Mga Pangutana ug Mga Tubag
“Unsaon nako pagbaton og mas lig-on nga pagpamatuod bahin ni Joseph Smith ug sa Pagpahiuli?”
“Usa ka butang nga akong nabuhat aron sa paglig-on sa akong pagpamatuod sa Pagpahiuli mao ang pagbasa sa asoy sa unang panan-awon kada gabii sa dili pa matulog. Sa dihang mobasa ko bahin ni Joseph nga giluwas ug nagtindog diha sa presensiya sa Dios, mabati nako nga mas duol ko sa kahayag sa Dios, ug kana motabang nako nga mahibalo nga Siya anaa.”
Eve T., 16, Chorley, UK
“Sa dihang nakaamgo ko nga wala ko’y pagpamatuod bahin ni Joseph Smith, nagsugod ko og basa sa Mga Santos. Akong naamgohan unsa ka gamhanan ug milagroso ang kasinatian ni Joseph. Akong nabati usab ang Espiritu nga nag-uban nako sa dihang nag-ampo ko bahin sa Basahon ni Mormon. Nagsugod ko og tabang sa mga misyonaryo, ug karon dili nako maka-undang sa pagpamatuod sa mga tawo bahin ni Joseph Smith ug sa Pagpahiuli.”
Abish N., 18, Negros Oriental, Philippines
“Ang propeta misulti kanato nga magtuon sa kinabuhi ni Kristo aron matabangan ta nga makabaton ug pagpamatuod bahin Niya ug sa Iyang Pag-ula. Susama ra kini kang Joseph Smith. Samtang nagtuon ko sa iyang kinabuhi, makabaton ko og mas lig-on nga pagpamatuod sa Pagpahiuli ug kang Joseph isip ang unang propeta sa atong dispensasyon. Mas masabtan usab nako nganong ang Simbahan ni Jesukristo kinahanglan nga ipahiuli.”
Asher W., 17, Louisiana, USA
“Buhata unsay gihimo ni Joseph ug pangutana sa Dios! Pagmapailobon; ang tubag moabot ra.”
Anna W., 17, Colorado, USA
“Ang pag-ampo mao ang pinakalabing yano nga paagi aron makabaton og pagpamatuod bahin ni Joseph Smith ug sa Pagpahiuli. Ang Ginoo mitubag niini nga pag-ampo alang nako ug sa uban pa—buhaton usab niya kini alang kanimo. Usab, pagtuon sa gamhanang mga pagpamatuod sa mga saksi diha sa Basahon ni Mormon.”
Andrew N., 18, Washington, USA