Ngaahi Leʻo ʻo e Toʻu Tupú

Ko ha Faʻahinga Faifakamoʻui ʻoku Kehe

fāmili

Toʻohema ki toʻomataʻú: Keili (tokoua), Kamaloni (tamai), Kulisitolo (faʻē), Kala, Kōheni (tuongaʻane)

Naʻe puke ʻeku faʻeé talu mei hoku taʻu faá. ʻI he kamataʻangá, naʻe ʻikai ʻilo ʻe ha taha pe ko e hā hono puké, ka naʻe lotu mo ʻaukai homau fāmilí mo e ngaahi kaungāmeʻá ke mahino ki homau fāmilí ʻa hono puké. Hili ha ngaahi taʻu lahi ʻo e tafá mo e siví, naʻa mau ʻiloʻi ko hono puké ko e pupula ʻo e ʻutó (Chiari malformation), kanisā toto, mo ha ngaahi fokoutua kehekehe naʻe ʻikai ha faitoʻo ki ai.

ʻI heʻeku sio ki he puke lahi ʻeku faʻeé, naʻe kamata ke u ʻita ki he ʻOtuá. Naʻá ku ʻiloʻi naʻá Ne maʻu ʻa e mālohi ke fakamoʻui [ʻeku faʻeé], ko ia naʻe ʻikai mahino kiate au ʻa e ʻuhinga naʻe ʻikai ke Ne fakamoʻui ai iá. Naʻá ku fakakaukau kuo ʻikai ha ola ʻo e ngaahi lotú, feinga paʻangá, mo e ʻaukai kotoa pē.

Ka ʻi heʻeku mamata mo hoku fāmilí ʻi he konifelenisi lahi ʻo ʻOkatopa 2021, naʻá ku fanongo ki ha lea ʻa ʻEletā Peleni H. Nilasoni ʻo e Kau Fitungofulú, naʻá ne pehē, “Ko e mālohi faifakamoʻui ʻa e Fakamoʻuí [ʻoku] ʻikai ko ʻEne malava pē ke fakamoʻui hotau sinó, kae mahalo ko e mahuʻinga angé, ʻa ʻEne malava ke faitoʻo hotau lotó.” ʻI he taimi naʻe fakaafeʻi ai ʻe he Fakamoʻui kuo toetuʻú ʻa e kakai ʻi he Tohi ʻa Molomoná ke fakamoʻui kinautolú, naʻe ʻikai ke Ne ʻuhinga “ki ha fakamoʻui fakaesino ka ko ha fakamoʻui fakalaumālie ʻo honau ngaahi laumālié” (Liahona, Nōvema 2021, 57).

Naʻe tokoni ʻa e ngaahi lea ko ʻení ke u ʻiloʻi naʻe ʻikai ke liʻekina au ʻe he ʻOtuá. Naʻe ʻikai pē ke u sio au ki he founga naʻá Ne fakamoʻui ai ʻeku faʻeé ʻi ha founga naʻe mahuʻinga ange ʻi hono fakamoʻui fakatuʻasino iá.

Kuo teʻeki pē ke maʻu ha faitoʻo maʻa ʻeku faʻeé, ka kuo tokoniʻi ia ʻe he Tamai Hēvaní ʻi he ngaahi taimi faingataʻa tahá. ʻOkú Ne tokoniʻi ia ʻi he taimi ʻokú ne ongoʻi mātuʻaki faingataʻaʻia ai ʻi heʻene moʻuí. Ko e taimi ʻoku ou fakakaukau ai ki he aʻusia ko ʻení ʻi he taimi ní, ʻoku ou ʻiloʻi ʻoku ʻafioʻi moʻoni ʻe he Tamai Hēvaní mo Sīsū Kalaisi ʻa e meʻa ʻoku ou ongoʻi mo fouá.

Cara C.,13, Louti ʻAilani, ʻIunaiteti Siteiti ʻo ʻAmeliká

Saiʻia ke feohi mo e ngaahi kaungāmeʻá mo fakaafeʻi kinautolu ke nau vaʻinga.