« ទទួលបានកម្លាំងរបស់ទ្រង់—ឥឡូវនេះ និងជានិច្ច » ដើម្បីកម្លាំងនៃយុវជន ខែ មីនា ឆ្នាំ ២០២៤ ។
ផ្ដល់កម្លាំងគ្រប់ពេល
ទទួលបានកម្លាំងរបស់ទ្រង់—ឥឡូវនេះ និងជានិច្ច
អ្នកមានភាពស័ក្ដិសមដើម្បីទទួលកម្លាំង និងជំនួយរបស់ព្រះយេស៊ូវគ្រីស្ទ ។
រចនារូបភាពដោយ អាឡិច ណាបោម
សូមស្រមៃថាដើរកាត់ព្រៃ ហើយដើរមកជួបក្មេងប្រុសម្នាក់ ដែលបានដួល ហើយជាប់ក្នុងមែកឈើងាប់ៗ ។ មែកឈើមួយមានទម្ងន់ធ្ងន់ខ្លាំង ដែលគាត់លើកចេញដោយខ្លួនឯងមិនរួច ។
តើអ្នកជួយទេ ? ឬតើអ្នកអង្គុយចុះសិន ហើយគិតថា តើគាត់សមនឹងទទួលបានជំនួយរបស់អ្នកដែរឬទេ ?
ប្រាកដណាស់ អ្នកជួយ ! គំនិតដែលបញ្ឈប់អ្នកមិនឲ្យជួយ រហូតដល់ក្មេងប្រុសនោះធ្វើអ្វីមួយត្រឹមត្រូវ វាអាចស្តាប់ទៅមិនសមហេតុផលសម្រាប់អ្នក ។ ហើយយើងក៏គិតបែបនេះចំពោះខ្លួនយើង—លើកលែងតែក្នុងករណីនេះ យើងជា ក្មេងដែលត្រូវការជំនួយ ។
អ្នកមានតម្លៃឲ្យសង្គ្រោះ
មិនថាអ្នកមានអាយុប៉ុន្មានទេ អ្នកគឺជាក្មេងម្នាក់បើប្រៀបធៀបនឹងព្រះវរបិតាសួគ៌ និងព្រះយេស៊ូវគ្រីស្ទ ។ ( តាមពិតទៅ អ្នកគឺជាបុត្រ របស់ ព្រះវរបិតាសួគ៌ពិតប្រាកដ ) ។ ហើយកម្លាំងរបស់អ្នក—រាងកាយ អារម្មណ៍ ខាងវិញ្ញាណ ឬផ្លូវចិត្ត—គឺគ្មានអ្វីប្រៀបធៀបទៅនឹងរបស់ទ្រង់ទាំងទ្វេបានទេ ។ ពួកយើងភាគច្រើនយល់ពីគោលគំនិតនោះគ្រប់គ្រាន់ហើយ ។ ប៉ុន្តែនៅពេលយើងជំពប់ដួលដោយហេតុផលណាមួយនោះ ជារឿយៗយើងមានអារម្មណ៍ថា យើងមិនអាចទាក់ទងសុំជំនួយបានរហូតដល់យើងធ្វើអ្វីមួយសិន ។ នោះច្បាស់ជាមិនមែនជាការពិតទេ ។
ប្រធាន ឌៀថើរ អេហ្វ អុជដូហ្វ ដែលពេលនោះជា–ទីប្រឹក្សាទីពីរនៅក្នុងគណៈប្រធានទីមួយ នៅគ្រាមួយបានមានប្រសាសន៍អំពីរៀបប្រៀបប្រដូចនៃចៀមដែលវង្វេងនៅក្នុង លូកា ១៥ ។
លោកបានសួរថា « តើចៀមនោះត្រូវដឹងពីរបៀបប្រើឧបករណ៍គណនាកូអរដោនេនៃរយៈទទឹងដ៏ស្មុគស្មាញដែរទេ ? » « តើវាត្រូវចេះប្រើ ជី ភី អេស ដើម្បីកំណត់ទីតាំងដែរទេ ? តើវាត្រូវការមានអ្នកជំនាញដើម្បីបង្កើតកម្មវីធី ដែលអាចស្នើសុំជំនួយ មែនដែរឬទេ ? តើចៀមត្រូវការសកម្មភាពគាំទ្រពីអ្នកធានាពីមុនពេលអ្នកគង្វាលល្អ នឹងមកជួយសង្គ្រោះពួកគេមែនដែរឬទេ ?
« អត់ទេ ។ ពុំមែនទេ ! ចៀមនោះមានភាពស័ក្ដិសមនៃការសង្គ្រោះពីព្រះ ដោយសារអ្នកគង្វាលល្អស្រឡាញ់វា ។
« ចំពោះខ្ញុំ រឿងប្រៀបប្រដូចនៃចៀមវង្វេងគឺជាសារលិខិតមួយដ៏សំខាន់បំផុតនៅក្នុងបទគម្ពីរ » ។១
យើងម្នាក់ៗអាចវង្វេងដោយសារហេតុផលផ្សេងៗគ្នា ។ ហើយសម្រាប់យើងម្នាក់ៗ ជំនួយដ៏ទេវភាពប្រហែលជាកំពុងស្វែងរកយើងទៅហើយ ។
ជំនួយតែងតែមានជានិច្ច
ជំនួយគឺមានសម្រាប់យើង មិនត្រឹមតែនៅពេលដែលយើងមានអំពើបាបប៉ុណ្ណោះទេ ប៉ុន្តែក៏នៅពេលដែលយើងរស់នៅល្អបំផុត ដែលយើងអាចធ្វើបានផងដែរ ។ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀន ៖
« ខ្ញុំងឿងឆ្ងល់ថា តើយើងពុំបានដឹងពេញលេញនូវការចម្រើនកម្លាំងរបស់ដង្វាយធួននេះ នៅក្នុងជីវិតយើង ហើយជឿដោយខុសឆ្គងថា យើងត្រូវតែរែកបន្ទុកតែម្នាក់ឯង—ដោយការតាំងចិត្ត ការដោះស្រាយ និងការដាក់វិន័យ និងដោយសមត្ថភាពដែលមានកំណត់របស់យើងនោះឬ ។
« មានរឿងមួយត្រូវដឹងថា ព្រះយេស៊ូវគ្រីស្ទ បានយាងមកលើផែនដី ដើម្បី សុគត សម្រាប់យើង ។ ប៉ុន្តែយើងក៏គួរតែមានអំណរគុណចំពោះ ព្រះរាជបំណងព្រះអម្ចាស់ តាមរយៈដង្វាយធួន និងដោយអំណាចនៃព្រះវិញ្ញាណបរិសុទ្ធ ដើម្បី ផ្ដល់ជីវិតឲ្យយើង—មិនត្រឹមតែដឹកនាំយើងប៉ុណ្ណោះទេ ប៉ុន្តែក៏ដើម្បីពង្រឹង និងប្រោសយើងផងដែរ » ។២
អ្នកមានតម្លៃដើម្បីទទួលជំនួយរបស់ទ្រង់ ! មិនថាផ្លូវដែលអ្នកដើរនាពេលថ្មីៗជាអ្វីនោះទេ ព្រះយេស៊ូវគ្រីស្ទ គង់នៅចាំយាងនៅជំហានថ្មីជាមួយអ្នក ។