Dali, Sunod Kanako

Pagsabot sa Mga Istorya sa Unang Panan-awon ni Joseph Smith

Ni Matthew C. Godfrey

Departamento sa Kasaysayan sa Simbahan

Unsa ang kalainan sa upat ka istorya sa Unang Panan-awon ni Joseph Smith? Nganong lain-lain man kini? Ug unsa ang matudlo niini kanato?

Nakasulay na ba ka nga misulti ngadto sa usa ka tawo kabahin sa espirituhanon nga kasinatian? Unsa nga mga detalye ang imong giapil? Unsa nga mga detalye ang wala nimo giapil? Sa imong hunahuna managlahi kaha ang imong isugilon nga istorya kon isulti nimo kini sa usa ka higala, sa miting sa sakramento, o sa usa ka tawo nga dili miyembro sa Ang Simbahan ni Jesukristo sa mga Santos sa Ulahing mga Adlaw?

Kini nga mga pangutana importante kon maghunahuna kon giunsa pagpasabot ni Joseph Smith ang iyang panan-awon sa Langitnong Amahan ug ni Jesukristo diha sa New York niadtong 1820. Si Joseph mipakigbahin niini nga kasinatian sa daghang higayon. Karon aduna kitay upat ka istorya nga personal gikan ni Joseph:

Usa ka personal nga kasaysayan nga gisulat ni Joseph sa panahon sa ting-init sa 1832. Si Joseph mipasabot nga miadto siya sa kakahoyan aron mag-ampo tungod kay naglibog siya bahin sa espirituhanon nga mga butang. Gusto usab niya nga mapasaylo sa iyang mga sala.
Journal ni Joseph sa 1835. Usa ka magwawali nga ginganlan og Robert Matthews miabot sa Kirtland, Ohio. Gusto siya nga makig-istorya ni Joseph bahin sa relihiyoso nga mga butang, busa si Joseph misulti niya bahin sa iyang panan-awon. Si Warren Parrish, kinsa nagrekord sa journal ni Joseph, misulat sa unsay gisulti ni Joseph.
Usa ka opisyal nga kasaysayan sa Simbahan nga gisugdan ni Joseph sa 1838. Siya naghisgot bahin sa Unang Panan-awon isip kabahin kon sa unsang paagi gipahiuli ang Simbahan. Kini nga istorya gimantala diha sa Perlas nga Labing Bililhon.
Usa ka sulat nga gisulat ni Joseph niadtong 1842. Usa ka peryodista nga ginganlan og John Wentworth mihangyo ni Joseph sa pagpasabot kon sa unsang paagi Ang Simbahan ni Jesukristo sa mga Santos sa Ulahing mga Adlaw namugna. Si Joseph mitubag pinaagi sa usa ka sulat ug gilakipan og impormasyon bahin sa Unang Panan-awon.

Matag istorya gihimo sa lain-lain nga panahon alang sa lain-lain nga tigpaminaw. Si Joseph adunay managlahi nga mga katuyoan sa iyang hunahuna para sa usag usa. Apan kon basahon nato kini og dungan, makakuha kita og mas daghan ug mas tin-aw nga hulagway sa kasinatian ni Joseph diha sa Sagradong Kakahoyan.

Unasay Nakalahi?

Kini nga mga istorya tanan adunay pipila ka managlahi nga mga detalye. Sa istorya sa 1832, si Joseph nagtutok sa iyang tinguha nga mapasaylo sa iyang mga sala. Wala siya maghisgot og piho nga gustong makahibalo kon asa nga simbahan ang tinuod. Naghisgot siya kon sa unsang paagi “ang Ginoo” mipakita kaniya—wala niya gilahi og ila ang Langitnong Amahan ug si Jesukristo.

Ang 1835 ug 1838 nga mga istorya naghisgot og daotan nga pwersa nga misulay sa pagpugong ni Joseph sa pag-ampo. Ang istorya ni Joseph sa 1835 nag-ingon nga gibisitahan siya og duha ka binuhat, ingon man usab sa mga anghel. Ang 1838 ug 1842 nga mga istorya naghisgot usab og duha ka binuhat, ang usa niini piho nga giila nga sa Jesukristo. Kining duha ka istorya naghatag og gibug-aton sa pagpangita ni Joseph sa tinuod nga simbahan.

Nganong Aduna May mga Kalahian?

Adunay pipila ka rason sa mga kalainan sa mga istorya.

Ang Kinaiyahan sa Memorya

Usahay magtuo ta nga ang atong mga memorya kanunay nga parehas. Apan dili ingon ana ang pamaagi sa memorya. Lahi atong paghinumdom sa mga butang samtang nagkaedad ta. Ang nahitabo sa una mahimong molahi ang kahulogan tungod sa dugang nga mga kasinatian sa kinabuhi. Ang kinauyokan nga memorya magpabilin, apan ang ubang detalye mahimong mausab. Wala kini nagpasabot nga ang atong memorya dili tinuod o tukma, kondili ang mga parte niini mas gihatagan og gibug-aton sa lainlaing panahon.

Lainlaing mga Katuyoan

Si Joseph adunay nagkalainlaing rason sa pag-istorya sa iyang sugilanon. Sa 1832, naghimo siya og personal nga istorya, mao nga mas gitutokan niya kon unsa ang kahulogan sa Unang Panan-awon ngadto niya sa personal nga paagi. Sa 1838 ug 1842, naghisgot siya bahin sa Unang Pan-awon isip kabahin kon sa unsang paagi namugna ang Simbahan. Mao nga gitagaan niya og gibug-aton ang iyang tinguha nga masayod kon asa nga simbahan ang tinuod.

Lainlain nga mga Tigpaminaw

Si Robert Matthews ug si John Wentworth dili mga miyembro sa Simbahan. Kinahanglan ni Joseph nga mohulagway sa mga butang sa lahing paagi ngadto nila. Ang 1838 nga istorya mas gidirekta niya ngadto sa mga miyembro sa Simbahan. Tingale naghunahuna siya nga ang iyang 1832 nga istorya basahon lamang sa iyang suod nga mga higala ug mga sakop sa pamilya.

Unsay Pagkapareha?

Sa tanang upat ka istorya, ang pangunang mga detalye parehas. Si Jospeh naglibog bahin sa iyang kaugalingong kaluwasan ug sa kaluwasan sa kalibotan. Nabasa niya sa Santiago 1:5–6 nga makadawat siya og mga tubag sa iyang mga pag-ampo. Miadto siya sa kakahoyan ug nag-ampo. Mga langitnong binuhat ang mipakita kaniya. Sila mitawag niya sa iyang ngalan. Miingon Sila nga ang mga simbahan niana nga panahon wala nagtudlo og eksakto nga mga doktrina.

Unsa ang Gitudlo sa mga Istorya Ngari Kanako

Ganahan ko mobasa sa nagkalain-laing mga istorya tungod kay kini makatabang nako nga mas masabtan ang Unang Panan-awon. Mas klaro nakong nakita nganong si Joseph naglibog ug gusto nga mag-ampo. Mas mabati nako og kusog ang Espiritu samtang nagbasa ko mahitungod sa unsay gipasabot sa Unang Panan-awon ngadto ni Joseph sa lain-laing panahon sa iyang kinabuhi. Kon gihiusa, ang mga istorya motabang nako sa pagkahibalo nga si Joseph nagsulti sa tinuod. Nakita niya ang Dios nga Amahan ug si Jesukristo didto sa Sagradong Kakahoyan. Kini nagpalambo sa akong paglaom nga makakuha usab ako og mga tubag sa akong mga pag-ampo.

Istorya	Nganong si Joseph miingon nga siya nag-ampo	Kinsa ang giingon ni Joseph nga nagpakita
1832	Alang sa pagpasaylo sa iyang mga sala	Ang Ginoo
1835	Aron sa pagtino kinsa ang eksakto ug kinsa ang sayop sa mga butang bahin sa relihiyon	Duha ka personahe—ang una, gisundan sa lain—ug mga anghel
1838	Aron mahibaloan hain nga simbahan ang tinuod nga Simbahan ni Kristo	Ang Amahan ug Iyang Anak si Jesukristo
1842	Aron mahibaloan hain nga simbahan ang tinuod nga Simbahan ni Kristo	“Duha ka mahimayaon nga mga personahe”