gabii sa pagkatawo ni Jesus, nagtan-aw ka sa imong bintana sa Jerusalem ug nakita ang bag-ong bituon nga midan-ag sa langit.

Sa dihang mibisita Siya sa Jerusalem sa unang higayon, nasayran nimo nga adunay butang nga lahi mahitungod Kaniya—misanag gayod ang Iyang pagkamaayo.

Sa dihang sa wala madugay Iyang gipahibalo ang Iyang balaanong pagkatawo isip ang Manluluwas sa kalibotan, kuryoso ka nga naminaw sa unsay Iyang isulti. Nagsige na ka og adto aron molingkod ug maminaw Kaniya, ug sa matag higayon, imong nasayran nga Siya mao gayod ang Anak sa Dios.

Sa dihang nakadungog ka nga Siya gidakop ug gilansang sa krus, mihilak ka sa kaguol; apan sa dihang nakita nimo Siya nga nabuhi pag-usab, mihilak ka sa kalipay.

Karon hunahunaa kini:

Mibiyahe ka sa liboan ka tuig ngadto sa umaabot. Ang tuig kay 1820, ug ang tanan dili pamilyar: ang mga tawo, ang sininaan, gani ang pagkaon. Miadto ka sa mga tindahan, nangita tabok sa mga lungsod alang sa usa ka tawo nga imong nailhan, apan walay makatabang nimo.

Ug samotan pa, ang kahingpitan sa ebanghelyo ni Jesukristo dili na makaplagan. Ang uban nangangkon nga nakaplagan nila kini, apan wala gayod sila mahinumdom ni Jesus—o sa Langitnong Amahan—sa tukmang paagi. Ang uban naghunahuna nga ang Dios usa ka Espiritu, ug ang uban naghunahuna nga Siya anaa lamang aron mosilot sa mga tawo sa pagpakasala. Ang uban wala na gayod motuo Kaniya.

Usa lamang ang misantop sa imong hunahuna: “Asa man si Jesus, ug unsaon man aron makaplagan ko Siya?”

Nagkinahanglan ka og usa ka pagpahiuli—sama sa tanan—aron makaplagan pag-usab si Jesus ug mas makaila pa Kaniya.

Unsa ang Nahatag sa Pagpahiuli Kanato?

Sa pagpamalandong sa ika-200 nga anibersaryo sa Unang Panan-awon, si Presidente Jeffrey R. Holland, Akting nga Presidente sa Korum sa Napulog Duha ka Apostoles, nangutana sa iyang kaugalingon kon unsa ang iyang pangitaon kon siya nabuhi sa wala pa ang Pagpahiuli. Siya miingon, “Kita unta molantaw sa ‘maamumahon nga kinaiya sa Dios,’… usa ka mapinanggaong Amahan sa Langit, kay sa usa ka bangis nga maghuhusga nga mopaluwat og higpit nga hustisya.”

Sa dihang ang Langitnong Amahan nagpakita ni Joseph Smith, ang unang butang nga Iyang gisulti mao “Joseph” (tan-awa sa Joseph Smith Kasaysayan 1:17). Dili ang “nakahimo ka og daghang sala,” o “wala koy panahon nimo.” Daw ingon og ang unang butang nga gihimo sa Langitnong Amahan sa pagpahiuli sa ebanghelyo mao ang pagseguro nga si Joseph nasayod nga ang iyang Amahan sa Langit nakaila kaniya ug nahigugma kaniya.

Ang ikaduhang butang nga Iyang gihimo mao ang pagpailaila ni Jesukristo. “Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17). Kauban sa tanang doktrina, mahangtorong mga kamatuoran, mga baroganan, ug organisasyon nga ipahiuli, duha ka butang nga gusto sa Dios nga unang mahibaloan ni Joseph (ug nato) mao:

Ang Dios personal nga nakaila kaninyo ug nahigugma kaninyo.
Si Jesukristo mao ang Anak sa Dios, ug kinahanglan kita nga maminaw sa unsay Iyang isulti.

Usa sa importante nga katuyoan sa Pagpahiuli mao ang pagtabang nato nga makaila gayod kon kinsa ang Langitnong Amahan ug si Jesukristo.

Unsa ang Kahulogan sa Pagpahiuli ngari Nako?

Hunahunaa sa makausa pa:

Mibalik ka sa 1820. Milabay ang mga adlaw, nga miabot og mga semana, nga miabot og mga bulan—ug misugod ka sa pagbati og kawalay paglaom. Nakita nimo ang Biblia, nga nagpahinumdom nimo sa mga adlaw nga naglingkod ka kauban ni Jesus, naminaw Kaniya. Apan ang pipila ka bahin giusab o gani nawala.

Nakadesisyon ka nga mopuyo sa usa ka gamayng lungsod nga gitawag og Palmyra, New York. Usa ka adlaw sa tingpamulak, nakadungog ka og butang mahitungod sa usa ka batan-ong lalaki nga nangangkon nga nakakita siya sa Dios ug ni Jesukristo. Dili kaayo ka interesado … sa sinugdanan. Nakadungog ka nga nahibaloan sa batan-ong lalaki nga wala sa mga simbahan dinhi sa yuta ang tinuod apan si Jesus andam nga motukod pag-usab sa Iyang Simbahan, uban sa kahingpitan sa Iyang ebanghelyo!

Unsa kaha ang imong bation, sa pagkasayod nga si Jesus mipakita pag-usab? Unsa kaha ang kahulogan niana nganha kanimo?

Pinaagi sa pagpahiuli sa Simbahan sa Manluluwas, Ang Simbahan ni Jesukristo sa mga Santos sa Ulahing mga Adlaw, kita adunay akses ngadto sa mas lawom nga kahibalo mahitungod sa Manluluwas. Kita dili kinahanglan nga mahimong mga tigbiyahe sa panahon aron masayod kon kinsa si Jesus. Makasiksik kita sa mga kasulatan aron magbasa sa Iyang pulong, ug makadawat kita sa mga panalangin pinaagi sa Iyang awtoridad, sa gipahiuli nga gahom sa pagkapari.