“ʻOku faʻa lahi ʻa e kē ʻeku ongomātuʻá. Ko e hā te u lava ʻo fai ke tauhi ai ʻa e Laumālié ʻi homau ʻapí?,” Ki Hono Fakamālohia ʻo e Toʻu Tupú, ʻEpeleli 2024.
Ngaahi Fehuʻí mo e Talí
“ʻOku faʻa lahi ʻa e kē ʻeku ongomātuʻá. Ko e hā te u lava ʻo fai ke tauhi ai ʻa e Laumālié ʻi homau ʻapí?”
“Feinga ke fai ha lotu ke ʻomi ʻa e ʻofá mo e melinó ki homou ʻapí. ʻOku faingamālie maʻu pē ʻa e Tamai Hēvaní ke ʻomi ʻa e Laumālié, pea ʻokú Ne akoʻi mai ʻa e founga ke tau ʻofa lahi ange aí. ʻE lava ke fakamolū ʻa e loto hoʻo ongo mātuʻá ʻi hoʻo fakahaaʻi ʻokú ke ʻofa moʻoni ʻiate kinauá.”
Ethan D., 17, Tekisisi, ʻIunaiteti Siteiti ʻo ʻAmeliká
“ʻI heʻetau feinga ke fai ʻa e ngaahi meʻa ʻokú ne fakaafeʻi mai ʻa e Laumālié ki heʻetau fakakaukaú mo e tōʻongá, ʻoku tau hoko ai ko ha faʻifaʻitakiʻanga ki he niʻihi kehé. ʻE lava ʻe he fili pē ʻa ha toko taha ke fai leleí ʻo fai ha liliu.”
Kelsey L., 17, Mīsuli, ʻIunaiteti Siteiti ʻo ʻAmeliká
“ʻOku ou ongoʻi ʻa e Laumālie Māʻoniʻoní ʻi he taimi ʻoku ou lotu aí pe fanongo ki he mūsika ʻa e Siasí maʻá e toʻu tupú. ʻOku ou toe ongoʻi foki ia ʻi he taimi ʻoku ou mamata ai ki he ngaahi tāpuaki fakataautaha ʻa e Tamai Hēvaní maʻakú. ʻI he taimi ʻokú ke ongoʻi ai ʻoku faingataʻa ke tauhi ʻa e Laumālié ʻi homou ʻapí, fekumi ki he ngaahi tāpuaki ʻa e ʻOtuá ʻi hoʻo moʻuí.”
Beckett V., 13, Folōlita, ʻIunaiteti Siteiti ʻo ʻAmeliká
“Ko e meʻa naʻá ne tokoniʻi aú ko ʻeku toutou feinga pē ke maʻu ha ngaahi momeniti fakalaumālie ʻiate au pē. Naʻe tokoniʻi au ʻe he lau folofolá, ʻalu ki he ngaahi ʻekitivitī ʻa e Siasí, mo e lotu fakamātoató ke u maʻu ʻa e Laumālié.”
Claudia L., 18, Miniteni, Siamane
“ʻI he taimi naʻe ʻi ʻIsipite ai ʻa Siosefá, naʻe hoko ʻene faʻifaʻitakiʻanga leleí mo ʻene moʻui tāú ke tukuange ai ia mei he fale fakapōpulá ʻo ne tokoniʻi hono fāmilí mo Felo. Kapau ʻokú ke fakaʻamu ke tokoniʻi ha taha ʻoku vāofi mo koe ka ʻoku fakafekiki, fakaʻaliʻali ange kiate ia ʻa e Maama ʻo Kalaisí mo ʻEne ngaahi tefitoʻi moʻoni ʻo e feʻofaʻakí.”
Seth H., 16, ʻIutā, ʻIunaiteti Siteiti ʻo ʻAmeliká