2025 nga Tema sa Kabatan-onan
Tan-aw ngadto kang Kristo
Doktrina ug mga Pakigsaad 6:36
Ang 2025 nga Tema sa Kabatan-onan makatabang nimo sa pagpili nga mosalig imbes nga magduhaduha ug mopakita og hugot nga pagtuo imbes nga mahadlok.
Ang dise siyete anyos nga si Kailey apil sa cheerleading team hangtod ang usa ka aksidente miresulta sa traumatic nga kadaot sa utok [traumatic brain injury]. Ang iyang pagpakaayo mipugong niya sa pag-eskwela, ug nagsugod siya nga mobati nga nahimulag ug nag-inusara. Nakigbisog siya sa emosyonal nga paagi ug wala kahabilo asa mangita og tabang. Usa ka higala ang misugyot nga maminaw siya sa mga misyonaryo. Gitudloan nila siya bahin sa Pag-ula ni Jesukristo. Ang pagtuon og dugang bahin ni Kristo mihatag kaniya og paglaom, ug gibati niya nga ang Dios Mismo ang nagpaduol kaniya.
Misulti si Kailey sa iyang mama, “Wala gayod nako nabati nga gimahal ko sa Dios. Apan karon nasayod ko nga gimahal ko Niya.”
Iyang Mama, si Michelle, natingala og gamay. Siya ug iyang bana, si Brock, mibiya sa Ang Simbahan ni Jesukristo sa mga Santos sa Ulahing mga Adlaw sa dihang si Kailey pito ka tuig tungod sa nagkalain-laing mga pangutana, mga pagduda, ug mga kabalaka. Sila nagtuo nga ang ilang anak nga babaye mas malipayon kon wala ang tanan nga mga miting ug mga sugo. Wala gayod sila maghunahuna nga ang ilang pagpili mopugong ni Kailey nga makabaton og suod nga koneksyon sa Dios. Samtang nagtan-aw si Michelle ug Brock giunsa pagkausab ni Kailey, ilang naamgohan nga taas nga panahon na ang milabay sukad mibati sila nga duol sa Dios, ug gusto nila nga mobati niini pag-usab.
Nakigkita sila sa ilang bishop, ug wala madugay ang pamilya, lakip ang igsoong lalaki ni Kailey nga si Braeden, mibalik sa simbahan. Ang pagbati nga duol sa Dios ug pagkonekta pag-usab ngadto Kaniya—ilabi na pinaagi sa pag-ampo—mipahiuli sa ilang hugot nga pagtuo. Ang pagbalik sa simbahan wala mosulbad sa tanan nilang mga pangutana o mga kabalaka, apan naamgohan nila nga ang pagkaadunay mas lig-on nga personal nga koneksiyon sa Dios mas importante kaysa ilang kawalay pagtuo.
Tanan kini nagsugod sa usa ka higala—usa ka batan-on sama nimo—nga midapit ni Kailey nga motan-aw ngadto kang Kristo. Ug gihimo niya!
Si Jesukristo nag-ingon, “Paghunahuna ngari kanako sa matag hunahuna; ayaw pagduha-duha, ayaw kahadlok” (Doktrina ug mga Pakigsaad 6:36). Mao kini ang inspirasyon sa 2025 nga Tema sa Kabatan-onan. Tugoti kami nga mopakigbahin kon unsaon nimo sa pagpili nga mosalig imbes magduhaduha ug mopakita og hugot nga pagtuo imbes mahadlok samtang motan-aw ngadto kang Kristo:
Wala paingon sa tuo: Sister Runia, Presidente Freeman, Sister Spannaus
Tamara W. Runia
Kon ako nakigbisog, kini kanunay makatabang nako sa paghunahuna ni Jesukristo nga ang iyang mga bukton nakatuy-od. Samtang motan-aw ko Kaniya, mahinumdoman nako ang mga pulong sa awit, “I will Walk with Jesus [Molakaw ko Uban ni Jesus]”: “He will never leave me, even when I fall [Dili ko n’ya biya’an, kon madagma ko].”
Emily Belle Freeman
Kon magbasa ko niini nga tema sa kasulatan, mahinumdoman nako si Pedro diha sa Dagat sa Galilea. Ang pagtutok sa bagyo midugang sa iyang kahadlok ug pagduha-duha, nga miresulta sa iyang pagka-unlod ngadto sa dagkong mga balod. Apan ang pagtutok ngadto sa Manluluwas nakapahimo Niya nga matuman ang usa ka butang nga wala pa sukad niya mabuhat: milakaw siya sa tubig! Katingalahan gayod. Unsa kaha ang imong mabuhat samtang motan-aw ngadto Kaniya?
Andrea Muñoz Spannaus
Kon magsugod ko nga mobati nga nahadlok, bisan asa ko o unsa ang sitwasyon nga anaa ko, akong tuyoon ang paghunahuna sa akong relasyon uban sa Langitnong Amahan ug ni Jesukristo. Akong balik-balikon sa akong hunahuna sa kadaghan nga higayon: AKO ANAK NGA BABAYE SA DIOS. Padayon ko kini nga buhaton hangtod maarang-arang ang akong pamati. Kanunay kining mosaler!
Wala paingon sa tuo: Brother Wilcox, Presidente Lund, Brother Nelson
Bradley R. Wilcox
Pangutan-a ang imong kaugalingon kinsa ang labing nagpakabana ug nagmahal nimo. Imo bang mga ginikanan ug mga lider sa Simbahan? Ang mga tawo ba sa social media nga nagpakabana lang sa gidaghanon sa ilang mga follower? Tan-aw ngadto sa Langitnong Amahan ug ni Kristo. Sila nagpakabana kanimo!
Steven J. Lund
Hunahunaa unsay imong mahinumdoman kon mag-recite ka sa mga tema sa Korum sa Aaronic nga Pagkapari ug sa Young Women: Ikaw usa ka hinigugmang anak nga lalaki o babaye sa Dios. Pagbaton og hugot nga pagtuo nga ang atong Amahan adunay plano alang kanimo. Ang pagtan-aw ngadto ni Kristo nagpasabot sa pagtan-aw nga ang Iyang Pag-ula anaa sa sentro sa niana nga plano.
Michael T. Nelson
Ang pagbasa sa mga kasulatan susama sa pagtan-aw ngadto ni Kristo! Ang mga pagduda ug mga kabalaka natural nga mawala samtang pahinumdoman kita sa mga milagro ug mga pagtulun-an ni Jesus. Bulahan kita nga aduna kitay akses sa Iyang mga pulong. Magamit nato kini sa matag sitwasyon nga atong masinati sa atong mga kinabuhi.